Read Namrrik Marcos 11 Bible Online

Marcos 11 - Namrrik bible

Marcos 11

¹Yandø Jerusalénsrø chab pub amba, Betfagéba, Betaniaba pueblomerayu tru Olivos Tunsrø chab puabe, Jesúsbe nui kusrenanøb pera uniilø pailan trenchib karua ørøbig køn:

²—Ø pinrrøguesrø yamera tsitsø pønrrabsrømay ambay cha. Trusrømbe pubyutø kan burro-unø muguen itøguaniimíig litsig wetørranrrabguen cha. Picha, srua amrrunrrigay cha.

³Inchippa møikkøben: “¿Chinchainchigue?” cha payene: “Señor palai indan cha. Katø petø pegutchun” chinrrigay— cha.

⁴Inchen nømbe ambene, burrobe mayu kan yaskab pulu litsig pasrain købene, nømbe pichen,

⁵møiløgøsrøn truyu pønrrabeløbe trenchibelø køn: —¿Burrone chinchab pichigue?— cha.

⁶Inchen nømbe Jesús maig taigwan treeg løtøben, truiløbe ka sruambashen,

⁷nømbe Jesúsweimay burro-unane srua amba, nømuim pala kewagúilan burron kayen, Jesúsbe itøguanabig køn.

⁸Inchen truba yamelø nømui pala kewagúilan maywan kayen, kaneløbe chugøben nøørøsrø kullag srarcheelø lutiicha, maywan kayen,

⁹merrab amrrubelø lata, wendau amrrubelø lata trenchib trashibelø køn:—¡Hosanna! chib;¡Señor Tiuswei munchiyu nø ørig arrubiibe mayanguen tab kuig køn! chib.

¹⁰¡Namui merrabsrø møskai David nø ashib karub waig købig arrubiibe mayanguen tab indig køn! chib.¡Srømbalasrømbe Hosanna!— chib, trashibelø køn.

¹¹Inchen Jesúsbe Jerusalén pua, Tiuswei yau kebyabe, truyu chiwan køben ambumay imay tab ashabe, yandø maaben køben, Betaniasrømay nui doce kusrenanøb pera uniiløba ibig køn. Jesús mamig niimø higuera tusrwan kaig nebunrrain chib

¹²Katø kwaløm Betaniagurri webamba, Jesúsbe parøgwai møra,

¹³yabgurri kan higuera tusr ishiibaig pasrai ashabe, mamig niga tusr køtashchab ibene, tru higos nigam pølmera kømuben, ka ishiitø tøgaig wetørrabig køn.

¹⁴Incha Jesúsbe tru higuerane trenchibig køn: —Managuen ñuinukkurri mamig niguigwan muguen manrrab tamibe chi kaanrrun— cha. Inchen nui kusrenanøb pera uniiløbe nø trendaigwan mørøbelø køn. Tiuswei yawan Jesús chish marøb

¹⁵Incha nømbe Jerusalénsrø pua, Jesúsbe Tiuswei yau kebyabe, truyu yanøb, penab inchib warabelan wambig webetab mendaptinchibig køn. Katø misagwan an yunømarøb purraig mishatsiimeran utsøbetab, palomamera yanøbelø purraigwan utsøbetab incha,

¹⁶katø mungucha truyube chigøben srua puramrramamíig køn.

¹⁷Incha trenchib kusrenanøbig køn: —Tiuswei wamwan pørigube trenchibig kømuitarru cha:“Nai tab yabe mayeelø chu pirausrø misaameraindøgucha Tiuswan wamindi ya køn cha wamig kønrrun” taig. Trune ñimbe nileelø warain trab marin køn— cha.

¹⁸Inchen sacerdotesmeran karubeløba, tru Moisés pørigwan kusrenanøbeløba mørabe, mandø incha kweetsamdiig køtashchab lab mendabelø køn, nun køriimata, kaguende maya misaamera Jesús kusrenanigwan ke kwaara asha køben.

¹⁹Inchen yandø yem køben, Jesúsbe nui kusrenanøb pera uniiløba ciudayugurri webya ibig køn. Higuera tusr mamig niimíig yandø mul-laig

²⁰Incha katø løtsø truwan puraamben, tru higuerabe kutøgue srølbañau mul-lain kui ashabe,

²¹Pedrobe Jesús trendaigwan isua, nune trenchibig køn: —Au, Kusrennøbig, tru ñi kaig nebubash cha trendaig higuerabe chab mul-labguen indin køn— cha.

²²Inchen Jesúsbe trenchibig køn: —Ñimui isubigwan ke Tiusweinuutø pasra pønrray cha.

²³Nabe ñimun cierton trendamønrrun cha: Møikkøben i tunwanma øyah taimbe: “Yugurri mendamisra, maryu kebeñ” cha. Incha nui manrrøyu treeg kømuptinchaitamab isumøtø, maig taig ke treeg marig kønrraitamab kørebene, treeg marig kønrrun cha.

²⁴Inchawei nabe ñimun trendamønrrun chibig køn: Ñim chiwandøgucha Tiusba waminchib miappe, chabguen trunun utabguen indermab kørewabe, ñimbe utønrrun cha.

²⁵Incha ñim Tiusba waminchib pønrrappe, møigwan køben namig isuig tøgaguabe, nø kaig marigwan ulø paymønrrab, pesannamig køn cha, srømbalasrø wabig ñimui Møskaingucha ñimui kaig mariilan treetøwei ulø paymø, pesannaig kønrraimbe.

²⁶Kaguende katøgan ñimun kaig maren, ñimma pesannamø, ulø payene, ñimui Møskai srømbalasrø wabikkucha pesannamø, ñimui kaig mariilan ulø payrrun— chibig køn. Jesúswei karumburab karuibe mu mandamgaig

²⁷Incha katøle Jerusalénmay amrrua, Jesúsbe Tiuswei yau llirab uñene, sacerdotesmeran karubeløba, tru Moisés pørigwan kusrenanøbeløba, misagwan karubelø kølli misaameraba nun kemallabe, trencha payibelø køn:

²⁸—¿Ñi mariilane mu karua pasriitøgarre margu? cha. Kabe ¿øyeeg maramelane mu karua pasrta?— cha.

²⁹Inchen Jesúsbe trencha løtabig køn: —Na ñimun kan chigøsrøn payrrab inchar cha. Nan løtøbene, øyeelan martraimbe nan i mu mandamgaig marig chugurriig kuig na ñimun eshkarrumøn cha.

³⁰Juan misagwan piu umbu ulsrøb uniibe ¿srømbalasrøngurrin kuig kø chindah, kabe møgueløgurrin kuig kø chindah? cha. Løtørray— chibig køn.

³¹Inchene nømdø trenchib payiyab mendabelø køn: —Trube, nam: “Srømbalasrøngurrin kuig køn” chibene, nøbe namune trenchinrrun cha: “¿Chindimba nune køremøgue?” cha.

³²Kabe: “Møgueløgurrin kuig køn chinrrab ashendø, ¿maig købsruerah?”— cha. Øyan chippe, kaguende nømbe misagwan kørig isuarre inchibelø køn, kaguende mayeeløba Juanwane cierton Tius maig karuigwan eshkabig kui asha tøgagøbelø køben.

³³Treekkurri Jesúswane trenchibelø køn: —Maig kuindøbeh— cha. Inchen Jesúsbe trenchibig køn —Trube, nagucha eshkamumønrrun cha, iilan na mu karuitøga marigwan.—