Read Namrrik Mateo 12 Bible Online

Mateo 12 - Namrrik bible

Mateo 12

¹Inchen tru uras kan isrin kwaløm Jesús tirigu ellmari utuwan pureb ibene, nui kusrenanøb pera uniiløbe parøgwaben, tirigu turwan lurra, trulwan mab mendabelø køn.

²Inchen fariseosmerabe asha, Jesúswan trenchibelø køn: —Au, ñui kusrenanøb pera uniiløbe isrin kwaløm chigøben marmønrrai merigwan marøb køn— cha.

³Inchene nøbe trencha løtabig køn: —¿Ñimgan lemeelø køtirru cha, mana køsrøn Davidwanba nui linchibelanba parøgwaben mandø indigwan?

⁴Pøs truima Tiuswei carpa ya tabzhigu kebya, nøba nui linchibeløba Tiusweyasiitø tarømarig pirrimeran maig købig køn tan cha, ni nun lata, nui linchibelan lata mamønrrai merigwan, tru sacerdotesmeratø mamigwan.

⁵¿Kabe ñimgan tru maig maramigwan martrai Moisés pørigu lemeelø køtirru cha, isrin kwaløm kuindøgucha sacerdotesmera Tiuswei yau marøb purrappe, isrin kwaløm kømui lataig, isrømø, marøb purrøben, truigwanma Tiusbe kalø kui asig kuitarru? cha.

⁶’Inchen køben nabe ñimune trenchar: Tiuswei ya lataitøguen kømøtø, mas purø nuikken kur cha, na yu pasrabiibe.

⁷Ñimbe ni chi tainguen mørmuin køn: “Animal kweecha, Tiuswan tranøb kømøtø, ñimbe lastima ashibelø kønrrai inchar” taigwan. Tru trendaigwan ñim mandø kui mørig kuimbe, kaig mara kømeelane ‘øyeeg kaig marøbelø køn’ chimubsruinrrun cha.

⁸Inchawei na, Møg Misra Arrubiibe isrin kwaløm nan nø karunrrain kømøtø, maramdiigwane marøb, maramgaigwane marmub, nabe na asha karubig kur— chibig køn, Jesúsbe. Kan møg tasig mul-laig

⁹Incha Jesúsbe truyugurri ya, judíosmera tulundzuni yau kebibene,

¹⁰truyube kan møg tasig mul-laig wabig køn. Inchen kaguen møiløgøsrøn Jesúswan chigøben chi køptø, Jesúswane trencha payibelø køn: —¿Isrin kwaløm kan kwanrriigwan ka tamartrain kø chindah?— cha.

¹¹Inchene Jesúsbe trenchibig køn: —¿Ñimma møikkøben kan ubisha tøgagua, isrin kwaløm trabyu kebeñene, ya, kemøra, wesramønrraguh? cha.

¹²Pøs kan møøbe kan ubisha lataitøguen kømø, purab nuikken køn cha. Inchawei treeg købene, isrin kwalømmerawangucha tabig maramigwane merømø, ka marbasamig køn— chibig køn.

¹³Incha tru møwane trenchibig køn: —Kwalwan larrøbichi— cha. Inchen nøbe larrøbichene, kandarø kwal latawei tabig kørrømisrøptinchibig køn.

¹⁴Inchen fariseosmerabe webamba, Jesúswan namig kurra, mandø incha pinisamigwan waminchib mendabelø køn. Jesúsweimburab maig nebunrrabigwan wamindig

¹⁵Inchen Jesús iigwan wammørabe, truyugurri iben, misag truba nu mendig ambubelø køn. Inchen Jesúsbe mayan kwanrreelan tamarøbig køn.

¹⁶Incha nune mu køn cha, mun køben misaameran mørø waminchimønrrain karubig køn.

¹⁷Iibe tru Tius maig karuigwan eshkabig Isaíaskurri øyeeg taig nebunrrain kuig køn:

¹⁸Iibe tru nai karuig marøb megabig køn cha, tru na lawa wesruig, na undaaraig, truigweimburappe nabe truba tab kui mørøb kasrag war taig.Nabe nai Espíritun nuim pala pasren, chu pirausreelø køben maya misaameran tru sølgandø tabigwan nø eshkab kusrenanrrun taig.

¹⁹Nøbe kwayam lamøwei, trashimøwei, callesmerayu nui wamwan wamindi mørmøwei indig kønrrun taig.

²⁰Kan caña kegurisaigwan nøbe kebinab lanchimøwei, katø mecha ke chab kwab pilab pasrabigwan kweechimøwei inchun taig,tru sølgandø tabigwan kerrigu kanawa wesrawa pasramnegatig.

²¹Inchen judíos kømø misaamerabe nui munchiyutø isua muniirab kønrrun, taig. Jesúswan kwaimandzigwei maramburab mariitøga maran chib

²²Inchen Jesúsweimay kan møg kabgaig, wamgaig kwaimandzig tøgaigwan srua amben, nøbe nun tamarene, tru wamgaibe waminchib, ashib inchibig køn.

²³Inchene mayeeløba kwaara ashib trenchib payiyabelø køn: —¿Iibe tru merrabsrø Davidwei Nusrkain køppeendi?— cha.

²⁴Inchen fariseosmera iigwan mørabe, trenchibelø køn: —Nugwaimandzig, Beelzebú, tru kwaimandziimeran ke nøasha karubig treeg martrai tranig kua, truikkurri kwaimandziimeran weeran— cha.

²⁵Inchen Jesúsbe nøm chi isub pønrraigwan ashabe, trenchibig køn: —Kan rey karub tøgaweim pirauma misag nømasiitø nøørøtø misrøb kurrabe, pinønrrun cha. Katø kan ciuda lata, katø kan yauelø lata nømasiitø nøørøtø misrøb kurrabe, warønrrab kaimanrrun cha.

²⁶Øyeetøwei Satanáskucha Satanáswandøwei weguchabe, nøasiitø nøørøtø misran cha. Inchen nø ashib karub waibe, trube, ¿chincha pasrabig pasrønrrab kø? cha.

²⁷Tru kwaimandziimeran na webetappe, Beelzebúgurri webetig købene, trube, ¿ñimui mendig amøñibeløbe kwaimandziimerane mu webetingaruitøgarre webetah? cha. Inchawei, treeg købene, maig kuigwan ñimun uyube nøm kusrenrrun chibig køn.

²⁸Trune na Tiuswei Espíritutøga kwaimandziimeran webetøbene, Tius nø ashib karub pasraibe ñimui utube puaguen pasran cha.

²⁹’Kabe kan møikkøben kan mur møwei yauma kebya, tru mur møwan lusrøbmerrig lusrmøwatøbe, ¿nui chi tøgagúigwan chincha kerranrrab kø? cha. Lusra trarratøwei nui chi tøgagúilan kerranrrun chibig køn.

³⁰’Naingatø pasrømíibe, nan tsaleelaingatø maran. Inchen naba tulishimíibe truørøtø wiitan.

³¹’Inchawei nabe ñimun trendamønrrun: Misaamera kaig mariilan lata, chigøben Tiuswan purø trømbøig wamab wamindiilan lata Tiusbe kerriguh pesannawa ulø paymønrrun cha. Trune Espíritu Santon purø trømbøig wamab wamindiilane si, Tiusbe pesannamø, ulø payrrun chibig køn.

³²Møikkøben na, Møg Misra Arrubigwan chigøben kaig waminchibigwane Tiusbe ulø paymønrrab pesannanrrun. Trune møikkøben Espíritu Santon kaig waminchibigwaneguende ni møi yu lata, ni kansrø lata pesannamø, ulø payrrun cha. Tusrwane mamikkurri asan

³³’Pøs kan tab tusrbe, tab mamitøwei niirrun. Inchen kan kaig tusrbe kaig mamitøwei niirrun. Kaguende kan tusrwane mamig niguinug asan.

³⁴¡Ul lataig inchib misaamera! ¿Ñim chincha tabig waminchague, trendø kailøbe? Kaguende nui manrrau chine isua tøgagúilø pinøguchen, nui triibe treeg wamindan.

³⁵Kan møg tabiibe tabig isuilan nui manrrau esegabig kua, truyugurrimbe tabig wesrub wamindan. Inchen kan møg kaibe kaig isuilan nui manrrau esegabig kua, truyugurrimbe kaig wesrub wamindan.

³⁶Inchawei nabe trendamønrrun: Chigøben wamindamgailan misag ke ka wamincha møriilan Tiuswei tru maig kønrrabigwan asha maram kwaløm mayeeløba tru urasbe kerriguh maig kuigwan eshkamig kønrrun cha.

³⁷Pøs ñui wamindiitøgatøwei ‘tabig køn’ tain kui, kabe ‘kaig køn’ tain kui Tius treeg marig kørrømisrtrabguen.— Jesúswan mu køremgaig mana asiimíig martrai miab

³⁸Inchen møiløgøsrøn Moisés pørigwan kusrenanøbeløba, fariseosmeraba Jesúswan trenchibelø køn: —Kusrennøbig, Tius ñiba pasrain kui nam asha kønrrab mar— cha.

³⁹Inchene Jesúsbe trencha løtabig køn: —Møin kwaløm kaig misaamera, kan kasharawar peeba itøluløpteelø lataitøwei Tiusbatø pønrrømø misaamera kailø, Tius naba pasrain kui ashchab maramig miatan cha. Inchendø asha kønrrai katøgan chigøben peg kenamara tranmøtø, Tius maig karuigwan eshkabig Jonásweiwandø eshkamønrrun cha.

⁴⁰Tru Jonás truba nu peskau umbu pøn kwaløm, pøn yem wab lataitøwei Møg Misra Arrubikkucha pøn kwaløm, pøn yem pirø umbu wanrrab køn cha.

⁴¹Tru Nínive ciudasrø misaamerabe Tiuswei tru maig kønrrabigwan asha maram kwalømbe kenamisrtrun cha, tru møin kwaløm misaameran kaiyu pønsrønrrab. Kaguende nínivesreeløbe Jonás eshkaigwan møra, nømui kaig mariilan isua møra, Tiusweimay lliraig køn cha. Inchen yu pasrabiibe Jonás lataitø kømø, mas nuig kur cha.

⁴²’Tru ambø umbu pirausrø reinagucha Tiuswei tru maig kønrrabigwan asha maram kwalømbe kurrønrrun cha. Incha nøbe tru møin kwaløm misaamera ñimun møra melønrrai maringarunrrun. Kaguende nøma purø yabsrøngurringuen pirau arrig købig køn, Salomón, tru purø kusrebig wamindigwan mørtrab. Inchen yu pasrabiibe Salomón lataitø kømø, mas nuikken kur chibig køn. Kwaimandzig møweinuumay katøle arrub

⁴³’Kan trømbøig maringarub kwaimandzig møweinukkurri webippe, chugøben purmerasrø isramig lab uña, yandø wetørranrrab kaimappe, treeg isun:

⁴⁴“Katø nai yamay inrrab cha, na chugurri webarrua arrinuumaytøwei”. Incha katø arruabe, tru møwane kan yawan chiguchagaig chishtø paluuncha tamara pasrig lataig wetørranrrun cha.

⁴⁵Incha ippe, katøgan kwaimandziimera, nø lataguen kømø, mas larrø trømbøig marøbelan sieteba tulundzuna, søteeløba trubalatø tru møweinug purrønrrab kebamrrun cha. Inchen tru møøbe yandø srabebe mas purø kaikken kørrømisrtrun cha, tru srøsrø lataitøguen kømø. Inchawei i møin kwaløm misaameran kailan treetøwei purainrrun— chibig køn Jesúsbe. Jesúswei usrimba, nui nuneløba

⁴⁶Jesús misaameran waminchib srø pasramne nui usrimba, nui nuneløba pua, nøba waminchig kui wambiitø pønrrabelø køn.

⁴⁷Inchen møikkøsrøn Jesúswan eshkabig køn: —Ñui usrimba, ñui nuneløba wambig pønrran cha, ñiba waminchab ñun payib.—

⁴⁸Inchene Jesúsbe tru eshkabigwane trenchibig køn: —¿Nai usri, nai nuneløbe mumera køh?— cha.

⁴⁹Inchabe nui kusrenanøb pera uniilan kwaneshkab trenchibig køn: —Nai usri, nai nuneløbe iilø køn cha.

⁵⁰Kaguende møikkøben nai Møskai srømbalasrø wabig maig martrai karuben, treeg marøbig, truibe sí, nai nuneg, nai nuchag, nai usrin køn— cha.