Read Nalca WAHYU 4 Bible Online

WAHYU 4 - Nalca bible

WAHYU 4

¹Wera nen nidyaʾ seleb dara, nara kemel yabasa enyek, imik heik sam ara pika hnon bakokaʾ ak eibsa. Dara, men danyek, poo anaʾ benggong yub anasoʾ ak kemsa yub enyek, onoʾ anaso anyek wenyal yabokaʾ ak kebsaʾ ara, ”An nen seleb dara, eimik hekaʾ unuwanamla anyek, anak amawanenggen anasa, anyagan wele yalom,” hyok.

²Dara wene sab-sab enyek, Geisinya adya nak gologanyok dara, wera, imik heik sam ara, dubnya senenggomnya bedya ekla bunaʾ hnon uboka, an eilib ara, nimi ben hnon bulumok ak amawanyok.

³Wera an ekla bunaʾ eilib bulumoknya bera, kemen dara, yaspis girik ab, sardis girik ab, melelaʾ beining anasoʾ ak ulumok. Dara onoʾ mano hnon an ekla bunaʾ eilib samarud girik melelaʾ beining anasoʾ anyek, keeb ganagamok.

⁴Dara, ban ekla bunaʾ en gogob dara-dara ara, yok domdaraʾ badya ekla bunaʾ hnon ulumookanya, wera an ekla bunaʾ eilib era, domdaraʾ badya nang, nonga kaboka wa borob nang era, geisa boksom ongob ligiwoka, sikja hukuk ara, emas huk golunaʾ golumek nang ek, anyekan bulumek.

⁵Dara ban ekla bunaʾ ak ab danyek, ebnaʾ lengem-lengem aboka, onoʾ irr aboka, anya liminga yuba dalagoka, gururu aro yabok. Wera an ekla bunaʾ saram enyek ara, wesaʾ sekbadya ak uk bokaʾ singilimok. Wera nera, Imik Neyung sekbadyaʾ ganya era an.

⁶Dara nauba ekla bunaʾ saramek ara, mek gwan anyek, kristal heng kemeldanaʾ beining anaso ak, houm-houm alamok. Dara ekla bunaʾ en berem dara-dara nidyaʾ ara, gamyakaʾ dombadyaʾ adya, saramek weilik sam nidyaʾ ara, heng dok adyok lararo lomokaʾ ak ulumek.

⁷Men youboka heng laramok gamyakaʾ era, singa anaso ak ulumok. Bok penenya nera, yem sapi pam eneso ak ulumok. Winilinya nera, alja hogung era nim hogung anaso ulumookanya, domnya nek dara, balyo gweregaʾ wining anam gwebdo yabalamna weneso ak ulumok.

⁸Dara, ban dombadya gamyakaʾ nidyaʾ ara, nidyaʾ ola hnabbadya dara-dara ulumok. Bok darasam sikja lomok ak dara, nidyaʾ heng doka yakaʾ ak ulumek. Anya sik ban gamyakaʾ edya dara, inimnek yubyek buluk lobongganggonggom, bera sobaʾ sebelsinilimek. ”Geisa, geisa, geisa! Wenelesilimnya Imik Neyung hyak senenggomnya geisa ok ulumla! Youmaʾ, wen, eimik sobaʾ ulumnalanya benyaʾ, geisa ok ulumla!” wenyalamek.

⁹Sikda dombadya gamyakaʾ edya lero seblemek ber era, al ekla bunaʾ ak bululanya bek perob aboka si imik nenewoka, gigiwoka, perob aboka giblemek. Dara an giboka seblemek salek era,

¹⁰domdaraʾ badya nonga kaboka wa borob nang dara, ekla bunaʾ ak bulumoknya be saramek sam koma lumugoka dunuwoka oumub ligiweekanya, alak sob-sobaʾ ululanya bek eiya hlaboka gibek. Dara sikja meilik huk golunaʾ ara ban ekla bunaʾ dam enyekan, boro boboka lelemekja,

¹¹”Nunja wenelesilimnya, nunja Imik Neyung o! Wera anja yokaʾ-yokaʾ nidyaʾ ara uyiwolumukanya, anja ganya seininaʾ edya, ban nidyaʾ uyiwolumaʾ ara ulumla anasa, anak danyek, si imik nenenaʾ ab, ganya sokok nenebdangoka gibnaʾ ab, hyak senenggom migibaʾ ab dara, anak danyek ok dololom,” wenyalamek.