Read Nalca 1 YOHANES 5 Bible Online

1 YOHANES 5 - Nalca bible

1 YOHANES 5

¹Yesus ara Imik Neyung adya sokok blebsinaʾ dubnya Kristus aboka lesuk aboka dib senelelanya bera, alda aldib Imik Neyung alja me ulumla. Nimi hnon ben hnon ak wanaʾ ulumla dara, wera alaʾ me ak anaba wanaʾ ulumla.

²Wera ban pik enedya danyek, nunda Imik Neyung mab ak wanaʾ ulumabaʾ ara ella dangalamab. Nunda Imik Neyung ak wanaʾ ulumabakanya, alja oruklesil yub ek dib senewoka ganya oloklemab dara, nunda Imik Neyung mab ak wanaʾ ulumab.

³Anasa wera, Imik Neyung ak wanaʾ ulumab dara, nunda alja oruklesil yub ek pe keboka unulumab ok. Dara, ban oruklesil yub era nunsamba igin nong unggulusil.

⁴Anasa wera, Imik Neyung mab ulumak nim era, sokok an malya unaʾ hwam ulumlaʾ ara, migib adya ol lamaklamak. Dara onoʾ nenyek dara, nunja dib senenaʾ adya ara, sokok an yokaʾ-yokaʾ ol lamaklamab.

⁵Heknedya sokok an yokaʾ-yokaʾ ob lamaganamso do? Al Yesus ara Imik Neyung bedya me yokaʾ ulumla aboka dib senelelanya bedyok ol lamaklamla.

⁶Yesus Kristus nong ak hnonok alak ok mek ab, eneng eb dadya uboka, sokok yeilimok. Yesus ara mek dem adyok yanggumok bok, alda mek ab eneng eb neikaʾ hiboka yeilimok. Imik Neyung Geisinya ara sondaʾ lenaʾ oroknya anasa, nera aldib unumok aboka Geisinya enedya nuk laga neklesil.

⁷Ban nong ak dara, damok winilya danadya nuk laga neklesak ara, Imik Neyung Geisinya hnon, mek adya hnon, eneng adya hnon, sik winilya dadya, neik yub enyek ok laga neklesak.

⁹Nunda nim adya yokaʾ ak laga lelemak dara, dib senelemab bok, Imik Neyung adya laga lelelanya nera hyak migibaʾ senenggomaʾ ak ulumla. Dara ban nenyek, Imik Neyung adya alja me nemba nekoka elegesukaʾ laga lenaʾ era an.

¹⁰Anasa ban nenesa leboka, Imik Neyung alja me nek dib senelemak nim era, ban laga lelemla yub enera, seleb ganya lomok ulusil. Bok Imik Neyung ak dib senenaʾ orok nim era, Imik Neyung ara sondaʾ lelelanya nenelemak. Ban unulumaknya nera, Imik Neyung adya alja me nemba lelemlaʾ anyek dib senenggulumakaʾ adya sondaʾ lelelanya nenelemak.

¹¹Dara laga len yub era ban: Imik Neyung ara nuk seleb dib embengaʾ ulmoubnaʾ elegesuk. Dara, ban dib embengaʾ ulmoubnaʾ damok ara alja me lomok ulumla.

¹²Heknedya alja me nek dib dolomla dara, alda embengaʾ unaʾ yakaʾ ak ulumla, bok Imik Neyung me donaʾ oroknya bera, alda embeng unaʾ orokaʾ ak ulumla.

¹³Ugun Imik Neyung bedya me si nek dib senelelum nim ek, ban momnya doboka beibsin. Anadya ugunda dib embengaʾ ulmoubnaʾ ara seleb nunjaʾ ak ulusil senewoka ella dolulumaʾ aboka ubna.

¹⁴Dara nunja yokaʾ-yokaʾ mololemabaʾ ara alja seinilamla sok mololomab dara, wera nunja molonaʾ kelesil senewoka dib ella ulumab. An anasa, nunda Imik Neyung aljaʾ saramek uboka asaʾ ganya boboka mololomab.

¹⁵Dara, nunja yokaʾ-yokaʾ alak mololemab dara, nunja molonaʾ kelesil senewoka seleb ella ulumab dara, onoʾ nunja yokaʾ-yokaʾ mololemabaʾ ara eleganesilaʾ anyaʾ senewoka ella ulumab.

¹⁶Wera ugun kabo yuba dololanya bedya, alja ban adya somoganggunumso malya unaʾ enyek ubnamlaʾ eibnesom dara, ugunja Imik Neyung ak molowanasom dara, embengaʾ unaʾ ara onsok Imik Neyung adya benyek eleganamla. Ban nenera yuba donaʾ nim edya malya ulumak bok, somoganggunumaknya nenesa lebna. Bok hnon malya unaʾ ak dara, somoknaʾ lanalamla. Ban nenyek dara, nara ugunuk Imik Neyung ak molowolululumaʾ aboka lebnenggubna.

¹⁷Nidyaʾ yokaʾ-yokaʾ meknewoka unulumaknya nera, anara malya unaʾ ok ulumla, bok hnon malya unaʾ ara dib somoganggunumak malya unaʾ hnon ulumla.

¹⁸Nimi nidyaʾ Imik Neyung mabo seleb dangamek nim era, sob-sobaʾ malya unulmorunggulumakaʾ ara nunda ella ulumab. Nera Imik Neyung alja me adya sikenek goluwoka bo ulusil dara, bisaʾ ara sikenek yokaʾ-yokaʾ hnon ununggulusil.

¹⁹Soko me nidyaʾ ara bisaʾ adyok salawoka bo ulumla bok, nuk dara, Imik Neyung alja mab ulumabaʾ anyek hnonok ella ulumab.

²⁰Nunda jong ulumla Imik Neyung ek ella ulunokaʾ aboka, Imik Neyung me ara seleb yeiniboka geremsenga seleb elegesukaʾ ara ella ulumab. Wera nunda jong ulumla Imik Neyung eblaboka neikaʾ kwebdangoka ulumab. Dib nong ara, alja me Yesus Kristus ablaboka neikaʾ kwebdangoka ulumab. Wera al benyek, jong ulumla Imik Neyung era an. Dara onoʾ, dib embengaʾ ulmoubnaʾ ara an.

²¹Najabo yab o, ugunda yokaʾ-yokaʾ sunuwoka giblemakaʾ ak abaʾ ara mok nenewoka ulululum e.