Read Namrrik Génesis 42 Bible Online

Génesis 42 - Namrrik bible

Génesis 42

¹Inchen Jacobpe Egiptosrømbe mamiimera køn tai wammørabe, nui nusrkalane trenchibig køn: —Mailø køh cha, kangurri kangurri asiyab purrønrrappe.

²Egiptosrømbe mamig køn tai wammørar cha. Trusrømay kørraamba, namuyasig mamig penay cha, kwamø, øsig waramig kønrraimbe.—

³Inchen tru Joséwei nunelø tru pa trattrøeløbe Egiptosrø mamig penønrrab kørraambubelø køn.

⁴Inchendø Jacobpe tru Joséwei nuneg Benjaminwane ørmíig køn, tru nui nuneløba: “Inchippa mayu chigøbendø nebubgun” cha.

⁵Inchen Israelwei nusrkaløbe mamig penønrrab ambubelø køn, tru katøganelø penønrrab ambubeløba, kaguende Canaán piraube parø purø trømbøig pasrøben.

⁶Inchen Josébe tru pirau nø ashib karubig købig køn, katø chu pirausreelan køben maya misaameran tirigu yanøbig. Inchen Joséwei nunelø trusrø puabe, nømui kappalømeran pirausrøngatig kebachib utsøbasrøbelø køn.

⁷Inchen Josébe tru urastø nømune nui nunelø kui møi møi nebua ashibig køn. Inchendøgucha ashmíig misrøppa, nømune purø tsag waminchib trencha payibig køn: —¿Ñimbe chugurri amrrugue?— cha. Inchen nømbe: —Canaán pirausrøngurri tirigu penønrrab amrruer— chibelø køn.

⁸Inchen Josébe nui nunelø kui ashen, nømgurrimbe ashmeelø køn.

⁹Inchen Josébe nun tru nømuimburab piaig købigwan isuptinchibig køn. Inchabe trenchibig køn: —Ñimbe i pirau kwayanrrab mubørab mas may kegørramdiig køtashib ka larønrraptørre amrrun— cha.

¹⁰Inchen nømbe trenchibelø køn: —Ñi, namui karubig, chi treeg kømøn cha, nam ñui karuig melabeløbe tirigu penønrrab amrruig køn cha.

¹¹Nambe mayeeløba kan møskaweindø nusrkalø ker cha, nambe chigøben kalø marøb pønrrømø misaamera, nam ñi karuig melabeløbe maisrøn køtashib kalø martrab larab amøñimø misaamera ker— cha.

¹²Inchene Josébe trenchibig køn: —Kah cha, ñimbe i pirau kwayanrrab mubørab mas may kegørramdiig køtashib trunun ashchaptøwei amrruin køn— cha.

¹³Inchen nømbe trenchibelø køn: —Nam ñi maig chiben pønrrabelø pa trattrø y par købelø kuig køn cha, nambe søteeløba kan møskaweindø nusrkalø Canaán pirau tsubigwei. Inchen mas unøbe namui møskaimba kørrømisren, kane yandø pinig mugaagøn— cha.

¹⁴Inchen Josébe katøle trenchibig køn: —Na maig taig ñimbe maisrøn køtashchab nilø ka larønrraptørre amrrun cha.

¹⁵Incha isa kømø, ñimui wamindig cierto kuitashchab Faraónwei merrab, ¡katø! nabe øyeeg maramønrrun cha, trendamønrrun chibig køn, ñimui wendø nuneg-unan yumay pera amrrumuingatiibe ñimbe yugurrimbe webamrraamøn cha.

¹⁶Ñim møigwan køben øray chibig køn, tru ñimui wendø nunewan pera attrai. Inchen katøganelane keera purrønniilø purrønrrain cha, trumaybe asamdiig kønrrun cha ñim sølwan waminchibelø kuin kui. Inchen ka isatø indin kuisruandøbe, ñimbe maisrøngøtashchab ka larønrraptørre amrruar køn cha, nabe Faraónwei munchiyu trendamønrrun— cha.

¹⁷Incha tru nøm pa trattreelane Josébe pøn kwaløm ørøba keerig purrønrrai marøbig køn.

¹⁸Inchabe pøn kwaløm puraibene, trenchibig køn: —Nabe Tiuswane larrø køriibala pasrabig kur cha. Øyamay maray chibig køn, ñim øsig webamrrappe:

¹⁹Ñim isa kømø, chigøben kalø marøb pønrrømø misaamera kuabe, møikkøben ñimui kan nunewan keera awannig kørrømisra wanrrain cha. Inchen kaneløbe ñim ñimui yau misaameran parø purørmønrrab mamiimera srua ambay cha.

²⁰Incha ñimui wendø nuneg-unan pera amrrurrunrrigay cha. Trumaybe isa kømø ñimbe sølwan waminchibelø kui asha, ñimbe kwamig kømønrrun— cha. Inchen nømbe treegwan martrab kørrømisrøbelø køn.

²¹Inchabe kangurri kangurri trenchibelø køn: —Isa kømø, nambe namui nuneweimburab larrø trømbøig kalø marig køn cha. Pøs øyeekkatiibe marmørrunrrigay chib nø namun truba truba trenchib megaben, nambe trendaigwane ni mørøkkuinguen kømuin pønrraig købig køn cha, yeeg lastima isui indi ashatøgucha. Truburø møimbe øyeeg isuin pønrramig namuimbala itøarrin pønrrer— cha.

²²Inchene Rubénbe trenchibig køn: —Unane chi kaig marmøtay chiben, ñimwei nan mørmuig køn cha. Møimbeguende namune nui animbe ulø payinab pønrramig kønrrab køn— cha.

²³Inchen Josébe nø wamindi wamwan nui nunelan katøburø lliska waminchabig katøgan pera pasrabig køn. Inchagurri nuneløbe nøm chi chib pønrrailane Josébe mørøb pasraitamappe isumeelø køn.

²⁴Inchen Jøsebe nømuim pulugurri tarømisra ya, truba kishababe, trugurri katøle nømuimay arrua, nømba wamincha, Simeónwane nøørø mara, nøm ashib pønrramne lusringarubig køn.

²⁵Incha trugurrimbe Josébe nømui kustalmerayu tirigu netsøganingarua, katøle tru nømui tiriguburø pagarai anmerane kanun, kanun tru nømui tirigu kustalyu pusringarub, katø mayuwei ishin tamara traningarub inchibig køn. Inchen treeg marig køn.

²⁶Inchen nømbe nømui tirigumeran burrumerayu niisra truyugurri ambubelø køn.

²⁷Incha nømbe tru kørrømisra kiamsrø puabe, møikkøsrøn nui burrun tirigu mannrrab kustalwan pichene, møimbe nui anbe kustalrrigu ka wai ashiptinchibig køn.

²⁸Inchen nøbe nui nunelan trenchibig køn: —Nai anwane nane katøle pusrin kømøh cha. Yu nai kustalyu ka purran— cha. Inchene nømbe larrø kørrø kwariilø, nømui manrrøbe ke webørsrab lata inchen, kangurri, kangurri trendiyabelø køn: —¿Namun øyeeg nebuinab pønrramig kønrrai kabe Tius treeg mara chinderah?— cha.

²⁹Inchen nømbe Canaán pirausrø møskai Jacob waisrø chab puabe, nømun kerrigu chi purayaigwan eshkab trenchibelø køn:

³⁰—Tru pirausrø karub wab møøbe namune purø tsag wamincha, nui pirøwan maig køtashib namune larab amrruig treeg kemesrøtan cha.

³¹Inchen: “Nambe chigøben kalø marøb pønrrømø misaamera, managuen maig køtashib larab amøñimeelø ker cha, nambe trender cha.

³²Incha katø nambe nune trenchibelø ker cha: “Nambe pa trattrø y pa nunelø, katø søteeløba kan møskaweindø nusrkalø, kane yandø pinig mugaaben, srabeibe ñiba Canaánsrø kørrømisran” cha.

³³Inchene tru pirausrø karub wab møøbe namune trenchitan cha: “Nabe ñimune øyamay marigu asamønrrun cha, ñim chigøben kalø marøb pønrrømø misaamera kuitashchab ashchab, møigwan køben, ñimui nunewan yu naba kørrømaray cha, kaneløbe nømui yauelan parø purammønrrai tirigu niisra amrrai.

³⁴Inchendø katø amrruppe, wendø nunewan pera amrrunrrigay chitan cha. Trumaybe ñim isa kømø chigøben kalø marøb pønrrømø misaamera, ka maig køtashchab ashib ka larønrraptø amrrumuin kui asamønrrun cha. Trugurrimbe ñui katøgan nunewan elachen, ñimbe i pirau mu chi taimíig yanøb, penab amønamig kønrrun” chitan— cha.

³⁵Inchen tru Joséwei nunelø tru kustalmeran kwarøb mendøbene, nømui kustalmørig kan talegu-unøzhigu nømui tru tiriguburø pagarai anbe ka purraptinchen, nøm lata, nui møskai lata tru an pusri talegu-unøzhigwan kura ashabe, purø kørig isubelø køn.

³⁶Inchene møskai Jacobpe nømune trenchibig køn: —Ñimbe nane yandø chi nusrkaløgaig kørrømarøb amrrutan cha. Josébe yandø pinig mugaaben, Simeóngucha mugaaben, møimbe Benjaminwan pera amrrab indan cha. Iibe kerriguba naimbalatø pureb attan— cha.

³⁷Inchen Rubénbe møskawan trenchibig køn: —Benjaminwane na ashchur cha. Na Benjaminwan ñuimay katøle pera pumubene, nai pagatø nusrkalan kwetchig— cha.

³⁸Inchene Jacobpe trenchibig køn: —Nai nusrkaimbe ñimba inrraamøn cha. José nuneebe yandø kwaig mugaaben, møimbe nøtøwein kørrømisra megan cha. Mayu chigøben kaig nebubene, chi martrague cha, trube, ñimgurrindø kønrrun cha, køllig waacha isubigutø kuabene.—