Read Namrrik Marcos 14 Bible Online

Marcos 14 - Namrrik bible

Marcos 14

¹Pascua fiestan maramiba, tru Pirri Levaduragaig maig Fiestan maramiba yandø pa kwalømdø paløben, sacerdotesmeran karubeløba, tru Moisés pørigwan kusrenanøbeløbabe Jesúswan kwetchab chigøben isa mandø incha kemøramdiig køtashchab inchib kuabe,

²trenchibelø køn: —Fiesta utu marmønrrab cha, misaamera ke chindi asamgaig inchimønrrain— cha. Kan ishug Jesúswan may irrabzhiitøga itø lushib

³Betaniasrø tru Simón Leproso taigwei yau Jesús wabene, kan ishug alabastro limetayu nardotøzhig chi undisaimíig, netsiig, truba may irrabig, purø nuweyigwan srua, kemalla, Jesús mishatsigu wamnetø, limetan pushippa, tru may irrabigwan tur pala itølushibig køn.

⁴Inchen møiløgøsrøn truyu purrabeløbe nama, nømdø trenchibelø køn: —¿Purø may irrabzhigwan ke ka yandøbe chinchabrre lusah? cha.

⁵Waachameran purugumig kan trescientos denarios menrraweinguen yanøbsruinrrun— cha. Nømbe tru ishuwane truba namig waminchib købelø køn.

⁶Inchen Jesúsbe trenchibig køn: —¡Kagøbasay! cha. ¿Chinchabrre inchigue? cha. Nøbe nayasig truba tabzhig maran cha.

⁷Waachamerane chu uragucha ñimui utu tøgagua, ñim nømun tabig maramdiig købene, tabig martrun cha. Trune nane yube chu uragucha tøgagønrraamøn cha.

⁸I ishuube nun maig maramdiig nebuben treeg maran cha. Nai asrwan manawei kanmaytø may irrabzhigwan srølan cha, nan søramigweyasig.

⁹Nabe ñimune cierton trendamønrrun chibig køn: Yu pirau chutøgucha Tiuswei tabig srø wam kaigyugurri wesrabigwan eshkab kusrenaniisrømbe, tru nø marigwangucha tøga waminchun cha, nun pesannamø, isuig kønrrai.— Judas Jesúswan ashig kømui inchibelan tranøb

¹⁰Inchen Judas Iscariote, tru doce Jesús kusrenanøb pera uniilai utuig, sacerdotesmeran karubelan Jesúswan nømui tasku trannrrab waminchab ibene,

¹¹nømbe trunun mørøppe, truba kasraarawa, an trannrrab misrøbelø køn. Inchen Judasbe Jesúswan mandø incha tranamigwan yandø lab mendabig køn. Señorwei Pascua mamig

¹²Tru Pirri Levaduragaig maig Fiesta pølbasrøb kwaløm, tru Pascuayasig ubisha-unan kweechib kwaløm, Jesúswei kusrenanøb pera uniiløbe nun trencha payibelø køn: —¿Pascua mamigwan ñuimbe chu tamartrab ambamø?— cha.

¹³Inchen nøbe nui kusrenanøb pera uniilan pailan trencha karua ørøbig køn: —Ciudayumay ambay cha. Truyube kan møg pigøtsø mutaig ñimun katøben, truigwei wendautø amrrigay cha.

¹⁴Incha truig kebyainug kebambabe, ya puaigwane ñimbe trenchinrrigay cha: “Kusrennøbiibe ñun trendan cha: ‘¿Nai kusrenanøb pera uniiløba pascua mamigwan mab purram salabe chu køh?’ ” cha.

¹⁵Inchene ya puaibe pala pisusrø kan nu sala chiguen palømíig yandø ke chab tamarikken ñimun eshkanrrun cha. Inchen ñimbe namuyasig truyu tamartrigay— chibig køn Jesúsbe.

¹⁶Inchen nømbe amba, ciudayu puabe, Jesús nømun maig taig treeg wetørrawa, tru Pascuan tamarøbelø køn.

¹⁷Inchen yandø yem køben Jesúsbe nui doce kusrenanøb pera uniiløba pua,

¹⁸mishatsigu mab purrøwabe, Jesúsbe trenchibig køn: —Nabe ñimun cierton trendamønrrun cha: Ñim møikkøsrøn naba mab wabig nan ashig kømui inchibelaingatø misra, nan trannrrab køn— cha.

¹⁹Inchen nømbe truba isui inchib menda, Jesúswan kan kan payibelø køn: —¿Kabe na købra, chinderah?— chib.

²⁰Inchen Jesúsbe trencha løtabig køn: —Ñim doceelai utuig køn cha, naba i nindagutøwei pirriwan kebishibig.

²¹Pøs, tru Møg Misra Arrubiibe Tiuswei wamwan pørigu maig pørig pasrøben, truwan pureb iben, trune ¡tru møg waacha! tru Møg Misra Arrubigwan ashig kømui inchibelan trannrrabigweimburappe, yeekkucha kuita, chibig køn. Trembe truibe kal-lamuig kuinguen søl købsruinrrun— cha.

²²Incha mab purrappatø, Jesúsbe pirriwan muta, Tiuswan ‘mayanguen pay’ cha, pirishabe, nømun trenchib srørrøbig køn: —Cha, may cha. Iibe nai asr køn— cha.

²³Incha katø copan muta, Tiuswan ‘mayanguen pay’ chabe, nømun purøørøbig køn. Inchen tru copayuigwan søteeløba muchibelø køn. Inchen nøbe nømun trenchibig køn:

²⁴—Iig, nai animbe, Tius tru misagweyasig srø acuerdon mari anin køn cha. Tru animbe truba nu misagweyasig lusig køn cha

²⁵Nabe ñimun cierton trendamønrrun cha: Uvas piwane mas muchimumønrrun cha, nai Møskai nø ashib karub waisrø katøyug ñimba mutsam kwalømgatig.— Pedro nan ‘ashmíig kur’ chinrrautan cha, Jesús trenchib

²⁶Incha kan himnon chab cantawabe, Olivos Tunsrømay amba,

²⁷Jesúsbe trenchibig køn: —Ñimbe mayeeløba nainug isua pønrraigwan trubishinrrun cha. Kaguende Tiuswei wamwan pørigu øyah chibig pørig pasran cha:“Ubisha ashibigwan na kweechen, ubishamerabe nøørøtø chab lulrrun” chibig.

²⁸Inchendø nabe katøyug øsiirappe, ñimguen ammøwatø, nabe Galileasrømay yamønrrun— cha.

²⁹Inchen Pedrobe trenchibig køn: —Mayeeløba ñuinug isua pønrraigwan trubisaingucha, na kuimbe tarømisrmumønrrun— cha. Inchen Jesúsbe trencha løtabig køn:

³⁰—Nabe ñun cierton trendamønrrun cha: Møi yemdøweinguen kallu pamay wamømøwatø, ñibe pønmayguen nan ‘ashmíig kur’ chinrrautan— cha.

³¹Inchen Pedrobe truba inchib trenchibig køn: —Ñiba nan kwamig nebuinguen, nabe managuen ñun ‘ashmíig kur’ chimumønrrun— cha. Inchen søteeløba treetøwein chibelø køn. Jesús nui Møskaimba Getsemanísrø waminchib

³²Incha nømbe kanbalø Getsemaní taisrø puabe, Jesúsbe nui kusrenanøb pera uniilan trenchibig køn: —Yu purramisray cha, nai Møskaimba na wamindamne.—

³³Incha Pedronba, Jacobonba, Juanwanba pera yabe, truba truba isui, ni mumayguen tab kømui inchib menda,

³⁴trenchibig køn: —Nai manrraube isubiitø kwabguen ka kwamdiig køtan cha. Ñimbe yutø kørrømisra, kimø purray— chibig køn.

³⁵Incha Jesúsbe katøguchi ambuurø ya, pirau sraløptincha, Møskaimba waminchib miabig køn: —Tru purø trømbøig attrabig nan treeg punrrain kømubene, treeg pumugasam— chib.

³⁶Katø Tiuswan trenchib miabig køn: —Abba, nai Møskain chib, ñuimbe chitøgucha kaimamø, maramdiitø køn cha. I copan nan tarømartra cha. Inchendø na maig isuig køben, treeg kønrrain kømøtø, ñun maig maramdiig køben, treeg kønrrain— chib.

³⁷Incha nui kusrenanøb pera uniilaimay arrua, kib purrai wetørrawabe, Pedrone trenchibig køn: —Simón, ¿kib watirru? cha. ¿Kan uratøguen kimø, kasriibe wanrrab kaimatirru? cha.

³⁸Kimø, Tiusba waminchib purray, chibig køn, chiyugøben kaigyu kegørrømønrrappe. Ñimbe tabigwan martrabwei isuingucha, ñimui asrbe kullaguig køn— cha.

³⁹Incha katøle Jesúsbe ya, treetøwein chib Møskaimba waminchibig køn.

⁴⁰Incha katø arruabe, katøguen nui kusrenanøb pera uniilane kiptøwei purrain kui wetørrabig køn, kaguende nømui kabmerabe kigøbiitø ke kanaim purrøwa. Incha nømbe mancha løtønrrab kaimabelø køn.

⁴¹Inchen Jesúsbe pønmay kønrrabyu arruabe, trenchibig køn: —¿Katøgucha ñimgan israb, kib srø warøtirru? cha. Yandø tsabø køn cha. Ura pun cha. Yandø tranan, chibig køn, tru Møg Misra Arrubigwan kaig marøbelai tasku.

⁴²¡Kurray, chibig køn. Amrrab! cha. Nan ashig kømui inchibelaingatø pasramisrøbig nan trannrrab arrubguen indan cha. ¡Asay!— chibig køn. Jesúswan merrarrawa srua ambub

⁴³Incha Jesús waminchib pasramne, tru Judas, tru doce kusrenanøb pera uniilai utuibe truba nu misaaba arrubig køn, nømbe espadamera køben, tsiimera køben sruargue. Truiløbe sacerdotesmeran karubeløba, tru Moisés pørigwan kusrenanøbeløba, misagwan karubelø kølli misaameraba misra, karua øriilø købig køn.

⁴⁴Tru Judas Jesúswan ashig kømui inchibelaingatø pasramisrøbiibe nømune: “Merrarramig kuitamab ñim ashchai, na chi siñal køsrøn maren, ashib pønrrønrrigay” cha, eshkain købig køn. “Tru na muchaig, truig kønrrun cha. Truigwan kemøra, suldaumeraba sruamrrigay” cha.

⁴⁵Inchen Judas puabe, møi møi Jesúsweim pulu kemallib trenchibig køn: —¡Nai Kusrennøbig!— cha. Inchabe muchabig køn.

⁴⁶Inchene nømbe Jesúswan kemøra, sruamrrab merrarrabelø køn.

⁴⁷Inchen møikkøsrøn truyu pasrabiibe nui espadan wesrub, maya sacerdotesmeran nø karub sacerdotei karuindiig megabigwan kaluwan kelarrab lutiichiptinchibig køn.

⁴⁸Inchen Jesúsbe misaameran trenchibig køn: —¿Chindimbarre ñimbe espadamera køben, tsiimera køben sruar werrugue cha, nan kemørtrab, nabe kan niliig kui lata?

⁴⁹Nabe ñimba kwalømmørig Tiuswei yau kusrennøb waben, ñimbe managuen nane kemørmuig køn cha. Inchendø Tiuswei wamwan pørigu maig taig treeg nebunrrain kuig køn— chibig køn.

⁵⁰Inchene nui kusrenanøb pera uniiløbe nundø pasramnetø, mayeeløba chab luløptinchibelø køn.

⁵¹Inchen kan matsinube køsaatiig llensutø tsinaig tru wendautø iben, nune kemørøptinchen,

⁵²nøbe llensun wesølønnøb, køsaatiig ¡katø! pinaptinchibig køn. Jesús tru Setenteelø maig maramigwan asha marøbelai merrab

⁵³Incha Jesúswan tru maya sacerdotesmeran nø karub sacerdoteimay srua ambubelø køn. Inchen mayeelø sacerdotesmeran karubeløba, misagwan karubelø kølli misaameraba, tru Moisés pørigwan kusrenanøbeløba kerriguh tulundzunabelø køn.

⁵⁴Inchen Pedrobe Jesúswei wendau yaptø, yaptø tru maya sacerdotesmeran nø karub sacerdotei ya wambiisrøngatig ya, tru ashchai pønsraig pønrrabeløba pachiirab naabulu wamisra wabig køn.

⁵⁵Inchen sacerdotesmeran karubeløba, tru Setenteelø maig maramigwan asha marøbelø mayeeløba misra Jesúswan kwanrrai pasrtrab, møilan køben ‘Jesúsbe kaig maren, nambe ashibwei indig køn’ chib, waminchabelø labendø, treeg waminchabelø wetørranrrab kaimabelø køn.

⁵⁶Inchen møiløgøben nuimburab chigøben isa waminchendø, nøm wamindiibe ka peetø, peetø webibig køn.

⁵⁷Inchen møiløgøben kurra, isatø Jesúswan trenchibelø køn:

⁵⁸—Nambe nø trendai mørig køn cha: “Nabe i Tiuswei yawan møguelø marigwan pinisha, pøn kwalømyube Tiuswei ya katøgan, møguelø marig kømøtø, mara pasramønrrun” tan— chib.

⁵⁹Inchen treendingucha, katøgucha nømui wamindiibe peetø, peetø webiben,

⁶⁰tru maya sacerdotesmeran nø karub sacerdotebe mayeelai utu kurra pasramisra, Jesúswane payibig køn: —¿Chigucha løtømønrrapteh? cha. ¿Ñune øyeebe chi kalø maran charre inchib køh?— cha.

⁶¹Inchen Jesúsbe niløtø pasrøwa, chigucha løtømuben, tru maya sacerdotesmeran nø karub sacerdotebe katøyug trencha payibig køn: —¿Ñigan tru Cristo køtirru cha, tru Tius mayanguen Tab Indigwei Nusrkai?—

⁶²Inchen Jesúsbe trenchibig køn: —Nabe truigwein kur cha. Inchagucha tru Møg Misra Arrubig tru maramburab marøb Tiuswei kusrmay waben ñim ashib, katø srømbalasrøngurri wañiyu arruben ashib inchun— cha.

⁶³Inchen tru maya sacerdotesmeran nø karub sacerdotebe nø kewagúigwandøwei kølsrøb, trenchibig køn: —¿Namun nuimburab waminchabelø mas chiwein kui palønrrab kø? cha.

⁶⁴Ñimdøweinguen Tiuswan purø trømbøig wamab wamindigwan møran cha. ¿Ñimune maig asønata?— chibig køn. Inchen nømbe mayeeløba treeg kaig kuin kui mara, kwanrrai kørrømara pasrøbelø køn.

⁶⁵Inchen møiløgøben nun illimbi tuchib, maløwan kasra, nun kurraguchib mendabe trenchibelø køn: —¡Namun kelarrab eshkau pøs, chib, mu kurragutsin kui!— Inchen tru Tiuswei yau ashchay pønsraig pønrrabeløbe Jesúswan merrarrawa, pashaguchibelø køn. Pedro Jesúswan ‘ashmíig kur’ chib

⁶⁶Inchen Pedrobe pinaamay yawambig waben, trunetø tru maya sacerdotesmeran nø karub sacerdotei mendig megabig kan srusrø puabe,

⁶⁷Pedro nag pulu pachiirab waben, nun tab ashabe, trenchibig køn: —Ñigucha tru nazaretsriig Jesúsba uñibig kuig kømøh— cha.

⁶⁸Inchen Pedrobe trenchib isabig køn: —Ashmíig kur cha. Ni chi wamindinguen mørmur— cha. Incha wambig kerruisrø webibene, kan kallu wamabig køn.

⁶⁹Inchen tru srusrøbe katøle Pedron ashabe, truyu purrabelan katø eshkab mendappe: —Iibe truilai utuigwein køn— chiben,

⁷⁰Pedrobe katøguen ‘ashmíig kur’ chib isabig køn. Inchen truyu purrabeløbe yanayutø katøguen Pedrone trenchibelø køn: —Isa kømø, ñigucha truilai utuigwein køn cha; kaguende ñibe galileasriig køn— cha.

⁷¹Inchen Pedrobe: —Na isab pasraig købene, trube, nan chigøben nebunrrappe nebubash chib. Tiusken ashen, katø nabe isa waminchibgucha pasrømur, chibig køn. Ñim waminchib kui møwane ni ashibguen ashmíig kur— cha.

⁷²Inchen trenchiben latatø kallube katøganguen wamaptinchibig køn. Inchene Pedrobe Jesús øyah taig kømørramab isuptinchibig køn: “Kallu pamayguen wamømøwatø, ñibe nan pønmayguen ‘ashmíig kur’ chinrrautan” taigwan. Incha trunun isuabe, truba truba isuig kishibig køn.