Read Nalca WAHYU 3 Bible Online

WAHYU 3 - Nalca bible

WAHYU 3

¹Sardis heikek yuba donaʾ nimi lero ek, ban unuwoka momnya dobnelamaʾ ara: ”Ban yub enera Imik Neyung aljaʾ sekbadya ganya eb, sekbadya guraʾ eb, danyek salalanya bedya yub era an. Anja unululamaʾ nidyaʾ ara nara seleb ella ulumna. Anak dara, hnon nim edya dara, anam embengaʾ ulumla alanjak bok, seleb somogolumaʾ ak ululam.

²Anasa, bukoka pe diri uldalalom. Anja welelam wa nek dara, nadya Imik Neyung hogung ak ara, nidyaʾ ara, perob ok eilinggulumnaʾ anasa, anam somogonunaʾ ululanya nek nidyaʾ somogalyek aboka, migibaʾ gebnelam.

³Anasa, anda men youmaʾ enyek unuwanalam aboka nekenjekaʾ hnon pe seiniwanalam. Hnonda hekaʾ ak unuwanalam an yuba kelumaʾ anyek beklom. Dara, ban pe unubgiga balamenekanya, anda malya unaʾ loboka ganya dangawalom. Bok anda anam bukoka pe diri uldanaʾ orok dara, na yanamna salek era, sumen yanamlaʾ ara elgom umen bok, hokaʾ don nang enesoʾ anyek gelelenga yanamna.”

⁴”Bok, an Sardis heikek ara nimi hnon nim era, nadya boksom sembejaʾ ubnelyek senewoka pe ulumakaʾ ak ella ulumna. Ban nim enyek dara, sikda anaso unuwaneseng hogunga geknelemlaʾ anasa, geisa akleng ongowoka nab neikaʾ yabalemnemab.

⁵Heknedya malya unaʾ ak ab oblamaganalanya bera, neik so geisa akleng ek ongowanamla. Anya alja si nera nim embengaʾ un bukuk sam ulumlaʾ ara, eimik eneba hyak lubnenggunumna. Nadyaʾ neyung Imik Neyung be saramek sam hnon, alja lero nang hogung ak sam ab, nim enera nadyaʾ ak ulumla aboka laga lebnamna.”

⁶”Heknyek o yakaʾ ara, Imik Neyung Geisinya adya yuba donaʾ nim ek lelemlaʾ pe keblul,” hyok.

⁷Filadelfia heikek yuba donaʾ nimi lero ek ban unu momnya dobnelamaʾ ara: ”Ban yub enera, hyak geisa uboka, hyak dib nong ululanya bedya yub era ban. Dara, Daud bedya pik baknaʾ era alja bo ulumla. Alja pika baknamso dara, nimi yok nang edya seregamenggom, anya onoʾ alja sereganamso dara, yok nang edya anaba baknamenggom.

⁸Anja hekaʾ unululamaʾ ara, nara seleb ella ulumna. Anasa, nadya ansamba yok nang edya sereganggom pik era seleb bak lobgesa. An nong ara mek migibaʾ ululamakanya, nadya yuba ek pe salawoka, nadya si nera gununggululamaʾ ara, nara seleb ella ulumna.

⁹Dara nimi nidyaʾ bisaʾ dubnya Satan bedya bisaʾ mab silibaʾ ulumak nang era, Yahudi nang yokaʾ gom bok, sondaʾ anasa nunda Yahudi nang enyaʾ aldalamak nang era, nadya anjaʾ saramek sam yeiniboka gibgenokaʾ aboka unuwanok senen ganya enyek eleganesin. Anedya sikda, nara anak wanaʾ ulunggenaʾ ara gobdo ella danamak.

¹⁰Anda nadya yub ek dib senewoka pe siklewoka unululamaʾ anasa, nababya amba lunuwoka soko me nidyaʾ igina kwebnesil sum ek ab kemero ubnenggen. Ban unuwanamlaʾ ara soko nimi nidyaʾ ak sunuwanasil.”

¹¹”Nara berra yanamna! Yok nang edya anak an Imik Neyung adya perob huk goulunaʾ era doblyek anasa, anak an ulunggelaʾ ara pe salabmoubuka ululom.

¹²Heknedya malya unaʾ ak ab oblamaganalanya bera, nadyaʾ Imik Neyung ek sam alak senenggom egomnaʾ nenewanamna. Dara, alda hyak mekaʾ goubnenggunumla. Anya, nadyaʾ Imik Neyung bedya si neb, Imik Neyung bedyaʾ anyek imik heikek ab uboka eleganasil heik si Yerusalem ara, benyek an momnya dobnamna. Anya onoʾ nadyaʾ wenyok si neneba benyek an momnya dobnamna.”

¹³”Heknyek o yakaʾ ara, Imik Neyung Geisinya adya alja yuba donaʾ nim ek lelemlaʾ ara, pe keblul!” hyok.

¹⁴Laodikia heikek yuba donaʾ nim lero ek unu momnya dobnelamaʾ ara: ”Ban yub enera, Amin, yo aldib anaʾ damnya, yokaʾ-yokaʾ eiyiwoka aldib ulumla aboka, bojam uboka dib nong ok lelelanya, anya Imik Neyung adya yokaʾ-yokaʾ uyiwokaʾ nidyaʾ gaknya bedya yub era ban.

¹⁵Anja yokaʾ-yokaʾ unululamaʾ ara nara seleb ella ulunggen. Penya-penya unaʾ loboka, hnonok ok ubnenggeso dara, perob senewanasinya bok, anja nonga poba unggulunggelaʾ anaba, onoʾ saragenaʾ denggulunggelaʾ ara nara seleb ella ulumna!

¹⁶Anasa, anja nong unaʾ era, saragenaʾ degenaʾ anaba orokokanya, poba sen-sen anaʾ anaba orok bok, alda anda poba saragenaʾ gangganek ululam. Ban nenesa leboka, nadyaʾ sibamaʾ ak ab dukoka bobogonun aboka ulunggen.

¹⁷Dara anja lelelamaʾ ara, nara bonaʾ dubnya uboka, yokaʾ-yokaʾ nidyaʾ sangaʾ ok ulunel aboka, anasa yokaʾ-yokaʾ ak ara, bunya buknenggunusinya, alalam. Bok an nong ara hyak malya nongaʾ anyek senggeiriwoka igina kwelenggel bok, ella unggululamakanya lelelam! Anda bonaʾ garan uboka, akleng ongonaʾ orokaʾ anyek, henga luma yajokaʾ ak ululam.

¹⁸Anasa nadya dara, anak ara dub dalomaʾ aboka, nadyaʾ senedyaʾ yakaʾ meilik dangman enyek deklomaʾ aboka wenelenggen. Hnonda nong baneng uboka, alya ubgelyek anasa, nadya geisaʾ akleng enyek deklomaʾ aboka wenelenggen. Anya heng ek ngikoka, pe eiblomaʾ aboka heng hwenaʾ meka nak ab deknelam wenyalenggen.”

¹⁹”Nadya okoka yokaʾ nauba wanaʾ ulusin nanga nong enyek, ooma leboka nauba wenelesin. Anasa, anda yeiriwoka migibaʾ anyek anja malya unaʾ eibkweboka loboka ganya dib dangawalom.

²⁰Nara pik sindamak sam sekoka pika glorum-glorum alasinaʾ anyek kendululum e! Nimi ben hnon nadya yuba keboka pika baknelya dara, nara wekoka alab eibdananamakanya, nara alab, alda nab, neikaʾ delemnenam.

²¹Nara malya unaʾ oblamagoka nadyaʾ neyung beb alja eklaʾ bunaʾ ak sam neikaʾ bulunuma sok, heknedya malya unaʾ ak ab oblamaganalanya bera, nadya bulumna ekla bunaʾ ak sam or neikaʾ buknenam aboka lebnamna.”

²²”Heknyek o yakaʾ ara, Imik Neyung Geisinya adya yuba donaʾ nim ek lelemlaʾ anyek, pe keblul!” hyok.