Read Nalca WAHYU 5 Bible Online

WAHYU 5 - Nalca bible

WAHYU 5

¹Dara, nara kemel yabasa enyek, domba me senenggom ekla bunaʾ ak sam bukoka, kerob buku hnon, momnya dara-dara domekaʾ anyek, sekbadya beknaʾ denenaʾ denemekaʾ ak, alja sirik sorukuk, salamokaʾ ak eibsa.

²Onoʾ hyak senenggom lero edya, ”Heknyek an sekbadya beknaʾ denenaʾ ara glokoka kerob buku era, alja baknamso geknenanya bera ulumla goma?” senenggomaʾ yuba saboka wenyal yabokaʾ ak eibsa.

³Bok, nimi ben hnon sibin anaba, imik heik gom, sokok an gom, sokok damumduk gom, ban buku kerobaʾ en baknamsokanya lomok sam kendenesonya beneba, benyek senenaʾ ara orok.

⁴Nimi ben hnon or buku kerobaʾ en bakoka lomok sam kemedenesonya bera orok anasa, nara hyak angoo senewoka nauba engewasa.

⁵Dara ban nonga kaboka wa borob nang danyek, anyaganyeb be hnonja nak lebokja, ”Anda engenaʾ ara mem! Keblom, Yehuda nang yilaʾ bei gam singa adya, Daud bek ab mengebdangdobnya bedya seleb oblamagal. Anedya alak danyek, ban buku kerobaʾ eb, alja sekbadyaʾ beknaʾ denenaʾ eb dara, alja baknamla,” hyok.

⁶Wera nara ekla bunaʾ hnoumung ab, ban dombadya gamyakaʾ ab, anya ban nonga kaboka wa borob nang hnoumunga ara, kemel yabasa enyek, domba pam me hnonok, seleb oboka beiyimnaʾ anasoʾ anyek, bonga sekbadyakanya, henga sekbadya ak sekemokaʾ anera, Imik Neyung aljaʾ ganya sekbadya ak mok soko me nidyaʾ ak boksuk ara an.

⁷Dara ban domba pam me nera yeindeboka, ban buku kerobaʾ en ekla bunaʾ ak bulumoknya bedya soruk ab dobok.

⁸Ban unu dol yabok dara, an dombadya gamyakaʾ eb, domdaraʾ badya nonga kaboka wa borob nang eb dara, al saramek hogung oumub ligiwek. Dara, sikda yok-yok benggong hnonok, emas mek hmeiya hnonok, gen-gen song meklaʾ adyok deknemokaʾ anyek salawek. Anera munaʾ Imik Neyung mab adya molonaʾ era an.

⁹Anya sikda wenyok yok ber enyek an wenyaro seblemekaʾ ara, ”Anda seleb objeekanya, an anja eneng edya, anda sik yok-yok nimi yilaʾ ulumakaʾ ak ab, sik yok-yok yuba salamak nim ek ab, sikja nimigumaʾ yok-yok unulumak nim ek ab, sik yok-yok mok soko ulumak nim ek ab dara, Imik Neyung amba dekoka doblum anasa, al anak danyek ban buku kerobaʾ en dobnelamakanya, alja beknaʾ denenaʾ danera, or anja baknelam.

¹⁰Anya anda sikinek hyak senenggomaʾ wenewoka bo un heik nang nenewousulumukanya, nunja neyung Imik Neyung amba sikda yuba wa gak nang dangiyiwousulum. Anasa sokok anera, sikda dub nang dangoka wenelemnesak,” wenyaro seblemekaʾ ak eibsa.

¹¹Dara nara, yuba hnon keboka kemel yabasa enyek, lero nang era, ekla bunaʾ ab, gamyakaʾ ab, nonga kaboka wa borob nang ek longob ganagoka, yuba nauba saro balamekaʾ ak eibsa. Sikja deng mandebnaʾ era, deng salyaʾ uboka, onoʾ denga salyaʾ adya deng mandebnaʾ era hyak gong ulumek.

¹²Sikda yuba yeiriwoka saboka wenyalamekaʾ ara, ”Orob domba pam me nenyek danyek, damnya bedya len migib ab, bonaʾ dub ab, ella unaʾ damok ab, yeirin migib ab, alak nauba senewoka gibnaʾ ab, si imik nenenaʾ ab, giginaʾ nauba ab dara, alak danyek dobnamla,” wenyaro seblemek.

¹³Dara nara gamyakaʾ ulumlaʾ imik heik ab, sokok ab, soko damumduk ab, nauba mek gwanek ab, ane lomok nidyaʾ ulumlaʾ ara wenyalamekja, ”Al mok heik enyek an ekla bunaʾ eilib bululanya beb, domba pam me ab dara, giginaʾ nauba ab, nauba senewoka gibnaʾ ab, si imik nenenaʾ ab, yokaʾ len migib eb dara, siksamba hyak sobaʾ ulmorulumnamla!” wenyaboka lelemek.

¹⁴Wera ban dombadya gamyakaʾ era, ”Al aldib or unululul,” hyek. Dara ban nonga kaboka wa borob nang eneba doro boublingdangoka giblemek.