Read Namrrik Marcos 5 Bible Online

Marcos 5 - Namrrik bible

Marcos 5

¹Pisu ambøgatømaysrø larraamba, Gerasa pirausrø puben,

²Jesús barcoyugurri webiben latatø, kan møg trømbøig maringarub kwaimandzig tøgaig sørin trabmerayugurri webarrua, Jesúswan kemallibig køn.

³Tru møøbe sørin tulyutø tsubig, muguen lusrtrab kaimaig købig køn, ni cadenastøgaguen.

⁴Kanmaybe srøbmeran tasiimeran cadenastøga køben, katø chitøga køben lusrendø, lusrimørig pitischig marøb lurren, muguen kaimabelø køn.

⁵Incha yem kwaløm chu uragucha tunmerasrø, sørin tulmerasrø trashib, sruutøga nøasiitø kørriinchib uñibig køn.

⁶Incha Jesúswane yabgurrindø asha, lula, nui merrab tømbønsra,

⁷trenchib trashibig køn: —¿Ñibe nane chi martrab inchigu? cha, Jesús, Tius Mayeelaim Pala Pasrabigwei Nusrkai. Purø trømbøig møra megamig kømønrrai Tiuswei munchiyu ka købash cha, chib miarrumøn— cha.

⁸Pøs øyeeg chippe, kaguende Jesúsbe: —¡Ñi, trømbøig maringarub kwaimandzig, i møweinukkurri webinrrø!— chib pasrøben, trendaig køn.

⁹Inchene Jesúsbe nun trencha payibig køn: —¿Chi munchi kugu?— cha Inchen nøbe: —Legión munchi kur, chibig køn. Kaguende nambe purø nu ker— cha.

¹⁰Inchabe tru piraugurri nøørø peesrømay ørmørrunrrig chib, Jesúswan truba truba rugabig køn.

¹¹Inchen tru tun puluwan kuchimera lawa mab truba nu amøñibelø køn.

¹²Inchen tru kwaimandziimerabe rugab trenchibelø køn: —Kuchimeraimay ambingarurra cha, nam truilainug kebamrrab— cha.

¹³Inchen Jesúsbe ka kebambashen, trømbøig maringarub kwaimandziimerabe møweinukkurri webamba, kuchimerayu kebambene, truyu kuchimerabe pa milburab warabeløbe truba trømbø lendeyu lula, chab pinøgørraptincha, larrø nu pisuyu kegørra, pi keesra, chab kwabelø køn.

¹⁴Inchene kuchi ashibeløbe kwaariilø lula, puebloyu køben, wambig nøørøwansrøn køben eshkab ambubelø køn. Inchen misaamerabe chi purayaigwan ashchab amrrubelø køn.

¹⁵Incha Jesús waisrø pubene, tru kwaimandzig tøgaig købiibe møimbe køsaatiig kømø, keweig, tabig wai ashabe, truiløbe kørig kui inchibelø køn.

¹⁶Inchen tru kwaimandzig tøgaig købigwanba, kuchimeranba maig purayaigwan ashibeløbe nømun eshkaben,

¹⁷nømbe Jesúswan nømuim piraugurri ‘irra’ chib truba rugabelø køn.

¹⁸Inchen Jesús barcoyu kebibene, tru kwaimandzig tøgaig købiibe: —¿Ñui mendig arruah?— cha, truba inchen,

¹⁹Jesúsbe arrubashmøtø, trenchibig køn: —Ñui yamay inrrø cha, ñui yau misaameraimay Señor ñun yeeg nørriig mara, mandø lastima asigwan nømun eshkanrrab.—

²⁰Inchen tru møøbe ya, Decápolis pueblosrø Jesús nun yeeg nørriig marigwan truba eshkab mendøbene, mayeeløba kwaara ashibelø køn. Jesús kan ishuwan kwanrrøwan tamarøb

²¹Jesús barcoyu katø pisu ambøgatømay larraibene, nuim pøtøgatan misag truba truba nu tulundzunøben, nøbe pisu mendatø kørrømisrøbig køn.

²²Inchen judíosmera tulundzuni yau ashib karubig, Jairo taig, puabe, Jesúswan ashippe, nui srøb pulu tømbønsra,

²³arrubsrumugu chib truba inchib, trenchibig køn: —Nai nimbasr-unø kwanrrab inchib tsun cha. Kwanrrø tammisren, katø øsig uñchai ñui tasigwan nuim pala estsartrab attra— cha.

²⁴Inchen Jesúsbe nøba iben, menrra misag mendig ambuptø nun trag maren,

²⁵tru misag utube kan ishug doce años ørøba ani ib kwanrrø tøgaig kua,

²⁶chu uraskucha purø trømbøig kui uña, mø marøbelai yam tasku pureb megawa, nui chi tøgagúigwan kerrigu patsøgøben, chiweingucha puraimø, kwanrrøbe masken inchib iben,

²⁷Jesúswan wamindi mørøppe, tru ishuube misag utu wendaugurri Jesúsweim pulu kemallippa, nø kewagúigwan katørabig køn.

²⁸Kaguende nøbe treeg isubig køn: “Kewagúilandøguen katøraitø, tammisrig kørrømisramønrrun” cha.

²⁹Inchen tru ani ibiibe møi møi pasramisrøptinchen, asru nui kwanrrøbe yandø purayai møren,

³⁰Jesúsbe nø mun køsrøn nui maramburab mariitøga tamarøbrain kui mørabe, nu misag søtøwan keeshabe, payibig køn: —¿Na kewagúigwane mu katørah?— cha.

³¹Inchene nui kusrenanøb pera uniiløbe trenchibelø køn: —Misag søtø yeeg trag mari ashatø, ñibe: “¿Mu katørah?” taibe— cha.

³²Inchen Jesúsbe mu katøraitashchab ambumay, imay ashene,

³³tru ishuube kørig købiitø itønab, nun maig purayaigwan møra, ya, Jesúswei merrab tømbønsrøb srala, isømø, kerriguwan eshkaben,

³⁴Jesúsbe trenchibig køn: —Nimbasr, ñui isubigwan nainuutø pasra tøgagúikkurri tamarig kørrømisran cha. Chi isumø, inrrø cha. Ñui kwanrrøbe yandø purayaig køn— cha. Jesús Jairoi nimbasrwan øsiiranøb

³⁵Trune Jesús waminchib pasramnetø, tru judíosmera tulundzuni yau ashib karubigwei yaugurri møiløgøsrøn amrruppe, unai møskawane trenchibelø køn: —Ñui nimbasrbe kwabguen indan cha. ¿Kusrennøbigwan mas chinrrabrre øyeeg chigu?— cha.

³⁶Inchen nøm trenchib kuingucha Jesúsbe trunun mørøb pasrømøtø, tru tulundzuni yau ashibigwane trenchibig køn: —Chi kørig kui inchimøtø, køreptø køreu— cha.

³⁷Incha mas mungucha amrrubashmøwa, Pedronbah, Jacobonbah, Jacoboi nuneg Juanwanbatø amrrungarubig køn.

³⁸Incha tru judíosmera tulundzuni yau ashibigwei yau puabe, ke chindi asamgaig misaabe kishib, miirab, trashib inchib kui ashabe,

³⁹Jesúsbe kebya, trenchibig køn: —¿Chindimbarre øyeeg inchib, kishib køh? cha. Unøbe kwaig kømøtø, ka kiptø tsun— cha.

⁴⁰Inchen misaamerabe Jesúswane ka indzatø mørøbelø køn. Inchen Jesúsbe mayeelan møi møi webambingarua, møskawanbah, usranbah, tru nøba ambubelanbatø pera ya, tru ishug-unø tsuinug kebya,

⁴¹tasigu kemørabe, trenchibig køn: —Talita, cumi— cha. (Trenchippe: “Ishug-unø, ñun kurrø char” chib.)

⁴²Inchene tru doce años tøga ishug-unøbe møi møi kurrappa, llirab mendøben, misaamerabe truba truba kwaara asha kørrømisrøbelø køn.

⁴³Inchen Jesúsbe mun køben eshkab kønrrab kømø cha, unan mamig srøttrai karubig køn.