Read Namrrik Marcos 1 Bible Online

Marcos 1 - Namrrik bible

Marcos 1

¹Tiuswei Nusrkai Jesucristoimburab tru tabig srø wambe øyamay pølbasrig køn:

²Tru Isaías Tius maig karuigwan eshkabig maig pørimbala:Au, nabe nai wam srua inrrabigwan ñui merrab ørar cha, truibe ñui maywan tamartrai.

³Mu misag warab waraimøsrø kan wam trenchib trasan chib:“Señorwei maywan tamarøb, nuyasig maymerane ølmarøb inday” tan, chib.

⁴Treekkurri Juan Bautistabe mu misag warab waraimønug kenamisra, misaameran mas kaig marmønrrab isua møra, Tiusweimay llirain kønmab asamig piu umbu ulsrailø kømigwan eshkab kusrenanøbig køn, kaig mariilan ulø payamig kømíig pesannailø kønrrai.

⁵Inchen maya misag Judea pirausreelø køben, Jerusalén ciudasreelø køben nuimay mørtrab amrruabe, nømui kaig mariilan ‘øyeeg marig køn’ chib eshkabene, truilan Juanbe Jordán piyu piu umbu ulsrøbig køn.

⁶Juan kewagúibe camello isiitøga marig købig køn. Inchen nui pørønaibe kaluswan marig køben, nui mamibe nørrø chapullba, kaambu mielba købig køn.

⁷Incha misagwan eshkab waminchibig køn: —Nai wendaube katøgan na lataguen kømø, maramburab marøbig maskenig attrun cha. Trunune nabe nui alpargatisyu tsiwan utsøbasra, pichibguen pitchabgaig kur chibig køn.

⁸Nabe ñimune pi pinøbulrrai piu umbu ulsrar cha. Trune nøbe ñimun Espíritu Santotøga pinøbulrrun— chibig køn. Jesús piu umbu ulsraig

⁹Inchen tru kwalømmerawan Galilea pirau, Nazaret puebloyugurri Jesús webiben, nune Jordán piyu Juan piu umbu ulsrøbig køn.

¹⁰Inchen piu umbugurri webarrub latatø, Jesúsbe srømbala kuri ashib, Espíritu Santo nuim pala kan paloma lataig kørraarri ashib inchen,

¹¹Srømbalasrøngurrimbe kan wam treeg mørø waminchib trenchibig køn: —Ñibe nai Nusrkai undaaraig køn cha. Nabe ñuimburab truba tab kui war— cha. Nugwaimandzig Jesúswan chindashchab inchib

¹²Inchen tru urastø Espíritu Santobe Jesúswan mu misag warab waraimøsrø møi møi ingarubig køn.

¹³Inchen Jesúsbe truyu kwalømmera cuarenta nemisramne tsuben, Satanásbe kebenøsrkønrrab ke chinetø maringarunrrab inchibig køn. Inchen ángelesmera purugubelø køn, Jesúsbe namig animalmerai utu tsuben. Jesús Galilea pirau nui chi maramigwan pølbasrøb

¹⁴Juanwan kailan keeri yau keeri wendø, Jesúsbe Tiusweimburab tabig srø wamwan Galilea pirausrø eshkab kusrenanøb ya,

¹⁵trenchibig køn: —Yandø øyeeg kønrrabig puben, Tius nø ashib karub pasraibe lutau pasran cha. Ñimui kaig mariilan isua møra, Tiusweimay llirab, tabig srø wamwan kørey— cha. Jesús pibgatø peskabelan nui mendig amrrunrrai wamab

¹⁶Jesús Galilea nu pisu mendawan ib pasrøwabe, Simónwanba, nuneg Andréswanba, truiløbe peskabelø kua, nømui atarrayameran pisuyu keguchib warai ashibig køn.

¹⁷Inchabe Jesúsbe trenchibig køn: —Nai mendig amrruy cha. Nabe ñimune misaameran peskabelø kønrrai maramønrrun— cha.

¹⁸Inchen nømbe møi møi nømui atarrayameran waramnetø Jesúswei mendig ambubelø køn.

¹⁹Inchen Jesúsbe katøguchi ambuurø yabe, Zebedeowei nusrkalø Santiagonba, nuneg Juanwanba ashibig køn. Truiløbe kan barcoyu nømui atarrayameran tamara tsushib purrabelø køn.

²⁰Inchabe tru urastø wamøben, nømbe nømui møskai Zebedeowanba, purugubelanba barcoyu purramnetø, Jesúswei mendig ambuptinchibelø køn. Kan møg kwaimandzig tøgaigwan Jesús tamarøb

²¹Incha Capernaum puebloyu pua, tru isrin kwalømbe Jesúsbe judíosmera tulundzuni yau kebya, kusrenanøb mendøben,

²²nø wamindiilan møra, misaamerabe kwaara ashibelø køn. Kaguende kusrenanøppe, nuinukkurrindøwei mu mandamgaig kusrenanøbig køn, tru Moisés pørigwan kusrenanøbelø lata kømø.

²³Inchen tru puebloyu judíosmera tulundzuni yaube kan møg trømbøig maringarub kwaimandzigwan tøgaig wawa, trenchib trashibig køn:

²⁴—¿Nambabe ñibe chi asamig tøgagugu cha, Nazaretsrø Jesús? ¿Namun pinishinrrab attirru? cha. Nabe ñune mu kui ashar chibig køn. Ñibe tru Tiuswei Newan Tabig, truig køn— cha.

²⁵Inchen Jesúsbe kwaimandzigwan namab trenchibig køn: —¡Ñibe trashimøtø, møweinukkurrimbe webinrrø!— cha.

²⁶Inchen trømbøig marøngarub kwaimandziibe møwan truba mur sruagucha, tru møweinukkurri mur trashib webibig køn.

²⁷Inchen mayeeløba kwaara asha, nømasiyaitø trenchib payiyabelø køn: —¿Øyeebe chi kerah? cha. ¡Kusrenanig iibe ke srøig, trurrigu nø maig chippe ke treeg kønrrai maran! cha. I møøbe trømbøig maringarub kwaimandziimeranguen mu chindamgaig wamøben, nune møran— cha.

²⁸Inchen petø Galilea pirau ørøba misaamerabe Jesús nø chi marigwan wammørøbelø køn. Jesús Simón Pedroi sueeran kwanrrøwan tamarøb

²⁹Incha tru urastø judíosmera tulundzuni yaugurri webambabe, Jesúsbe Jacoboba, Juanba, Simónweimba, Andrésweimba yamay amben,

³⁰Simónwei sueerabe camayu pachiiba tsuben: “Kwanrrø tsun” cha, tru urastø Jesúswan eshkaben,

³¹Jesúsbe kemalla, tasigu kemørøb kusrabene, pachiibe weetaptinchen, nøbe tru pubelayasig chi maramigwan marøb mendabig køn. Jesús truba yam kwanrreelan tamarøb

³²Yandø pørr pinaiben, chab pilliraben, Jesúsweimay mayeelø kwanrrø tøgarmeranba, kwaimandziimera tøgarwanba srua amrruben,

³³puebloyu maya misaaba yaskabugøba tulundzuna pasrøben,

³⁴Jesúsbe truba yamelø chi kwanrrø køben tøgarmeran tamarøb, katø truba yam kwaimandziimeran misaamerainukkurri webusrøbig køn. Incha kwaimandziimerane waminchibashmíig køn, kaguende truiløbe nune mu kui ashibelø køben. Jesús Galilea pirau truørø srø wam tabelan eshkab kusrenanøb

³⁵Incha løtsøzhig ullarbatø, Jesúsbe kurra, ciudayugurri wambig mu misakkasrø, trusrø Tius Møskaimba waminchib wabig køn.

³⁶Inchen Simónba, nui linchibeløba lanrrab webamba,

³⁷wetørrawabe, trenchibelø køn: —Mayeeløba ñune lab køn— cha.

³⁸Inchen nøbe trencha løtabig køn: —Misaamera puluwandø katøganbalømera warabsrømay amrrab cha. Trusrøngucha srø wam tabelan eshkab kusrennrrab, kaguende nabe truweiwei arrur— cha.

³⁹Incha Jesúsbe Galilea pirau ørøba judíosmera tulundzuni yamerayu chutøgucha eshkab kusrenanøb, katø kwaimandziimeran misaamerainukkurri webusrøb inchibig køn. Asr trerab kwanrrø, lepra taig, tøgaigwan Jesús tamarøb

⁴⁰Kan møg asr trerab kwanrrø, lepra taig, tøgaig Jesúswan kemalla, tømbønsrabe trenchibig køn: —Ñi nan tamaramdiig købene, tamartra— cha.

⁴¹Inchen Jesúsbe lastima asha, tasigwan larrøbicha estsarabe, trenchibig køn: —Tamarøg køtan cha. Tamarig kørrømisr— cha.

⁴²Inchen møi møi nui trerab kwanrrøbe pinøben, nøbe chishig kørrømisren,

⁴³Jesúsbe yandø ‘inrrø’ cha, nune kuchi murtø waminchib trenchibig køn:

⁴⁴—Au, mungøben eshkawabesin cha. Inchendø ya, ñui asrwan sacerdotendø kenamara, tru ñi yandø chishig kørrømisrimburø tru Moisés trannrrig taigwane srua ya, trannrrig cha, mayeeløba ñui kwanrrøwan chishig kørrømisrin kui ashchain— cha.

⁴⁵Trendaingucha møøbe ya, chi purayaigwan mayeelan waminchib mendøben, treekkurri Jesúsbe chu puebloyutøgucha misag ashene, yandø kebinrrab kaima, mendawansrø misakkanug uñibig køn. Inchen chugurrielø køben nun ashchab amrrubelø køn.