Read Namrrik Génesis 21 Bible Online

Génesis 21 - Namrrik bible

Génesis 21

¹Nø maig taig købigwan trumay martrab Jehovábe Saran ashchab arrua, nune tru maig trannrrab kørømisrigwan treeg marig købig køn.

²Inchen Sarabe kwanrriig kørrømisra, Abraham kølli misagwei kan nusrkai tøgaguig køn. Tius tru mana tøgagønrrun taig tru uraske.

³Inchen tru Sara tøgaguig unø tru møg-unø kal-labigwane Abrahambe Isaac munchi pasrig køn.

⁴Incha Abrahambe tru nui nusrkai Isaacwan trattrø y pøn kwalømyu circuncidaig køn, Tius maig karuig køben, treekke.

⁵Nui nusrkai Isaac kal-laben, Abrahambe pilamera cien tøgaig købig køn.

⁶Incha Sarabe trenchibig køn: “Tiusbe nane ka intsøg kønrrai marig køn cha. Møikkøben na unø tøgaguin kui wammørøbeløbe naba ketøtø intsønrrun cha.

⁷¿Abrahamwane mugui trenchinrrautah cha, Sara ureg mutsøsrønrrun? chabe. Inchen køben, Abraham ya køllig køben nabe kan nusrkai tranar” chibig køn. Agarwanba Ismaelwanba Abrahamwei Yaugurri Webusriilø

⁸Inchen Isaacbe nurab iben, yandø pitsø kuchen, tru pitsø kuchib kwalømbe Abrahambe larrø tab mamiimera tamarøbig køn.

⁹Inchen Sara ashene, møimbe tru Egiptosrø Agarwei nusrkai tru Abrahamba tøgaguig unø Ismaelbe, nui nusrkai Isaacwane ke ka intsatø ashen,

¹⁰Sarabe Abrahamwane trenchibig køn: —Ñui tru karuindiig megab ishuwane nui nusrkawanba yugurri weguchi cha, kaguende tru ka karuindiig megab ishuwei nusrkaimbe nai nusrkai Isaacbabe chi tøgaguigwan keta tranamigube tøgatø ashchabig kømøn— cha.

¹¹Inchen øyeeg wammerabe Abrahamwane purø murig pubig køn, kaguen nui trag unan øyeeg nebuben.

¹²Treeg kuindøgucha Tiusbe Abrahamwane trenchibig køn: —Ñui karuindiig megab ishuweimburab lata unaimburab lata chi isumøta cha. Sara nø maig taigwan kerriguba ka møra, trunun treeg ka mar cha, kaguende ñuinukkurri amrrunrrab misaamerabe Isaackurri kønrrun cha.

¹³Inchen tru ñui karuindiig megabigwei nusrkaweinukkurringucha truba truba nørrø søtø misaamera kønrrai nabe treeg maramønrrun cha, kaguende ñuinukkurri arrubig kuimba.—

¹⁴Indig katø kwalømbe Abrahambe løtsøzhig kurra, Agarwane pirrin køben, pi niguin kalusyu pi køben trana, kildunyu mutøsra, Ismaelwane yandø ñi ashchig cha nun tranabe, ka amrrigay chibig køn. Inchen nøbe webya ya, Beerseba tru mu misag warab waraimøsrø chu pumikkaig llirab uñibig køn.

¹⁵Inchen tru kalusyu niguin pibe patsaptinchen, unane kan lamø tusr umbusrø wanna,

¹⁶usrimbe truyugurri kan maya yabgøsrøn ashib wanrrab tarømisrøbig køn. Kaguende nøbe treeg isubig køn: “Nai unan kwai ashig kømøtan” cha. Inchen usri wamisren, unøbe trashib kishibig køn.

¹⁷Inchen Tiusbe unø trashib kisigwan møren, Tiuswei ángelbe Agarwan srømbalasrøngurri wama trenchibig køn: —¿Agar, chinnda? cha. Chi kørig isumøta cha. Kaguende unø nø wainukkurri kisigwan Tiusbe mørin køn cha.

¹⁸Kurra ya, unan tasku kemøra, srua pasramisr cha, kaguende nabe nuinukkurri misaamera purø nørrø søtø kønrrai maramønrrun— cha.

¹⁹Inchen tru uras Tiusbe Agarwan kammeran kurøptinchen, nøbe kan pisu waig ashiptinchibig køn. Inchen Agarbe tru pi niguin kalusyu pi netsøgana, unan pizhig srørrøbig køn.

²⁰Inchen Tiusbe unan lincha pasrøben, unøbe nurab ya, mu misag warab waraimøsrø tsua, nøbe arcotøga søl øramibe kan piaig lataig købig køn.

²¹Incha nøbe Paran tru mu misag warab waraimø pirausrø tsubig kuig køn. Inchen usrimbe nune kan Egipto pirausrø ishuuba kasharanig køn. Abrahamba Abimelecba Øyamay Kønrrai martrab cha Kørrømarig

²²Tru kwalømmerawandøwei Abimelecba katø tru nui suldaumeran nø asha karubig Ficolba Abrahamwan trenchibelø køn: —Ñi chi marøb arrigutøgucha Tiusbe ñiba pasran cha.

²³Incha møi yutøwei ñibe Tiusken ashen ¡katø! nabe treeg marmø kømø, maramønrrun taitøga kalø marmørrumøn chirra chibelø køn, tru nan lata, nai nusrkawan lata, nainukkurri amrrub misaameran lata. Incha ¡katø! treeg maramønrrun chirra chibig køn nanba, møi ñi yu tsuim pirau misaameranba tru purainrrab arruatiigwan utabelan tab inchib tøgagørrunrrig cha, tru ñun mandø tab indig køben tru tab indiitøga treetøwei tab inchib.—

²⁴Inchen Abrahambe trenchibig køn: —¡Katø! nabe treeg marmø kømø, maramønrrun— cha.

²⁵Inchendø Abrahambe Abimelecwane ‘ñibe nane øyeeg kalø marig køn’ cha trunun wesrabig køn, tru Abimelecwei karuig mendig melabelø Abraham tru pirø umbugurri pi wesraizhig købigwan nun kerraigwan.

²⁶Inchen Abimelecbe trenchibig køn: —Nabe øyeegwane murreendi mørmur cha. Katø ñigucha nan wammørøsrømøwei inchene, nabe møinguen wammørøb pasrar— cha.

²⁷Inchen Abrahambe ubishamera køben waaramera køben srua arrua, Abimelecwan tranøbig køn. Incha ambugurri, igurri øyamay kønrrab cha wamincha kørrømisrøbelø køn.

²⁸Inchen Abrahambe nui ubisha søtømerayugurri ishug ubisha-ureezheelø trattrø y par, nuingui tarømarøbig køn.

²⁹Inchene Abimelecbe trencha payibig køn: —Iig tru ishug ubisha-ureezheelø trattrø y par tru ñi nuingui tarømariiløbe ¿maig punrrabigwan eshkabig køh?— cha.

³⁰Inchen Abrahambe trenchibig køn: —Tru iig ishug ubisha-ureezheelø trattrø y par iilan na ñun tranen, ñi utiibe tru pirø umbugurri pizhigwane na lalla wesraig købigwan trunun eshkab pasrønrrabig køn— cha.

³¹Incha treekkurri trusrømbe Beerseba cha wamig køn, kaguende tru pa møguelø truyu ambugurri, igurri øyamay kønrrab cha wamincha kørrømisrig kua.

³²Incha øyamay kønrrab cha kørrømisrøbelø køn tru Beersebasrø. Incha Abimelecba katø tru suldaumeran nø asha karubig Ficolba katø filisteosmerai pirøsrømay katø ambubelø køn.

³³Incha Abrahambe tru Beersebasrø kan tamarisco tusr ellguawa pasrabe, Jehová, tru Managurri Managatig Wabigwei munchiwan isub wamabig køn.

³⁴Incha Abrahambe filisteosmeraim pirausrø purø yana tsuig køn.