Read Namrrik Marcos 4 Bible Online

Marcos 4 - Namrrik bible

Marcos 4

¹Jesús katø nu pisu menda kusrenanøb mendøben, nø wainug misag truba nu tulundzunøben, treekkurri Jesúsbe pisuyu kan barcoyu kebya wamisren, maya misaabe tru pisu mendatø kørrømisrøbelø køn.

²Inchen nøbe nømun ‘øyeeg lataitøwein køn’ chib wamindiiløtøga chineh kemesra, kusrenanøbig køn.

³Inchabe nui kusrenanigube trenchibig køn: —Iigwan møray cha. Kan kwallibiima tsurøb kwallchab webyan cha.

⁴Incha tsurøb ibene, kanbalø yellbe mayu kørrøben, illimera amrrua, man cha.

⁵Inchen katøganbaløbe srug trøldø pirau pirø tre chiganug kørrøben, pirø palatiig kua, tru yellbe kal-lappe, petø kal-labendø,

⁶pørr webarrua, mergurangaruben, srøl tre chigaig kua, mul-laptindan cha.

⁷Katøganbalø yellbe kal shau utu kørrøben, kalmera nørrørab mendappe, chab kasrøb tsibishiben, truibe chigucha misrmøn cha.

⁸Inchen katøganbalø tab pirau kørrabiibe sí, kal-lawa, tabig nørrørawa, truba nu nigan cha. Møiløbe kan yellgurrindø mamig trulzheelø treinta niguen, møiløbe sesenta niguen, møiløbe cien nigan— chibig køn.

⁹Incha trenchibig køn: —¡Møramig kalu pønsraibe, mør!— cha. Mandøgurri Jesús ‘iigwan øyeeg lataig køn’ cha, kemesra wamindig

¹⁰Jesús yandø nøtø kørrømisren, tru doce kusrenanøb pera uniiløba kanbalatø Jesúsweim pulu pønrrabeløbe trenchibelø køn: —¿Tru ‘øyeeg lataitøwein køn’ chib kemesra wamindiiløbe chi chibig køh?— cha.

¹¹Inchen nøbe trenchibig køn: —Tiusbe nø ashib karub wainug mu asiimíig tøgagúilan ñimune ashchai tranan cha. Inchendø misaamera nøøreelø truyuilø kømeelane ‘øyeeg lataitøwein køn’ chib kemesragøba wamindiiløtøga wamindig køn cha,

¹²nømbe ashippe ashendø, ashmøwa lataig kørrømisrøb; mørøppe mørendø, chi tainguen mørmøwa lataig kørrømisrøb inchain cha.Incha isua møra Tiusweimay lliramøwei, nømui kaig mariilan Tius ulø payamigwan pesannamø, ulø payamig kønrrain kuig køn— cha. Tru kwaliibe ‘øyeeg lataig køn’ cha, kemesra wamindigwan Jesús øyeeg køn cha eshkab

¹³Incha katø trenchibig køn: —Ñimgan ‘øyeeg lataitøwein køn’ cha, tru kemesra wamincha pasrigwane ¿chigúi wetøgørrøtirru? cha. Katøgan ‘øyeeg lataitøwein køn’ cha, kemesra tru wamindiilangucha kerriguba ¿chincha wetøgørrønrrague? cha.

¹⁴Tiuswei wamwan waminchibiibe yellwan tsurøbig lataig køn cha.

¹⁵Inchen tru mayu kørrab yellmerabe iilø latailø køn cha. Nømbe Tiuswei wamwan møren latatø, Satanásbe arrub, tru tab wamwan nømuinug ellmarigwane kerran cha.

¹⁶Inchen tru srug trøldø pirau pirø tre chiganug tsuri yellmera latailøbe iilø køn cha: Tiuswei wamwan møra, tru urastøbe truba tab kui utøbendø,

¹⁷nømasiitø srøl tre umbu keetiimeelø kua, maya yanaguen amøñimøn cha. Incha tru Tiuswei wamgurrindø chigøben puben, katø chigøben kaig nebub arruben, nømbe møi møin elachiptindan cha.

¹⁸Inchen katøganeløbe tsuren, tru kal shau utu kørrab yell latailø køn cha.

¹⁹Tiuswei wamwam mørøppe mørendø, i pirau chine købigwan menrra isubiibah, nømui chine palømø tøgagúilø purø tabig lataig asønaikkurrimba, trugurri chine tøgagømmørø chull inchib isuiløbatø Tiuswei wamwan mørigwane kerrigu truitø kasrøben, chigucha nømbe ellmarig misrmøn cha.

²⁰Inchen tru tab pirau tsuriiløbe tru Tiuswei wamwam møra, ellmarig misrøbelø, truilø køn: kan trulzhikkurrindø treinta, kabe sesenta, kabe kan trulzhikkurrindø cien nigabelø latailøgue.— Lámparan kemesra wamindig

²¹Katø Jesúsbe trenchibig køn: —¿Kabe kan lámparanma køtsø umbu pasrtrab, kabe cama umbu pasrtrab srua kerrubelø kuitarru? cha. Treeg kømøtø, ¿tør kønrraimbe, pala pasramig kømuitarru? cha.

²²Chigøben sørig pasrabiibe søriitø pasrømøtø, kenamaramig kønrrun cha. Katø chinchaguen asamgaig kasra pasrigwane ashchai tøryu wesraig kønrrun cha.

²³Møikkøben møramig kalu pønsraig kuabe, mør— cha.

²⁴Incha katø trenchibig køn: —Ñim chi mørigwane tab isua kuy cha. Ñim kanelan maig unaasha traniibe, ñimungucha treetøwei unaasha trana, ñimune nemariibaguen tranrrun cha.

²⁵Kaguende tøgaigwane masken tranen, trune chigaigwane nui lamøtiig tøgagúigwanguen kerranrrun— cha. Yell nurab lataitøwein køn cha, kemesra wamindig

²⁶Jesúsbe katø trenchibig køn: —Tius nø ashib karub pasraibe kan møg pirau yellwan tsuri lataig køn cha.

²⁷Incha kib tsui lata, kurra uni lata, yem kui lata, kwaløm kui lata, yellbe kal-lawa nuran cha, møøbe mandø indinguen ashmøwatø.

²⁸Kaguende pirøbe nøasiitø mamig niguingarubig køn cha. Srøsrøbe ishiimerrig kal-laben, trugurrimbe urø weetøben, urøyube trulmera netsan cha.

²⁹Inchen yandø trul srønøben latatø, usestøga paran cha, kaguende yandø param kwaløm puin køben.— Iibe murtasa yell lataitøwein køn cha, kemesra wamindig

³⁰Katø Jesúsbe trenchibig køn: —¿Tius nø ashib karub pasraibe chi lataig asøna cha, kabe chiwan kemesra, ‘øyeeg lataitøwein køn’ chinrrab køh? cha.

³¹Kan murtasa yell lataig køn cha. Tsurøb uras truibe yu pirau maya yellmerai utu purø lamøzhig købendø,

³²tsurinukkurrimbe shush mamig tusrmerai utu katøguchinguen palaig nu tusr-unø srarmerabaig nuraben, illimera pala amøñibeløguen truyu le martrun— cha. Jesús ‘iibe øyeeg latailø køn’ cha, kemesra wamindig

³³Jesúsbe Tiuswei wamwan øyamay kusrennøbig køn, ‘øyeeg lataitøwein køn’ chib, truba yambalø kemesra eshkab. Møi eshkaig latailø, nøm mayangatig chigúi nebua mørtrapteelø køben, treetøh marøbig køn.

³⁴‘Øyeeg lataitøwein køn’ chib kemesrømøbe, waminchimíig køn. Inchendø nui kusrenanøb pera uniilane nømundø nøørø kerrigu tør marøb eshkabig køn. Isig ichibigwanba, pi welar kurrabigwanba Jesús pasramisringarub

³⁵Incha tru kwalømdøwei yandø pilliraben, nui kusrenanøb pera uniilan trenchibig køn: —Pisu ambøgatøsrømay larraamun— cha.

³⁶Inchen nømbe misagwan ‘ungwa’ cha, Jesúswan tru nø waig barcoyutøwei pera amben, katøgan barcomeragucha lincha ambubelø køn.

³⁷Inchen truba mur isig ichibig webarruben, pi welarmerabe barcoyu keguchen, yandø ke pitø netsab arruben,

³⁸Jesúsbe wendau kan labzhigu ne kib waben, nømbe kasrønanabe trenchibelø køn: —¡Au, Kusrennøbig! ¿nam asentanrreenchib melamne, ñigan isubguengaig watirru?— cha,

³⁹Inchen Jesúsbe kurra, isigwan kønømønrrai kandø wama, piwane trenchibig køn: —¡Wanrrømø, møi møi wasrørau!— cha. Inchene isiibe pasramisren, yandø kerrigu wasrønzhig kørrømisrøbig køn.

⁴⁰Inchen Jesúsbe nui kusrenanøb pera uniilan: —¿Chindimbarre kørig køta? chibig køn. ¿Ñimui isubigwan nainuutø pasra kømeelø kø chindah?— cha.

⁴¹Inchen nømbe truba kwaariilø kørrømisra, kangurrin kangurri trenchibelø køn: —¿Iibe mu kerah cha, isig ichibig lata, mar lata, nun mørtrappe?—