Read Nalca WAHYU 6 Bible Online

WAHYU 6 - Nalca bible

WAHYU 6

¹Dara nara kemelamsa enyek, domba me ara mem an beknaʾ denenaʾ sekbadya ulumokaʾ ak anyeb, mennya nek bakokaʾ ak eibsa. Anya, dombadya gamyakaʾ anyek, mennya nedya liming yub anasoʾ ak bii aboka, ”Yanggalom!” al yabok ak kebsa.

²Onoʾ nara kemelamsa enyek, wera, nim abakna pam kul pam ek hnon eibsa. Pam en eilib abakamoknya bera, yina salamookanya, alak ara dub nang goululumak huk goulunaʾ anyek elegok. Anya, alda ollamaklelanya benesonya bek adya, onoʾ oblamagoka alawoka dobnunaʾ aboka yanggokaʾ ak eibsa.

³Wera onoʾ domba me ara penenyaʾanya beknaʾ denenaʾ bakal yabok dara, dombadya gamyakaʾ anyek, penenya nedya lel yabokja, ”Yanggalom!” al yabok ak kebsa.

⁴Anya abaksin pam yoknya hnon, honga goronokaʾ houm-houm alamokaʾ ak yanggok. Dara abagamoknya bera, ganya pe namenaʾ unaʾ anyek, sokok anyeb doblulaʾ aboka, anya sokok dubuk an ulumek nim era obdangdo yabalanok aboka, unun migib enyek alak elegok. Anya alak ara senenggom gab enyek mal dibaʾ elegel yabokaʾ ak eibsa.

⁵Dara onoʾ domba me ara winilinya beknaʾ denenaʾ bakal yabok dara, winilinya gamyakaʾ era, ”Yanggalom!” al yabokaʾ ak kebsa. Anya nara, wera, abaksin pama hnon, honga mirinokaʾ ak ulumookanya, an eilib abakamoknya bera, igina sununaʾ ak alja sorukuk salamokaʾ ak eibsa.

⁶Anya nara or yokaʾ adya yub enyek, ban gamyakaʾ dombadyaʾ hnoum anyeb sal yabakdo senewasaʾ ara lel yabokja, ”Perob gandum enyek igina hnonok dara, liga hnonok wa webnaʾ amba eleklesak sok, deknaʾ adya dekoka dobnemak, dara yok gandum era, igina winilya amba anaba al neikik, lika hnonok weboka donya nedya dekoka dobnemak. Bok pam mek ab, anggur mek ab dara, sekoka bolokdo yabanaʾ ara mem,” wenyalamekaʾ ak kebdongowasa.

⁷Wera onoʾ domba me ara domnya beknaʾ denenaʾ bakal yabok sab-sab, nara kebsa enyek, domnya gamyakaʾ edya, ”Yanggalom!” al yabokaʾ ak kebsa.

⁸Anya, wera, abaksin pama hnon, hong ara embeng meklaʾ uboka, weik bokaʾ aleb-aleb arobaʾ ak ulumookanya, an eilib abagamoknya bedya alja si nera, somoknaʾ damok. Anya somoknaʾ nang heikek era, eimik dobgiga yalamok. Anya sikenek ara, sokok an ulumek nanga nidyaʾ ara, dombadya bokoka dara, hnonok obnemek migib enyek, mal oldanaʾ pik ab, gwaneng okaʾ bun pik ab, neiknaʾ damok don pik ab, sokok an yok-yok yu nongaʾ beiyik ulumlaʾ pik ab benewoka obnokaʾ aboka migib era, elegel yabasukaʾ ak eibsa.

⁹Dara domba me ara lamnya beknaʾ denenaʾ bakal yabok dara, nara sik Imik Neyung yub amba hnon, laga pe lenaʾ sikja boboka lelemeknya nenesa leboka, seleb osik nang edya, sikja ganya era, uka daboka gibnaʾ oulyang damumduk sam eibsa.

¹⁰Anya sikda hyak yeiriwoka bii aboka, banaso wenyalamek, ”Ai, hyak migibaʾ senenggomaʾ yangawolumnya, hyak geisikanya, aldib ok unululamnya o, anda nunja eneng emba leboka, sik sokok ulumak nang ek diriknaʾ ara, lika hekbadya so ublya ek yana lelenaʾ lolomnalam do?” hyek.

¹¹Dara sikenek yok-yok ongon akleng hyak geisa nong anyek elegel yabasuukanya, sikenek anaso wenhyok, sikda or dek-deka soboka diri ul yabamunaʾ ara, sikja hemyab neik wa wen nang eb, sik kabo nang eb, sikja hemyabo men osik sok, nang en eimik neikaʾ amba leboka, nimi wene nang obnemak aboka eininaʾ anyek gigiwalya danyek anasa, or diri ublulum, hyok.

¹²Dara ban domba me ara hnabnya bakal yabok salek, nara kemel yabasa enyek, wera, hyak okna senenggom sogoumaʾ enyek dorogookanya, heng ara hyak mirin nong boksum enesoʾ anyek dookanya, walaʾ ara eneng anaso anyek, hyak eneng ok dangdo lobok.

¹³Wenyek guraʾ imik sam nidyaʾ ara, baroka kaboʾ dolomna enyek, daka-daka malyanggalamla sok, unu daka malyanggalamok.

¹⁴Dara im ara kerobaʾ buku anasoʾ anyek kebok enyek, moksoko mein ab, nauba mek gwan hnoum soko dumung eb dara, nidyaʾ men bukumok oulyang ek ab gogoka-gogoka buru yibuk.

¹⁵Wenyek sokok sam an wenesin dub nang eb, si sinaʾ senenggom nang eb, yin bonaʾ dub nang eb, bonaʾ dub nang eb, migibaʾ obleboka un nang eb, wa orugan enyek wen nanga nidyaʾ ab, yoknya bedya dangoka un gom nang eb dara, ban mok mein enyek an welewoka buru yibilimok girik lum pik hnon, dunuwoka bulumla girik sen-sen pik hnon murugul balamek.

¹⁶Dara sikda ban girik mein danyek an lebekaʾ ara, ”Dakoka nuk sikleweisiminikanya, al imik ekla bunaʾ ak bululanya bedya hogung ak ab, domba me adya waboka osinaʾ ak ab, nunda dokneiyiweisilom,” alamek.

¹⁷Wera sikenek senenggomaʾ lero obnesil sum era seleb yal anasa, heknyek sobaʾ anyaʾ senewoka or sekmoubnamla do?