Read Nalca WAHYU 22 Bible Online

WAHYU 22 - Nalca bible

WAHYU 22

¹Wera onoʾ lero enedya nak nim embengaʾ eleklesil mek era, Imik Neyung ab, domba me ab, sikja bunaʾ ekla ek ab, goboka, eleb-alab arobaʾ ak yabalamok mek enyek, nak aawanyok.

²Dara, heik enyegan naubaʾ yaban pik hnoumung era, mek en mabokaʾ ge dara-dara ara, nim embengaʾ eleklesil gala gong ek sekdo byuukanya, gibnaʾ hnonok dara, walaʾ elaʾ gigiro lika obadya moulumla. Dara, gal meklaʾ danedya meklaʾ era, nimi nidyaʾ soko nim merellisinaʾ amba ulumla.

³Anya, si malya nenewanamsoʾ digumaʾ ara, hyak mekaʾ sibin anaba hnon unggulumnamla. Imik Neyung ab, domba me ab dadya, bun ekla bunaʾ era, heik lom enyek an ulumnamlakanya, Imik Neyung bedya alja mabo era, alak gibdo ulumnemak.

⁴Dara, alja hogung era eillilemnemaakanya, alja si nera, nang enedya asok ak nidyaʾ momnya domlyaʾ ak ulumnemak.

⁵Anya anyegeinira, gunaʾ ara hyak mekaʾ unaʾ orok uboka, Wenelesilnya Imik Neyung anyek, alak dilinaʾ uboka, sikenek yeblemnesilaʾ adya, sikda uk dilinaʾ yebnaʾ ab, heng dilinaʾ ab dara, lobnemak. Dara, sikda dub nang dangoka mok soko me nidyaʾ wenewoka hyak sobaʾ amba bo ulumnesak.

⁶Dara onoʾ an lero era nak hnon lebnyokaʾ ara, ”Ban lebna yub danera, hyak dib nongokanya, ganya beilimnaʾ nong yub ek ulumla. Anya Wenelesilnya Imik Neyung bera, ununumnaʾ lelemek nang, sikja Wenelesilnya benyaʾ, alja lero ek Imik Neyung bedya mab ek eimik unuwanamlaʾ anyek, sikenek ella danokaʾ aboka, laga neksulul aboka nak oruganyok,” wenyhenyok.

⁷”Aldib, dib nong ara, nara hyak berra yanamna. Anasa, ban buku enyek an unuwanamna lenaʾ anyek, dib senewoka ganya oloklelenya bera pe ulumla!” hyok.

⁸Dara, nara Yohanes bedya, ban nidyaʾ ara, nadya seleb keboka eibsa. Anya, nara ban nidyaʾ seleb eiyiwoka kebgogowasakanya, nak an yokaʾ-yokaʾ bo amalenyok lero ek an gibnunaʾ aboka, aljaʾ saramek oumuwoka ubsabok,

⁹alda nak lebokja, ”Anaso ununggom, mem! Nara an soʾ ak uboka, anjaʾ hemyab ununumnaʾ lelemek nanga hnon, onoʾ nimi nidyaʾ ban buku enyek an momnya dobok yub ek dib senewoka ulumak nang enesonya. Alda Imik Neyung ak ok hnonok gibnelam!” hyok.

¹⁰Dara onoʾ alda hnon lebokja, ”Ban nidyaʾ ununumnaʾ lebnaʾ danera, mandebnaʾ loboka, berra unuwanalabok anasa, ban buku ek an momnya dobokaʾ ara, anja hnon gunuwoka, mem an beknaʾ beilinaʾ ara mem.

¹¹Anasa, nimi heknedya meknelemla dara, or meknebgiga balalul. Anya, nimi hnon malya unaʾ hwam ok unulamla dara, or malya ubgiga balalul. Anya, nimi hnon pelemla dara, or pebgiga balalul. Anya, Imik Neyung amba ok munaʾ ululanya bera, or Imik Neyung amba leboka, munaʾ gobdo ululul,” wenyhenyok.

¹²”Aldib, dib nong ara, nara mek anam yanamnakanya, nimi nidyaʾ sikja unulumakaʾ sunuwoka deknesinaʾ anasa, deknaʾ en bo yanamna. Dara, nidyaʾ sikja unumekaʾ sunuwoka, gigiwoka eleganesin.

¹³Nak men youmaʾanya uboka, onoʾ eimik sidyaʾ daknanya ulumnakanya, al nak danyek, men eininaʾ ak abaʾ ara, onoʾ sidyaʾ einil daknaʾ amba Wenesinya ulumna,” hyok.

¹⁴”Nimi nidyaʾ sikjaʾ ongon aklenga mek elekdob nim era, pe ulumak. Anasa, sikda embengaʾ un gal doka denaʾ hnon dobnemaakanya, perob pik uboka heik enyek an weknemak.

¹⁵Bok nimi guma guklesak nang eb, gel salanaʾ hwam ok ulumak nang eb, nim dib olomak nim eb, bisaʾ girik gala giblemak nim eb, sondaʾ hwam ok lelemak nim eb, nera yuba sirik adya sondaʾ lelemak gom, sene bobnenewoka wanaʾ ulumak nim eb, ban nimi digum nidyaʾ ara, perob heikek ab weilik geboka ulumnemak,” hyok.

¹⁶”Dara, nara Yesus adya, nadya yuba donaʾ nim enyek kebnokaʾ aboka, ban nidyaʾ unuwanamlaʾ yub era, wenyaro bijebok aboka, nadya lero bek orugamsa. Na benyek Daud nang yilaʾ uboka, onoʾ yali sam yeblamla eleb-alab arob ololaʾ ulumna,” hyok.

¹⁷Dara, Imik Neyung Geisinya ab, Imik Neyung me ak dobnomok gel geb dadya dara, ”Wera, anyagan yoululum!” wenyalarak. Nimi nidyaʾ ban yub en kebnelanya bera, ”Or, yangganok!” henok! Anya heknyek mek ok ubnamla dara, wera or meka del youlul! Heknyek nara embengaʾ ulunun senewalenya bera, wera nim embengaʾ eleklesil mek enyek, or salyaʾ doboka del youlul!

¹⁸Dara, nara Yohanes bedya, nimi nidyaʾ ban buku enyek an, ununumnaʾ leboka momnya dobokaʾ ak kebnemak nim era, nadya lebnesinaʾ banyek keblulum: Heknedya ban unuwanamna aboka lebok yub enyek, nauba nenewoka maknamla dara, Imik Neyung anaba albabya, ban buku enyek an, malya nenewanesin aboka momnya dobok yub edya malya nenenaʾ ara, alba diriganamla.

¹⁹Anya nimi ben hnon, onoʾ ban unuwanamna aboka, ban buku enyek an ununumnaʾ lebokaʾ momnya dobok yub enyek, mekaʾ nenewanamla dara, Imik Neyung anaba aljaʾ embeng un gala denesonya neb, aljaʾ geisa heikek ulumnesonya neb, ban buku enyek an momnya doboka lebokaʾ ara dorowanamla, keblulum.

²⁰Dara ban yub en, unuwanamna aboka lelelanya bedya lelemla ara: ”Yo, aldib, nara hyak berra aboka yanamna!” wenyalamla. Amin. Wenelesilimnya Yesus o, or yalom e!

²¹Dara, Wenelesilnya Yesus adyaʾ wanaʾ uboka perob eleksinaʾ ara, ugun nidyaʾ ak, ulusulul e!