Read Namrrik Mateo 13 Bible Online

Mateo 13 - Namrrik bible

Mateo 13

¹Tru kwalømdøwei Jesús yaugurri webya, nu pisu menda wamisrøbig køn.

²Inchen misag truba nu tulundzunikkurri, Jesúsbe kan barcoyu kebya wamisren, maya misaabe tru pisu mendatø pønrrabelø køn.

³Inchen nøbe waminchib pølbasrøbig køn ‘øyeeg lataitøwein køn’ chib wamindiiløtøga chineh kemesra kusrenanøb. Incha trenchibig køn: —Kan kwallibiima tsurøb kwallchab webyan cha.

⁴Incha tsurøb ibene, kanbalø yellbe mayu kørrøben, illimera amrrua, man cha.

⁵Katøganbaløbe sruurrøldø pirau pirø tre chiganug kørra, pirø palatiikkurri tru yellbe kal-lappe, petø kal-labendø,

⁶pørr webarruabe, mergurangaruben, srøl tre chigaig kua, mul-laptindan cha.

⁷Katøganbalø yellbe kal shau utu kørrøben, kalmera nørrørab mendappe, chab kasrøb tsibisan cha.

⁸Inchen katøganbalø tab pirau kørrabiibe si, tabig ellmarig misra, møiløbe kan yellgurrindø mamig trulzheelø cien niguen, møiløbe sesenta niguen, katøganeløbe kan trulzhikkurrindø treinta nigan cha.

⁹¡Kalu pønsraibe, mør!— chibig køn. Mandøgurri ‘iilan øyeeg lataig køn’ cha Jesús wamindig

¹⁰Inchen nui kusrenanøb pera uniiløbe Jesúswan kemalla, trenchib payibelø køn: —‘Øyeeg lataitøwein køn’ chib, ¿misaamerane chindimba øyamay waminchigu?— cha.

¹¹Inchene Jesúsbe trencha løtabig køn: —Srømbalasrø Tiusbe nø ashib karub wainug mu asiimíig tøgagúilan ñimun ashchai tranan cha. Trune katøganelane treeg kømøn cha.

¹²Kaguende tøgaigwane masken tranen, uñchaguen tøgagønrrun cha. Trune chigaigwane nui lamøtiig tøgagúigwanguen kerranrrun cha.

¹³Inchawei nabe ‘øyeeg lataitøwein køn’ chib wamindiiløtøga chineh kemesra waminchar chibig køn. Kaguende:nømbe ashendø, ashmøn cha, mørendø mørmøwei, ni katø chigúinguen mørmøwei indan cha.

¹⁴Inchawei nømune øyeeg køben, Tius maig karuigwan eshkabig Isaías øyah wamindig ciertonwei nebun cha:Maya, maya mørendø, ni chi tainguen mørmønrrun cha. Ashippe, ashendø, chigúi ashmønrrun cha.

¹⁵Kaguende i misaamerai manrrøbe larrø tranrreelø srug lataig misrin køn cha. Kalumera, kabmera kasrailø tøgar køn cha,ashmøwei, mørmøwei, ni chi tainguen mørmøwei, nuimay amrrumøwei inchai,katø na tamariilø kømøwein kønrrain taig.

¹⁶’Trune ñimbe mayanguen tab kuilø køn, kaguende ñimui kabmera Tiusweimburabigwan ashib, kalumera nuimburabigwan chigúi mørøb inchibelø tøgarbe.

¹⁷Inchawei nabe ñimun cierton trenchar: Tius maig karuigwan eshkabelø køben, sølgandø tabig marøb misaamera køben, truilø truba nu, i ñim asigwan asinrrabna kui inchendø, ashmuig køn cha. I ñim mørigwan mørinrrabna kui inchendø, mørmuig køn cha, trenchibig køn. ‘Øyeeg lataig køn’ cha, kemesra wamindigwan Jesús tab eshkab

¹⁸’Au, ñim møray, tru kwallibigwan ‘øyeeg lataitøwein køn’ cha, kemesra wamincha pasrigwan na eshkanrrab.

¹⁹Tiuswei tru srø wam srømbalasrø karub waisriigwan mørendø, chigúinguen mørmeelane tru nugwaimandziibe arrua, tru manrrau ellgwaigwane kerran cha. Inchen truiløbe tru yell mayu kørrabelø latailø køn.

²⁰Inchen tru sruurrøldø pirau pirø tre chiganug kørrab yellbe tru misag Tiuswei wamwan tru urastøbe truba tab kui mørøb utabelan trunun eshkabig køn.

²¹Inchendø srøl tre umbu keetiimíig kua, maya yanaguen amøñimøn. Incha tru Tiuswei wamgurrindø chigøben puben, katø chigøben kaig nebub arruben, møi møin kørran.

²²Inchen tsuren, tru kal shau utu kørrab yellbe øyeeg misagwan eshkabig køn: Tiuswei wamwan mørøppe, mørendø, i pirau chine købigwan menrra isubiibah, nømui chine palømø tøgagúilø purø tabig lataig asønaikkurrimbatø, tru Tiuswei wamwan mørigwane kerrigu truitø kasrøben, chigucha nømbe ellmarig misrmøn cha.

²³Inchen tru yell tab pirau tsuriiløbe tru misag Tiuswei wamwan møra, katø tab chigúi møra, truibe sí, tab ellmarig misrigwan eshkabig køn. Truiløbe tru kan yellgurrindø mamig trulzheelø cien, kaneløbe sesenta, kaneløbe treinta nigabelø latailø køn— cha, trenchibig køn Jesúsbe. Tirigu utu arrucillu kal-labigwan kemesra wamindig

²⁴Incha Jesús katøgan ‘øyeeg lataitøwein køn’ cha eshkawa pasrøb trenchibig køn: —Srømbalasrø Tius nø ashib karub waibe kan møg nui trau tab yellwan tsuri lataig køn cha.

²⁵Inchen søteeløba kib waramne nun kan ashig kømui inchibig arrua, tirigu tsuri utu kaig yellwan wiitappa, yan cha.

²⁶Inchen tirigu nørrørawa, urø weetøbene, tru kaig kau arrucillugucha kenamisrøptindan cha.

²⁷Inchen tru tra puaigwei marøb melabeløbe nune trenchinrrab ambubelø køn: “Señor, ñi trau tru tsurig yellbe tabig købendøbe, ¿tru kaig kaube chugurrin kal-lah?” cha.

²⁸Inchene tru ellmarig puaibe trenchibig køn: “Mutø tsaliig øyeeg mariinrrun” cha. Inchen truyu marøb melabeløbe trencha payibelø køn: “¿Kabe tru kaig kauwan nam kitønrrab ambamøh?” cha.

²⁹Inchene nøbe trenchibig køn: “Kagøbasay cha. Inchippa kaig kauwan kitønrrab incha, tirigungucha tøga kitabgun cha.

³⁰Trembe paramnegatig trubalatø ka nørrørabasay chibig køn. Tru uras tru tulishinrrabelan øra, tru kaig kauwanmerrig tulisha, lusrø mara, pattrai karumønrrun cha. Incha tirigune nai tirigu esegainug keeringarumønrrun”, tan— cha, trenchibig køn Jesúsbe. Murtasa yellwan kemesra wamindig

³¹Jesús katøgan ‘øyeeg lataitøwein køn’ cha, kemesra waminchibig køn: —Srømbalasrø Tius nø ashib karub waibe kan murtasa yell lataig køn cha, kan møg nui trau tsurig.

³²Maya yellmerai utu purø lamø yellzhig købendø, nurappe, tru ellmarig shush tusrmerai utu mas nuibe murtasa køn cha. Yandø kan tusrburabig misren, nuig køptø, illimera pala amøñibeløguen amrrua, tru srarmerayu le marøbelø køn— chibig køn. Levaduran ‘øyeeg lataitøwein køn’ cha, kemesra wamindig

³³Katø Jesúsbe katøgan ‘øyeeg lataitøwein køn’ cha, kemesra waminchibig køn: —Srømbalasrø Tius nø ashib karub waibe levadura lataig køn cha, kan ishuuma pa arruba harina sømara, levaduran pusren, maya sømarigwan trunun ørøba pulingarub lataig køn— cha. Mandøgurri ‘iilan øyeeg latailø køn’ chib Jesús kemesra wamindig

³⁴Jesúsbe misaamera nørrø pasrabigwan kerrigu iigwan kusrenanøppe, ‘øyeeg lataitøwein køn’ chib wamindiitøga eshkabsulu waminchibig køn. ‘Øyeeg lataitøwein køn’ cha, eshkawa pønsra kømuppe, waminchimíig køn.

³⁵Øyeeg nebuppe, tru Tius maig karuigwan eshkabig maig taig nebunrrain kuig køn, tru øyah taig:Waminchib kusrenanøppe, ‘øyeeg lataitøwein køn’ chibgøba eshkab wamindamønrrun cha. Tius pirøwan marøb uraskurri sørig pønrrabelan tørgandø eshkab wamindamønrrun cha. Tirigu utu arrucillu kauwan kemesra wamindigwan ‘øyeeg lataitøwein køn’ cha, Jesús tab eshkab

³⁶Incha Jesús tru nu søtø misagwan ungwa cha, yau kebibene, nui kusrenanøb pera uniiløbe kemallabe trenchibelø køn: —Tru ellmarinug kaig kauwan ‘øyeeg lataitøwein køn’ cha, namun eshkab wamindigwan tab eshkarra— cha.

³⁷Inchene Jesúsbe trenchibig køn: —Tru tab yellwan ellmarøbiibe Møg Misra Arrubigwan eshkabig køn cha.

³⁸Inchen tru ellmarig trabe yu pirau maya misagwan eshkabig køben, tru tab yellbe Tius nø ashib karub waigwei ureemeran eshkabig køn cha. Inchen tru kaig kaube nugwaimandzigwei ureg køn cha, eshkabig køn.

³⁹Inchen tru ashig kømui inchib tsaliig tru kaig kauwan ellguawa pasrøbiibe nugwaimandzigwan eshkabig køn cha. Inchen tru ellmarig srønøbe srabe kwaløm patsønrrabigwan eshkabig køben, tru ellmarigwan tulishibeløbe ángelesmeran eshkabig køn cha.

⁴⁰Tru kaig kauwan tulisha, nagu pattrai kebetab lataitøwei srabe kwaløm patsab uraskucha øyeeg punrrun chibig køn.

⁴¹Tru Møg Misra Arrubiibe tru katøganelan kaig maringarub pønrrabelanba, ke kaigwandø marøb pønrrabelanba nø ashib karub wainukkurri truilane mayamba nui ángelesmeran tulishinrrai ørtrun cha.

⁴²Inchen nu nag naarabigu kebusren, truyube kishib, trugulmeran tsatsamig kønrrun cha.

⁴³Inchen tru sølgandø tabig marøbeløbe nømui Møskai ashib karub waisrømbe kan nøsig pilab latailø pilønrrun cha. ¡Kalu pønsraibe, mør! chibig køn. Purø tabig søra tøgagúigwan kemesra wamindig

⁴⁴’Srømbalasrø Tius nø ashib karub wainuguiibe kan chigøben truba tabzhigwan pirø umbu søra pasrig lataig køn. Kan møg tru tabig sørig pasrabigwan wetørrawa, katøle truyutøwei søra pasran. Incha truba kasrag ya, nui chi tøgagúilan kerrigu yanabe, tru pirøwan penaptindan. Tørguebilab sruuzheelø truba nuweyig lataitøwein køn cha, kemesra wamindig

⁴⁵’Katø tru srømbalasrø Tius nø ashib karub wainuguiibe kan tørbilab sruuzheelan lawa, penab, yanøb inchibig lataig køn cha.

⁴⁶Incha kan tørbilab sruuzhig truba truba tabzhig nuweyig wetørrappe, ya, nui chi tøgagúigwan kerriguh yana, tru purø tab sruuzhigwan penan, chibig køn. Atarraya lataitøwein køn cha, kemesra wamindig

⁴⁷’Katø tru srømbalasrø Tius nø ashib karub wainuguiibe kan atarrayan maryu keguchen, chi peskaugurrimbunø kemørøb lataig køn cha.

⁴⁸Incha atarrayayu peskau netsabene, tru peskabeløbe pi menda wesrua, peskaumeran lawa tarømartrab purramisran cha, tabelane tasinyu pusrøppe, kailane petaptø petan cha.

⁴⁹Srabe kwaløm patsab uraskucha øyeetøweih purainrrun, chibig køn. Inchen ángelesmera webamrrun cha, kailanba, sølgandø tabig marøbelanba nøørø tarømartrab.

⁵⁰Incha kailane nu nag naarabigu kebetønrrun cha, truyube kishib, trugulmeran tsatsamig kønrrun— cha. Kusrenaniilø kølliiba, srøiløba

⁵¹Incha Jesúsbe trencha payibig køn: —¿Ñimbe iilan kerriguba chigúi mørgueh?— cha. Inchene nømbe: —Señor, øø— cha, løtabelø køn.

⁵²Inchene Jesúsbe trenchibig køn: —Mutøgucha Moisés pørigwan kan kusrenanøbig srømbalasrø Tius nø ashib karub wainuguigweimburab kusrebig misrabe, kan ya puaig møskai latawei nui tabzheelø esegaig tøgagúinukkurri srøilø køben, kølleelø køben wesrub lataitøwei maran— cha. Jesús Nazaretsrø

⁵³Yandø Jesús tru ‘øyeeg lataitøwein køn’ chib iilan eshkab chab waminchabe, truyugurri webya ibig køn.

⁵⁴Incha nuim pirausrøndøwei puabe, tru judíosmera tulundzuni yau kusrenanøb mendøbene, misaamerabe truba kwaara ashib trenchibelø køn: —¿I møøbe øyeeløbe churre øyeeg kusreh? cha. ¿Katø tru maramburab mariilan chincharre marerah? cha.

⁵⁵¿Iibe tru tsiimeratøga chine marøbigwei nusrkai, katø nui usrimbe María taig kømuitarru? cha. ¿Santiagoin køben, Joséwein køben, Simónwein køben, Judaswein køben nuneg kømuitarru? cha.

⁵⁶¿Yamba nui nuchaløgucha kerriguba namui ututøwei warabelø kømuitarru? cha. ¿Trube, kerrigu iigwane i møøbe chugurrinrre øyeelø tøgaguerah?— cha.

⁵⁷Treeg isua nune kaashibelø køn. Inchen Jesúsbe trenchibig køn: —Chutøgucha Tius maig karuigwan kan eshkabigwane tab indan cha. Inchendø nui piraueløba, nui yaueløba, truiløbe chi tab inchimøn— cha.

⁵⁸Incha truyube maramburab mariilø tre marmíig køn, kaguende truyu misaamerabe nømui isubigwan nuinug pasrmuikkurri.