Read Nalca YUDAS 1 Bible Online

YUDAS 1 - Nalca bible

YUDAS 1

¹Ban momnya donaʾ era, nara Yudas, Yakobus alja weis edya, Yesus Kristus adya wa wenya uboka, nunjaʾ neyung Imik Neyung adya wanaʾ uboka, Yesus Kristus amba bo uboka youbsuk nim ek beibsin.

²Angoo yadyek senewoka arasinaʾ ab, namen ganya boldanaʾ ab, wana unaʾ ab dara, ugunuk nauba danggiga balasulul senelamna.

³Nadya hemyabo wanaʾ ulusin nim o! Nunja neikaʾ dib senewoka domouba blebsinaʾ damok enesa, momnya doboka beibsununaʾ aboka ulumnakanya, onoʾ munaʾ Imik Neyung mab ek dib senenaʾ damok gobdo elegesuknya bemba, ugunda duboka salabmoubnelum aboka, ugunuk dukaʾ lolom-lolom along sok wenyaboka lebnesin senewoka momnya doboka beibsin.

⁴Imik Neyung orowek obnamna senewoka memeb gegewok nang era, nu gangganek sam seleb gelelenga wekel yalamakaʾ anasa lebna. Sikja malya ubnob senewoka, Imik Neyung adya gouluwom aboka wanaʾ un yub enyek, nimi ganya oka desinaʾ amba samab menegoka, sikda malya nim ek ulumak. Anya sikda nunja hnonok dubnya Yesus Kristus anyek, Wenelesilnya gomaʾ aboka boro dorogol dilimak.

⁵Ban nidyaʾ ara seleb ella ululum bok, hnonok saawoka beknelumaʾ aboka lebnesinaʾ ara, Imik Neyung adya Israeli nimi Mesir sokok ab bleboka bo balasuk bok, Imik Neyung ak dib senenaʾ orok nim era, eimik saawoka obsuk.

⁶Hnonda, Imik Neyung ara lero nang sikja webneseng wa wiknebaʾ era ella umekjok, onoʾ sik ulumekaʾ abaʾ ara, hnon lo yibilemek dara, busaʾ heng adya geregoka, hyak gunaʾ lomok sam dibaʾ beibsukaʾ ara, eimik senenggom sum era yana lelewoka obnesil.

⁷Youmaʾ Sodom heik ab, Gomora heik ab, ok berem heik eb hnon ara, neikso malya ulumek. Sikda gela salawoka, anasoʾ malya unaʾ gong mandebnaʾ unuru yabalemekaʾ amba leboka, Imik Neyung adya singilmorulamla uk edya lobaʾ nenewoka obsukaʾ ara, anera beknaʾ dibaʾ ulumla.

⁸Dara, Sodom Gomora heik nimi malya ulumek sok, ban wekel yalamak nimi salyeʾ hwam seinilemak nim enyek, neikso malya ulumak. Sikda sik nong ak malya neneldalamaakanya, bleknaʾ hwam ulumak, imik heik sam geisa perobaʾ ulumlaʾ ak derelemak.

⁹Lero dubnya Mikhael bera, bisaʾ dubnya Iblis beb Musa bedya beʾ enesa mala webdek sum era, ”Iblis ak ara, yub adya anda malya ululam aboka gasa lebnenggubuk bok, alda Imik Neyung adya eb ngalagoka ooma lebgulul,” anaʾ ok lebok.

¹⁰Bok ban malya ulumak nim era, yokaʾ-yokaʾ elgom ulumaknya nek derelemak. Dara sikja ella ulumaknya nera, ganya orokaʾ adya seinilamla sok, gobdo nauba malya ulumak. Wera anadya sik nonga dengabdanamakaʾ ara an.

¹¹Sikda hyak omom nongaʾ ak ulumak! Wera an unulumakaʾ ara, Kain bedya unumok malya unaʾ enyek, neik diligaʾ unulumak. Onoʾ, rupiah dobnob senewan dara, Bileam bedya umok diligaʾ doboka, dibum aboka malya ulumak. Hnonda, Korah bedya blekoka umok diligaʾ doboka, blekoka orok neneldalamak.

¹²Wera an unu malya ulumak nim eb neikaʾ delelum dara, sik nong ara, ugun gangganek sik meklaʾ ulumak. Wera delelum dara, alya orokaʾ anyek, yok nimi wanaʾ unaʾ loboka, siksamba ok nonogoka delemak. Sikja unaʾ era, kaboʾ adya debaʾ ak walawoka bo yibin enyek, moka yangganaʾ lolomla sok unulumak. Hnonda sik nong ara, gal meklaʾ gololamla li era, doka mounggulumlaʾ anasoʾ ak uboka, yarenga dama delewan enyek, yalegoka dibaʾ oulaʾ olomla sok ulumak.

¹³Sik nong ara, nauba mek gwanek lo saawoka elilamla sokaʾ ak ulumaakanya, sikja alya usinaʾ ara, mek elilamlaʾ adya bolgamalaʾ bouruklamlaʾ anasoʾ ak ulumla. Hnonda, sik nong anaba, salyaʾ eini yabalamla guraʾ ara, gunaʾ lomok sam dengalamlakanya, gunaʾ lomok ulmorulamla sok ulumak.

¹⁴Adam bek abaʾ li seknya likimeknya Henokh bedya, ban nang ak ununumnaʾ lebgogomokaʾ ara, ”Nimi nidyaʾ ak yana lelewosunun aboka, Wenelesilnya bera, aljaʾ geisa ganya ulumak nim eb, denga yubaʾ gong-gong yanamak. Nim adya malya unaʾ pik balamaakanya, hyak nauba meknewoka malya ulumak ununaʾ nidyaʾ anasa, yana lelewanesil. Onoʾ, nimi malya ulumak nim edya, Imik Neyung ak derewoka walamaknya nenesa, yana lelewanesil.”

¹⁶Wera an unu malya unaʾ hwam ok ulumak nim era, sobaʾ yu yaboka gaga kiboka yok nim ek meknelelum aboka malya geblesak. Sikja nong unaʾ era, malya ubsinya ganya diligaʾ enyek ulumaakanya, sikda nonggo aldalamaakanya, nuk perob dosulul senewan dara, dibnya gom bok, miniwoka leboka, yok nim edya unuruwaʾ amba, pe makaʾ lelewoka lelemak.

¹⁷Bok, nadya wanaʾ ulusin hemyabo nim o, nunja Wenelesilnya Yesus Kristus amba yuba lenaʾ gak nang edya, ugunuk men leb elegesik yub enyek, pe beklelulum.

¹⁸Sikja dara ugunuk ara, ”Eimik soko dengaboka sidyaʾ daknamla salek oka danamla dara, perob yub ek dolbalek nenelemak nimi hnon lanawanamak. Wera an nim era, sikja malya unulunob senen ganya edyok wekdeknewoka ulumak nim ek ulumnemak,” hyek.

¹⁹Wera an nim era, nimi ganya yok-yok bokdanok senewoka benelesak nim ulumak. Sikenek ara sokok an ganya ok denaʾ anyek deknewoka ulumaakanya, Geisinya bedya arawoka bo usinaʾ hyak gobdo orok nim ek ulumak.

²⁰Bok nadyaʾ hemyab ugunuk dara, ugunja dib senelumaʾ ara, hyak perobaʾ geisa nong ulusilaʾ anyek, wera migib nenebdanggiga balamunukanya, ugunda Imik Neyung Geisinya migib unaʾ lomok uboka mololelulum.

²¹Ugunja Wenelesilnya Yesus Kristus adya gouluwom aboka angoo yadyek senewoka arasinaʾ anadya uboka, dib embengaʾ ulmoubnaʾ anyek, ganya weboka diri ulumunukanya, Imik Neyung adya wanaʾ ulusilaʾ lomok sam sobaʾ ulumnelum aboka, pe kemero ulululum.

²²Hnon nim era, ganya penya-penya uboka, hmeng ulusil nim ek ara, ugunja sikenek angoo yadyek senenaʾ beknaʾ damoka pe sunuwoka aralesululum.

²³Yok nim ek, uk ab ugunja salawoka gliboka perob pik dil yalalulum. Onoʾ yok nim ek ara, sikenek angoo yadyek senen ganya bobmunjok, onoʾ lok ganya boboka, sikja ongon akleng eneba malya unaʾ seininaʾ hwam adya sembejaʾ nenemekaʾ ak lek senemunjok, blebsululum.

²⁴Imik Neyung ara, ugunuk malyinggijek aboka migibaʾ pe bo ulusilnya bek, anya ugun nonga doboka Imik Neyung al omomaʾ perobaʾ saramek sam si gegena ponaʾ orokaʾ anyek, ei-ei ganya gekman, migib imik nenewanasil.

²⁵Onoʾ nunjaʾ Wenelesilnya Yesus Kristus pik uboka, nunja bleblesilnya bek, alak hnonok si imik nenenaʾ ab, alja senedyaʾ omom unaʾ ab, hyak dub unaʾ ab, aljaʾ migib unaʾ ab danyek, youmaʾ, wen, eimik eneba, senenya loboka sobaʾ ulmorululul. Aldib unululul.