Read Namrrik Mateo 2 Bible Online

Mateo 2 - Namrrik bible

Mateo 2

¹Jesúsbe Judea pirau Belén puebloyu kal-labig køn, Herodes tru pirau rey køb uras. Inchen tru uras pørr kal-labgatøsrø kusreb møguelø tru estrellameran ashib kusrebelø Jerusalén puabe,

²trenchib payibelø køn: —¿Judíosmerai tru rey kal-labiibe chu tsuh? cha. Kaguende nambe nui estrellan webarri asha, køriibala nune tabig waminchab amrruer— cha.

³Inchen rey Herodesbe trendaigwan mørabe, ni mumaygucha kømui inchibig køn. Inchen katø Jerusalén misaamerangucha treetøweim pubig køn.

⁴Inchen reybe sacerdotesmeran karubelanba, tru Moisés pørigwan kusrenanøbelanba wama, payibig køn: —¿Cristobe chu kal-lanrrabig kø?— cha.

⁵Inchen nømbe trenchibelø køn: —Judea pirau Belén cha. Kaguende Tius maig karuigwan eshkabig øyah pørig køn cha:

⁶Judea pirau, ñi Belén pueblo-unøbe, tru pirau purø wamindig ciudamerai utuñibe chigucha kømøzhig lataig kønrrab kømø, purø nuig køn cha.Kaguende ñuinukkurrimbe misagwan ashib karunrrabig kan webattrun cha, nai Israel misagwan nø pera marøb ashib pasrønrrabig.—

⁷Inchen Herodesbe tru srømbalasrø estrellameran ashib kusrebelan mu ashmøwatø wama, estrellabe tappe chu uras kenamisrigwan payibig køn.

⁸Incha nømune Belénmay ørabe, trenchibig køn: —Trusrømay amba, tru unaimburab tab payrrigay cha. Incha wetørrawabe, eshkarrunrrigay cha, nagucha køriibala tabig waminchab inrrab— cha.

⁹Tru kusrebeløbe rey øyeeg eshkailø ambubelø køn. Inchen estrella tru pørr kal-labgatøsrø asiibe nømui merraptø ya, yandø tru unø tsuim pala pasramisren,

¹⁰tru kusreb møguelø estrellan ashabe, truba truba kasraarabelø køn.

¹¹Incha yau kebambabe, unamba, usri Maríanba ashabe, tømbønsra, køriibala tabig wamincha, nømui ketamelan kura, oro køben, incienso køben, mirra køben ketøbelø køn.

¹²Incha yandø nømune piabyu Herodesweimburab ammønrrain cha, eshkailø kua, nømui pirausrømaybe peg maywan ambubelø køn. Egiptosrømay trubab ambub

¹³Yandø tru kusreb møguelø chab amben, Señorwei kan ángel Joséwan piabyu kenamisrabe, trenchibig køn: —Kurra, unan usranba perøb Egiptosrømay trubab inrrø cha. Incha trusrø na eshkamnegatig kørrømisrtrig cha. Kaguende Herodesbe unan kwetchab lanrrab køn— cha.

¹⁴Inchen Josébe kurra, unan usranba pera, yem Egiptosrømay webya, ya,

¹⁵trusrø tru Herodes kwamnegatig waraig købig køn. Øyeeg nebuppe, Tius maig karuigwan eshkabikkurri øyah taig, truig nebunrrain kuig køn: “Nai Nusrkawan Egiptogurri wamar” taig. Herodes uregwan kwetchai karub

¹⁶Inchen Herodes nun tru kusreb møguelø isin kui mørabe, truba truba nama, tru kusreb møguelø tru ureg chu uras kal-laigwan eshkaigwan, trunun cuenta mara kal-laingurrimbunø pa pilagatiguelø Belén pøtøgatan warabelan kerriguba kwetchain karubig køn.

¹⁷Øyamay nebuig køn Tius maig karuigwan eshkabig Jeremías øyah pørig:

¹⁸Ramá pueblosrø kan wam mørig køn cha. Truibe kan truba truba isuig wamab kishib,tru Raquel nui uregweimburab isua, kishibig køn. Incha ‘kishmø, ka awentau’ taingucha, awentanrrab kaimabig køn cha,kaguende yandø ureemera chab kwaikken køben. Egiptogurri katø amrruig

¹⁹Inchen yandø Herodes kwaben, Señorwei kan ángel Joséwan Egiptosrø piabyu kenamisra, trenchibig køn:

²⁰—Kurra, unanba usranba pera, Israel pirausrømay katø inrrø cha. Kaguende unan kwetchab inchibeløbe yandø chab kwan— cha.

²¹Inchen Josébe kurra, unanba usranba Israel pirausrømay pera, ibig køn.

²²Inchen Herodeswein cuentabe nui nusrkai Arquelau Judea pirau truig karub wan taig mørøppe, Josébe trusrømay yamig køriimatøben, Tius piabyu Judeasrømay imønrrai eshkaben, Galileasrømay ambig køn.

²³Incha Josébe trusrø puabe, Nazaret pueblosrø tsunrrab ibig køn. Iig øyeeg nebuppe, Tius maig karuigwan eshkab møguelø øyah taig nebunrrain kuig køn: “Jesúsbe nazaretsriig cha wamig kønrrun” taig.