Read Namrrik Mateo 27 Bible Online

Mateo 27 - Namrrik bible

Mateo 27

¹Yandø tør-rraben, sacerdotesmeran karubeløba, misagwan karubelø kølli misaameraba mayeelø Jesúswan kwetchab treeg martrab kandø isua pønrramisrøbelø køn.

²Inchen nun lusra, srua amba, kubenadur Pilaton tranøbelø køn. Judas kwaig

³Judas, tru Jesúswan ashig kømui inchibelaingatø pasramisrøbiibe, Jesúswan kwanrrai pasrig kui ashabe, treeg marmumøtømab, truba truba isua, sacerdotesmeran karubelanba, misagwan karubelø kølli misaameranba tru an treintan

⁴trenchib katø kebusrøbig køn: —Nabe kaig marar cha, chi kaig marmø møwan kwanrrai tranøb.— Inchene nømbe trencha løtabelø køn: —Øibe ñuimburab køn cha, namune trunune manguaasamø— cha.

⁵Inchene Judasbe anwan Tiuswei yau kebetappa, truyugurri webya yabe, naashigu tsi pasra, megamisrøppa, kwaptinchibig køn.

⁶Inchen tru sacerdotesmeran karubeløbe tru anwan tulishabe, trenchibelø køn: —I anbe yandø ani lushaig kaig an køn cha, Tiusweyasig an pusrinuube pusrmønrrai, merig køn— cha.

⁷Incha nømbe tru andøga køtsø marøbigwei tulwan penønrrab cha, treeg martrab kandø isua kørrømisrøbelø køn, tru peesrøngurri amrrub misaameran søramig tøgagønrrab cha.

⁸Inchawei tru pirøbe møin kwalømgatig “Ani Lusra Tul” cha wamig køn.

⁹Øyamay tru Tius maig karuigwan eshkabig Jeremías øyah taig treeg nebuig køn: “Tru an treinta, tru israelitasmera nune an øya pagaranrrab taig anwan nøm srua pønrramisra,

¹⁰trutøgabe køtsø marøbigwei tulwan penan taig, Señor nan maig karuig køben treeg” taig. Pilato Jesúswan ‘¿øyeebe maig kø?’ cha payib

¹¹Incha Jesúsbe yandø kubenadurwei merrab pasrøben, nøbe trencha payibig køn: —¿Ñigan judíosmerai rey køtirru?— cha. Inchen Jesúsbe trenchibig køn: —Ñitøweinguen chab trendan— cha.

¹²Inchen sacerdotesmeran karubeløba, misagwan karubelø kølli misaameraba ‘øyeeg køn’ chib, ‘øyeeg marøbig køn’ chib kømne, Jesúsbe chigucha løtømíig køn.

¹³Inchene Pilatobe trencha payibig køn: —¿Ñun chigøben yeeg chib kømne mørmøtirru?— cha.

¹⁴Inchen Jesúsbe ni chi chib kuingucha manchagucha løtømuben, tru kubenadurbe ‘øyeebe maig kermab’ ke kwaara asha kørrømisrøbig køn. Jesúswan yandø kwanrrai pasrøb

¹⁵Tru fiesta kwalømmerawane kubenadurbe kailan keeri yau pønrrabelan misag møigwan elatchai miaben, trendø treeg marøb elachibig købig køn.

¹⁶Inchen truyu Barrabás taig mayeelø mu kui asig kailan keerig yau pasrabig køn.

¹⁷Inchen tru nøm tulundzuna kømne, Pilatobe trencha payibig køn: —¿Ñimbe møigwan na elatsamig palain køgue cha, Barrabáswandeh, kabe Jesús tru Cristo taigwandeh?— cha.

¹⁸Kaguende Pilatobe Jesúswane uni ashig kømuptø nun tranin kui ashibig køn.

¹⁹Inchen Pilatobe nø wamisra karub waigu srø wamnetø, nui sraimbe trenchinrrai eshkawa ørøbig køn: “Ñibe ñuimburappe chigucha marmøta cha, ø møwan sølgandø tabigwane. Kaguende mira yem purø trømbøig nan piaig køn cha, ø møkkurrindø.”

²⁰Inchen sacerdotesmeran karubeløba, misagwan karubelø kølli misaameraba misaamerane miamne indingarubelø køn, Barrabáswane elatchai miappe, Jesúswane kweetsingarunrrai.

²¹Incha kubenadurbe katøle payibig køn: —¿Ñimbe i pailan møigwan elatsamig palain køgue?— cha. Inchene nømbe trenchibelø køn: —¡Barrabáswan!— cha.

²²Inchen Pilatobe trencha payibig køn: —¿Jesús, tru Cristo køn taigwane, nabe mandø indamø?— cha. Inchene mayeeløba: —¡Kurusyu mesraig kønrrain!— chiben,

²³Pilatobe trenchibig køn: —¿Chindimba øyeeg martreenchigue? cha. ¿Nøbe chi kalø marig kø?— cha. Inchen nømbe masken mur trashibelø køn: —¡Kurusyu mesraig kønrrain!— chib.

²⁴Inchen Pilatobe mumaygucha yandø chi maramgaig kui asha, trune mas mas trømbøig inchen, pi tranrrab øra, mayeelai malau trenchib tasigwan kinabig køn: —Nabe naimburappe i kwanrrabigweimburappe, chi marig kaagøn cha. Iibe ñimuimburab kønrrun— chib.

²⁵Inchen maya misaabe trencha løtabelø køn: —Nø kwawa ani lusiibe namuimburappa, namui uregweimburappa kønrrun— cha.

²⁶Inchen yandø Pilatobe Barrabáswan ka inrrai elacha, Jesúswane chab ichagutsingaruabe, kurusyu mesrønrrai tranøbig køn.

²⁷Incha tru kubenadurwei suldaumerabe tru palacioyu Jesúswan mas umbusrø srua amba, maya suldau søtø nuim pøtøgatan tulundzunøben,

²⁸Jesúswan nui kewagúigwan wesrua, kan keeg kørrabig piguiig kørrabig itøguenanøbelø køn.

²⁹Incha kan kaldiig corona mara, petsøsra, kusrmay taskube kan caña tsig trana, nui merrab tømbønsrabe, ka indzatø ashib trenchibelø køn: —¡Judíosmerai Rey, viva!— chib.

³⁰Katø illimbi tutamba, tru cañatøga turbøtø itsamba inchibelø køn.

³¹Nun øyeeg marøb ka indzatø ashib srua køptø, tru kørrabig kenanigwan wesrawa, nuiwan kenanabe, kurusyu mesrønrrab srua ambubelø køn. Jesúswan kurusyu mesrøb

³²Incha truyugurri webamba amben, kan møg Simón taig cirenesriig arrub pasrain køben, tru møwane Jesúswei kuruswan ke mutamne incha mutøsrøbelø køn.

³³Incha kanbalø Gólgota tainug pubelø køn (tru trenchippe, “Calaverasrøn” tainug).

³⁴Incha truyu Jesúswan vinoba, purø trømbø møb piba lindisaigwan mutchai yuuløbelø køn. Inchen Jesúsbe kaizhig muchamørabe, muchimuptinchibig køn.

³⁵Incha yandø kurusyu chab mesrabe, suldaumerabe Jesúswei kewagúilan mu merrarramig køtashchab suerte kuchibelø køn.

³⁶Inchabe truyu chindashchab ashib purrabelø køn.

³⁷Inchen nui tur palabe kan pørig mesrøbelø køn, chigurrin kwanrrai mesraig køn cha eshkabig. Truibe trenchibig pørig købig køn: IIBE JUDIOSMERAI TRU REY JESUS KØN chibig.

³⁸Katø pagatø nileelangucha nøba kurusyu melsrøbelø køn, kanun kusrmay, kanune atsimaygue.

³⁹Inchen truwan puraambubeløbe tsalø wamab, turwandø kønøgøb,

⁴⁰trenchibelø køn: —¡Ñi tru Tiuswei yawan pøtiicha, katø pøn kwalømyutø kusranrrabiibe ñi kwamønrrab ñitøwei chigøben mar! cha. ¡Tiuswei Nusrkain kuabe, kurusyugurri pinaamø!— chib.

⁴¹Incha sacerdotesmeran karubeløba, Moisés pørigwan kusrenanøbeløba, misagwan karubelø kølli misaameraba misra, ka indzatø ashib trenchibelø køn:

⁴²—Kanelane kaigyugurri wesrubendø, nøasiitøweimbe kaiman cha. Israel misagwei rey kuabe, møimbe kurusyugurri kørraarrubash cha, treenchene, nambe nun køremønrrun chibelø køn.

⁴³Nøbe ¡katø! Tiuswandø isun cha. Trube, Tius nun undaguig kuabe, møimbe nun kwamønrrai marbash cha. Kaguende nøbe: “Tiuswei Nusrkain kur” taig køn— cha.

⁴⁴Inchen nileelø nøba kurusyu melsraig melabeløguen treetøwei nun tøga tsalø wamabelø køn. Jesús kwaig

⁴⁵Inchen kwaløm tøbøtakkurri maaben las treskatig pirø ørø kerrigu løstiig kørrømisrøbig køn.

⁴⁶Tre uras Jesúsbe truba mur trashib trenchibig køn: —Elí, Elí ¿lama sabactani?— cha. (Trenchippe, “Nai Tius, nai Tius ¿chindimba nandø elachigu?” chib.)

⁴⁷Inchen møiløgøsrøn truyu pønrrabelø mørabe, trenchibelø køn: —Øibe Elíaswan wamøtan— cha.

⁴⁸Inchen møi møi nømui utu møikkøsrøn kan ñab esponja lataigwan tranrrab lula, trunun køchiibiyu kebisha, kan caña tsigu pucha, trunun mutchai trig pulusrøngatig nun yuuløbig køn.

⁴⁹Inchene kaneløbe trenchibelø køn: —Kagøbasay cha. Inchippa kwamønrrai pinøsranrrab Elías attashchab— cha.

⁵⁰Inchen Jesús katøle mur trashabe, kwaptinchibig køn.

⁵¹Inchen tru urastø Tiuswei yau tru purø tab llensuzhig kelarrab søtø mesraibe pabaliig misrøb palasrøngurri kørrab kølsrøbig køn. Inchen pirøbe mur kønøben, nørrø sruumerabe pushen,

⁵²kwabelan sørin trabmerabe kuren inchibig køn. Inchen Tiuswei tarømari misaamera truba nørrø kwabelai asrmeraguen øsiiraig købig køn.

⁵³Inchen Jesús kwawa, yandø katø øsiirabene, nømbe tru sørin trabmerayugurri webamba, tru Tiuswei tarømari ciuda Jerusalénsrø kebambubelø køn. Incha misaameran mamdeelandø kømø, kenamisrøbelø køn.

⁵⁴Inchen tru Roma suldau cienelan nø karubiiba, truyu Jesúswan chindashchab ashib pønrrabelø katøganeløba pirø kønabigwan køben, chine purayaigwan køben ashabe, ¡katø kørig købiitø! ke chinchimmørø inchib trenchibelø køn: —¡Isa kømø, iibe Tiuswei Nusrkain købwei indin køn!— cha.

⁵⁵Inchen truyube ishumburmera truba nu yabsrøngurrindø ashib pønrrabelø køn. Truiløbe Galileasrøngurri Jesúswei mendig amrruar, katø nømbe nun purugub linchibelø købig køn.

⁵⁶Inchen tru ishumburwei utube María Magdalena køben, katø Santiagoimba, Joséweimba usri María køben, katø Zebedeowei nusrkalai usrin køben pønrrabelø køn. Jesúswan sørig

⁵⁷Yandø yem misren, kan truba pua møg Arimatea pirausriig José taig pubig køn, truikkucha Jesúswei mendig uñibig købig.

⁵⁸Truibe Pilatoimay yabe, Jesúswei asrwan miaben, Pilatobe truigwan traningarubig køn.

⁵⁹Inchen Josébe asrwan srua ya, kan lino llensu chishchiitøga kirra,

⁶⁰kan peñayu José tru nuyasig søramig trab lalig srøig pasrabigu wayibig køn. Incha tru trabyu truba nu srugwan merrana, kebambinug kasra pasrabe, yandø ibig køn.

⁶¹Inchen María Magdalenaba, katøgan Maríaba sørinug pinrrøgue purrabelø køn. Jesúswan sørinug ashib pønrrønrrai pønsrailø

⁶²Inchen katø kwaløm tru isram kwalømweyasig tamarøb kuin kwaløm chab puraiben, katø kwaløm, tru sábado isrin kwalømbe, tru sacerdotesmeran karubeløba, fariseosmeraba kanbalatø misra Pilaton ashchab ambabe,

⁶³trenchibelø køn: —Au, namui kubenadur, nambe isua ker cha; tru isa waminchiptiibe øsig uñippatø trendaig køn cha: “Kwawa, pøn kwalømyube katø øsiiramønrrun” cha.

⁶⁴Inchawei treeg købene, ñibe pøn kwalømgatig sørigwan tab ashib tøgagønrrai karu, chibelø køn. Inchippa nui kusrenanøb pera uniilø yem amrrua, nui asrwan nilabgun cha. Incha misaameran ‘katø øsiirain køn’ chimønrrai. Treeg purayaisruandøbe si, trube, srøsrø isa wamindi lataikken kømø, katøbe purø trømbøig isa wamindig kønrrun— cha.

⁶⁵Inchen Pilatobe trenchibig køn: —Suldaumera pønrrabelan pera ambay, cha. Ñim maig tamaramdiig køben, treeg tamartrigay— cha.

⁶⁶Incha ambabe, tru sørin trabwan mu chinchimønrrai may tamarøbelø køn. Tru kasrøb srugwane kan sello mesrøb, katø truyu suldaumera ashib pønrrønrrai pønsrøb, treeg inchibelø køn.