Read Namrrik Génesis 27 Bible Online

Génesis 27 - Namrrik bible

Génesis 27

¹Indig Isaac yandø larrø kølliizhig misren, nui kammerabe yandø pilømuben, yandø ashchab kaimabig købig køn. Kan kwaløm nui mayur nusrkai Esauwan wamabe, trenchibig køn: —Nai nusrkain— cha. Inchen nøbe: —Nabe yu war— chiben,

²Isaacbe trenchibig køn: —Nabe yandø køllig kur cha. Nabe chi kwaløm kwam kui mørmur cha.

³Pøs, ñibe tru ñui usha kemørøb srua uniilan: tru ñui arconba ñui flechaswanba nemøra srua, wambigwansrø kan usha ørtrab inrrø chibig køn.

⁴Trugurrimbe, na maig chullig kuaasha, kan mamig larrø mayzhig tamara, srua attra chibig køn, na manrrur cha. Trugurrimbe na kwamøwatø mayanguen tabig nebuig kønrrai ñuyasig na Tiuswan mianrrab— cha.

⁵Inchen Rebecabe Isaac tru nui nusrkai Esaúwan waminchen, mørøb wabig køn. Inchen Esaúbe wambigwansrø ibig køn, møskaweyasig kan ushawan pasraara, kweecha, sruattrab.

⁶Inchen Rebecabe nui nusrkai Jacobwane trenchiptinchibig køn: —¡Au! nabe ñui møskai Isaacbe ñui nuneg Esaúba: “Kan usha kemøra larrø may mamiizhig tamara, srua attrig” chib øyeeg waminchen trunun mørar cha.

⁷“Incha nø mamigwan ma, Jehováwei merrab mayanguen tabig nebuig kønrrai ñuyasig na Tiuswan mianrrab chitan cha, nø kwamøwatø.”

⁸Inchawei nai nusrkai na mandø cha karuben, trunun tab mørtra chibig køn.

⁹Møimbe ubishameraba cabrameraba purrabsrømay ya, pagatø purø tab cabro ureemeran sruattra cha. Pøs, nabe ñui møskai maig mabig kui asha truilan larrø may mamiizhig tamaramønrrun cha.

¹⁰Inchen ñibe nø manrrai srua inrrig cha, nø kwamøwatø, mayanguen tabig nebuig kønrrabigwan Tiuswan nuyasig miaben, trunun ñi utønrrig— cha.

¹¹Inchene Jacobpe usri Rebecane trenchibig køn: —Nai nuneg Esaúbe ya isiitø møg køben, nabe ya chigucha isikkaibe cha.

¹²Inchippa nai møskaimbe nan katørawa, nan mugui mørabe, nane isa purø may kebenøsrkøptiig kui martrautan cha. Trubeguende nane mayanguen tabig nebuig kønrrai nayasig Tiuswan miai urasbe nane masken larrø kaig nebuig pasramigwanguen miawa pasrtrautan— cha.

¹³Inchene usrimbe trenchiptinchibig køn: —Nai nusrkai, ñun trømbøig nebunrrabiibe nan nebunrrain cha. Na maig taigwan mørøptø møra, srua amø— chibig køn.

¹⁴Inchen nøbe ya srua arrua, usran tranen, usrimbe møskai maig chullig kuaasha, treeg tamarøbig køn.

¹⁵Incha trugurrimbe usrimbe mayur nusrkai Esaú kewa uniilø purø tabig yau purrabelan Jacob wendø nusrkawan kenanøbig køn.

¹⁶Incha trugurrimbe tru usrimbe Jacobwane tasiguba, katø nukaburab chi isikkayube tru cabro ureezhelai kalusmeratøga pinøbula,

¹⁷trugurrimbe tru may mamiizhig tamarigwanba, tru pirrin tamarigwanba Jacobwan tranøbig køn.

¹⁸Inchen Jacobpe møskaweimbulu puabe, trenchibig køn: —¡Nai Papá!— cha. Inchene Isaacbe trenchibig køn: —Nabe yu war cha, nai nusrkai. ¿Ñibe mø nusrkain kugu?— cha.

¹⁹Inchene Jacobpe trenchiptinchibig køn: —Nabe Esaú, ñui mayur nusrkain kur cha. Nabe ñi maig taigwan marar cha. Kurra, wamisra na kemøra srua arrigwan ma chibig køn. Tru mayanguen tabig nebuig kømigwan nayasig Tiuswan miaben na utønrrab— cha.

²⁰Inchen Isaacbe nui nusrkawan trenchibig køn: —Nai nusrkai, ¿Mandø incharre malla wetørragu?— cha. Inchene Jacobpe trenchibig køn: —Jehová ñui Tiusbe nan petø wetørramig purugutan— cha.

²¹Inchen Isaacbe Jacobwan trenchibig køn: —Nai nusrkai møimbe kemall cha, na katøranrrumøn cha, isa kømø, nai nusrkai Esaú køtamørtrab cha kabe peg kuin kui.—

²²Inchen møskai Isaacwan Jacobpe kemallen, nøbe katørawabe, trenchibig køn: —Wambe Jacobwein købendø, tasiimerabe Esaúwein købwain inndan— cha.

²³Pøs nøbe møig kui mørtrab kaimabig køn, kaguende tasiimerabe Esaúwei tasiimera lataig isiiteelø køben. Incha mayanguen tabig nebuig kømigwan yandø ke tranntrab inchabe,

²⁴Isaacbe katøle payibig køn: —¿Ñigan isa kømø, nai nusrkai Esaú køtirru?— cha. Inchen Jacobpe: —Nabe truwein kur— chiben,

²⁵Isaacbe trenchibig køn: —Ñi kemøra srua arrigwan na manrrab srua attra cha, na ñun mayanguen tabig nebuig kømigwan tranrrumøn— cha. Inchen Jacobpe mamigwan srua kemallen, Isaacbe mabig køn. Incha katø vinogucha srua arruben, trunungucha muchibig køn.

²⁶Inchen Isaacbe nusrkawan trenchibig køn: —Nai nusrkai, møimbe kemalla, nan mucharra— cha.

²⁷Inchen Jacobpe kemalla, muchaben, Isaacbe tru nui nusrkai kewa pasrailan irrømørabe, mayanguen tabig nebuig kømigwan tranøb trenchibig køn: —Nai nusrkaimbe wambigwansrø chi købigwan Jehová mayanguen tabig kønrrai mari lataig irrabig køtan cha.

²⁸Tiusbe tru ellmariiløyu srømbalasrøngurri serenu peñibzhigwan tranrrun cha. Inchen pirøbe misramburab misren, tirigumera misrøb, vinomeragucha nørrø weguchib inchun cha.

²⁹Tru misag søtømera nørrø pønrrabeløbe ñun utsøbasrtrun cha. Inchen ñibe ñui nunelane ñi karubig kønrrig cha. Inchen truiløbe ñui merrab utsøbasrtrun cha. Ñun ‘trømbøig nebunrrain’ chib pønrrabeløbe, nøm trømbøig nebuilø kønrrun cha. Inchen ñun ‘tabig nebunrrain’ chib pønrrabeløbe, nøm tabig nebuilø kønrrun— chib.

³⁰Inchen Isaac tru mayanguen tabig nebuig kømigwan Jacobwan chab tranen, Jacobpe møskaweinukkurri webiben latatø, nuneg Esaúbe wambigwansrø usha kemørøb uña puptinchibig køn.

³¹Incha nøgucha kan mamig mayzhig tamara, nui møskaweimay srua arruabe, trenchibig køn: —Nai papá, wamisr cha. Na ñui nusrkai kemøra srua arrigwan manrrig cha, ñi nan mayanguen tabig nebuig kømigwan nayasig Tius nan trannrrai miarrunrrig— cha.

³²Inchene Isaac møskaimbe trenchiptinchibig køn: —¿Trube, ñibe mugugu?— cha. Inchen nøbe: —Nabe tru Esaú ñui mayur nusrkain kur— chiben,

³³Isaacbe itønab menda, purø kørrø kwaarig, trenchibig køn: —¡Paare! ¿Trube muguig køh? cha, tru usha kemøra srua arrubiibe. Pøs, ñi arrumøwatø, srua arruben, nabe kerrigu chab maig køn cha. Incha nabe mayanguen tabig nebuig kømigwan nun chab tranig køn cha. Pøs, tru mayanguen tabig nebuig kømigwan tranigwane nøbe tøga kørrømisrtrun— cha.

³⁴Inchen Esaúbe møskai trendaig wamwan mørabe, truba mur wamab trashib, purø kørrø isui inchib ¡karren kønrrab! chib kishibig køn, trenchib: —Nai møskai, tiusmanda nangucha tru mayanguen tabig nebuig kømigwan trannrra— cha.

³⁵Inchen Isaacbe trenchibig køn: —Ñui nuneebe arrua, nane purø may isa, tru mayanguen tabig nebuig kømig ñuin kønrrabigwan nø uta, tøga, yan— cha.

³⁶Inchene Esaube trenchiptinchibig køn: —Nune Jacob cha wamappe, trendambuawei trendaig kuin køn cha. Pamayguen køn cha, nan øyeeg isa kebenøsrkøb arrig, srøtøbe na mayur nusrkain kuimburø na uta tøgagømigwan nø kerraig køn cha. Møimbe tru mayanguen tabig nebuig kømig naiwan katø nøtøwei uta tøga yain køn— cha. Inchabe katø trenchibig køn: —¿Nayasikkan tru mayanguen tabig nebuig kømigwan tranamig maitøguen tøgagømøtirru?— cha.

³⁷Inchen Isaacbe trencha løtabig køn: —Nabe ñune Jacob karub tøgagønrrai Tiuswan miar cha. Incha katø nui misaamerabe Jacob manchiben marøb melabelø kønrrai miar cha. Trurrigu nøbe tirigumera nørrø tøgagøb, vinomera tøgagøb inchai miar cha. Nai nusrkai, ¡Møimbe yandø ñuyasiibe chi maramig kaatan!— cha.

³⁸Inchen Esaúbe møskawan trenchibig køn: —Nai møskai, tru mayanguen tabig nebuig kømigwan tranamiibe kabe ke kanzhiitø kuig kuitarru cha. Nai møskai, nangucha tru tabig nebuig kømigwan trannrra— cha. Incha srawa, srawaa kishibig køn.

³⁹Inchene Isaacbe trenchibig køn: —Ñibe misrøb pirømerasrøngurri purø yabsrø tsunrrabguen cha, katø srømbalasrøngurri serenu peñibig nebumøsrø.

⁴⁰Ñibe ñui espadatøga kwayawatøwei øsig tsunrrabguen cha. Incha ñibe ñui nuneg karuindiig megamig nebunrrun cha. Inchendø ñun megamgaig misrøb arruben, ñibe truyugurri welulrrabguen— cha. Jacob Esauwan Kørab Lulamig Nebub

⁴¹Indig truyugurrimbunø Esaúbe Jacobwan purø trømbøig ashig kømui inchibig køn, nui møskai tru mayanguen tabig nebuig kømigwan nun tranikkurri. Incha nøasiitøwei trenchibig køn: “Maya yanayutø namui møskai pinøben, larrø isuin pønrram kwalømmeragucha attrun cha. Yandø trugurrimbe si, pinisamønrrun cha, nai nuneg Jacobwan.”

⁴²Inchen Rebecabe tru Esaú øyeeg martrab isub unigwan wammørabe, Jacobwan wamønrrab øra, trenchibig køn: —Ñui nuneg Esaúbe ñun nøgucha lata martrab ñune kwetchab tan cha.

⁴³Inchawei nai nusrkai na maig taigwan møra mar cha. Nai nuchag Laban Haran pirau tsuisrømay trubab inrrø chibig køn.

⁴⁴Trusrø kan maya yana køsrøn tsunrrig cha, ñui nunewan namig købig purayamne.

⁴⁵Ñui nunewei namig købig yandø patsab, tru ñi nun chi mariilan nø pesannabene, ñibe katøle attrai, trube, eshkawa øramønrrun chibig køn. Nai pagatø nusrkalan ke kan kwalømyutø parba pini asha wag kømøtan— cha.

⁴⁶Incha Rebecabe Isaacwan trenchibig køn: —Nabe nai øsig unigu larrø trømbøig kui uñar cha, tru hititas ishumburmeragurrindø. Jacob yu Canaán pirau hititasmeraba kasharabene, chinchib øsig tsumuinguen kønrrautan— chibig køn.