Read Nalca WAHYU 11 Bible Online

WAHYU 11 - Nalca bible

WAHYU 11

¹Wera alda wira anyek, sununaʾ gamaʾ anasoʾ ak, nak elegoka, ”Bimenekanya, Imik Neyung e ab, uka daboka gibnaʾ oulyang eb, e lomok wekoka giblemeija nim eb, danyek sunuwanalam aboka oruganyok.

²Bok geisa e nedya eremek sam anyek hnonok, alda yok-yok mok soko nim ek seleb elegookanya, sikda eimik era geisa heik era walaʾ anyek denga hnonok uboka, ebdobnya meija daraʾ badya yana ingil sablemnemak anasa, anera sunuwamenek, mem,” hyok.

³Anya nara nadya penya pe laga len nang ek ara, sikenek migibaʾ ak hnon eleganasin. Anedya sikda engenaʾ ganya boboka, liga seribu dua ratus enam puluh sum ununumnaʾ lelemnerak.

⁴Wera sik an nang era, Zaitun gal penya ab, uka dininaʾ penya ab dara, Wenelesilnya nidyaʾ im soko yangawoknya bedya saramek sam ulurakaʾ ara an.

⁵Dara nimi hnon sikenek waboka obnesinaʾ anaso ubnesak dara, uk ara sikja sibamaʾ ak ab goblyekanya, sikja isaʾ nang era, bolowoka denemla. Anya nimi hnon sikenek ganya oka delesulul senewoka, yokaʾ unuwanaseng dara, sikbabya unuseng diligaʾ pik enedya somoganaseng.

⁶Sik ununumnaʾ lelerija salek era, moka yalyek aboka dara, imi sereknaʾ migib era sikenek ulumnesilikanya, sikda meka nidyaʾ enenga nenewanasereng migib eneba sikenek ulumnesil. Dara sikja sobaʾ seiniwoka an unuwanom senelerija dara, sokok anera yok-yok malya damok edya waboka obnomaʾ aboka, sikenek unun migibaʾ ulumnesil.

⁷Wera sikda penya laga len nang era, seleb wenyabgogoweirija dara, yok embengaʾ gamyakaʾ yu nong ara, somoknaʾ gweren selengaʾ ak ab lanawalyakanya, sikenek we doboka oblamageisilyekanya, obnesil.

⁸Dara sikja beʾ era, senenggom heik yabalamak pikek, Sodom, Mesir aboka sunuwoka silimak heikek anyeganyebaʾ ara, sikja Wenelesilnya be oboka glabameijaʾ heikek an beibnemak.

⁹Wenyek sikja nimigumaʾ yok-yok unulumak nim eb, sik yok-yok nimi yilaʾ ulumakaʾ ab, sik yok-yok yuba salamak nim eb, sik yok-yok mok soko ulumak nim eb dara, sikja beʾ era, liga winilya gobdo uboka, lika hnon bok loboka mablyebok eibnemak. Bok ban nim en sikenek ara, nim danedya beʾ nera dibaʾ doboka soko lokmunuk mem, henemak.

¹⁰Dara nidyaʾ soko anam ulumeija nim era, ban penya ununumnaʾ len nang emba, sikenek malya nenewoka ol neblesirijaʾ anasa leboka, wera sikenek pewarek aboka eiya hlaboka, ganya heknaʾ dibaʾ ak hnon, elegeldalamnamak.

¹¹Bok liga winilyaʾ uboka, lika hnon bok loboka mabokaʾ seleb dara, embengaʾ unaʾ hibaʾ ganya era Imik Neyung bek ab, sikenek dibaʾ wekel yousuk. Dara anedya sikda embengaʾ suboka bukdek. Dara nimi nidyaʾ sikenek eibsik nim era, hyak nauba loka dabsuk.

¹²Dara ban penya nang era imik heik ab sikenek, ”Or wele yanggururum!” aboka bii al yabasukaʾ anyek kebdek dara, sikja isaʾ nang era ngolugul yabisik salek, sikda debaʾ ganggan pik uboka, imik heikek welewarek.

¹³Wera ban salek nong era, senenggom sogoumaʾ dorogoka, senenggom heik era sagobadya amba anasoʾ bokoka, luk menegookanya, sogoumaʾ enedya dara, tujuh ribu nim obsuk. Dara, oboka bok lobok nim era, hyak loka daboka, Imik Neyung imik heik ululanya bek giblemek.

¹⁴Dara penenya lobaʾ nenewoka osinaʾ ara, seleb dongowom al bal bok, wera onoʾ winilinya nera berra yanggalaʾ anyek, kendelom.

¹⁵Dara sek lero era, alja benggong lel yabokaʾ enyek, imik heikek lomok ara nauba yuba saro, banaso wenyalamek, ”Sokok an wenen yub ek dara, nunja Wenelesilnya Imik Neyung bedya, alja sekiyimoknya Kristus bedya hnon, danamlakanya, alda dubnya wenesinya dangoka hyak sobaʾ wenelmorulumnesil,” wenyaro balamek.

¹⁶Dara onoʾ nonga kaboka wa bo rob nang domdaraʾ badya nang era, sikda Imik Neyung saramek bulumek nang, anya sikda oumuwoka Imik Neyung ak giblemek.

¹⁷Anya banaso wenyaboka giblemekaʾ ara, ”Ai, Imik Neyung, hyak migib nongnya, seleb ululumukanya, weneba ululamaʾ anasa, nunda gibildolonjab. Anya anda anja migib nong senenggomaʾ anyek doboka, seleb dubnya wenesinya dangoka einiwoka wenelesilimaʾ anasa, giblenjab.

¹⁸Yok-yok mok soko nim era, yu ganya bolomek bok, anja yu ganya era, seleb yal. Dara seleb somogek nim emba yana lelesin salek era, seleb dal. Anya anja wa wen nim era, ununumnaʾ len nang eb, munaʾ Imik Neyung mab ab, anja si nek lok ganya boboka ulumak nim eb, deknaʾ eleksin salek seleb dal. Nimi mek nang eb, senenggom nang eb dara, nidyaʾ hiboka eleksin salek era, seleb dal. Dara sokok malya nenewoka unun nim ek, malya nenewoka osin salek era, seleb dal,” wenyalamek.

¹⁹Wenyek Imik Neyung bedya e imik heikek ara, bak lobookanya, alja orowek mem golongaʾ era, seleb laga dookanya, ebnaʾ ab, liming yub gururu anaʾ ab, sogoumaʾ ab, saragenaʾ mok dok ab, anera nauba ul yabok.