Read Namrrik Mateo 14 Bible Online

Mateo 14 - Namrrik bible

Mateo 14

¹Tru kwalømmerawan Galilea pirau karubig Herodesbe Jesúsweimburabgøba wamindi mørabe,

²nui karuindiig melabelane trenchibig køn: —Truibe tru Juan Bautista kuinrrun cha, kwailai utugurri katø kurriinrrun cha. Incharre øyeeg maramburab maramig tøgaig kuinrrun— chibig køn.

³Kaguende Herodesbe tru Juanwan kemøringarua, lusra, kailan keeri yaumay kertrai srua ambingaruig købig køn, tru nui nuneg Felipei srai Herodíaskurrindø.

⁴Kaguende Juan Bautistabe Herodeswane trendaig købig køn: —Tru Herodíaswan ñui srai mara tøgagømibe merig pasran— cha,

⁵Herodesbe Juanwan kwetchab inchendø, misagwan køriimatabig køn, kaguende mayeeløba Juanbe Tius maig karuigwan eshkabig kui kørewa køben.

⁶Inchen tru Herodeswei kal-lain kwalømwan isub kasrag waram kwaløm, tru Herodíaswei nimbasrbe tru linchai eshkailø mayeelø purrabelai merrab pailaben, Herodeswane truba tabig asønaptø, tru srusrane:

⁷—¡Katø, tranmø kømø! chi miabendø tranrrumøn— chibig køn.

⁸Inchen tru srusrøbe usri øyeeg chinrrig cha eshkaig køppe, Herodeswane trenchiptinchibig køn: —Juan Bautistai turwan kan platilloyu trannrra— cha.

⁹Inchen reybe truba isui inchendø, tru mayeelø lincha purrabelai malau, treeg tranrrumøn cha, trannrrab misrig køppe, traningarubig køn.

¹⁰Incha Juanbe kailan keeri yau waben, Herodesbe turwan paringarubig køn.

¹¹Inchen tunwan para, kan platilloyu srua ya, srusran tranen, nøbe usran tranøbig køn.

¹²Inchen Juanwei mendig amøñibeløbe amrrua, Juanwei asrwan srua amba, sørabelø køn. Incha Jesúswan trunun eshkanrrab ambubelø køn. Trattrø mil misagwan Jesús manrrai tranøb

¹³Inchen Jesús Juanwan kweetsin kui wammørabe, truyugurri nøtø kan barcoyu nøørø mu misag warab waraimøsrømay ibig køn. Inchen misaamerabe truba nu wammørøppe, pueblomerayugurri webamba, nuimay katsikkatø ambub mendabelø køn.

¹⁴Inchen Jesús barcoyugurri pinaya, truba nu misag pasrai ashabe, nømun lastima køben, nømui utu kwanrreelan tamarøbig køn.

¹⁵Inchen yandø mawabrab købene, nui kusrenanøb pera uniiløbe Jesúswan kemallabe, trenchibelø køn: —Yube mu misakkanug køn cha. Inchagucha yandø maabenwein køn cha, misagwan amrrai ‘ungwa’ chi cha, yamera pønrrabsrø amba, nømuyasig mamig pena manrrain— cha.

¹⁶Inchene Jesúsbe trenchiptinchibig køn: —Chi ambamibe palømøn cha. Manrrai ñim mannay— cha.

¹⁷Inchene nømbe trenchibelø køn: —Nambe trattrøgatø pirrimbah, pagatø peskaubatø tøgaguer— cha.

¹⁸Inchene Jesúsbe trenchibig køn: —Yu srua amrrurray— cha.

¹⁹Incha tru nu misagwan pubilayu purramisringarua, tru trattrøgatø pirrimeranba, pagatø peskaumeranba, tasku muta, srømbalaneb neesha, Tiuswan ‘mayanguen pay’ chibig køn. Incha pirrimeran pirisha, nui kusrenanøb pera uniilan tranen, nømbe misagwan pirishibelø køn.

²⁰Inchen mayeeløba øska ma kørrømisren, katøgucha pitis undailan tasinmerayu netsøbatø doce tulishibelø køn.

²¹Inchen tru mabeløbe ishumburwan, uregwan munchimuben, møgueløtø trattrø mil købig køn. Jesús pi palawan arrub

²²Incha yandø Jesúsbe nui kusrenanøb pera uniilan pisu ambøgatøsrømay merrab amrrai barcoyu nebambingarubig køn, tru nu misagwan ‘ungwa’ chib pasrappatø.

²³Incha yandø misagwan chab ‘ungwa’ chabe, nøbe nøtø kan tunbalasrø Tiusba waminchab ya, yem køben nøtø trusrø wabig køn.

²⁴Trune yandø barcobe pisuyu yabsrønguen iben, pi welarmerabe barcongøba megambubig køn, kaguende isiibe nømui malaugøba megambub ichen.

²⁵Inchen løtsøzhig yemdø Jesús pi palawan katsikka nømuimay kemallib ibene,

²⁶nui kusrenanøb pera uniilø pi palawan arri ashippe, truba kwaarøb kørig købiitø trenchib trashibelø køn: —Kan møsig køn— cha.

²⁷Inchen Jesúsbe møi møi nømune waminchib trenchibig køn: —¡Kørmø, mur isua purray! cha. Na kur cha. Kørig kui inchimøtay— cha.

²⁸Inchene Pedrobe trenchiptinchibig køn: —Señor, trube, ñi kuabe, nan ñuimay pi palawan: “Amø” chirra— cha.

²⁹Inchene Jesúsbe trenchibig køn: —Amø pøs— cha. Inchen Pedrobe barcoyugurri pinaya, pi palawan Jesúsweimay ib mendabig køn.

³⁰Incha tru mur isig ichibigwan tab ashippe, køriimataptinchibig køn. Inchen nune asentab mendaptinchen trashibig køn: —¡Señor, wesrurra!— chib.

³¹Inchene Jesúsbe møi møi tasigu kemørabe, trenchibig køn: —Ñi kui ñui isubigwane nainug ke ka kømønrraindiitø pasra tøgaig cha. ¿Chindimbarre kaimamuitamab isugu?— cha.

³²Incha barcoyu nebamben latatø, isiibe wasrøngandø pasramisrøptinchen,

³³barcoyu purrabeløbe nune køriibala tabig waminchib trenchibelø køn: —Isa kømø, ñibe Tiuswei Nusrkain køn— cha. Jesús Genesaretsrø kwanrreelan truba nu tamarøb

³⁴Incha yandø tru pisuyu chab larraamba, Genesaret pirausrø pubene,

³⁵misaamera Jesús kui nebua ashabe, wammørøsrøngarubelø køn tru pirau ørøba. Inchen nuimay maya kwanrreelan srua amrrua:

³⁶—Ñi pala itøguewa kuig urøzhigwan namun katørabashcha— chib, rugabelø køn. Incha mayeeløba katørabeløbe tabig kørrømisrøbelø køn.