Read Namrrik Mateo 21 Bible Online

Mateo 21 - Namrrik bible

Mateo 21

¹Yandø Jerusalénsrø chab pub amba, Betfagé pueblo tru Olivos Tunsrø chab puabe, Jesúsbe nui kusrenanøb pera uniilø pailan

²trenchib karua ørøbig køn: —Ø pinrrøguesrø yamera tsitsø pønrrabsrømay ambay cha. Trusrømbe pubyutø kan burra, burro-unøzhig peraig, litsig wetørranrrun cha. Incha picha, srua amrrunrrigay cha naimay.

³Inchippa møikkøben chigøben chibene, øyah chinrrigay chibig køn: “Señor palai indan” cha. Inchen truibe pebrrun— cha.

⁴Øyeeg pureppe, Tius maig karuigwan eshkabig maig taig treeg nebunrrain kuig køn, tru øyah chib pørig:

⁵Sion ciudayuelan øyah chib eshkau cha: “Asay chib, ñimui Rey ñimuimay arruppe,chigucha chi nuig kømíig lataig kan burroyu, burro-unøyu itøguana arrun taig, kan carga nigab animal lluig unøyu.”

⁶Inchen nui kusrenanøb pera uniiløbe Jesús maig karuigwan treeg mara,

⁷burran unanbañau srua amrrua, nømbe nømui kewagúilan burranba, unanba kayen, Jesúsbe itøguanabig køn.

⁸Inchen misag truba nu pasrabiibe møiløbe nømui kewagúilandøwei maywan kayen, møiløbe kullag srarcheelø lutiicha kayibelø køn.

⁹Inchen merrab amrrubelø lata, wendau amrrubelø lata, øyah chib trashib amrrubelø køn:“¡Rey Davidwei Nusrkai Hosanna! chib.¡Señor Tiuswei munchiyu nø ørig arrubiibe mayanguen tab kuig køn! chib.¡Srømbalasrømbe Hosanna!” chib.

¹⁰Jesús Jerusalénsrø kebibene, maya misaamera ke chi indi asamgaig inchib, møiløgøben trenchib payibelø køn: —¿Iibe mu køh?— chib.

¹¹Inchen tru nu misag søtøbe trenchibelø køn: —Iibe Tius maig karuigwan eshkabig Jesús Galilea pirau nazaretsriig køn— cha. Jesús Tiuswei yawan chish marøb

¹²Jesús Tiuswei yau kebya, truyu mayeelø yanøb, penab inchib warabelan søtøba wambig webetabig køn. Katø misagwan an yunømarøbelai mishatsiimeran utsøbetab, palomamera yanøbelø purraigwan utsøbetab inchibig køn.

¹³Incha trenchibig køn: —Tiuswei wamwan pørigube trenchibig køn cha: “Nai tab yabe Tiuswan wamindi ya køn cha, trencha wamig kønrrun” cha. Trune ñimbe nileelø warain trab marin køn— cha.

¹⁴Inchen tru Tiuswei yau kabgailø køben, cojosmera køben Jesúswan kemallen, nøbe tamarøbig køn.

¹⁵Inchen sacerdotesmeran karubeløba, Moisés pørigwan kusrenanøbeløba Jesúswei tru purø nørreelø mariilan ashib katø Tiuswei yau shush ureemera: “¡Rey Davidwei Nusrkai Hosanna!” chib trasai mørabe, truba namabelø køn.

¹⁶Incha Jesúswan trenchibelø køn: —¿Iilø øyeeg chib køben mørtirru?— cha. Inchene Jesúsbe trenchibig køn: —Øø, mørar cha. ¿Ñimgan Tiuswei wamwan pørigu iig øyeeg chibigwan managuen lemeelø køtirru? cha:Pitsø muchib shush ureemeran køben, katø nørrø ureemeran køben ñun newan tabzhig waminchai, ñi Tius treeg marin køn taigwan.—

¹⁷Incha nømun pønrramnetø, ciudayugurri webya, Betaniasrømay yabe, trusrø kørrømisrøbig køn. Higuera tusr mamig niimíigwan Jesús kaig nebunrrai wamab

¹⁸Incha løtsø katø ciudayumay arruabe, Jesúsbe parøgwai mørøbig køn.

¹⁹Incha kan higuera tusr may pulu pasrai asha, kemallabe, tru higuera tusrbe ka ishiitø tøgaig kui ashabe, Jesúsbe tru higuerane trenchibig køn: —¡Møingurrimbe yandø managucha mas mamig niimubash!— cha. Inchen tru urastø higuerabe mul-laptinchibig køn.

²⁰Inchen tru chi purayaigwan nui kusrenanøb pera uniiløbe ashabe, truba kwaarøb, Jesúswan trenchib payibelø køn: —Higuerabe møi møi mul-lanrrappe ¿mandø indah?— cha.

²¹Inchene Jesúsbe trenchibig køn: —Pøs nabe ñimun cierton trendamønrrun cha: Ñim ñimui isubigwan Tiusweinuutø pasra tøgagua treeg kømuptinchaitamab isumubene, na higueran øyeeg mari lataitøguen kømøtø, ñim i tunwanma: “Yugurri mendamisra, maryu kebeñ” chibene, treeg purainrrun cha.

²²Inchawei ñim Tiusba waminchib miappe, chiwandøgucha nø martraitamab kørewa, miawabe, ñimbe utønrrun— chibig køn. Jesúswei karumburab karuig mu mandamgaig

²³Jesús Tiuswei yau kebya, kusrenanøb wamnetø, sacerdotesmeran karubeløba, misagwan karubelø kølli misaameraba Jesúswan kemallabe, trencha payibelø køn: —¿Ñi mariilane mu karua pasriitøgarre margu? cha. ¿Ñi øyeeg maramigwane mu karua pasrta?— cha.

²⁴Inchen Jesúsbe løtappe, trenchibig køn: —Nagucha ñimun kan chigøsrøn payrrab inchar cha. Ñim iigwan løtøbene, trube, nagucha eshkarrumøn chibig køn, iilan mu karuitøga marar cha.

²⁵¿Misagwan Juan piu umbu ulsraibe chugurri arrig køh? cha: ¿Srømbalasrøngurrin kønrrab køh? Kabe: ¿Møgueløgurrin kønrrab kø chindah?— cha. Inchen kangurrin kangurri payiyab mendabelø køn: “ ‘Srømbalasrøngurrin kuig køn’ chibene, nøbe namune trenchinrrun cha: Trube, ‘¿chindimba nune køremøgue?’ cha.

²⁶Katø: ‘Møgueløgurrin kuig køn’, tamgawein køn cha. Kaguende misagwan namune kørig køtan cha. Kaguen ya mayeeløba Juanbe Tius maig karuigwan eshkabig købig kui asha tøgar køn” cha.

²⁷Treekkurri Jesúswane trencha løtabelø køn: —Maig kuindøbeh— cha. Inchene Jesúsbe trenchibig køn: —Trube, nagucha eshkamumønrrun cha, iilan na mu karuitøga marigwan.— Pagatø nusrkalø lataitøwein køn cha, kemesra wamindig

²⁸Jesúsbe payibig køn: —¿Ñimbe iigwan maig isugue? cha. Kan møg pagatø nusrkalø tøgagua, kanunmerrig trendan cha: “Nai nusrkai, nai uvas ellgwain trau møi kwallchab inrrø” cha.

²⁹Inchene nøbe trencha løtabig køn cha: “Ig kømøtan” cha. Inchendø nøbe yanayube treeg marmønrrurmab isua møra, ka yan cha.

³⁰Inchen møskaimbe katøgan nusrkaweimay yabe, katø treetøwein chiben, nusrkaimbe: “Øø, Papa, na inrrur” chibendø, imøn cha.

³¹Trube, tru i pa nusrkaløyu møskai maig maringaruigwan ¿møig marerah?— chiben, nømbe: —Tru srøsrø karuinab nusrkai— chibelø køn. Inchen Jesúsbe trenchibig køn: —Pøs nabe ñimun cierton trendamønrrun cha: Romasreelayasig an utabeløba, ishumburmera asrwan anwei yanøbeløba Tius nø ashib karub waisrømbe nømmerrikken kebamrrun cha, ñimguen kebammøwatø.

³²Kaguende Juan Bautistabe sølgandø tabig mandø amønamigwan kusrenanrrab arruben, ñimbe køremuig køn cha. Trune tru an utabeløba, tru ishumbur an pagarwei trømbøig marøptø warabeløba, truiløguen køreig køn cha. Trune ñimbe iilan kerrigu ashendø, kørenrrab isua mørmuig køn chibig køn. Kwallibelø larrø kailan kemesra wamindig

³³’Incha møray, chibig køn, katøgan ‘øyeeg lataitøwein køn’ cha, kemesra wamindigwan. Kan møg pirø puaig uvas tra mara, trugurrimbe panig pasra, uvas piwan chu wesrumigwan truyu tamara pasra, incha tru ellmarigwan ashib laramig kan ya-unø palaig mara pasran chibig køn. Incha nui pirøwan katøganelan misrigwan pirishinrraptø kwallchai tranabe, yabsrømay yan cha.

³⁴’Incha yandø tru mamig misrigwan lurramig lutauraben, møilan køsrøn nui karuindiig melabelan tru nuimburabigwan tru kwallchab utabelan mianrrab øriibe,

³⁵tru kwallibeløbe karua øriilan merrarrawa, kanune kurraguchib, kanune kweechib, kanune sruutøga petab inchibelø køn cha.

³⁶Inchen tru pirø puaibe srøsrø lataguen kømø, katøbe karuindiig melabelan mas yam øren, tru kwallibeløbe søteelanba treetøweih maran cha.

³⁷’Incha yandø trugurrimbe nui trag nusrkawan ørøbig køn cha, treeg isub: “Nai nusrkawane chinchimønrrun” cha.

³⁸Treendingucha tru kwallibeløbe nusrkawan ashippe, nømdø trenchibelø køn: “Pirøwan ketig utønrrabiibe iigwein køn cha. Kwetchab amun chibelø køn, nuimburab nø utamigwan nam tøga kørrømisrtrab” cha.

³⁹Incha merrarrawa, uvas traugurri wegucha, nune kweechibelø køn cha.

⁴⁰’Møimbe, trube, ¿tru uvas tra puaig arruabe, tru kwallibelane chi martrerah?— chibig køn.

⁴¹Inchene nømbe trenchibelø køn: —Tru larrø kailane treetøwei kaig mara kwetchun cha. Incha tru uvas trawane katøgan mendailan tranrrun cha, lurrimørig nuimburabigwan trannrrai.—

⁴²Inchene Jesúsbe trenchibig køn: —¿Ñimgan Tiuswei wamwan pørigu øyeeg chibigwan managuen lemeelø køtirru? cha:Ya marøbelø kaasig sruube katsiisrø pølbasra wayamig mas purø tab srukken misrin køn taigwan.Señor Tius øyeeg marene, namuin kabyube truba tabig asønatan cha.

⁴³Inchawei nabe ñimune trenchar: Tius nø ashib karub waigwane ñimune kerrawa, katøgan peg misaameran Tius tranrrun cha, ellmarig maig misrtrabig køben, treeg ellmarig misrtrabelan.

⁴⁴Inchen møikkøben tru srug pala peñippe, pitis misrtrun cha. Inchen tru srug muim pala køben peñippe, nune usrø tuindø martrun— chibig køn.

⁴⁵Inchen tru sacerdotesmeran karubeløba, fariseosmeraba tru ‘øyeeg lataitøwein køn’ chib Jesús eshkab wamindiilan mørabe, nømun kemesra wamindin kui wetøgørrabelø køn.

⁴⁶Incha Jesúswan merrarranrrab inchendø, misag søtøwan køriimatabelø køn, kaguende misaamerabe Jesúswane Tius maig karuigwan eshkabig kui treeg tøgagøben.