Read Namrrik Mateo 22 Bible Online

Mateo 22 - Namrrik bible

Mateo 22

¹Katø Jesúsbe nømun ‘øyeeg lataitøwein køn’ cha, kemesra kusrenaniilan waminchib mendappe trenchibig køn:

²—Srømbalasrø Tius nø ashib karub waibe øyeeg lataig køn cha. Kan rey nui nusrkai kasharaben fiesta marøbig lataikke.

³Incha nui karuindiig melabelan novios yaumay linchunrrigay cha eshkailan wamønrrab øriibe, tru linchab amrrunrrai eshkailøbe amrrug kømui indin køn cha.

⁴Inchen nui karuindiig melabelan katøganelan katøyug trencha karua ørøbig køn: “Nai tsal-lanin toromeran kweetsingarua mamigwane yandø chab tamaraguen war cha, møimbe si yandø kerrigu ke chab tamarikken pønrran cha, novios yaumay linchubash tan” chinrrai.

⁵Trune tru linchai eshkailøbe cuentaguen marmø, møikkøsrønbe nui trausrømay iben, katøgane penab, yanøb inchab ibig køn cha.

⁶Inchen katøganeløbe tru reywei karua øriilan merrarrawa, truba kaig marøb kurrabetab køptø kweechibelø køn cha.

⁷Inchen reybe truba namaptø, tru kweechibelane nui suldaumeran truilane kweetsingarua, nømui pueblone parringarun cha.

⁸’Incha nui karuindiig melabelane trendan cha: “Isa kømø, tru noviosmerai fiesta maramibe chab tamarig pønrrøben, tru linchab amrrunrrai eshkailøbe treegube linchabgailø kuig kua, amrrumuig køn cha.

⁹Incha mas nørrø callesmerawan amba, mun wetørrabashtø novios yaumay linchab amrrunrrai eshkanrrigay” tan cha.

¹⁰Inchen tru karuindiig melabeløbe callesmerawan webamba, mun wetørrabashtø tulundzunabelø køn, tabelan køben, kailan købengue. Inchen kasharabelø purrai salayube ¡katø! misaatø netsaptinchibig køn.

¹¹’Inchen reybe tru linchab amrrunrrai eshkailan ashchab kebyabe, kan møg noviosyu linchab keegwan keweig pasrømui ashabe, trenchiptinchibig køn:

¹²“Au, kasuku, kasharabyu keegwan keweig kømubendøbe, ñibe ¿chincha kebarrugu?” cha. Inchen nøbe ke wamguen pinim pasramisrøbig køn cha.

¹³Inchen reybe tru mishatsigu ashib pønrrabelane trenchiptindan cha: “Srøbwanba, tasiimeranba lusra, wambig purø trømbø løstøyu wegutsay cha. Truyube kishib, trugulmeran tsatsamig kønrrun” cha.

¹⁴Kaguende wamiiløbe truba nu køben, lawa wesruiløbe mamdø køn— chibig køn. Tiuswein kønrrabigwane Tiuswan tranøppe, Césarwein kønrrabigwane Césarwan tranøb

¹⁵Øyeelø chab puraiben, fariseosmerabe nøørø mendamisra, nømdø waminchibelø køn, Jesúswan chigøben payen, kalø løtøbene, kebenøsrkønrrab cha.

¹⁶Inchabe møilan køsrøn nømui mendig amøñibelanba, Herodesweingateelanba øyah chinrrai ørøbelø køn: —Kusrennøbig, ñibe ciertonigwan waminchib møg, Tius maig amøñinrrai karuigwan, isa kømø, trunun treeg kusrenanøb, katø misag maig chitanmaptø mørøb pasrømíig kui ashibelø ker cha. Kaguende ñibe mundøgucha nømun mailø køtasha kandarøtø imøwei inchibig køn cha.

¹⁷¿Ñune maig købsruerah? cha, namun eshkarra chibelø køn. ¿Tru Romasrø maya misagwan karub wabigwan nam an pagaramig merig køh, kabe merømuig køh, chinderah?— chinrrai.

¹⁸Inchen Jesúsbe nømun ka kaig martraptø isua inchib pønrrain kui ashabe, trenchibig køn: —Ñim palatø tabelø, ¿nane chindimbarre kebenøsrkønrrab inchigue? cha.

¹⁹Tru pagaram anwan eshkarra— chibig køn. Inchen nømbe kan an srua amrruben,

²⁰Jesúsbe trencha payibig køn: —¿I anyu maløba, i munchi pøriibabe muin køh?— cha.

²¹Inchene nømbe trenchibelø køn: —Tru Césarwein køn— cha. Inchene Jesúsbe trenchiptinchibig køn: —Inchawei Césarwein købene, Césarwan tranay cha. Inchen Tiuswein købene, Tiuswan tranay— cha.

²²Inchen iigwan mørabe, kwaara asha kørrømisra, nømbe nune pasramnetø, ambuptinchibelø køn. Kwawa katø øsiiramigwan payib

²³Tru kwalømdøwei kan møiløgøsrøn saduceosmera Jesúswan ashchab ambubelø køn, truiløbe tru kwabeløbe øsiiramønrrun chibelø kuabe, Jesúswane øyeeg payibelø køn:

²⁴—Kusrennøbig, Moisésbe trendaig køn cha: “Møikkøben kan møg urekkaig kwabene, nuneebe tru piudan kasharam nebunrrun cha, tru nuneg kwabigweimburab ureg kørrømartrab.”

²⁵Pøs yu namui utuma sieteelø nunelø købig køn cha. Indiibe srøsriibe kasharawa, urekkaig kwawa, srawane nunewan kørrømaran cha.

²⁶Katø tru wendø nunewan treetøweim puraiben, katø tru wendau nunewan treetøweim puraiben, sieteelanba treetø treetø puraibig køn cha.

²⁷Yandø srabebe tru ishukkucha kwan cha.

²⁸¿Pøs treeg købene, tru kwabelø katø øsiirabene, tru maya nunelø tru ishuwan kasharaig kuig køppe, nøbe sieteelai utu møigwei srain kønrrerah?— chibelø køn.

²⁹Inchen Jesúsbe trencha løtabig køn: —Ñimbe mandø kuinguen mørmøwa, pella pønrran cha, kaguende Tiuswei wamwan pørigwan lata, Tiuswei maramburab marøbigwan lata nebua ashmeelø kua.

³⁰Kaguende kwailø katøyug øsiirappe, kasharamøwei, kasharanrrab kømøwein kønrrun cha. Treeg kømøtø, srømbalasrø ángelesmera latailøtøwein kønrrun chibig køn.

³¹Inchen tru kwailø øsiiranrrun taigweimburappe, ¿ñimgan lemeelø køtirru? cha, Tius nøtøwei øyah taigwan:

³²“Nabe Abrahamwei Tius, Isaacwei Tius, Jacobwei Tius kur” cha, trendaigwan. Inchawei Tiusbe kwailai Tius kømøtø, øsiguelai Tius køn— chibig køn.

³³Inchen misag truba nu pasrabiibe iigwan mørabe, Jesús kusrenanigwan ke kwaara asha kørrømisrøbelø køn. Martrai karua pasrig mas nuig

³⁴Fariseosmera tru saduceosmeran Jesús niløtø pønrram wamindin kui wammørabe, tulundzuna,

³⁵kan møikkøsrøn tru maig maramigwan martrai Moisés pørigwan kusrenanøbiibe Jesús kalø løtøbene kebenøsrkønrrab isua, trencha payibig køn:

³⁶—Kusrennøbig, ¿maig maramigwan martrai Moisés pørigu karua pønsrailø, mas nuibe møig køh?— cha.

³⁷Inchen Jesúsbe trenchibig køn: —“Señor ñui Tiuswane ñui manrraugurri kerrigu newan undaaraitøgaba, kerrigu ñui øsig pasraitøgaba, kerrigu ñui turtøga isumburab isuitøgaba undaaramig køn, chibig køn” cha.

³⁸Tru maig maramigwan martrai pønsrailøyu, iimerrig køn cha, trurrigu mas nuibe.

³⁹Inchen tru wendauikkucha treeg lataitøwei chibig køn: “Ñima ñiasiitøwei maig undaguig køppe, ñui mendaigwangucha treetøwei undaaramig køn” cha.

⁴⁰Tru maig maramigwan martrai Moisés pørigu kerrigu pønrrabig lata, Tius maig karuigwan eshkabelø kerrigu kusrenaniilø lata i pagatø maig maramigwan martrai pønsrailøyugurri pølbasra amrrubig køn— cha, trenchibig køn. ¿Cristobe mui misagugurri arrubig kerah?

⁴¹Inchen fariseosmera tulaamba srø purramnetø,

⁴²Jesúsbe trencha payibig køn: —¿Ñimbe Cristoimburab maig isugue? cha. ¿Mui misagugurri arritamague?— cha. Inchen nømbe trenchibelø køn: —Davidwei misagugurri arrub nusrkain køn— cha.

⁴³Inchen Jesúsbe trenchibig køn: —¿Trube, treeg købene, Davidbe Cristone chindimba Señor tah? cha, nun Espíritu trendingaruben. Kaguende Davidbe trendaig køn:

⁴⁴Señor Tiusbe tru nai Señorwane trendan cha: “Nai kusrmaygatø wamisr cha,ñui ashig kømui inchib tsalø inchibelan ñi itøbunønrrai ñui srøb umbu na pønsramnegatig.”

⁴⁵Cristone Davidbe: “Señor” cha, øyeeg wamøbene, trube, ¿mandøgurri Cristobe Davidwei nusrkain kønrrab køh?— chiben,

⁴⁶muguen mancha kusrua løtønrrab kaimabelø køn. Incha tru kwalømgurri mugucha chigøben mas payrrab inchimeelø køn.