Read Namrrik Mateo 26 Bible Online

Mateo 26 - Namrrik bible

Mateo 26

¹Jesús iilan kerrigu chab waminchabe nui kusrenanøb pera uniilan trenchibig køn:

²—Ñimguen ashen pa kwalømyube Pascua Fiestan martrab køn cha. Inchen tru Møg Misra Arrubiibe kurusyu mesraig kønrrai tranig kønrrun— cha.

³Inchen tru urastøwei sacerdotesmeran karubeløba, misagwan karubelø kølli misaameraba Caifás, tru maya sacerdotesmeran nø karub sacerdotei palacioyu tulundzunabelø køn.

⁴Incha Jesúswan chinchagøben tammaytø chi isa køben kemøra, kwetchab waminchendø,

⁵trenchibelø køn: —Fiesta utu marmønrrab cha, misaamera ke chindi asamgaig inchimønrrain— cha. Betaniasrø kan ishug may irrabigwan Jesúswan itølushib

⁶Betaniasrø tru Simón leproso taigwei yau Jesús wabene,

⁷kan ishug alabastro limetayu truba may irrabig netsiig truba nuweyigwan srua, kemalla, Jesús mishatsigu wamnetø, tru may irrabigwan tur pala itølushibig køn.

⁸Inchen nui kusrenanøb pera uniiløbe ashabe, ishuwan trenchib namabelø køn: —¿Ke ka yandøbe iigwane chinchabrre lushibig køh? cha.

⁹Waachameran purugumig purø nuwei yanøbsruinrrun— cha.

¹⁰Inchen Jesús wetøbeñabe, trenchibig køn: —¿Ishuwane chi chibrren purrøgue? cha. Pøs iig nan mariibe truba tabig maran chibig køn.

¹¹Kaguende waachamerane chu uragucha ñimui utu tøgagønrrun cha. Trune nane treeg kønrraamøn cha.

¹²Ishug tru may irrabigwan nan asru itølusiibe nan søramigweyasig tamaran cha.

¹³Pøs nabe ñimun cierton trendamønrrun: Yu pirau chutøgucha Tiuswei tabig srø wam kaigyugurri wesrabigwan eshkab kusrenaniisrømbe tru nø marigwangucha tøga waminchun cha, nun pesannamø, isuig kønrrain— chibig køn. Judas Jesúswan ashig kømui inchibelan tranøb

¹⁴Judas, tru Iscariote taig, Jesús doce kusrenanøb pera uniilai utuig, sacerdotesmeran karubelan ashchab yabe,

¹⁵trenchibig køn: —¿Jesúswan ñimui tasku tranene, nane chi tranrrunrrague?— cha. Inchen nømbe an treinta tranøbelø køn.

¹⁶Inchen tru uraskurri Judasbe Jesúswan mandø incha tranamigwan yandø lab mendabig køn. Señorwei Pascua mamig

¹⁷Tru Pirri Levaduragaig Maig Fiesta pølbasrøb kwaløm Jesúswei kusrenanøb pera uniilø nun kemallabe, trencha payibelø køn: —¿Pascua mamigwan ñuimbe nambe chu tamaramø?— cha.

¹⁸Inchene nøbe trenchibig køn: —Ciudayu kan møweimay ambabe trenchinrrigay cha: “Kusrennøbiibe trendan cha: ‘Nai urabe yandø puin køn’ cha. ‘Pascua maramigwan nai kusrenanøb pera uniiløba ñui yau martrab’ tan”— cha.

¹⁹Inchen nui kusrenanøb pera uniiløbe Jesús maig karuigwan mara, tru Pascuan tamarøbelø køn.

²⁰Inchen yandø yem køben, nui kusrenanøb pera uniiløba mishatsigu wawa,

²¹mab wappe, trenchibig køn: —Pøs nabe ñimun trendamønrrun cha: Ñim møikkøsrøn nan ashig kømui inchibelaingatø misra, nan trannrrab køn— cha.

²²Inchen nømbe truba truba isui incha, kan kan nun payib mendabelø køn: —¿Señor, kabe na købra chinderah?— chib.

²³Inchen Jesúsbe trencha løtabig køn: —Kan møikkøsrøn pirriwan i nindagutøwei naba kebishibig, truig nan ashig kømui inchibelaingatø misra, trannrrautan cha.

²⁴Tru Møg Misra Arrubiibe Tiuswei wamwan pørigu maig pørig pasrøben, truwan pureb iben, trune ¡tru møg waacha! tru Møg Misra Arrubigwan ashig kømui inchibelan trannrrabigweimburappe, yeekkucha kuita chibig køn, trembe truibe kal-lamuig kuinguen søl købsruinrrun— cha.

²⁵Inchen tru Judas, tru ashig kømui inchibelaingatø misra trannrrabiibe: —¿Kusrennøbig, kabe na købra chinderah?— cha payene, Jesúsbe: —Ñibe sølwein tan— chibig køn. Señor nui doce pera uniiløba mab

²⁶Incha mab purrappatø, Jesúsbe pirriwan muta, Tiuswan ‘mayanguen pay’ cha, pirisha, nui kusrenanøb pera uniilan trenchib srørrøbig køn: —Cha, may cha. Iibe nai asr køn— cha.

²⁷Incha katø copan muta, Tiuswan ‘mayanguen pay’ cha, nømun trenchib purøørøbig køn: —Søteeløba i copayuigwan mutsay cha.

²⁸Kaguende iig, nai animbe, Tius tru misagweyasig srø acuerdon mari anin køn cha. Tru animbe truba nu misagweyasig kaig mariilan ulø paymø pesannaig kønrrai lusig køn cha.

²⁹Incha nabe ñimun trendamønrrun chibig køn: Uvas piwane mas muchimumønrrun cha, nai Møskai nø ashib karub waisrø katøyug ñimba mutsam kwalømgatig.— Jesús Pedron, nan ‘ashmíig kur’ chinrrautan cha, kanmaytø eshkab

³⁰Incha yandø kan himnon chab cantawabe, Olivos Tunsrømay amba,

³¹Jesúsbe trenchibig køn: —Ñimbe mayeeløba nagurrindø møi yembe nainug isua pønrraigwan trubishinrrun cha. Kaguende Tiuswei wamwan pørigu øyeeg chibig pørig pasran cha:Ubisha ashibigwan na kweechen, ubishamerabe nøørøtø chab lulrrun, chibig.

³²Inchendø nabe katøyug øsiirappe, ñimguen ammøwatø, nabe Galileasrømay yamønrrun— chibig køn.

³³Inchen Pedrobe trenchibig køn: —Mayeeløba ñuinug isua pønrraigwan trubisaingucha, na kuimbe managuen tarømisrmumønrrun— cha.

³⁴Inchen Jesúsbe nune trenchibig køn: —Pøs nabe cierton ñun trendamønrrun cha: Møi yemdøweinguen kallu wamømøwatø, ñibe pønmayguen nan ‘ashmíig kur’ chinrrautan— cha.

³⁵Inchen Pedrobe trenchibig køn: —Ñiba nan kwamig nebuinguen, nabe managuen ñun ‘ashmíig kur’ chimumønrrun— cha. Inchen mayeeløba nui kusrenanøb pera uniiløgucha treetøwein chibelø køn. Jesús Getsemanísrø Tiusba waminchib

³⁶Incha Jesúsbe nui kusrenanøb pera uniiløba, kanbalø Getsemaní taisrømay ambabe, trenchibig køn: —Yu purramisray cha, na øsrø nai Møskaimba waminchab yamne.—

³⁷Incha Pedronba, Zebedeowei nusrkalan pailanba pera yabe, truba isui, ni mumayguen tab kømui inchib menda,

³⁸trenchibig køn: —Nai manrraube isubiitø kwabguen ka kwamdiig køtan cha. Ñimbe yutø kørrømisra, naba ñimgucha kimø, purray— chibig køn.

³⁹Incha Jesúsbe katøguchi ambuurø ya, nui maløwan piraugatig kebachib sraløptinchabe, trenchib Tius Møskaimba waminchibig køn: —Nai Møskai, i copan nan tarømartra cha. Inchendø na maig isuig køben, treeg kønrrain kømøtø, ñun maig maramdiig køben, treeg kønrrain— cha.

⁴⁰Incha katø nui kusrenanøb pera uniilaimay arrua, kib purrai wetørrawabe, Pedrone trenchibig køn: —¿Kan uratøguen kimø, naba kasrig purrønrrab kaimatirru? cha.

⁴¹Kimø, Tiusba waminchib purray chibig køn, chiyugøben kaigyu kegørrømønrrappe. Ñimbe tabigwan martrabwei isuingucha, ñimui asrbe kullaguig køn— cha.

⁴²Incha katøle Jesús Tius Møskaimba waminchab ya, trenchibig køn: —Nai Møskai, i copan na muchimønrrai tarømaramgaig købene, trube, ñun maig maramdiig køben treeg martra— cha.

⁴³Incha katø arruabe, katøguen nui kusrenanøb pera uniilane kiptøweim purrain kui wetørrabig køn, kaguende nømui kabmerabe kigøbiitø ke kanain purrøwa.

⁴⁴Incha nømun purramnetø katø pønmay kønrrabyu Tius Møskaimba waminchab ya, srøsrø mandø wamindig treetøwein chib waminchibig køn.

⁴⁵Incha nui kusrenanøb pera uniilaimay arruabe, trenchibig køn: —¿Katøgucha ñimgan israb, kib srø warøtirru? cha. Yandø ura pun cha, tru Møg Misra Arrubigwan kaig marøbelai tasku tranamig.

⁴⁶¡Kurray, chibig køn, amrrab! cha. Nan ashig kømui inchibelaingatø pasramisrøbig nan trannrrab arrubguen indan cha. ¡Asay!— chibig køn. Jesúswan kemøra srua ambub

⁴⁷Jesús waminchib pasramne, Judas, tru doce kusrenanøb pera uniilai utuibe truba truba nu misaaba arrubig køn, nømbe espadamera køben, tsiimera køben sruargue. Truiløbe sacerdotesmeran karubeløba, misagwan karubelø kølli misaameraba misra, karua øriilø købig køn.

⁴⁸Tru Judas Jesúswan ashig kømui inchibelaingatø pasramisrøbiibe nømune: “Merrarramig kuitamab ñim ashchai, na chi siñal køsrøn maren, ashib pønrrønrrigay cha, eshkain købig køn. Tru na muchaig, truig kønrrun cha. Kemørtrigay” cha.

⁴⁹Incha Judasbe møi møi Jesúsweim pulu kemallib trenchibig køn: —¡Kusrennøbig, yandø yem køn!— cha. Incha muchabene,

⁵⁰Jesúsbe trenchibig køn: —Nai trendø lincha uñibig, chi martrab arruabe, mar— cha. Inchen kaneløbe kemalla, Jesúswan kemøra, sruamrrab merrarrabelø køn.

⁵¹Inchen møikkøsrøn Jesúsba pasrabiibe espadan wesrub, maya sacerdotesmeran nø karub sacerdotei karuindiig megabigwan kaluwan kelarrab lutiichiptinchibig køn.

⁵²Inchen Jesúsbe trenchibig køn: —Ñui espadane wayinug way cha. Kaguende mutøgucha espadatøga kwayabiibe, espadatøgatøwei kweetsig kønrrun cha.

⁵³Ñi isubgan nai Møskawan miamønrraitamatirru cha. Na miabene, nøbe møindøweinguen ángelesmera muguen nebua mundzamgaig ørøbsruinrrun cha.

⁵⁴Pøs treeg købene, Tiuswei wamwan pørigu øyeeg purainrrun taibe, trube, ¿chincha purainrrab kø?— cha.

⁵⁵Incha tru urastø Jesúsbe misaameran payibig køn: —¿Chindimbarre ñimbe espadamera køben, tsiimera køben sruar werrugue cha, nan kemørtrab, nabe kan niliig kui lata? Nabe kwalømmørig Tiuswei yau kusrennøb waben, ñimbe managuen nane kemørmuig køn chibig køn.

⁵⁶Inchendø iig kerrigu øyeeg nebuppe, Tius maig karuigwan eshkabelø Tiuswei wamwan pørigu maig taig treeg nebunrrain kuig køn— cha. Inchen nui kusrenanøb pera uniiløbe nundø elachippa, mayeeløba chab luløptinchibelø køn. Jesús tru Setenteelø maig maramigwan asha marøbelai merrab

⁵⁷Incha Jesúswan merrarrabeløbe tru maya sacerdotesmeran nø karub sacerdote Caifáswei yamay nune srua ambubelø køn, tru Moisés pørigwan kusrenanøbeløba, misagwan karubelø kølli misaameraba tulundzuna pasrainuumay.

⁵⁸Inchen Pedrobe Jesúswei wendau yaptø, yaptø tru maya sacerdotesmeran nø karub sacerdotei ya wambiisrøngatig ya, umbu kebyabe, tru ashchay pønsraig pønrrabeløba wabig køn maig kørrømisrtashchab ashchab.

⁵⁹Inchen sacerdotesmeran karubeløba, tru Setenteelø maig maramigwan asha marøbelø mayeeløbabe Jesúswan kwanrrai pasrtrab møilan køben ‘Jesúsbe kaig maren, nambe ashibwei indig køn’ chib isa waminchabelø labendø,

⁶⁰wetørranrrab kaimabelø køn, møiløgøben ‘øyeeg køn’ chib, ‘øyeeg marøbig køn’ chib isa waminchibelø, truba werruppe werrubendø. Yandø truinchib køptø, pailø werrua,

⁶¹trenchibelø køn: —I møøbe øyah taig køn cha: “Nabe Tiuswei yawan pøtiicha, pøn kwalømyutø katø mara pasramønrrun”— cha.

⁶²Inchen tru maya sacerdotesmeran nø karub sacerdote Caifásbe kurra, Jesúswan payibig køn: —¿Chigucha løtømønrrapteh? cha. ¿Ñune øyeebe chi kalø maran charre inchib køh?— cha.

⁶³Inchen trendaingucha, Jesúsbe chigucha løtømuben, tru maya sacerdotesmeran nø karub sacerdotebe trenchibig køn: —Øsig wab Tiuswei munchiyu nabe ñun, ñi Cristo Tiuswei Nusrkain kuabe, ‘truig kur’ cha, namun eshkau tamønrrun— cha.

⁶⁴Inchene Jesúsbe trencha løtabig køn: —Ñitøweinguen chab trendan cha. Katø nabe ñimune trendamønrrun cha: Møg Misra Arrubiibe tru maramburab marøb Tiuswei kusrmay waben ñim ashib, katø srømbalasrøngurri wañiyu arruben ashib inchun— cha.

⁶⁵Inchen tru maya sacerdotesmeran nø karub sacerdotebe nui kewagúigwandøwei kølsrøb, trenchibig køn: —I møøbe Tiuswane purø trømbøig waman cha. ¿Namun nuimburab waminchabelø mas chiwein kui palønrrab kø? cha. Ñimdøweinguen Tiuswan tru purø trømbøig wamab wamindigwan møran chibig køn.

⁶⁶Incha ¿ñimune maig asønata?— chiben, nømbe trencha løtabelø køn: —Kaigwein køn cha. Kwabash— cha.

⁶⁷Inchen nømbe malau illimbi itøtutamba, kurramba inchen, katøganeløbe pashaguchib

⁶⁸trenchibelø køn: —¡Cristo, mu kurragutsin kui, namun kelarrab eshkau pøs!— chib. Pedro Jesúswan ‘ashmíig kur’ cha isab

⁶⁹Inchen Pedrobe ya wambig wabene, kan mendig megabig srusrø kemallabe, trenchibig køn: —Ñigucha galileasriig Jesúsba uñibig kuig kømøh— cha.

⁷⁰Inchen Pedrobe mayeelai merrab ‘ashmíig kur’ chib trenchibig køn: —Ñibe ni chi waminchib pasrainguen mørmur— cha.

⁷¹Incha yaskabyu Pedro webibene, katøgan srusrø nun ashabe, katøganelan trenchibig køn: —Øikkucha Nazaretsrø Jesúsba uñibig kuig kømøh— cha.

⁷²Inchene Pedrobe katøyug: —‘Tiusken ashen, katø nabe isa waminchibgucha pasrømur’ chib, trenchibig køn. Nabe tru møwane ashmíig kur— cha.

⁷³Inchen yanayu truyu purrabeløbe Pedron kemallabe, trenchibelø køn: —Isa kømø, ñigucha truilai utuigwein køn cha. Waminchibyutøguen møramdiig waminchibig køn— cha.

⁷⁴Inchen Pedrobe: —‘Na isab pasraig købene, trube, nan chigøben nebunrrappe nebubash chib, Tiusken ashen katø nabe isa waminchibgucha pasrømur chibig køn’. Tru møwane nabe ashmíig kur— chib. Inchen tru urastø kan kallu wamaptinchen,

⁷⁵Pedrobe Jesús øyah taig kømørramab isuptinchibig køn: “Kalluguen wamømøwatø, ñibe nan pønmayguen ashmíig kur chinrrun”, taigwan. Incha Pedrobe truyugurri webya, truba truba isuig kishibig køn.