Read Nalca WAHYU 13 Bible Online

WAHYU 13 - Nalca bible

WAHYU 13

¹Unuwoka, ban naga bagaʾ era, nauba longon mek berem sokok diri seklemok. Dara nara onoʾ kendesa enyek, hnon gamyakaʾ yu nong anyek, nauba longowok mek gwanek ab lanawokaʾ ak eibsa. Banera, bong ara sagobadyakanya, huk ara sekbadya ak lanawok. Anya ban bong ok ara, dub nang huk goulunaʾ anyek yok-yok goluwookanya, ban sekbadya hukuk ara, Imik Neyung ak waboka derenaʾ si anyek, yok-yok ulumok.

²Ban mek gwanek ab lanawokaʾ ara, nadya eibsa dara, senenggom bei girik manaʾ senenggomnya nenesoʾ ak eibsa. Alja yan era nauba manaʾ, juenem manaʾ yana anaso. Anya hogung ara nauba yu girik manaʾ, singa manaʾ anaso. Dara ban lanawoknya nek, naga bagaʾ edya, alja migibaʾ ab, perob ekla dub nang edya bunaʾ ekla eb, migibaʾ dangoka wenesinaʾ ab, damok danyek elegok.

³Banera, huk ara sekbadya bok, hnonnya nera menengaʾ adya hyak nauba meilimla senenaʾ bok, seleb nibdangamok. Dara, soko nidyaʾ ara banyek, ganya hyak lokja senemeekanya, wera anyeblaboka neikaʾ balamek.

⁴Anya naga bagaʾ edya, banyek alja migibaʾ uboka ununaʾ anyek seleb elegemok anasa leboka, sikda naga bagaʾ ek an giblemek. Bok onoʾ hnonda banyek hnon, sikda giblemek. Anya sikda, ”Banera hyak yok nong! Alak ara asaʾ ganya boboka, hnon alab obdanggunuseng!” wenyaboka lelemek.

⁵Dara, ban yu nongaʾ ak ara, wera anda nonggo aldanaʾ yuba gom, Imik Neyung ak deren yuba gom, or salalom, wenyaboka lebgogowok. Onoʾ hnonda, liga empat puluh dua walaʾ anaso or wenewoka ubnesilim wenyaboka lebgogowok.

⁶Anya alda, Imik Neyung ab, Imik Neyung si ab danyek derewoka, malyaʾ gebeyiwok. Hnonda, Imik Neyung ulumla ol eb, imik heik ulumeijinya nidyaʾ ara derewoka walamok.

⁷Hnonda onoʾ alak, anja munaʾ Imik Neyung mab ek mala boboka obdangoka, sikinek oblamaganasilim aboka migibaʾ elegok. Anya sik yok-yok nimi yilaʾ ulumakaʾ ab, sikja nimi gumaʾ yok-yok unulumak nim eb, sik yok-yok yuba salamek nim eb, sik yok-yok mok soko ulumak nim eb dara, alak yeiriwoka unuru yibinilam aboka unun migibaʾ elegok.

⁸Dara ban yu nongaʾ ak ara, sokok an ulumak nimi nidyaʾ ara, alak giblemnemak. Bok anam soko uyiwanggom salek enyek ab moruwoka orob domba me aljaʾ nim embengaʾ un buku lomok sam si unggulumlya nim era, ban yu nongaʾ ak giblemnemak.

⁹Wera anasa, heknedya o yak dara, or keblul!

¹⁰Nimi hnon doboka doknowanamaknya bera, wera al unuwanamak. Onoʾ nimi hnon mala adya obnamaknya bera, wera mal adya obnemak. Wera an unuru yibinamlaʾ anasa, munaʾ Imik Neyung mab ara, ganya siklebmouboka, ganya gouluwoka bojam un ganya enyek bobnok.

¹¹Dara hnon yoknya, ban yu nongaʾ ak ara, sokok ab goboka lanewokaʾ ak eibsa. Banera dombaʾ me anaso anyek, bonga penya uboka, alja yuba sanaʾ ak dara, naga bagaʾ yuba anaso ak salamok.

¹²Dara ban eimik an yu nongaʾ edya, ban mennya nek ab yeiriwoka unun migibaʾ doboka, mennya nemba arawoka welemok. Dara, soko dubuk an ulumak nimi nidyaʾ ara, ban men yu nongaʾ edya menengaʾ diligaʾ nauba bok, seleb nibdangemlyaʾ ak an hyak elel nong bok, giblelulum aboka, eimiknya nedya orugosuk.

¹³Wera ban penenya gamyakaʾ era, hyak ganya lokja senewoka, loka dabnokaʾ aboka, ganya en mablul aboka dara, yoknya-yoknya unuru yabalemok. Anya nimi hogung ak ara, alda uk anyek, imik ab ara, sokok an gliboka bo dil yinggyuk.

¹⁴Dara, ban eimik yu nongaʾ enedya, lok so beknaʾ dibaʾ alak elegok adya, men yu nongaʾ amba leboka, loka dabsinaʾ unuru yabalamok adya, ban sokok an ulumeija nimi nidyaʾ ara, bobnenewoka ubsuk. Hnonda, ban men yu nongaʾ era, oldan gab edya menengaʾ diligaʾ hwam bok, or ulumlyaʾ anyek, alja nonga sunuwoka memenaʾ ara, galak girikek gom meewoka sekiyiwolulum aboka orugosuk.

¹⁵Anya onoʾ penenya yu nongaʾ ak, ban nonga sunuwoka memenaʾ ak an, embeng un hibaʾ elegolul aboka, migibaʾ anyek elegok. Anedya banera yuba saboka ubnamlakanya, nimi nauba ban sunuwoka memenaʾ ak an, gibnenggunumak nim era, obnesil aboka un hibaʾ ganya enyek elegok.

¹⁶Dara nimi, meknya naubenya gom, bonaʾ dub nang garen nang gom, wa wennya oruksinya gom nimi nidyaʾ ara, ban gamyakaʾ enedya, yokaʾ anyek, beknaʾ dibaʾ, ugunja soruk gom, asok ok gom, beiblulum aboka orugosuk.

¹⁷Anedya nimi hnon, ban yu nongaʾ adya si gom, einin momnya donaʾ an beknaʾ dibaʾ si unggulumlya nim era, yokaʾ-yokaʾ anaba dekoka, onoʾ deknok senewoka beilinaʾ anaba, hyak unuwanggunumak aboka, anera unuwosuk.

¹⁸Anasa, nunda geremseng uboka, pe seinin ganya enyek, bobnemab. Ban yu nongaʾ adya einin momnya donaʾ era, be hnonja ella donun aboka, geremsengaʾ ganya ulumso dara, or sunuwoka pe einiwolul. Wera, alja si nera, einin momnya donaʾ edya webnamlaʾ ara, enam ratus enam puluh enam ak gegewoka momnya dobnamlaʾ ak ulumnamla.