Read Namrrik Mateo 4 Bible Online

Mateo 4 - Namrrik bible

Mateo 4

¹Inchen Espíritu Santobe mu misag warab waraimøsrømay Jesúswan pera yaig køn, nugwaimandzig nun kebenøsrkønrrab inchai.

²Inchen cuarenta días yem kwaløm chigucha mamøwa, yandø parøgwai mørøbig køn.

³Inchen tru kebenøsrkønrrab inchibiibe Jesúswan kemallabe, trenchibig køn: —Isa kømø, tru ñi Tiuswei Nusrkain kuabe, i sruumeran pirri misringaru— cha.

⁴Inchen Jesúsbe trencha løtabig køn: —Tiuswei wamwan pørigube trenchibig køn cha: “Møøbe pirrindøgatø øsig tsumøtø, kerrigu Tiuswei wamdøgagucha tsumig køn”— cha.

⁵Incha nugwaimandziibe Jesúswan Jerusalén tru Tiusweindø tarømari ciudasrømay srua ya, tru Tiuswei yau purø palasrø pasrabe,

⁶trenchibig køn: —Isa kømø, tru ñi Tiuswei Nusrkain kuabe, pirausrø pørsrau cha. Kaguende Tiuswei wamyube trenchibig pørig pasran cha:Tiusbe nui ángelesmeran ñun ashchai ørtrun chibig. Incha ñui srøbwan srugu srurrengwamønrrainømui tasiimeratøga ñun kusranrrun— chibig.

⁷Inchen Jesúsbe trenchibig køn: —Katø Tiuswei wamwan pørigube treekkucha chibig køn cha: “Ñui Señor Tiuswane ke chinchibig køtashchab lataikkucha maramig kømøn”— cha.

⁸Katøbe nugwaimandziibe kan truba pala tunsrømay srua yabe, yu pirau chutøgucha nørreelø tru nøm ashib karub purrailanba, katø nømui chigurrimbunø tabig tørig tøgagúigwanba kenamarabe,

⁹trenchibig køn: —Iigwan nabe kerriguba tranrrumøn cha, ñi nan srala, køriibala tabig waminchene.—

¹⁰Inchene Jesúsbe trencha løtabig køn: —¡Satanás, møi møi iptsu! cha. Kaguende Tiuswei wamwan pørigube trenchibig køn cha: “Señor ñui Tiuswandø køriibala tabig waminchib, nuyasiitø marøb megamig køn”— cha.

¹¹Inchen nugwaimandziibe nuinukkurri tarømisren, ángelesmera amrrua, purugubelø køn Jesúswan. Jesús tru nui maramigwan Galilea pølbasrøb

¹²Juan Bautistan kailan keeri yau keerin køn taig Jesús wammørabe, Galileamay ibig køn.

¹³Incha Nazaret puebloyugurri webyabe, Capernaum pueblosrø pisu menda, Zabulónwei misag warainuuba, Neftalíwei misag warainuuba tru pirau tsunrrab ibig køn.

¹⁴Øyeeg nebuppe, Tius maig karuigwan eshkabig Isaías øyah taig nebunrrain kuig køn:

¹⁵Zabulónwei misag warainuuba, Neftalíwei misag warainuuba tru pirau, Jordán pi ambøgatø tru nu pisugatømaysrø, Galilea tru judío kømeelø warainug,

¹⁶misaamera løstøyu warabeløbe kan truba tørig asan chib.Kwamig nømuim pala itøgasraig lataig warabelø købelane kan tørig kebilin køn, chib pørig.

¹⁷Trugurrimbunø Jesúsbe eshkab kusrenanøb trenchibig køn: —Kaig mariilan isua møra, Tiusweimay lliray cha. Srømbalasrø Tius nø ashib karub waibe lutau pasran— cha. Jesús pibgatø peskabelan wamab

¹⁸Jesús Galilea nu pisu mendawan ib pasrøwabe, pa nunelan ashibig køn, kane Simón, truigwane katø Pedrogucha taig, kane Andrés taig. Truiløbe peskabelø kua, nømui atarrayameran piyu keguchib warøben,

¹⁹Jesúsbe trenchiptinchibig køn: —Nai mendig amrruy cha. Nabe ñimune misaameran peskabelø kønrrai maramønrrun— cha.

²⁰Inchen tru urastø nømbe nømui atarrayasmeran warøb, nøba ambuptinchibelø køn.

²¹Incha Jesúsbe katøguchi mas ambuurø yabe, katøgan pa nunelø warai ashibig køn, truiløbe Zebedeowei nusrkalø, Santiagoba, Juanba. Nømbe nui møskaimba barcoyu atarrayamera kølsrailan tamarøb purrøbene, Jesúsbe tru nusrkalan wamabig køn.

²²Inchen nømbe tru urastø barconba, nømui møskawanba kørrømarøppa, Jesúswei mendig ambuptinchibelø køn. Misag truba nuwan Jesús kusrenanøb

²³Jesúsbe Galilea pirau ørøba llirab ibig køn, judíosmera tulundzuni yamørig Tius nø ashib karub pasrainuguig tabig srø wamwan eshkab kusrenanøb. Incha misaameran chi kwanrreelan køben, chi pusrkwailan køben tamarøbig køn.

²⁴Jesúswane Siria pirausrø kerrigu wammøra kua, mayan kwanrreelan srua amrrubelø køn. Tru chi kwanrrø køben tøgarmeran, katø ni mumayguen tab kømui mørøb inchibelan, tru kwaimandziimera tøgarmeran køben, itønab pesannabig tøgarmeran køben, kønønrrab kaimabelan køben srua amrrubelø køn. Inchen Jesúsbe tamarøbig køn.

²⁵Inchen misaamera galileasreelø køben, decápolissreelø køben, jerusalénsreelø køben, judeasreelø køben, Jordán pi tru pørr kal-labgatøsreelø køben Jesúswei mendig truba nu ambubelø køn.