Read Namrrik Mateo 9 Bible Online

Mateo 9 - Namrrik bible

Mateo 9

¹Inchen Jesúsbe kan barcoyu nebya, pisu ambøgatøsrø larraya, nui puebloyu pubig køn.

²Inchen truyube kan møg kønønrrab kaimabigwan kan tsigalyu muta amrruben, Jesúsbe nømui isubigwan ke nuinuutø pasra pønrrai ashabe, kwanrriigwane trenchibig køn: —Nai nusrkai, kullaaramøta cha. Ñui kaig mariilan ulø payamig kømíig, pesannaig kørrømisran— cha.

³Inchen møiløgøsrøn tru Moisés pørigwan kusrenanøbeløbe treeg isubelø køn: “Nøbe Tiusweimburab purø trømbøig waman” chib.

⁴Inchen Jesúsbe nøm chi isub kuilan ashabe, trencha payibig køn: —¿Ñimbe ñimui manrraube chindimbarre øyeeg kaig isub køgue? cha.

⁵¿Møigwan mas kørmø trendamdiig købsruerah? cha. Kabe: “Ñui kaig mariilan ulø payamig kømíig pesannaig kørrømisran”, ¿tamiteh? Kabe: “Kurrab, inrrø”, ¿tamiteh? cha.

⁶Pøs, na, Møg Misra Arrubiibe yu pirau kaig mariilan ulø payamig kømíig pesannaig kønrrai mu mandamgaig marøbig kui møimbe ñim ashchai kenamaramønrrun— chibig køn. Inchabe tru kønønrrab kaimabigwane trenchiptinchibig køn: —¡Kurrø! cha. ¡Ñui tsigalwan mutab, ñui yamay inrrø!— cha.

⁷Inchen kwanrriibe kurra, nui yamay ibig køn.

⁸Inchen misaamera iigwan ashabe, truba kørig kui inchibelø køn, Tiusbe møguelan øyeeg mu mandamgaig maramig tranitamab isua. Incha øyeeg marikkurri Tiuswan truba tabig waminchibelø køn. Jesús Mateowan wamab

⁹Jesús truyugurri yabe, kan Mateo taig møwan romasreelayasig an utabelø purrainug wai ashabe, trenchibig køn: —Nai mendig amø— cha. Inchen nøbe kurrab, nui mendig ibig køn.

¹⁰Indiibe Jesúsbe tru Mateowei yau mab wabene, truba yamelø romasreelayasig an utabelø køben, katøganelø kaig marøb misaamera køben puabe, Jesúsba, nui kusrenanøb pera uniiløba mishatsigu trubalatø purrøben,

¹¹møiløgøsrøn fariseosmera trunun ashabe, nui kusrenanøb pera uniilan trencha payibelø køn: —¿Ñimui kusrennøbiibe an utabeløba, kaig marøbeløba mab, muchib wappe, øyeebe maig marøb wah?— cha.

¹²Inchene Jesús trunun mørabe, trenchibig køn: —Tabelø kwanrrøgarbe mø marøbig palain kømøn cha. Kwanrreeløbeguende palain køn cha.

¹³Amba, i pørigu chi chibig kuigwan kusrey cha, tru Tiuswei wamyu øyah chibigwan: “Animal kweecha, nan tranøb kømøtø, ñimbe lastima ashibelø kønrrai inchar” taigwan. Kaguende nabe sølgandø amøñibelan wamønrrab arrumøtø, kaig marøbelan wamønrrab arrig køn— chibig køn Jesúsbe. Ayunamigweimburab Jesúswan payib

¹⁴Juan Bautistai mendig amøñibelø Jesúswan kemallabe, trencha payibelø køn: —Namba, fariseosmerababe ayunamigwan katø katø marer cha. ¿Inchen ñui kusrenanøb pera uniiløbe chindimbarre trunun marmeelø køh?— cha.

¹⁵Inchene Jesúsbe trenchibig køn: —¿Kan novios yaumay linchai eshkailanma novio nømba wabengan isuin purrønrraitarru? cha. Inchendø yandø novion srua ambam kwalømmera punrrun cha. Inchen ayunabwei inchun cha.

¹⁶’Muguen kan køllin camisanma kølsraigu srø llensu søtiimíigwan waya, tsushimøn cha. Kaguende tru srø llensube kesruppa, kølli llensune kølsrøben, mas trømbøikken kølsraig kørrømisrtrun cha.

¹⁷Katø srø vinonma køllin kalusmerayu usrmøwei inchibelø køn cha. Kaguende treeg marene, kalusmerabe srurrøben, vinobe lushen, yandø kalusmerabe ka pinønrrun cha. Inchawei srø vinone srø kalusmeran marigu usramig køn cha. Trumaybe møigwandøgucha chi mindisaig kømønrrun— chibig køn Jesúsbe. Jesús kan ishuwan kwanrrøwan tamarøb

¹⁸Jesús waminchib pasramne, judíosmeran chi maramigwan kan karubig puabe, nui merrab tømbønsra, trenchibig køn: —Nai nimbasr ke møindø kwan cha. Øyeeg kuindøgucha, ñi arrua, tasigwan nuim pala estsarene, katø øsiiranrrun— cha.

¹⁹Inchen Jesúsbe kurra iben, nui kusrenanøb pera uniilø nun lincha amben, nøbe tru møøba ibig køn.

²⁰Indiibe kan ishug doce años ørøba ani ib kwanrrø tøgaig chiguen tab kømui megawa, Jesúswan wendaugurri kemallippa, Jesús nø kewagúig urøzhigwandø katørabig køn.

²¹Kaguende nøbe treeg isubig køn: “Nui kewagúigwan ka katøraitø tammisrig kørrømisramønrrun” cha.

²²Inchen Jesúsbe keesha asha, tru ishuwan ashabe, trenchibig køn: —Chi isumøta cha. Nimbasr, ñui isubigwan nainuutø pasra tøgagúikkurri tamarig kørrømisran— cha. Indiibe tru uraskurri yandø tammisrig kørrømisrig køn. Kan ishug-unan Jesús øsiiranøb

²³Incha Jesús tru judíosmeran karubigwei yau pubene, lus urrabelø køben, katø misaamera truba trashib kishib kui ashibig køn.

²⁴Inchabe trenchibig køn: —Yugurri webambay cha. Ishug-unøbe kwaig kømøtø, ka kiptø tsun— cha. Inchen misaamerabe Jesúswane ka indzatø mørøbelø køn.

²⁵Incha nømun webambingaruben, Jesúsbe kebya, ishug-unan tasigu kemørene, unøbe kurraptinchibig køn.

²⁶Inchen tru piraube muba kuimburab treeg purayaigwan wammørig kørrømisrøbig køn. Pailø kabgailan Jesús tamarøb

²⁷Jesús truyugurri webya ibene, pailø kabgailø trenchib trashib wendautø amrrubelø køn: —¡Namun lastima ashcha chib, merrabsrø Davidwei Nusrkai!—

²⁸Inchen Jesúsbe yau kebiben, tru kabgailø kemallene, nøbe trencha payibig køn: —¿Ñimbe na øyeegwan martraitamab køregueh?— cha. Inchen nømbe: —Señor, øø— cha, løtabelø køn.

²⁹Inchene Jesúsbe nømui kabmeran katørawabe, trenchibig køn: —Ñim ñimui isubigwan nainug maig tøgagúig treeg kønrrain— cha.

³⁰Inchen nømui kabmerabe ashibelø misren, Jesúsbe trenchib karubig køn: —Mun køben eshkab kønrrab kømø cha, i marigwan.—

³¹Trendaingucha nømbe webambuptø, Jesús nø chi marigwan tru pirau mayeelan waminchibelø køn. Kwaimandzig tøgaig waminchab kaimabigwan Jesús tamarøb

³²Inchen tru kabgailø købeløbe webambub kømnetø, møiløgøsrøn Jesúsweimay kan wamgaig kwaimandzig tøgaigwan srua amrrubelø køn.

³³Inchen Jesús tru kwaimandzigwan weguchen latatø, tru wamgaibe waminchiptinchen, misaabe kwaara asha kørrømisra, trenchibelø køn: —¡Managuen nam Israel misaamerai utube øyeekkatiibe ashmer!— cha.

³⁴Inchen fariseosmerabe trenchibelø køn: —Kwaimandziimeran ke nøasha karub pasrabikkurri kwaimandziimeran nøbe webusrøbig køn cha.— Jesús misagwan yeekkucha nebuig melaitamab lastima ashib

³⁵Jesús maya pueblomerasrø, yamera tsitsø pønrrabsrø, judíosmera tulundzuni yamørig kusrenanøb, tabig srø wam Tius nø ashib karub wainuguigwan eshkab waminchib, chi kwanrrømeragurrimbunø tøgarwan pusrkwabelan tamarøb llirab ibig køn.

³⁶Incha truba nu søtø misagwan ashabe, lastima isui inchibig køn. Kaguende nømbe truba isuilø, chinchabguen kaimar, kan ubishamera mu ashchabig chigar latailø køben.

³⁷Incha nui kusrenanøb pera uniilan trenchibig køn: —Ellmarig tulisamibe truba nørrø køben, trune tulishinrrabeløbe mamdø køn cha.

³⁸Inchawei tru ellmarig puaig Tiuswan miay chibig køn, nui ellmarigwan tulishinrrabelø ørtrai.—