Read Namrrik Génesis 3 Bible Online

Génesis 3 - Namrrik bible

Génesis 3

¹Inchen tru ulbe maya ushamera lataguen kømø, chigøben maramigwane purø may isua marøbig købig køn, Jehová Tius nø mariiløyu. Incha tru ulbe ishuwane trenchibig køn: —¿Kabe Tiusbe ñimungan tru ellmarin tulyuigwan ni mø tusryuigwanguen kerriguwan mamønrrain taig kuitarru?— cha.

²Inchen ishuube ulwane trenchibig køn: —“Tulyu pønrrab tusryu mamiimerane ka manrrigay” taig køn cha.

³Inchendø tru ellmarin tul tøbøtag pasrab tusryu mamigwane Tiusbe øyeeg taig køn cha: “Mamønrrigay cha, ni katøramøwei inchigay taig køn cha, kwamig kømønrrai”.—

⁴Inchene ulbe ishuwane trenchibig køn: —Ñimbe kwamønrrabguen cha.

⁵Tiusbe asha køn cha, ñim tru tusryuigwan mab kwalømbe, ¡katø! chinetø nebua asamigwan ñimui isubig kuren, ñimbe Tius lataitøwein kønrrabguen cha, kaigwanba, tabigwanba nebua ashibelø.—

⁶Inchen ishuube tru tusryuigwan larrø chull mamdiig kui ashib, trurrigu tru tusryu mamiibe larrø mayzhig kønraptiig kui ashib, katø chiwandøgucha larrø kusrebig kuinrrabna isumig purø chull kønrraptø tusr kui ashib inchibig køn. Incha tru tusryu mamigwan nemørøb, maptinchibig køn. Inchabe kewangucha srørren, truikkucha mabig køn.

⁷Inchen møimbe tru pailanba, ¡katø! chinetø nebua asamigwan nømui isubiibe kurøptinchen, nømbe køsaateelø købrain kui wetøgørra, nømbe higuera ishiimeran tsusha, søtøgasrailø marøbelø køn.

⁸Inchen yandø mawab misrøb pishi isig ichibig webarruben, tru ellmarin tulyu Jehová Tiusbe llirab arri møra, møøbe nui sraimba tusr utumerawansrø trubabelø køn Tius nø pasrainukkurri.

⁹Treendingucha Jehová Tiusbe møwan wamabe, payibig køn: —¿Ñibe chu pasrøgu?— cha

¹⁰Inchene møøbe trenchibig køn: —Tru ellmarin tulyu ñi llirab arri nabe mørøptindinaben, nane truba kørig køtan cha, kaguende nabe køsaatiig købrain købtinchen, treekkurri nabe trubar— cha.

¹¹Inchene Tiusbe trencha payibig køn: —¿Ñune køsaatiig køn chabe, mu eshkata? cha. ¿Na mamønrrain taig tusryu mamigwan ñibe mappeendi?— cha.

¹²Inchen møøbe trenchibig køn: —Tru ñi nan lincha pera uñchai trani ishug tru tusryu mamigwan nan srørren, nabe mar— cha.

¹³Inchene Jehová Tiusbe ishuwane trenchibig køn: —¿Øyeebe chi margu?— cha Inchene Ishuube —Tru ul nan purø may wamincha isøben, nabe mar cha— trenchibig køn.

¹⁴Inchen Jehová Tiusbe tru ulwane trenchibig køn: —Ñi øyeeg marikkurrindø maya ushamerai utu ñibe larrø trømbøig nebuig kønrrig cha, kusreeg ushamerai utu lata, namig ushamerai utu lata. Patsøtøgatø sraløb uña, ñi chugatig øsig tsuingatiibe pirøyu usrøwan manrrig cha.

¹⁵Incha ishuuba ñibabe larrø ashig kømuindiyabelø kønrrai maramønrrun cha, ñuinukkurri amrrubeløba, katø ishuweinukkurri amrrubeløba. Incha tru ishug misagweinukkurri srøig srøig kurrab arrubiguig ñune turwan pusøbunøben, ñibe nune talunyu tsatchun— cha.

¹⁶Incha ishuwane trenchibig køn: —Ñune unø tøgamisrøbyu pusrkwabigwan masken trømbøig pusrkwanrrai nemaramønrrun cha. Purø trømbøig pusrkwai incha, ñui ureemeran tøgamisrtrabguen cha. Inchen ñi ureg tøgagukkøb chull isuibe ñui kewein køben, ñui keebe ñune nø karub nø ashchabig køn— cha.

¹⁷Incha møwane trenchibig køn: —Ñi ñui srawei wamwan manchitanmaptø mørøb pasrøwa, na mamønrrig tain tusryu mamigwan ñibe main køn cha. Ñigurrindø pirøbe larrø trømbøig nebuig pasrønrrun cha. Ñi chugatig øsig tsumnegatiibe ñibe ¡katø! isua møra marøb megawabe, truyugurri manrrabguen cha.

¹⁸Inchen pirøbe tsøshambah, kaldusrmerabatø misren, mappe, kau umbu tusrmerandø manrrigay cha.

¹⁹Ñibe pøsra, pøsra mara mamig tøgagønrrig cha, ñi katøle pirøtøwei misramnegatikke, kaguendø ñibe pirøtøga mara pasrig køn cha. Ñibe pirø usrø kuig køppe, katø ñibe usrøtøwei misrtrabig køn— cha.

²⁰Inchen Adánbe nui srawane Eva munchi pasrøbig køn, kaguende Evabe maya misagwei usrin kønrrabig kuimba.

²¹Jehová Tiusbe møweimba, nui sraweimba kemelø ushamerai kalusmeran mara, kennøbig køn.

²²Incha Jehová Tiusbe trenchibig køn: “Møøbe møimbe kan møig køben nam lataitøwei misra pasramisrin køn cha, tabigwanba, kaigwanba nebua ashibig. Pøs, nui tasigwan larrøbitchain kømøn, chibig køn, tru øsig køm tusryu mamigwangucha nemøra, truigwan ma, managatig øsig kønrrab.”

²³Incha Jehovábe tru Edén tulyugurri nømun webusrøbig køn. Incha pirøwan kwallchain pasrig køn, tru nun mara pasrin pirøwan.

²⁴Incha møwan wambig wegucha, Edén tru tulyu pørr kal labgatømay querubinmera pønsra, katø kan espada naarabig amburab, iburab llirabig pasrøbig køn, managatig tru øsig køm tusryumay ambam maywan pumønrrai martrab.