Read Namrrik Génesis 37 Bible Online

Génesis 37 - Namrrik bible

Génesis 37

¹Jacobpe nui møskai kørrømisra tsui pirau truyu kørrømisra tsuig købig køn, tru Canaán pirau.

²Iibe Jacobwanba nui yaambu misaameranba maig pureb arrigwan waminchibig truig køn: Josébe pilamera diecisiete tøgaig kua, ubishameranba, cabrameranba nui nuneløba ashib tøgagøbig køn, tru møskawei ishumburmera Bilhaimba Zilpaimba truiløbe nusrkalø køben. Incha Josébe tru nuneløbe søl kømøtiig marøbelø køn chib møskawane eshkabig køn.

³Incha kerrigu maya nusrkalan lataguen kømøtø, tru Israel Jacob taig købiibe Joséwane truba undaguig købig køn, kaguende nø køllimbala tøgagui unø kuimba. Inchagurri pala itø kemig larrø tab tsurøzhig maringarubig køn.

⁴Inchen nømbe nøm kerriguelan lataguen kømø, Joséwane mas undaarai ashabe, yandø tsalø ashib menda ni kan wamzhikken tammaybe wamømeelø køn.

⁵Indiibe Josébe kan piji kan piaig tøgagua, nunelan waminchen, trugurrimbe nuneløbe masken tsalø ashibelø køn;

⁶kaguen nøbe trenchib eshkabig køn: —Nan piaigwan ñimun eshkanrrab inchar cha, mørtray cha:

⁷Møimbe nam trausrø warøwa, tirigu lusrømera lusrøb købene, møimbe nai tirigu lusrøbe pasramisrøppe, ke ølgandøzhig pasramisrøptindan cha. Inchen ñimui tirigu lusrømerabe tru nai tirigu lusrø pøtøgatan pønrramisrøppa, purø tab inchib ke nai tirigu lusrømaygøba utsøbasrøptinchimøh— cha.

⁸Inchene nuneløbe trencha kusrua løtabelø køn: —¿Treekkan namui rey misra, namune ke ñi karub tøga pasrønrrab inchib pasrøtirru?— cha. Incha masken ashig kømui inchibelø køn, tru piailan, nø waminchen.

⁹Incha Josébe katøgan piaig tøgagua nunelan katø treeg eshkabig køn: —Møimbe katø nan piappe, pørrba, pølba pa trattrø y kan kønchabiimeraba nan tab inchib utsøbasrøb piatan— cha.

¹⁰Incha møskawanba, nunelanba treeg eshkabene, møskaimbe øyeebe chisun waminchab arrugu trenchiptinchibig køn: —¿Tru ñi øyeeg piaig tøgaguitøgabe namune manchibrre inchigu? cha. ¿Ñui usrimba, ñui nuneløba, naba, kabe ñun piraugatig utsøbasrtrain kønrrab kø chindah?— cha.

¹¹Inchen nuneløbe larrø pusrkwai inchibelø køn. Trune møskaimbe øyeeg piaibe chiguermab wetøbeñimmørø chu uragucha isub sulu uñibig køn. Joséwan Nunelø Yanig

¹²Indiibe yandø treeg purayai wendø Siquémsrø nui nuneløbe møskawei ubishameranba, cabrameranba pu lawa mannrrab amben,

¹³Israelbe Joséwane trenchibig køn: —Ñui nuneløbe Siquémsrø ubisha ashib waran cha. Amø cha, trusrømay inrrig— cha. Inchen Josébe: —Øø, inrrur— chibig køn.

¹⁴Inchen Israelbe trenchibig køn: —Ashchab ya, tru ubishameraba cabrameraba, ñui nuneløba maig warai ashabe, wam srua attrunrrig— cha. Incha Hebrón chaasrøngurri inrrai ørøbig køn. Inchen Josébe ya, Siquémsrø pubig køn.

¹⁵Indiibe Josébe trusrø pua, truba lab llirab uña, pella pasrøbene, kan møg katabe, payibig køn: —¿Chi lagu?— cha.

¹⁶Inchene Josébe: —Nabe nai nunelan lab uñar cha. Chu ubisha ashib warai ñibe tiusmanda eshkabsrumuguh— chiben,

¹⁷tru møøbe trenchibig køn: —Yugurrimbe chab ambubguen indig køn cha. Inchendø: “Dotánsrømay amrrab” taig nabe mørig køn— cha. Inchen Josébe nunelan lab ya, Dotán tru misag søtømera warainug kømøtø, wambig nøørøsrø wetørrabig køn.

¹⁸Inchen nømbe yabsrø arri ashabe, nømuimbulu pumøwatø, nømbe kwetchab waminchibelø køn.

¹⁹Incha kangurri kangurri trenchibelø køn: —Ñimguen asay cha, tru piainabiibe øsrø arrun cha.

²⁰Møimbe amrrui chibelø køn, kweecha, kan aljibe laligu kegutchab cha. Incha: “kan namig usha kweecha, main køn chinrrab” cha. Er nui piailøbe maig indashchab— chibelø køn.

²¹Inchen Ruben iigwan mørabe, nømui taskabe chi marmønrrai isua: —Kweechimugun chibig køn.

²²Ñimbe ani lushmøtø, mu misag warab waraimønug aljibe lalig pasrabnug kegutsay chibig køn. Inchendø ñimui taskabe chi marmøtay— cha. Rubénbe øyeeg chippe, Joséwane katøle wesrawa, møskaweisrø pegutchab isuig køn.

²³Inchen José nunelaimbulusrø pubene, nømbe Joséwane tru nø pala itøguewa pasraig tab tsurøzhigwane kerrawa,

²⁴nune kemøra, tru pi wesramig trab lalig pasrabigu keguchibelø køn. Inchendø tru trab laliibe chi pigaig pur pasrabig køn.

²⁵Inchabe yandø nømbe manrrab purramisrøbelø køn. Inchen nøm ashene, Galaadsrøngurri kan søtø ismaelitasmera amrruptinchibelø køn, camellosmerayu niisrar larrø may irrabzheelø, balsamo køben, mirra køben tru Egiptosrømay.

²⁶Inchen Judábe nui nunelan trenchibig køn: —Namui nunewan kweechabe, chi mariasamø cha, kweecha tre marigwan søratø tøgaguabe.

²⁷Trembe ismaelitasmeran yangun chibelø køn. Namui taskabe chi kaig marmønrrab cha, kaguendø nøbe namui yaundøwei namui nuneg køn— cha. Inchen nuneløbe trumay kørrømisrøbelø køn.

²⁸Inchen tru madianitasmera chine penab, yanøb inchibelø amrruben, Joséwei nuneløbe tru aljibe trab lalig pasrabigugurri wesrawa, pib tratrø an pitiswei yanøbelø køn. Øyamay Joséwane Egiptosrømay srua ambig købig køn.

²⁹Indig yanayu Rubénbe tru aljibe trabsrømay arrubene, møimbe Josébe yandø mugaagøptinchen, nøbe isuptø nui kewa pasraigwan kølsrøptinchibig køn.

³⁰Incha nunelan trenchinrrab ibig køn: —Yandø matsinube mugaagøn cha. ¿Nabe møimbe chindamer?— cha.

³¹Incha nømbe kan cabro unø kweecha, José pala itøguewa unigwane tru aniyu kebisha,

³²tru Joséwei kewaguig tab tsurøzhigwane møskaweimay trana ørøppe, øyeeg cha ørøbelø køn: —Nambe øyeeg wetørrer cha, ñui nusrkawein kui, ñui nusrkawein kømui muingøtashchab tab ashchig— cha.

³³Inchen Jacobpe trunun nebua ashippe: —Nuiwein køn chibig køn. Kan namig usha webarrua kemøra, pitis mara, mainrrun— cha.

³⁴Incha Jacobpe nui kewa kuigwan kølsra, trøsrkølig kewa, nui unø pinigwan purø yanasrøngatig isub kørrømisrig købig køn.

³⁵Inchen nusrkaløba, nimbasrmeraba isumønrrai maya, maya inchib melaingucha, nøbe trunune mørøg kømui inchibig køn. Incha nusrkawan isub, kishib trenchibig køn: —Kwabelø israb waraisrø na nøba tsunrrab yamnegatig nai nusrkawane isub tøga kømønrrun— cha.

³⁶Inchen Egiptosrømbe tru madianitasmerabe tru Josewane Potifarwan yanøbelø køn, tru Faraon lutø tranigwan marøb pasrabig, tru suldaumera reywan chigøben kømønrrai ashib pønrrabelan nø asha karub pasrabigwan.