Read Nalca WAHYU 21 Bible Online

WAHYU 21 - Nalca bible

WAHYU 21

¹Dara onoʾ, men im eb men soko eb dara, orok dengaboka, youmaʾ mek gwan eneba nidyaʾ hiboka denghyokaʾ adya, nara wenyok im eb wenyok soko eb danyek eibsa.

²Dara onoʾ wenyok geisa Yerusalem heik era, nera hyak wenyok nong Yerusalem enyek, Imik Neyung adyaʾ ak imik heikek abaʾ ara yanggalamokaʾ ak eibsa. Ban Yerusalem heik era, gel ak nenya anam dobnamna salek ek gweidyaʾ sulumla sokaʾ ak yanggok.

³Dara onoʾ ban senenggom ekla bunaʾ ak ab, yuba hnon bii aboka lelemokaʾ ak kebsaʾ ara, ”Imik Neyung adya albeyok ulumla oulyang era, wenyok nim ak dal! Imik Neyung ara nim ab neikaʾ ulumnemak dara, nim ara onoʾ alja mabo silibaʾ dangoka ulumnemak. Imik Neyung ara nim ab neikaʾ uboka, alda sikja Imik Neyung ulumnamla.

⁴Imik Neyung adya sikja heng mekaʾ nidyaʾ ara lubnesil. Youmaʾ ek malya nenelesukaʾ damoka nidyaʾ ara denghenemlaʾ adya, somoknaʾ damok ara hnon ubnenggunumla. Ganya sugunaʾ ab, engenaʾ damok ab, ok ulusilaʾ ab, yokaʾ-yokaʾ nidyaʾ igina kwelesilaʾ ara, hnon sounuwoka ubnenggunumla,” wenyalamok.

⁵Dara onoʾ al ekla bunaʾ ak bukumoknya bedya, ”Yokaʾ-yokaʾ nidyaʾ ara, gobdo wenyoknya nenewanaʾ ara, kendelom!” hyok. Dara onoʾ hnon nak, ”Ban yub enera hyak dib nongaʾ uboka, alda dib senewanamak yub ek anasa, anda or momnya dobnelam,” wenyaboka lebnyok.

⁶Dara onoʾ hnon yuba lebnyokaʾ ara, ”Wera seleb gobdo unura dakdowan! Na nong anyek, men nongnya uboka, onoʾ eimik sidyaʾanya ulumna e. Nak danyek, men eininaʾ ak ab uboka, sidyaʾ daknaʾanya ulumna. Nimi nidyaʾ mek ok ulusil nim era, nim embengaʾ eleksin mek luk ab, embengaʾ unaʾ mek era or salyaʾ eleganamna,” hyok.

⁷”Nimi malya unaʾ ak ab oblamaganalanya bera, ban lebnaʾ nidyaʾ eleganesinaʾ ara, dobnamla. Nara alja Imik Neyung danamna dara, alda nadya me danamla.

⁸Bok nimi nidyaʾ lok hwam nim eb, yuba dib senenaʾ orok nim eb, malya uboka gasa ganya bolomak nim eb, nimi salyaʾ olomak nim eb, gelaʾ nauba salalemak nang eb, nimi guma guklesak nang eb, bisaʾ girik gala giblemak nim eb, nimi nidyaʾ sondaʾ hwam nim eb dara, ban sobaʾ singilamlaʾ uk mek gwanek sam doboka dabnesil. Wera penenya somoganamakaʾ ara an,” wenhyok.

⁹Wera onoʾ, ban sekbadya nimi somoknaʾ damoka sala ulumek sekbadya lero nang enyek, ben hnonja nak yeiniboka lebokja, ”Imik Neyung bedya me nedya gela dobnamlaʾ anyek aawanenggenaʾ anasa, anyagan kemel yalom,” henyok.

¹⁰Dara nak Imik Neyung Geisinya adya ok gologanyookanya, hyak senenggom mok soko meinik imik nongok sam bo welewanyookanya, wera anyaganyeb dara, Imik Neyung adyaʾ geisa heika, wenyok Yerusalem heik ara, imik heikek ab, Imik Neyung adyaʾ ara bo yanggokaʾ ak aawanyok.

¹¹Wera heik en hogung era, Imik Neyung adya imik si nenenaʾ ab, dilinaʾ ara, dangman melelaʾ waragoka, uraʾ girik melelaʾ anaso bokaʾ beiyiwoka mal gablenaʾ bokaʾ anaso ulumokaʾ ak eibsa.

¹²Dara heik era, lekaʾ ara girik adya hyak senenggomokanya, im nongok dob ganagoka, nauba wekna pik era, obadya pobok. Dara pik gong en eileb dameijek sam ara, lero nang enyek yok-yok ellaʾ gigiro ulumeekanya, Israeli nang obadya nang yilaʾ sunuwoka, sikja si momnya dobok.

¹³Wera pik sereknaʾ winilya-winilya nidyaʾ mok soko hogunga sunuwoka pobokaʾ ara, yali sam ara pika winilya, woru sam ara pika winilya, dabo sam ara pika winilya, anya kemban sam ara, pika winilya pobok.

¹⁴Anya, heik en egomnaʾ ikokaʾ ara, obadya senenggomaʾ ikoka sobookanya, domba me adya nim obadya nang yuba lenaʾ gak nang, sikja si nera anyagan momnya dobok.

¹⁵Wera alda ban nak yuba salanyoknya bera, meilik selerobaʾ adya memerob heika sunun gamaʾ ek, nera heik domenya ab, lekaʾ ab, pik mandebnaʾ nidyaʾ hiboka sunun danasa bomok.

¹⁶Heik domenya era, gwana dounguwoka bleblya ara dombadya ulumookanya, onoʾ domdama bleblya anaba al neikik. Wera heik era, aljaʾ soruk ak sam salamok gamaʾ enedya sunulumok dara, wareba ara dua ribu empat ratus meter ubok. Warana ab, domdam imik sam ab anaba neikik dok.

¹⁷Dara onoʾ lero enedya legaʾ domek ebelengnaʾ ak sunulumok dara, dom damak sam era, enam puluh meter anaso ubok. Ban lero enedya unu sunuwoknya nera, nim adya sunuwoka einilimaksonya nenyek, unuwok.

¹⁸Dara heik en legaʾ dobok ebelengnaʾ era, youn yarang anaso bokaʾ girik edya weibookanya, heik nong ak dara, meilik dangman selerob bokaʾ adya sorobaʾ ara jendelaʾ pik iblemakaʾ kaca anaso hogung bokaʾ ek eleb-alab alamok.

¹⁹Anya mek yabnaʾ ikok girik era, gabaʾ eleb-alab alamla sok girik dadya yangaro byuk. Men yangawok egomnaʾ era eleb-alab alamla girik edya yangawok. Penenya nera embeng mekla girik bokaʾ edya yangawok. Winilinya nera, embeng mirin sub girik edya yangawok. Domnya nera, embeng elerob nong girik edya yangawok.

²⁰Lamnya nera, embeng jobdob girika, hnabnya nera, embeng gal bokaʾ girika, seknya nera, heng kemenaʾ alawom aboka pelemlaʾ anasoʾ girika, linnya nera, embeng meklaʾ mirina yokoka ubok girika, soubnanya nera, yokaʾ-yokaʾ nidyaʾ goronaʾ mirinaʾ adya yokdob girika, sagonya nera, weik bokaʾ girika, goklomnya nera, mirin im bokaʾ girika, anya onya nera, mirina yokong goma elerobaʾ yoklamla girik edya yangawok.

²¹Nauba senenggomaʾ wekna pikik ara, pika yok-yok amba, meilik yubaʾ hnonok-hnonok ulumok. Heik en gangganek nauba yaban pik era, dangman adya niniwoka jakookanya, eleb alab alamlaʾ ara jendela iblemakaʾ kaca bokaʾ hogung anaso ak ulumok.

²²Dara heik enera, Imik Neyung al nong ab, domba pama me ab danyek, Imik Neyung ek an ulurak adya, yok Imik Neyung e ara, hnon eibnenggubsa.

²³Dara, domba pama me ara dilinaʾ alan seleb ulumlakanya, Imik Neyung nong anaba heik enyek an dilinaʾ ul eleknanya ulumlaʾ anasa, heik enyek anera, heng gom, walaʾ gom ara, unggulumnamla.

²⁴Anya mok soko me nidyaʾ nim ulumaknya nera, Imik Neyung adya dilinaʾ lomok sam an ura yabalamnemaakanya, mok soko dub nanga nidyaʾ ara sikja bonaʾ perobaʾ digumaʾ nidyaʾ ara, heik enyek an bo beil yalamnamak.

²⁵Dara onoʾ heik enyek anera, inimnek hnon gunaʾ dangoka ininaʾ ara orok adya, pik ara mekaʾ sereknaʾ loboka, sobaʾ ara bakalmorulumnamla.

²⁶Dara, nimi soko nim edya sikjaʾ senenggom dub nang dangoka ulumakaʾ ab, sikja bonaʾ perobaʾ digumaʾ nidyaʾ ara, heik enyek an alak bo beil yanamak.

²⁷Bok hyak dib nong ara, ban perob heikek ara, sembejaʾ digum gom, nimi nidyaʾ malya unaʾ hwam ok unulumak nimi gom, sondaʾ nauba lelemak nimi gom, ane digum nim era, hyak weknenggunumak. Alda, sik domba me adya aljaʾ embengaʾ un bukuk sam, si momnya domlya nim enyek ok, goʾ weknamak.