Read Nalca WAHYU 9 Bible Online

WAHYU 9 - Nalca bible

WAHYU 9

¹Lam lero era, alja benggonga lel yabok enyek, guraʾ hnon imik abaʾ ara, sokok malyinggyuk. Dara, an malyinggyuknya nek ara, nimi somoknaʾ gweren selengaʾ pik baknaʾ ek elegokaʾ ak eibsa.

²Dara, somoknaʾ gweren selengaʾ pika bakal yabok enyek, hyak senenggom solom enyek lom enyek anyeb goboka, heng ab, im pika nidyaʾ ara, solom enedya gunaʾ ok neneb lobok.

³Dara onoʾ solom lom enyek anyeb dara, wim kweng mandebnaʾ anyek, goboka sokok yalamek. Wera kweng gong enyek ara, hyak lok so siribnaʾ migib enyek elegok.

⁴Dara onoʾ kweng gong danyek ara, holaʾ ak denggunulum, gal meklaʾ gom, embengaʾ ulumla digum gom ara, denggunulum. Alda sik asok ak Imik Neyung beknaʾ denesinaʾ orok nim enyek ok, delemnelum aboka orugosuk.

⁵Wera onoʾ al neik kweng ek ara, nim ak obnenggunulum bok, walaʾ lambadya ok, oka nauba gweklenokaʾ aboka, igina kweiyiwanasulum aboka, hnon orugosuk. Dara, oka delemnesil ara, siribnaʾ adya nimek si sabsin ek oka delesil sok, unu oka delemnesil.

⁶Unu delemnesil salek era, nim ara men somogonun senewoka, elemnemak bok, somoknaʾ ara, mekaʾ eibnenggunumak. Anya somogeisibya senen ganya nauba bolomnemak bok, somoknaʾ ara sikja dob salawanggunumak.

⁷Dara kweng hogung ara, mala obdan danasa beillilimak abaksin pam hogung anaso uboka, anya pam hukuk ara, dub nang ongolomakaʾ meilik huk golunaʾ goluwoka, sikja hogung era nim hogung anasoʾ ak ulumek.

⁸Sikja hong era, waran uboka, sikja si nera beigam singa si anasoʾ ak ulumek.

⁹Sikja saram ara girik lagasa anaso uboka, sikja ol lak-lak anaʾ era, abaksin pam mandebnaʾ gong, gliboka bolomak e yan glorum-glorum anaʾ eneso ak lelemok.

¹⁰Dara, sikja amo era, siribnaʾ si anaso nekesa yarawoka yu nongaʾ ak uboka, sikja nekesa enedya walaʾ lambadya dara, anadya doboka ol nebsin migib ek ulusuk.

¹¹Anya sikja dubnya bera, somoknaʾ gweren selengaʾ pik amba dubnya ulumok. Alja si nera, Ibrani yub adya dara Abadon alamak bok, Yunani yub adya dara, Apolion alamak. Bok nunja yub edya dara, Soldel meneknanya henemab.

¹²Wera men nimi lobaʾ nenewoka osinaʾ era an bok, onoʾ eimik era, penyaʾ adya obnesiriknya nek hnon lanawanarak.

¹³Dara hnab lero edya alja benggong lel yabok enyek, Imik Neyung bulumlaʾ ak alsamba meilik uka daboka gibnaʾ oulyanga bonga yakaʾ ulumla hnoum ab, senenggom yuba hnon lanawokaʾ ak kebsa.

¹⁴Anya yub enedya dara, hnab benggong lebnunaʾ aboka salamok lero ek an, ”Efrat meka lomok an lero dombadya nang henga gouboka beibsikaʾ anyek, lobsilom,” aboka lelemok.

¹⁵Dara an dombadya lero nang era, ban jam ab, lika ab, walaʾ ab, gibnaʾ ab, obsinokaʾ aboka, meebgogosuk lero nang ek wen sokok an nimi nidyaʾ ara, winilya geboka darasam ara, obsinok aboka lobonggosuk.

¹⁶Wera yin bonaʾ nang era, abaksin pam dubuk abakdiriga yabokaʾ ara, denga yubaʾ salyaʾ anyek, dua ratus juta aboka, einil yabasukaʾ ak okoka kebsa.

¹⁷Hnonda lendar dib eibsaʾ ara, abaksin pam mandebnaʾ ab, pam enyek an obdanobaʾ aboka abakamek nang hogung ak eibsa. Anya, sikja senga enegemekaʾ ara, goron seng eb, mirin seng eb, embengaʾ meklaʾ seng ab, enegemek. Abaksin pam hogung ara, bei gam singa anaso uboka, sikja sibamaʾ lomok ab dara, uk ab, solom ab, yok uk bokaʾ eb, nidyaʾ hibmenegoka neikaʾ goblomok.

¹⁸Dara, sibamaʾ ak ab dara, uk ab, solom ab, yok uk bokaʾ ab goblomokaʾ ara, wera ban winilya obsinaʾ damok era, sokok an ulumek nimi winilya geboka darasam ara obsik.

¹⁹Wera abaksin pam migib era, sibamaʾ ak hnon, amo ak hnon, ulumok. Dara, abaksin pam amo ara, bagaʾ anaso uboka, huka yakaʾ adya, wera anedya nim unuruwaʾ ara olosik.

²⁰Anyek bok, an unuwoka osinaʾ orok nim era, sikja malya unulumekaʾ ak ab ganya dangawanggumek. Hnonda, dangman adya hnon, mal gablenaʾ dabom girik adya hnon, gal adya hnon, yokaʾ-yokaʾ adya hnon, memelemek sununaʾ ek, heng eilinggulumlaʾ, o kenggulumlaʾ, yana yabanggulumlaʾ anyek, gibelmorulumek.

²¹Anya sikda nim onaʾ ak ab, nimi guma gukoka gera dosinaʾ ak ab, gela salanaʾ ak ab, hoka donaʾ ak ab, ganya dangawanggumek.