Read Nalca WAHYU 8 Bible Online

WAHYU 8 - Nalca bible

WAHYU 8

¹Domba me adya sek beknaʾ denenaʾ bakal yabok enyek, imik heikek ara wene salek setengah jam yuba unuruwaʾ orokaʾ anyek deso aro lobok.

²Dara sekbadya lero nang Imik Neyung saramek seklemek nang ek, poo anaʾ benggonga sekbadya elegosukaʾ ak eibsa.

³Dara onoʾ yok lero ben hnon perob meilik yanggola salamoknya be yeiniboka Imik Neyung amba uka daboka gibnaʾ oulyang ak, sekemok. Dara lero ek ara, perob gen-gen song meklaʾ nauba ara, munaʾ Imik Neyung mab edya mololemak molonaʾ anaba uka daboka gibnaʾ oulyang ak sam uka dablulaʾ aboka elegok.

⁴Dara, gen-gen song meklaʾ soloma ab, munaʾ Imik Neyung mab adya molonaʾ ab dara, neikaʾ hiboka lero enedya soruk ak ab ara, Imik Neyung saramek sam welok.

⁵Dara onoʾ lero era meilik yanggol enyek doboka, Imik Neyung amba uka daboka gibnaʾ oulyang ak sam uk ek libookanya, uk era sokok sam nakdo dorogok. Dara, ebnaʾ langom-langom aboka, liming gururu aboka sogoumaʾ dorogok.

⁶Dara sekbadya lero nang era, sekbadya poo anaʾ benggong lebnobaʾ aboka meewoka diri ubek.

⁷Dara men lero era, poo anaʾ benggong lel yabok enyek, saragenaʾ mok eb uk ab eneng ab neikaʾ hiboka sokok sam nakok enyek, mok soko ara, yok-yok naubaʾ anyek winilya geboka, gal donggala anaba winilya geboka, hnon darasam ab, holaʾ nidyaʾ ab dara, uka momnyanga woluwoka jok.

⁸Dara onoʾ penenya lero alja benggonga lel yabok enyek, yokaʾ senenggom mok soko mein anaso uka singilimokaʾ ak anyek soboka, senenggom mek gwanek sam bobogok. Dara mek gwana winilya garawoka, darasam hnonda eneng ok dok.

⁹Wenyek, mek lomok sam ulumlaʾ nidyaʾ ara naubaʾ anyek winilya geboka, darasam hnonda somogok. Anya mek ekla bunaʾ nidyaʾ ara onoʾ winilya geboka, darasam hnonda uka jok.

¹⁰Dara winilinya lero era, alja benggonga lel yabok enyek, senenggom guraʾ hnon sokok sam uk wesaʾ anasoʾ anyek yinggyuk enyek, meka nidyaʾ, mek lu ab, naubaʾ anyek winilya geboka, darasam hnonda uka momnyanga wolubok.

¹¹Guraʾ an malyinggilimokaʾ ara, alja si nera Apsintus sika leleksin guraʾ alamek. Anya, meka nidyaʾ ara, naubaʾ anyek yok-yok winilya garawoka, darasam hnonda sik ok dok. Dara meka nidyaʾ ara, sik hwam ok dangoka, delemek nim era, anedya nauba somogek.

¹²Dara onoʾ dom lero era alja benggonga lel yabok enyek, henga ara darasam soldowookanya, walaʾ ab guraʾ ab dara, joboka, winilyaʾ yok-yok geboka, darasam hnonda gobdo gunaʾ ok dok. Dara, yubyek eb, inimnek eb dara, yok-yok naubaʾ winilya geboka, darasam hnonda gunaʾ ok dangoka ubmoruwok.

¹³Dara onoʾ hnon kelemsa enyek, weidya wininga hnon hyak im nongok lak-laka yabelemookanya, yuba senenggomaʾ anyek, ”Sik sokok ulumak nim ek ara, hyak omom nong ak ubnesil. Onoʾ winilinya lero edya sikja benggong anam lebnamak anasa, hyak omom nong ak ubnesil,” alamokaʾ ak eibsa.