Read Nalca 2 PETRUS 2 Bible Online

2 PETRUS 2 - Nalca bible

2 PETRUS 2

¹Youmaʾ dara, nimi yuba dolomekaʾ hnoum ara, sondaʾ amba yuba len nang aldalamek nimi hnon lanalemek. Anaso neikek weneba ugun gangganek ara sondaʾ amba bobnenewoka yuba lesin nim abdangoka hnon lanawanamak. Ban nang enedya dara, ugunuk ara dib gom yuba, nim ek malya gebellilimnesak yub enyek, bo lanawanasak. Dara sikja malya unaʾ emba dekesuknya senenggom Imik Neyung benyek unggulumla aboka bobnenewoka lebnesak. Unu Imik Neyung ak yaab lobnemakaʾ adya, senenggom somoknaʾ damok ara sik dam nang ek bo lanawanasil.

²Nimi nauba ara, ban malya nim enedya sikja unulumaknya nenyek diliwoka unulumnemak. Sik nong anyek unuro malya unaʾ ganya enyek diliwoka unulumnemak. Dara, ban nim enedya, nimi nauba ara jongaʾ perob pik Imik Neyung pik ab malya geboka unulumnemak.

³Sikenek sondaʾ yub ok miniwoka neklesak nang ek adya, ugunja sikenek perobaʾ elegosunuk senewoka, dib gomnya nenyek miniwoka ugunuk neklemnesak. Bok ban unulumakaʾ amba leboka, Imik Neyung adya igina yakaʾ ara seleb orowek beibuk, hnonda nenesemba leboka Imik Neyung adya sikenek obnesin aboka gegewoknya nera or anam diri ulusil.

⁴Malya lero nang dara, hyak gunaʾ serewora alamla gwerenek sam beiyisukaʾ ara yana lelewanasil sum doboka yana lelewanasil. Sikda malya ulumak dara, Imik Neyung adya obnamlaʾ ak ab salyaʾ blebnenggubsuk.

⁵Anasonya neikek, youmaʾ danaba Imik Neyung adya dara, unu obnesin ananya nera gigiwoka oro yibisuk. Nimi malya ulumek nim obnunaʾ aboka, Imik Neyung adya senenggom meka gwenewoka obsuk. Nimi nidyaʾ ara dengaboka obsuk bok, jong unaʾ amba lelemoknya Nuh beb, yok nimi sekbadya nim ok, Imik Neyung adya sikenek or blebsuk.

⁶Dara onoʾ nimi malya ulumak nim era, Imik Neyung adya dara, hekaʾ huboka yu ganya boboka olosilaʾ ara, ella danokaʾ aboka, Sodom Gomora heik ara uka daboka obsuk.

⁷Nimi nidyaʾ heik ene nimi nidyaʾ ara, malya unaʾ hwam ok ura ulumek bok, alda Lot bek hnonok alak ok Imik Neyung adya pelemoknya senemokaʾ anasa, unu ol yabasuk sum era Lot bek hnonok blebok.

⁸Ban unu malya ulumekaʾ gangganek sam ulumok dara, Lot bera ganya ara hyak nauba soldelenabok, malya ulumekaʾ ara li sobaʾ eillilemokjok, alak ok hnonok dogom aboka pe ulumok.

⁹Anasa ban eini lebmanaʾ adya eillilemab. Imik Neyung ara alak ella uboka, pe ulumak nim era, sikenek yokaʾ-yokaʾ adya geregoka malya nenelesil sum era, har so blebnamnaʾ ara pe ella ulumla. Dara onoʾ Imik Neyung ara, nimi malya ulumak nim era sidyaʾ daknamla sum ek henga geregoka yana lelewanamna senewoka, ban amba bo unaʾ ara alda ella ulumla.

¹⁰Nauba so ara, nimi yana lelewanasilaʾ ara, malya unaʾ adya ok wekdeknewoka unulumak nimi hnon, sembejaʾ ganya adya ok uboka, Imik Neyung adya migib si nek malya nenelemak nim enyek, yana lelewoka obnesil. Nimi malya unaʾ hwam nim era hyak asaʾ ganya boboka, dengdang ganya bolomakaʾ adya imik heikek ulumak nim anaba geklewoka malya ura walamak!

¹¹Senenggom migib enyek, nimi malya ulumak nim era hmeng so bok, hyak migib ulumak lero nang edya Imik Neyung saramek ab dara, anaso nim ek malya ulumak aboka yana kiboka wanggulumak bokaʾ anyek, sikja malya nenewoka walamak.

¹²Sikda pam unuruwaʾ ak beiyiwoka oboka youn danasa liklemak sokaʾ ak ulumak. Sikda hyak perob ganya era mekaʾ seininggulumak, anya sikja unulumakaʾ nidyaʾ ara salyaʾ anyek unulumabaʾ ara elgomjok, damok ara anaso danamlaʾ ara salyaʾ ulumakaʾ adya malya geboka derewoka lelemak. Anadya sikja meneng meknewoka unulumak malya unaʾ edya sik nonga geregoka, nim adya pam olomak sok, Imik Neyung adya dara, sikenek obnesil.

¹³Sikja meneng orowek igina nenebdangoka malya neneldalamakaʾ amba, sik nong ak igina kweboka nauba gweknemak. Sik nim en nong ak dara, sikja nonga ganya gigiwoka malya unaʾ ok laga yubyek hnoum enyek, unulumak dara, pewab senelemak. Anaso malya unaʾ anyek laga yok nimi ngouluklenabok ura yabalamak nim era, ugunub neikaʾ bukoka denaʾ delelum dara, sikja malya unaʾ hogung ok beiyi bulumakaʾ anyek, ugunda eiyiwoka dara duk lobnesom.

¹⁴Nimi malya unaʾ ok goluwoka ulumak nim era, hyak nauba malya ulwenelemak. Sumen enyek anyek unumoubaʾ ara elgom uboka, beiyik salyaʾ salalemak gelewa enyek ganya wekenadyok ulumak. Anya nimi yuba dib ganya oloknaʾ orok nimi gliboka anyagan bo balasak. Sikda bonaʾ dub nang danob senewoka, sikja ganya era malya unaʾ adya ok e soboka ulumak. Sikda seleb malya nenewoka, Imik Neyung adya obsuk nim ek ulumak.

¹⁵Ban unu nauba malya unulumak nim era, wanaʾ unaʾ pik era banaʾ loboka, malya pik biniboka seleb weiningdangamek. Ban nim enera Beor bedya me Bileam bedya balamok pik enyek, doboka balamak. Ban Bileam bera alja malya pik anyeb uboka, nauba rupiah dobnamna senewoka malya ulumok.

¹⁶Bok aljaʾ abakna pam era yuba sanggulumla pam bok, nimi yub adya saboka wenewok. Dara ban ununumnaʾ lelemoknya bera unu wenewok sum nauba meknelemoknya nera hnon lobok.

¹⁷Ban malya uboka, yuba bobnenewoka neklesak nang era, dalalamla mek lu nenesoʾ ak uboka, debaʾ ak kaboʾ adya doluwoka bolgoklamlaʾ anaso nang ek ulumak. Ban unu malya ulumakaʾ amba dara, siksamba Imik Neyung adya hyak gunaʾ nong oulyang ak seleb meewoka beibsuk.

¹⁸Sikda umeng-ameng aboka, hyak salyaʾ nong yuba hnon, dengdang ganya bon yub enyek nekdo yabalasak. Sikda nimi ganya oka desinaʾ anyek unuwolulum aboka wenewoka, nimi wenyek malya unaʾ ak abaʾ ganya dangawanob senen ulumak nim ek wenewoka gliboka bo malya nenelemak.

¹⁹Ban malya uboka bobnenewoka neklesak nang edya dara, sikja malya ul eleklesak nim ek an, ugumba yok perob nimi dangoka ulumnelumaʾ amba or seknelum anaʾ eleganasab alasak bok, sik nong ak dara, sokok an nimi malya nenesinaʾ damok adya sikenek seleb henga goubsuk nang ek ulumakjok lelemak. Anasa nim ara yokaʾ-yokaʾ adya henga goublamla dara, wera bera henga goumnaʾ anadya wa wenya ulumla.

²⁰Nunjaʾ Wenelesilnya uboka, nimi blebsinaʾ dubnya Yesus Kristus adya nimi malya nenelesil sokok ab seleb bleboka dobsuk bok, onoʾ eimik saawoka henga weboka youlesil dara, wera unuwanya bera men dara or pe ulunabok, eimik era hyak gobdo malya dangalamla.

²¹Ban anaso uboka malya unaʾ hwam ok salabmoubuka ulumak nim era, Imik Neyung adyaʾ jong pik ella danganaʾ loboka, Imik Neyung ak anaba elgom ulumneseng dara perob bok, Imik Neyung bedya yuba seleb ella ubnekanya, onoʾ nu lek aboka, malya pik balaseng dara, nauba so malya ulumak.

²²Sikja malya unulumakaʾ ara ban bol nenenaʾ yub enyek gigilamlaʾ ara, ”Gam ara alja men dukumna denaʾ enyek, eimik saawoka del balamla,” hnonda, ”Pam ara meka hwillilimak pam era, onoʾ saawoka lesa dal balamak,” hyok. Anaso nim Imik Neyung yub ella ulunadyok, eimik sum era yuba lolomak nim era nenyek gigilamla.