Read Namrrik Marcos 15 Bible Online

Marcos 15 - Namrrik bible

Marcos 15

¹Inchen yandø chab tør-rrabendø sacerdotesmeran karubeløba, misagwan karubelø kølli misaameraba, katø tru Moisés pørigwan kusrenanøbeløba, tru Setenteelø maig maramigwan asha marøbelø kerrigueløba tulundzunabelø køn. Incha nømbe Jesúswane lusra, srua amba, Pilaton tranøbelø køn.

²Inchen Pilatobe Jesúswan trenchibig køn: —¿Ñigan judíosmerai rey køtirru?— cha. Inchen Jesúsbe trencha løtabig køn: —Ñitøweinguen chab trendan— cha.

³Inchen sacerdotesmeran karubeløbe nune chine, chine ‘øyeeg marøbig kuig køn’ chiben,

⁴Pilatobe katøyug trenchibig køn: —¿Chigucha løtømønrrapteh? cha. Ñiguen ash cha, ñune chigøben yeeg waminchib køn cha, nømbe.—

⁵Inchen Jesúsbe treeg indingucha løtømuben, Pilatobe ‘kan øyeebe maig kermab’ isub kørrømisrøbig køn. Jesúswan kwanrrai pasrøb

⁶Fiesta kwalømmerawane kubernadurbe kailan keeri yau pønrrabelan misag møigwan elatchai miaben, trendø treeg marøb elachibig køn.

⁷Inchen tru keeri yaube kan møg Barrabás taibe keerig pasrabig køn, nøbe larrø kailøba søtømisra, ashib karubelan namig kurrabyu misag kweechaig.

⁸Inchen misaamerabe amrrua: —Ñi trendø treeg marøbiibe, treeg mar— chib, Pilatone miab mendøben,

⁹Pilatobe trencha løtabig køn: —¿Ñimbe judíosmerai reywan na elatsamig palain køgue?— cha.

¹⁰Kaguende Pilatobe tru sacerdotesmeran karubeløbe Jesúswane uni ashig kømuptø nun tranin kui ashibig køn.

¹¹Inchen sacerdotesmeran karubeløbe Jesúswan kømøtø, nømbe Barrabáswane elatchai inchibelø køn.

¹²Inchen Pilatobe katøyug payippe, trenchibig køn: —Trube, ¿ñim tru judíosmerai rey køn taigwane nabe mandø indamø?— cha.

¹³Inchen nømbe katø trenchib trashib løtabelø køn: —¡Kurusyu mesrø!— chib.

¹⁴Inchen Pilatobe trenchibig køn: —¿Nøbe chi kalø marindørre øyeeg martrainchigue?— cha. Inchen nømbe masken mur trashibelø køn: —¡Kurusyu mesrø! ¡Kurusyu mesrø!— chib.

¹⁵Inchen Pilatobe tru nu misagwan ka tab kønrrai inchig køptø Barrabáswan ka inrrai elacha, Jesúswane ichagutsingaruabe, kurusyu mesrønrrai tranøbig køn. Suldaumera Jesúswan indzatø ashib

¹⁶Inchen suldaumerabe palacioyu mas umbusrø srua amba, maya suldau søtøwan tulundzuningarua,

¹⁷kan yalø piguiig itøguenana, kaldiigwan corona mara, petsøsrøbelø køn.

¹⁸Incha trugurrimbe trenchib trashib mendabelø køn: —¡Judíosmerai Rey, viva!— chib.

¹⁹Incha cañatøga turbøtø itsamba, illimbi tutamba, tab inchib chib, nui merrab tømbønsramba inchibelø køn.

²⁰Incha øyeeg marøb ka indzatø ashib srua køptø, tru yalø piguiig itøguenanigwan wesrawa, nuiwan katøle kenana, kurusyu mesrønrrab nune wesrubelø køn. Jesúswan kurusyu mesraig

²¹Kan møg cirenesriig Simón taig, Alejandroimba, Rufoimba møskai wambig nøørøsrøngurri purainrrab arruben, nune Jesúswei kuruswan ke mutamne incha mutøsrøbelø køn.

²²Incha kanbalø Gólgota taisrømay nune srua ambubelø køn, (tru trenchippe, “Calaverasrø” tainug).

²³Jesúswane vinoba, mirraba lindisaig yuulingucha, Jesúsbe muchimíig køn.

²⁴Inchen kurusyu mesra, suldaumerabe Jesúswei kewagúilan mu merrarramig nebutashchab suerte kuchibelø køn.

²⁵Inchen løtsø las nuevetø købig køn, tru Jesúswan kurusyu mesrøben.

²⁶Incha kan pørig mesrøbelø køn, chigurrin kwanrrai mesraig køn cha eshkabig: JUDIOSMERAI TRU REY KØN chibig.

²⁷Incha katø pagatø nileelangucha kanun kusrmay, kanun atsimay nunba kurusyu melsrøbelø køn.

²⁸Inchen tru Tiuswei wamwan øyah chib pøriibe nebuig køn: “Tru kailai utu nune tøga pasrig kønrrun” taig.

²⁹Inchen truwan puraambubeløbe tsalø wamab, turwandø kønøgøb trenchibelø køn: —¡Au, ñi Tiuswei yawan pøtiicha, katø tru pøn kwalømyutø kusranrrabiibe,

³⁰kwamønrrab ñitøwei chigøben mar! cha. ¡Kurusyugurri pinaamø!— cha.

³¹Inchen tru sacerdotesmeran karubeløba, tru Moisés pørigwan kusrenanøbeløba treetøweih nun indzatø ashib kangurrin kangurri trenchibelø køn: —Kanelane kaigyugurri wesrabendø, nøasiitøweimbe kaiman cha.

³²Tru Cristo, Israel misagwei reybe, møi kurusyugurri pinaarrubash cha, nam asha, nø kuitamab kørenrrab— cha. Inchen nøba kurusyu melsraig melabeløgucha Jesúswan tsalø wamabelø køn. Jesús kwaig

³³Yandø kwaløm tøbøtag misrene, maaben las treskatig pirau ørøba løstiig kørrømisren,

³⁴tre uras Jesúsbe truba mur trashibig køn: —¡Eloi, Eloi! ¿Lama sabactani?— cha. (Trenchippe: “¡Nai Tius, nai Tius! ¿Chindimba nandø elachigu?” chib.)

³⁵Inchen møiløgøsrøn truyu pønrrabelø mørabe, trenchibelø køn: —Møray cha. Elíaswan wamøtan— cha.

³⁶Inchen møikkøsrøn lulabe, ñab esponjan køchiibiyu kebisha, kan caña tsigu pucha, mutchai pulusrø yuuløb trenchibig køn: —Kagøbasay cha. Inchippa kwamønrrai pinøsranrrab Elías attashchab— cha.

³⁷Inchene Jesúsbe mur trashippe, yandø isrømuptinchibig køn.

³⁸Inchen Tiuswei yau tru purø tab llensuzhig kelarrab søtø mesraibe palasrøngurri kørrab kølsra, yandø paig misrøbig køn.

³⁹Inchen tru Roma suldau cienelan nø karubiibe Jesúsweim pinrrøgue pasrøwa, øyeeg trasaigwan mørøb, mandø kwaigwan ashib inchabe, trenchibig køn: —Isa kømø, i møøbe Tiuswei Nusrkaiwein kuin køn— cha.

⁴⁰Inchen ishumburmera møiløgøsrøn yabsrøngurrindø ashib pønrrabelø køn. Tru utube María Magdalena køben, tru Wendiig Santiagoimba, Joséweimba usri María køben, katø Salomé købengue.

⁴¹Inchen tru ishumburmerabe Jesús Galileasrø uñen, nui mendig amøñib, purugub inchibelø købig køn. Inchen truyube truiløtø kømøtø, katøgan ishumburmera Jerusalénmay Jesúsba nebamba yam pasrabig køn. Jesúswan sørig

⁴²Inchen yandø yem misrøb køben, tru isram kwalømweyasig tamarøb kuin kwaløm købig køn, kaguende katø kwalømbe isram kwaløm kønrrab køben.

⁴³Inchen José arimateasriig, tru Setenteelø maig maramigwan asha marøbelai utuig truba nuig tabig kui asig møg, nøgucha Tius nø ashib karub wainuguigwan muniirabig arrua, Pilato wainug kørmø kebinrrab isua, nøbe kebya, Jesúswei asrwan miabig køn.

⁴⁴Inchen Pilatobe, trube, kwabguen inditamab isua, nøbe truba kwaara, kan suldau cienelan nø karubigwan wama, kwabguen inditarru cha, payibig køn.

⁴⁵Inchen truibe nun eshkaben, Pilatobe Jesúswei asrwan Joséwan pinøsrungarubig køn.

⁴⁶Inchen Josébe kan lino llensutøga kirra, Jesúswei asrwan pinøsrua, truyu pulabe, kan peñayu søramig trab lalig pasrabigu waya, trugurrimbe kan nu srugwan merrana, kebambinug kasrøbig køn.

⁴⁷Inchen María Magdalenaba, María Joséwei usrimbabe chu sørøben ashibelø køn.