Read Nalca WAHYU 14 Bible Online

WAHYU 14 - Nalca bible

WAHYU 14

¹Onoʾ nara kemedesa enyek, na saramek sam ara, domba me ara Sion meinik seklemokaʾ ak eibsa. Wera alablaboka dara, alja si ab, alja nei bedya si neb, sik asok ok momnya dorob nang era, seratus empat puluh empat ribu nang ab neikaʾ seklemek.

²Anya onoʾ nara, nauba mek lumdam yuba ollallek alamla anaso ab, senenggom liming yub anaso ab hnon, imik sam ab unuru wenyalamokaʾ ak kebsa. Ban yub en sanaʾ ara, nim adya henga nauba geregoka doblemak benggong yub enesoʾ ak lelemok.

³Hnonda senenggom dubnya bedya ekla bunaʾ saramek ab, gamyakaʾ dombadya ab, onoʾ nonga kaboka wa borob nang eb, sikjaʾ saramek sam ara, ban empat ratus empat puluh ribu nang edya, wenyok bera doboka seblemek. Ban ber era yok nang edya dara, ella dangoka sebnenggunuseng bok, alda seratus empat puluh empat ribu nanga, sokok anyeb seleb dekoka blebsuk nang edyok, seblemek.

⁴Ban nang era, sikda gelewa ab neikaʾ unggulumek nang. Sikda anam goubunya ulumna gel, nengmab adya hnon anam salawanggumnaʾ gel genesoʾ ak ulumek nang. Anya ban domba me ara, yokok yabalamnaʾ nidyaʾ ara, sikda neikaʾ ok balamek. Hnonda sokok an ulumak nimi nidyaʾ ak ab dara, sikinek hnonok munaʾ dekoka, Imik Neyung bek ab, domba me ak, mennya eleknaʾ dibaʾ gebsuk nang.

⁵Dara, sikenek ara sondaʾ lenaʾ mekaʾ sibin anaba hnon lenggulumeekanya, sikda mekaʾ gegena ponaʾ orok nang ek ulumek.

⁶Dara onoʾ lero be hnon, hyak imik nongok gwebdo yabalamokaʾ ak eibsa. Dara ban lero era, perob lero yanggan ulmoubnaʾ yuba nimi sokok an perob yuba siksamba wenyhusunun aboka yok. Dara, sik yok-yok mok soko ulumak nim eb, sik yok-yok nimi yilaʾ ulumakaʾ ab, sik yok-yok yuba salamak nim eb, sikja nimi gumaʾ yok-yok unulumak nim eb, hyak nidyaʾ dumunga ab, ban nidyaʾ ara yok-yok bok, perob yuba siksamba wenyhusunun aboka yok.

⁷Anya ban lero era, bii aboka, ”Imik Neyung adya nimi yana lelesin salek era, seleb yalaʾ anasa, Imik Neyung ak lok ganya boboka, aljaʾ si imik nenewoka, alak geklewoka giblelulum. Anya al im ab, soko ab, mek gwan ab, mek lu nidyaʾ uyiwoknya benyek, koma lumugoka giblelulum!” wenyaboka lebok.

⁸Dara onoʾ penenya lero hnon, men lero ek dolgounul yeindeboka lebokaʾ ara, ”Seleb malyinggil! Ban Babel heik senenggomaʾ ara, seleb malyinggil! Alda yok-yok mok nimi nidyaʾ ak, alja malya ulumokaʾ adya, Imik Neyung ak yu sen-sen anaʾ nenewoka, alja alak igina kwenaʾ ara, onoʾ sikenek nidyaʾ benewosuk ak ara, wera seleb malyinggil,” wenyaboka lebok.

⁹Dara onoʾ winilinya lero hnon, ban men penya lero ek dolgounul yeindeboka lebok ara, ”Yu nongaʾ ab, yokaʾ anyek al nonga sunuwoka mememekaʾ ak, giblemak nim era, alja beknaʾ dibaʾ sikja asok ok gom, sorukuk gom, ulumlya nim era,

¹⁰Imik Neyung adya yu sen-sen anaʾ ara, seleb orowek beiyimlyaʾ anyek, hnon mekaʾ namenaʾ nenenaʾ orok anyek, dobnemak! Ban dobnemak nim era, geisa lero nang ab, ban domba me ab, sikja saramek sam, uk mek adya birim-birim aboka singilamlyaʾ lomok, lobaʾ nenewoka gweklemnemak.

¹¹Anya ban nim en singilimnamla uk solom era, hyak sob-sobaʾ lo welelemnamla. Hnonda, ban yu nongaʾ ab, yokaʾ anyek al nonga sunuwoka mememekaʾ ak, giblemak nim era, alja beknaʾ dibaʾ sikja asok ok gom, sorukuk gom, si nen ulumlya nim era, sikda yubyek inimnek hnon dek-deka sonaʾ orok anyek, sobaʾ gweklemnemak,” wenyaboka yuba yallebnaʾ leboka wenhyok.

¹²Wera ban unuwanamlaʾ anasa, munaʾ Imik Neyung mab ara, alja oruksinaʾ yub ak pe keboka, Yesus ak bojam ganya boboka ulumak nim era, ganya siklebdaboka ganya gouluwoka pe salawoka ulunok.

¹³Wera an seleb dara, imik heik ab hnon lebokaʾ ak kebsenya nera, ”Banyek nidyaʾ momnya dobnelam: Wenyok ab mouruwoka, sik Wenelesilnya lomok uboka somoganamak nim era, pe ulumnamak!” aboka lebok. Dara, Imik Neyung Geisinya ara, ”Aldib!” hyok. Hnonda, ”Sikja igina berewoka welemeknya nera, jakmanaʾ danamlakanya, sikja welemekaʾ amba dara, deknaʾ dobnemak,” wenyaboka lebok.

¹⁴Nen seleb dara, hyak geisa nong debaʾ enyek laga dokaʾ ak, nara hnon eibsa. Dara, ban debaʾ en dubuk ara, nim anasoʾ ak, be hnon bulumok. Wera alja hukuk ara, dub nang edya huk goulunaʾ emas adyok mememekaʾ ak goulumookanya, aljaʾ sorukuk ara, holaʾ hlen parang hyak hleb aleng-aleng arobaʾ ak salamok.

¹⁵Wera onoʾ yok leronya be hnon, Imik Neyung e lomok ab gobdo dorogoka yibuk. Benera alda yeiriwoka bii aboka, ban debaʾ dubuk bulumoknya bek an, ”Soko ara hwiboka, yongowamen salek anasa, anja hlenaʾ parang salalamaʾ adya, or hlero yabamenekanya, or yongowonggalom!” wenyaboka lebok.

¹⁶Dara ban debaʾ dubuk bukumoknya bera, parang sokok an hyablemok enyek, soko ara nonga yongowonggok.

¹⁷Wera an nen seleb dara, yok lero be hnon, Imik Neyung bedya e, imik heikek ab, gobokaʾ ak eibsa. Onoʾ albabya yu parang ek salamok.

¹⁸Dara onoʾ yok lero hnon, uka bo ulumoknya bera, uka daboka gibnaʾ oulyang ak ab yok. Dara, alda paranga salamok lero ek yuba migibaʾ leboka, alak, ”Anggur dok ara seleb eng olomlaʾ anasa, sokok an anggur era parang adya garawoka, dakdo balalom,” wenyaboka lebok.

¹⁹Dara, paranga salamok lero era, ban anggur danyek, garawoka dakoka Imik Neyung adya yu sen-sen anaʾ londenaʾ ak, bo borobowogok.

²⁰Dara, ban anggur galdok londenaʾ ak ara, heik gogobok londelemekaʾ ak ara, anyaganyeb eneng ara mek anasoʾ anyek, mok so ara tiga ratus kilometer anaso uboka, lomok so dara, dua meter anaso ma yabalamok.