Read Namrrik Mateo 8 Bible Online

Mateo 8 - Namrrik bible

Mateo 8

¹Yandø Jesús tun palasrøngurri kørraarruben, misag truba nu mendig amrrubelø køn.

²Inchene kan møg asr trerab kwanrrø, lepra taig, tøgaig kemallippa, Jesúswei merrab tømbønsrabe trenchibig køn: —Señor, nan ñi tamaramdiig købene, tamartra— cha.

³Inchen Jesúsbe tasigwan larrøbicha estsarabe, trenchibig køn: —Tamarøg køtan cha. Tamarig kørrømisr— cha. Inchen tru urastø nui trerab kwanrrøbe chishig kørrømisren,

⁴Jesúsbe trenchibig køn: —Au, mungøben eshkawabesin cha. Inchendø ya, ñui asrwan sacerdotendø kenamara, katø Tiusweyasig tru Moisés tranrrig taigwane srua ya, tranrrig cha, mayeeløba ñui kwanrrøwan chishig kørrømisrin kui ashchain— cha. Suldau søtøwan nø karub pera pasrabigwei mendig megabigwan Jesús tamarøb

⁵Yandø Jesús Capernaumsrø kebibene, romanosmerai suldau cienelan ashibig, kan centurión taig, nuimay arruabe, nun purugurra chib,

⁶trenchibig køn: —Señor, nai mendig megabiibe yau kwanrrø tsun cha, truba truba pusrkwai inchib, kerrigu kønønrrab kaimaig.—

⁷Inchene Jesúsbe trenchibig køn: —Nabe arrua, tamaramønrrun— cha.

⁸Inchen tru centuriónbe trenchibig køn: —Señor, ñi nai yau kebattraimbe, nabe trengatig kømuinatan cha. Tammisr cha, treetø chirra cha. Nai karuindiig megabiibe tammisrtrun cha.

⁹Kaguende nagucha mas nørreelø karuig kur cha. Katø treeg køben na karub tøgagúilø suldaumera tøgagur cha. Truilanma na møigwan køben: “Inrrø” chibene, ib; katø na møigwan køben: “Amø” chibene, arrub; katø nai karuindiig megabigwan chigøben: “Mar” chibene, marøb inchibig køn— cha.

¹⁰Jesús iigwan møra, kwaara asha kørrømisrabe, nui mendig amrrubelan trenchibig køn: —Nabe ñimun cierton trendamønrrun: Israelsrø møigweinukken isubigwan nainug pasra tøgagúig øyangatig nuig wetørramur cha, i møwei lataig.

¹¹Incha nabe ñimune trendamønrrun chibig køn: Pørr kal-labgatøsrøngurrin køben, pørr kebibgatøsrøngurrin køben truba nu amrrua, Abrahamba, Isaacba, Jacobpa manrrab purramisrtrun cha, srømbalasrø Tius nø ashib karub waisrø.

¹²Trune Tius nø ashib karub waisrø purrønrrab ureemerabe wambig purø trømbø løstøyu webusriilø kønrrun cha. Truyube kishib, trugulmeran tsatsamig kønrrun— cha.

¹³Incha Jesúsbe tru centuriónwan trenchibig køn: —Yamay inrrø cha. Ñi maig køreig treeg kønrrun— cha. Inchen tru urastø tru mendig megabiibe tammisrig køn. Jesús Pedroi sueeran tamarøb

¹⁴Jesús Pedroi yamay arrua, kebyabe, Pedroi sueerabe camayu pachiiba tsui ashibig køn.

¹⁵Incha Jesúsbe tru ishuwei tasigwan katørabene, pachiibe weetaptinchen, nøbe kurra, tru pubelayasig chi maramigwan marøb mendabig køn. Kwanrreelø truba nørrøwan Jesús tamarøb

¹⁶Yandø yem misren Jesúsweimay truba yamelan kwaimandzig tøgarwan misaabe srua amrruben, kan wamitøgatø tru kwaimandziimeran webetab, katø chi kwanrrø køben tøgarwan mayeelan tamarøbig køn.

¹⁷Øyeeg pureppe, Tius maig karuigwan eshkabig Isaías øyah taig nebunrrain kuig køn:Nøtøwei namui pusrkwabelanba, namui kwanrrømeranba kerran, taig. Jesucristoi mendig ambamibe murig køn

¹⁸Jesúsbe nuin pøtøgatan misaamera truba nu tulsrua kui ashabe, nui kusrenanøb pera uniilane pisu ambøgatømaysrø larramrrai karubig køn.

¹⁹Inchen tru maig maramigwan martrai Moisés pørigwan kan kusrenanøbig kemallabe trenchibig køn: —Kusrennøbig, ñi chu ibendø, nabe mendig arrumønrrun— cha.

²⁰Inchene Jesúsbe trencha løtabig køn: —Zorramerabe waramig trab tøgagøben, katø pala amøñib illimeragucha nømui lemera tøgar køn cha. Trune na, Møg Misra Arrubiibe ni nai turwan chu nerrarramikken chigaig kur— cha.

²¹Inchen katøgan møikkøsrøn, Jesúswan mendig uñibiibe, trenchibig køn: —Señor, nai møskawan sørønrrabmerrig ibashcha— cha.

²²Inchene Jesúsbe trenchibig køn: —Ñibe nai wendau amø cha. Tiusweimburabigu kwaig latailøbe nømui kwailan sørøbash— cha. Jesús isig ichibigwanba, pi latøgushibigwanba kønøbashmub

²³Jesús yandø barcoyu nebiben, nui kusrenanøb pera uniiløbe nun lincha ambubelø køn.

²⁴Inchene møimbe maryube truba trømbøig mur isig ichib kurra, pi welarmera barcoyu mas, mas negutsingucha, Jesúsbe kib tsubig køn.

²⁵Inchen nui kusrenanøb pera uniiløbe kasrønanrrab amba, trenchibelø køn: —¡Señor, namun wesrurra chib, chab asentab meler!— cha.

²⁶Inchen nøbe trenchibig køn: —¿Chindimbarre kørig køta? cha. Ñim kui ñimui isubigwan nainug ke kagømønrraindøzhig pasra tøgar— cha. Incha kurrabe, isigwanba, marwanba kønømønrrai kandø wamuben, ¡katø! yandø kerrigu wasrønzhig kørrømisrøbig køn.

²⁷Inchen nømbe kwaara asha kørrømisra, trenchibelø køn: —¿Øyeebe chi møg kerah? cha. ¡Isig ichibig lata, mar lata, iiløguen nun mørtrappe!— Jesús Gadarasrø pailø kwaimandzig tøgarmeran tamarøb

²⁸Jesús pisu ambøgatø Gadara pirausrø larraibene, pailø kwaimandzig tøgarmera sørin trabmerayugurri werrua, Jesúswan kemallibelø køn. Truiløbe truba namiguelø køptø, tru maywane mugucha puramrrab kaimabelø køn.

²⁹Inchabe trenchib trashibelø køn: —Tiuswei Nusrkai, ¿namune chi martrab inchigu? cha. ¿Namun ¡katø! purø trømbøig møra melønrrai martrab attirru cha, tru treeg maramig pumøwatøbe?—

³⁰Truyugurri maya yab køsrøn kuchimera truba nu lawa mab amøñibelø køn.

³¹Inchen tru kwaimandziimerabe Jesúswan trenchib rugabelø køn: —Namun webetappe, trube, tru kuchimerayu kebambingarurrunrrig— cha.

³²Inchene Jesúsbe trenchibig køn: —Ambay pøs— cha. Inchen tru kwaimandziimerabe møguelainukkurri webamba, kuchimerayu kebamben, tru urastø kuchimerabe luløb mendappe, truba trømbø lendeyu lula, chab pinøgørraptincha, larrø nu pisuyu kegørra, pi keesra, chab kwabelø køn.

³³Inchen tru kuchi ashibeløbe chab lula, pueblosrø puabe, tru kwaimandzig tøgar købelan maig purayaigwan kerriguh waminchib mendabelø køn.

³⁴Inchen puebloyu maya misaabe Jesúswan katønrrab webamba, nun ashabe, tru piraugurri ‘irra’ cha, truba rugabelø køn.