Read Nalca 2 PETRUS 1 Bible Online

2 PETRUS 1 - Nalca bible

2 PETRUS 1

¹Yesus Kristus ara nunjaʾ Imik Neyung uboka, blebsinaʾ dubnya ulumlakanya, alda perob nenenaʾ edya dib blebsuk. Dara, nuk dib blebsinaʾ elegosuk sok, ugun hnon ban dib senenaʾ dolum nim ek momnya donaʾ en beibsin. Ban momnya donaʾ enera, Yesus Kristus adya wa arawoka yuba lenaʾ gaknya Simon Petrus bedya ugunsamba beibsin.

²Ugunda nunjaʾ Wenelesilnya Yesus ak hnon, Imik Neyung ak hnon, ella ululumaʾ adya, ugunuk nimi pe unaʾ ab, aljaʾ perob eleknaʾ ab dara, ugunuk nauba danggiga balasulul.

³Imik Neyung adya aljaʾ senenggom migib edya ongowoka, yokaʾ-yokaʾ nidyaʾ ara, yuba doboka pe ulunokaʾ aboka nuk seleb elegosuk. Imik Neyung adya ban unuwosuknya nera, aljaʾ senenggom migib eb perob unaʾ ab danyek, boboka ulunokaʾ aboka, youbusuknya bek ella dangamoubaʾ adya ubsuk.

⁴Ban unu elegousuknya nenedya, Imik Neyung ara senenggom perob eleknaʾ hnon, hyak nauba perob eleknaʾ era, alja orowek eleganesin amoknya nenesa, nuk sunuwoka elegosuk. Ban unu elegosuk eleknaʾ enedya, wera ugunda malya ubsinya senen ganya edya malya nenelesil ununaʾ era loboka, Imik Neyung adya ununaʾ enyek neikaʾ unulululumaʾ aboka, wera seleb elegosuk.

⁵Anasa ban unuwosuknya nenesa leboka, ugunda Kristus ak hyak gobdo ganya ologoka dib senewoka, ugunja dib senelelumaʾ ak ara, onoʾ hnon perob unaʾ unuwoka ulumnulum. Ugunda pe ulumunuk ab dara, onoʾ hnon geremsenga dangoka ulululum.

⁶Dara, ugunda geremseng nang uboka, hnonda ugun nong anyek pe diri uldalalulum. Dara onoʾ pe diri uldalamunuk ab dara, yokaʾ-yokaʾ lanawanamlya sum enesa leboka, ugun nong ara ganya migibaʾ gebdangoka pe ubmoruwanob senen ulululum. Onoʾ ganya migibaʾ gebdangoka pe ulmorulumunuk ab dara, Imik Neyung adya anaso ubseng senelamlaʾ sunuwoka ulululum.

⁷Dara, Imik Neyung senelamla sok sunuwoka ulumunuk ab dara, ugun neik yuba dololum nim ek perobaʾ lebdangoka yadyek ganya bobdangoka pe unuldalalulum. Ugun nim ek yadyek uboka pe unuldalamunuk ab dara, onoʾ nimi yok nim ek wanaʾ unaʾ dibaʾ pe unulusululum.

⁸Ban nidyaʾ lebna ganya era, ugunja unuwanasomaʾ ara an. Anasa ban lebna unaʾ ganya en diligaʾ doboka nauba danggiga balasilya dara, nunjaʾ Wenelesilnya Yesus Kristus ak anaba hyak pe ganya olowoka ella danalumaʾ ak dara, ugunda yeiriwoka wa weboka pewanalum.

⁹Bok nimi nidyaʾ ganya enyek boboka, unaʾ orok nim era, sikda heng ulusilaʾ adya, pe eilinaʾ loboka, nadya youmaʾ unulamsa malya unaʾ era seleb doboka boboganyokaʾ ara hibigoka salyaʾ ganya ulumak.

¹⁰Anasa wera, nadya hemyab o, Imik Neyung adya ugunuk weboka youbusukaʾ ara, duboka pe ulumunaʾ adya, dib ulusil aboka amalelulum. Ugunda ban unaʾ enyek pe unulumun dara, yuba dololumaʾ ara, eimik era goowoka denghenggunumla.

¹¹Ban unu ulumunaʾ adya, eimik nunjaʾ Wenelesilnya uboka, nimi blebsinaʾ dubnya Yesus Kristus ululanya bera nuk aljaʾ perob heikek weknemabaʾ amba, or anaʾ gak eleganesil.

¹²Ban nenyek unuwanaseng senewoka, ugunda seleb ella dangoka onoʾ Imik Neyung yub ak ella dangalumnya, nera seleb doboka pe salalalum bok, sounuwoka hnon beklulumaʾ aboka sobaʾ neklemnesin.

¹³Nunjaʾ neyung Wenelesilnya Yesus Kristus adya nara sokok anara loboka, imik heikek sam bininanya nera ulumna seleb nekenelaʾ anasa, nara anam embengaʾ ulumna salek era, nadya wa nenyaʾ aboka ugunuk pe bekellilimnesin dara, perob senelamna.

¹⁵Wera nera seleb somoganyaʾ anaba, nimi perobaʾ dangalamla yuba nekesinyaʾ ara, ugunda or beklelulumaʾ aboka duboka unulamna.

¹⁶Nunjaʾ Wenelesilnya Yesus Kristus migibaʾ eimik yanamla aboka neklesubaʾ anyek, nim adya geremseng adya, meka lelewoka salamak yub ek neknenggusuba. Kristus anyek Imik Neyung adya imik nenewokaʾ ara, nu nong adya ok ab okoka eibuba.

¹⁷Imik Neyung adya Yesus ak giboka imik nenewokaʾ ara, numba ok ulumoub bok ubok. Ban sum imik senenggom heikek ab yuba kebubaʾ ara, ”Nadya wanaʾ ulumna me nera ban. Alja nadya ganya hekel eleklenel!” hyok.

¹⁸Ban wenyan yuba kebubaʾ ara, nunda alab neikaʾ geisa meinik sam ulumouba sum enyek, Yesus ak imik heikek abaʾ lebokaʾ kebuba.

¹⁹Ban nong anyek eiyiwoka, Imik Neyung adyaʾ nidyaʾ ununumnaʾ lelemek nang edya lemekaʾ ara gobdo dib senelemab. Dara, ban yub era, wesaʾ ak gunaʾ ak yeblamlaʾ anaso ulumlaʾ anasa, ugunja ganya lomok ara heng anam dorogol yabanaʾ anaso uboka, onoʾ yali sam ololaʾ anam yebnenggulumla salek enyek, ugunda ban wesaʾ enyek an pe keeboka sunuwoka ulumnelum aboka lebsin.

²⁰Ugunda hyak okoka dib nongaʾ banyek beklemnelumaʾ ara, Youmaʾ ununumnaʾ lelemek nang edya, Imik Neyung yuba momnya dobokaʾ anyek, leb elegeisikaʾ ara, sikja nimi ganya adya ok doboka lebnenggumek.

²¹Nera Imik Neyung yub ara, hnon nim adya ok salyaʾ ganya doboka lebnesinya senewoka lenggulumek. Bok, alda Imik Neyung Geisinya anyek, Imik Neyung yuba leblulaʾ aboka, nimi ganya ak wekemok nang edya lelemek.