Read Namrrik Marcos 10 Bible Online

Marcos 10 - Namrrik bible

Marcos 10

¹Jesúsbe truyugurri webya, Judea pirausrømayba, Jordán pi ambøgatø pørr kal-labgatøsrømayba iben, katø trusrøngucha misaamera tulundzunab mendøben, nøbe trendø treeg marøbig kua, katø nømun kusrenanøb mendabig køn.

²Inchen møiløgøsrøn fariseosmera Jesúswan kemallabe, trencha payibelø køn, maig inchibig køtashchab: —¿Keebe srawan kutsamig chi meriimíig kø, chindah?— cha.

³Inchen nømune trencha løtabig køn: —¿Moisésbe ñimune maig karuig køh?— cha.

⁴Inchen nømbe trenchibelø køn: —Moisésbe ka tarømisriyabasig køn cha. Srawan treeg martrab cha, eshkabig kilga marabe, ka tarømisramig køn taig køn— cha.

⁵Inchene Jesúsbe trenchibig køn: —Moisés treeg marbashippe, ñimui manrrømera isumíig larrø mureløgurri ka treeg martrai ñimun pørig køn cha.

⁶Inchendø srøsrø kwaløm chiwandøgucha marøb uras: “Tiusbe møwanba, ishuwanba ellmarig køn cha.

⁷Øyeekkurri møøbe møskawanba, usranba elatchun cha, nui sraimba kandø kønrrab.

⁸Incha tru pailøbe kan asrtø kønrrun” cha. Inchawei yandø pailø kømø, kan asrtø køn cha.

⁹Inchawei treeg købene, Tius kandø mara lindisaigwane møøbe tarømaramig kømøn— chibig køn.

¹⁰Incha yausrø purrøwabe, nui kusrenanøb pera uniiløbe trunun katøyug payen,

¹¹Jesúsbe trencha løtabig køn: —Møikkøben srawan kucha, tarømisra, katøganba kasharabiibe nune itølula kørrømaran cha.

¹²Kabe sraingurringucha kewan kucha, tarømisra, katøganba katø kasharawabe, treetøwei itølulan— cha. Uregwan Jesús mayanguen tab kuilø kønrrain chib

¹³Inchen ureemeran Jesúsweimay srua amrrubelø køn, nø estsartrai. Inchen kusrenanøb pera uniiløbe tru srua amrrubelane namaptinchen,

¹⁴Jesúsbe trunun ashabe, nama, trenchibig køn: —Ureemerane merømø, naimay ka amrrubasay cha. Kaguende Tius nø ashib karub waibe nøm latailaiwein køn cha.

¹⁵Nabe ñimun cierton trendamønrrun cha: Møikkøben Tius nø ashib karub wainuguigwan kan unø lataitøwei utaptinchimíibe managuen truyube kebinrraamøn— cha.

¹⁶Incha nui kwalyu muta, tasigwan uregweim pala estsarabe, ‘mayanguen tabelø kønrrigay’ chibig køn. Kan pua møg Jesúsba waminchib

¹⁷Jesús nui maywan inrrab ibene, kan møg luløb arrua, nui merrab tømbønsrabe, trencha payibig køn: —Kusrennøbig tabig, ¿managatig øsig kømigwan Tius tranig tøgagønrrappe nabe chi maramerah?— cha.

¹⁸Inchen Jesúsbe nune trencha løtabig køn: —¿Chindimba nane: “tabig” cha wamøgu? cha. Tabiibe kandø køben, truibe Tiustø køn cha.

¹⁹Ñibe Tius maig maramigwan martrai pønsrailane yandø ashibig køn cha: “Kweechimøwei, itølulømøwei, nilømøwei, katøganelaimburab isa waminchimøwei, may wamincha chiyugøben kebenøsrkømøwei, ñui usri møskawane maig købash inchimø, tab indamig køn” tailan.—

²⁰Inchen tru møøbe trencha løtabig køn: —Kusrennøbig, nabe iilane kerriguh matsinø-unøgurri marøbig kur— cha.

²¹Inchen Jesúsbe tru matsinan tab ashabe, nun undag køptinchen, nøbe trenchibig køn: —Kan chigøsrøndø palan cha. Ya, ñui chi tøgagúigwan yana, waachameran tranø cha. Treeg marabe, ñibe srømbalasrømbe chigurrimbunø tøgagønrrun cha. Trugurrimbe arrua, nai mendig amø— chibig køn.

²²Inchen tru møøbe øyeeg taigwan mørøppe, nui maløbe minchiptinchibig køn. Incha truba isui ibig køn, kaguen truba puaig kua.

²³Inchen Jesúsbe pøtøburab ashabe, nui kusrenanøb pera uniilan trenchibig køn: —¡Tius nø ashib karub wainug puarmera kebambamibe truba murig kønrrun!— cha.

²⁴Inchen nui kusrenanøb pera uniilø trunun mørabe, truba kwaaren, Jesúsbe katøyug nømun trenchibig køn: —Ñim nai ureezheelø, Tius nø ashib karub wainug kebambamibe truba murig køn cha.

²⁵Kan camelloguen tsusain kal trabyu illmø larrayandiig køben, kan puaibe Tius nø ashib karub waisrø kebinrrab kaimanrrun— cha.

²⁶Inchen iigwan mørabe, nømbe masken kwaara, nømasiyaitø trenchib payiyabelø køn: —Treeg købene, ¿kaigyugurrimbe mu kui wesraig kønrrautah?— cha.

²⁷Inchen Jesúsbe nømun ashabe, trenchibig køn: —Møgueløbe iigwan martrab kaimanrrun cha. Trune Tiusweimbe, chi treeg kømøn cha. Kaguen Tiusweimbe chitøgucha maramdiitø køn— cha.

²⁸Inchen Pedrobe trenchib mendabig køn: —Au, nambe chi tøgagúigwan kerrigu elacha, ñui mendig amrruig køn— cha.

²⁹Inchen Jesúsbe trencha løtabig køn: —Nabe ñimun cierton trendamønrrun cha: Møikkøben nui yawan, nunelan, nuchalan, kabe usri møskawan, ureemeran, pirømeran nagurrimba, Tiuswei tabig srø wamgurrimba elachibiibe,

³⁰møi yu piraube cien piejes menrraguen yamera, nunelø, nuchalø, usral, nusrkalø, pirømera utønrrun cha, chigøbendø indinab melamig kuindøgucha. Inchen kansrømbe managatig øsig kømigwan utønrrun cha.

³¹Inchen møiløgøben møi ya yu pirau nømmerrig pønrrabeløbe trusrømbe srabe melønrrun cha. Inchen yu pirau srabe melabeløbe trusrømbe nømmerrig pønrrønrrun— chibig køn Jesúsbe. Jesús katøyug nø kwamigwan eshkab

³²Katø Jerusalénmay nebambub amba, Jesúsbe nui kusrenanøb pera uniilai merrab ib pasrøbene, nømbe truba kwaariilø ambub køben, kaneløbe wendau kørig kuilø ambubelø køn. Inchen Jesúsbe katø tru doceelan nøørø wama, nun chi purainrrabigwan eshkab menda trenchibig køn:

³³—Au, nambe Jerusalénmay nebambub amber cha. Trusrømbe tru Møg Misra Arrubigwane sacerdotesmeran karubelanba, tru Moisés pørigwan kusrenanøbelanba tranen, truiløbe nune kwanrrai pasra, judíos kømeelan tranrrun cha.

³⁴Inchen nune indzaashib, illimbi tuchib, ichib srua kua, kweechen, pøn kwalømyube katøle øsiiranrrun— chibig køn. Jacoboba, Juanba kan chigøsrøn nømuyasig miab

³⁵Inchen Zebedeowei nusrkalø Santiagoba, Juanba, Jesúswan kemallabe, trenchibelø køn: —Kusrennøbig, namuyasig nam kan chigøsrøn mianrreender cha. Kan treeg marøbsrumuguh— cha.

³⁶Inchen Jesúsbe trencha payibig køn: —¿Ñimuyasig chi maramig palain køgue?— cha.

³⁷Inchen nømbe løtappe: —Ñi wainug tørguegwalmabiisrø namun kanun ñui kusrmay, kanun atsimay purrønnøbsrumuguh— cha trenchibelø køn.

³⁸Inchen Jesúsbe nømune trenchibig køn: —Ñimbe chi miab pønrrermabguen mørmøn cha. ¿Na tru copayu mutsam piwan kabe ñim muchib, katø nan treeg chine trømbøig nebub pinøbuløb arrubig na utamigwan ñim trunun utab inchague?— cha.

³⁹Inchen nømbe løtappe: —Øø, maramønrrundø— chibelø køn. Inchene Jesúsbe trenchibig køn: —Na mutsim piwane ñimbe muchibwei inchun cha. Katø tru nan purø trømbøig nebub pinøbuløb arrubig na utamigwangucha ñimbe utabwei inchun cha.

⁴⁰Inchendø tru kusrmayba, atsimayba purramigwane, na tranamig kømøn cha. Tru purramibe nøm purrønrrabelayasig tamariilaindø køn— cha.

⁴¹Inchen tru nui kusrenanøb pera uniilø diezeløbe trunun mørabe, Juanwanba, Jacobonba namab mendabelø køn.

⁴²Inchen Jesúsbe nømun wamabe, trenchibig køn: —Ñimguen ashen judíos kømø misaameran karub purrabeløbe nøm karub tøgagúilane maig købash inchib, ke nøm karub purran cha. Inchen truyu møguelø nørreelø nøm karub purrabeløbe mungucha manchinrraingaig karub purrabelø kui ashchai nømbe kenamaran cha.

⁴³Trune ñimui utube ñimbe øyeelø kømumig køn cha. Treeg købgunrriibe, ñimui utu mas nuig kukkøbene, katøganelø karuindiig megamig køn cha.

⁴⁴Inchen ñimui utu møikkøben ñimmerrig melag købene, mayeelø karuindiig megamig køn cha.

⁴⁵Pøs tru Møg Misra Arrubikken katøganelø nuyasig marøb melønrrai arrumøtø, nøguen katøganelayasig marøb meganrrappa, nø kwaitøga truba nu misagwan purøbagarawa, kaigyugurri wesranrrappa arrig køn— chibig køn. Tru kabgaig Bartimeowan Jesús tamarøb

⁴⁶Incha Jericósrø pua, Jesúsbe tru ciudayugurri nui kusrenanøb pera uniiløba misag truba nu peraig webya iben, kan kabgaig Bartimeo taig Timeowei nusrkai, ‘anzhig kettra’ chib, miab may menda wawabe,

⁴⁷Jesús nazaretsriig kemallib arri mørøppe, trashib mendabig køn: —¡Jesús, merrabsrø Davidwei Nusrkai, nan lastima ashcha!— chib.

⁴⁸Inchen ke møiløgøben niløtø wanrrai namingucha, nøbe trenchib mas mur trashibig køn: —¡Merrabsrø Davidwei Nusrkai, nan lastima ashcha!— chib.

⁴⁹Inchen Jesúsbe pasramisrabe: —Wamay— chiben, nømbe kabgaigwane trenchibelø køn: —¡Chi isumø, kurraptinchi! cha. Kaguende ñune wamab pasran— cha.

⁵⁰Inchene nøbe nui tsina waigwan kuchib, pørtrappe, pasrambua, Jesúsweim pulusrø pubig køn.

⁵¹Inchen Jesúsbe trencha payibig køn: —¿Ñuyasig na chi maramig paløta?— cha. Inchen tru kabgaibe trencha løtabig køn: —Kusrennøbig, nai kabmera ashibig misrimbe køtan— cha.

⁵²Inchen Jesúsbe trenchibig køn: —Inrrø cha, ñui isubigwan nainug pasriitøgatø, tabig kørrømisran— cha. Inchen tru urastø tru kabgaibe ashibig misra, Jesúswei mendig ibig køn maywan.