Read Namrrik Marcos 6 Bible Online

Marcos 6 - Namrrik bible

Marcos 6

¹Jesúsbe truyugurri webya, katø nui pirausrømay iben, nui kusrenanøb pera uniiløbe nøba ambubelø køn.

²Incha isrin kwaløm pubene, Jesúsbe judíosmera tulundzuni yau kusrenanøb mendøben, møiløgøben mørøbeløbe truba kwaara asha, trenchibelø køn: —¿I møøbe kerrigube churre øyeeg kusreh? cha. ¿Iig nui øyeeg truba truba kusreibe chiguerah? cha. ¡Kan i møg nui tasiimeratøga maramburab mariilø yeekkucha kuita! cha.

³¿Iibe tru tsiimeratøga chine marøbig kømuitarru? cha, tru Maríai nusrkai. Katø ¿Santiagoimba, Joséweimba, Judasweimba, Simónweimba nøbe nuneg kømuitarru? cha. ¿Yamba nui nuchaløgucha yu namui ututøwei warabelø kømuitarru?— cha. Treekkurri nømbe nune chinetø cha mørøbelø køn.

⁴Inchen Jesúsbe trenchibig køn: —Chutøgucha peesrømbe Tius maig karuigwan eshkabigwane tab indan cha. Trune nui piraueløba, nømmisaameraba, nui yaueløbabe chi tab inchimøn— cha.

⁵Incha truyube maramburab marig chi martrab kaima, mamdø kwanrreelan nui tasiitøga estsara, trutøh tamarøbig køn.

⁶Inchen Jesúsbe yeekkucha køremø misaamera kønrrabmab ke kwaara ashibig køn. Jesús nui doce pera uniilan kusrenanrrai ørøb

⁷Incha nøbe nui doce kusrenanøb pera uniilan wama, pagatø, pagatø ørøb menda, trømbøig maringarub kwaimandziimeran mu chindamgaig marøb amrrai tranøbig køn.

⁸Incha treeg karubig køn: —Mayuweimbe chigucha sruammønrrain cha. Kan pøtønain tsiitø srua amrrain cha. Pirri srua ammøwei, wasr ila ammøwei, pørønailøyu an pusra ammøwei inchain cha.

⁹Alpargatistø keeta amrrain cha. Pala itøgueikkucha yunømaramiba kømøtø, kandø kewa amrrain— cha.

¹⁰Incha Jesúsbe katø trenchibig køn: —Ñim kan yau kebambuppe, tru puebloyugurri ambamnegatig kørrømisrtrigay cha.

¹¹Inchen ñimun wamømøwei, ñimun mørøg kømui indinuube, trube, tru puebloyugurri webamrrappe, ñimui srøbyu usrøwan chishtø kørrøgønrrigay cha. Treeg marøppe, trube: “Ñim kaasig købene, møimbe ñim kusrenrrigay” chib eshkab.—

¹²Inchen nømbe webamba, misagwan: —Ñim kaig mariilan isua mørøb, Tiusweimay lliray— chib eshkab kusrenanøbelø køn.

¹³Incha misagweinukkurri kwaimandziimeran truba yam webetab, truba yam kwanrreelan aceite srøla, tamarøb inchibelø køn. Juan Bautista kwaig

¹⁴Rey Herodesbe Jesúswan wamindi mørøbig køn, kaguende Jesúswei munchiwane misaamerabe nun, nun waminchib køben. Inchen møiløbe trenchibelø køn: —Juan Bautista kwailai utugurri katø kurriinrrun cha. Incharre tru maramburab øyeeg maramig tøgaig kuinrrun— cha.

¹⁵Inchen katøganeløbe trenchibelø køn: —Tius maig karuigwan eshkabig Elías kuinrrun— cha. Inchen kaneløbe: —Nøbe Tius maig karuigwan eshkabig kuinrrun, chibelø køn, tru møikkøben merrabsreelø lataitøwei.—

¹⁶Inchen Herodes trunun mørabe, trenchibig køn: —Iibe Juan, na tru turwan paringaruig kuinrrun cha. Møimbe kwailai utugurri katø kurriinrrun— cha.

¹⁷Kaguende Herodesbe tru Juanwane kemøringarua, kailan keeri yau lusra wanningaruig købig køn, tru nui nuneg Felipei srai Herodíaskurrindø. Tru Herodíasbe Herodeswei nuneg Felipei srain købig køn. Inchen Herodesbe truigwane nui srai marin køben,

¹⁸Juanbe Herodeswane trenchibig køn: —Ñi ñui nunewei srawan ñui srai mara tøgagømibe merig pasran— cha.

¹⁹Inchen tru ishug Herodíasbe Juanwan tsalø køptø kwetchab inchendø, kaimabig købig køn.

²⁰Kaguende Herodesbe Juanwane sølgandø tabig, katø Tiusweindø tarømari møg kwaasha, køriimata, trugurri nune mu chinchimønrrai ashib tøgagøbig køn. Incha Herodesbe Juan wamindigwane mandøguen kømui inchendø, tammay ka mørøbig køn.

²¹Indiibe Herodíasbe Juanwan maig maramigwan yandø treeg maramdiig puin kui ashibig køn. Kaguende Herodesbe tru chiwangucha nøm asha karubelaimba, suldaumeran karubelø nørreelaimba, Galilea mas kusreb møguelaimba nui kal-lain kwalømwan isub kasrag waram kwaløm tabig maren,

²²møimbe Herodíaswei nimbasrbe truyu kebya, pailaben, Herodeswanba, truyu mab purrabelanba tru pailaibe truba tabig asønaben, reybe tru srusrane trenchibig køn:

²³—Ñun chi miag købendø, miarra cha. Na tranrrumøn cha. ¡Katø! ñune tranmø kømø, nabe trunun tranamønrrun chib. Ñi chi miaben, tranrrumøn cha. Na muburab ashib karub waigwan tøbøtakkatikken tranrrumøn— chibig køn.

²⁴Inchen nimbasrbe webya, usran: —¿Chi miamø?— cha payen, usri Herodíasbe trenchibig køn: —Juan Bautistai turwan miau— cha.

²⁵Inchen tru srusrøbe tru urastø tru rey waisrø petøzhiitø kebyabe, trenchib miabig køn: —Møindøwei Juan Bautistai turwan kan platilloyu trannrra— cha.

²⁶Inchen reybe truba truba isui inchendø, tru mayeelø lincha purrabelai malau ‘treeg tranrrumøn’ cha, trannrrab misrig køppe, tru miaigwan ka chimø, ka tranøbig køn.

²⁷Incha tru urastø reybe kan suldauwan Juanwei turwan para, srua arringaruben,

²⁸truibe tru kailan keeri yaumay ya, Juanwei turwan para, kan platilloyu srua arruabe, srusran tranen, nøbe usran tranøbig køn.

²⁹Inchen Juanwei mendig amøñibelø iigwan wammørabe, amrrua, nui asrwan kusrua, srua amba sørabelø køn. Jesús trattrø mil møguelan manrrai tranøb

³⁰Inchen Jesús nøashib karua øriilø katø amrrua, nøba tulundzuna, nøm chi marigwanba, kusrenanigwanba kerriguh eshkaben,

³¹Jesúsbe trenchibig køn: —Nøørøsrø mu misakkasrø kuchi isrønrrab ñimbe amrruy— cha. Kaguende menrra misag køptø amben, amrruben inchen, nømune mab purramikken nebumíig køn.

³²Incha Jesúsba, nui nøashib karua øriiløba nømdø kan barcoyu mu misakkasrømay ambubelø køn.

³³Inchen møiløgøben nøm amben asha, Jesúswan mu kui nebua asha, chu puebloyuelø køben trusrømay lula, nømmerrig pubelø køn.

³⁴Incha Jesús barcoyugurri pinaya, truba nu misag pasrai ashabe, lastima isui inchibig køn, kaguende nømbe ubishamera mu ashchabig chigar latailø køben. Incha chine truba kusrenanøb mendabig køn.

³⁵Inchen yandø menrra maaben køben, nui kusrenanøb pera uniiløbe Jesúswan kemallabe, trenchibelø køn: —Yube mu misakkanug køn cha. Inchagucha yandø kwa maaben køn cha.

³⁶Misagwan amrrai, ‘ungwa’ chi cha, chugøben nøørøsrøn køben, puluwandø yamera pønrrabsrøn køben amba, nømuyasig chigøben pena manrrain— cha.

³⁷Inchen Jesús løtappe trenchibig køn: —Manrrai ñim mannay— cha. Inchene nømbe trenchibelø køn: —¿Manrrai mannamig kan møg doscientos días ørøba marøb megawa an pagaraig utiitøga pirrim penønrrab ambam nebunrrautah?— cha.

³⁸Inchen Jesúsbe trenchibig køn: —¿Ñimbe mam pirrin tøgagøgue? cha. Ashchab ambay— cha. Inchen nømbe ashabe, trenchibelø køn: —Trattrøgatø pirrimbah, pagatø peskaubatø tøgaguer— cha.

³⁹Inchen Jesúsbe misaameran kan søtø, kan søtø pillim pubilayu purramisringarubig køn.

⁴⁰Inchen kan søtømørig cienbatø, cienbatø purramisren; kan søtømerabe cincuentabatø, cincuentabatø purramisrøbelø køn.

⁴¹Inchen Jesúsbe tru trattrøgatø pirriwanba, pagatø peskaumeranba nui tasku muta, srømbalaneb neesha, Tiuswan ‘mayanguen pay’ chabe, pirrimeran pirisha, nui kusrenanøb pera uniilan misagwan pirishinrrai trana, katø tru pagatø peskaumerangucha mayeelan pirishinrrai tranøbig køn.

⁴²Inchen mayeeløba øska ma kørrømisren,

⁴³tru pirrim pitis, peskau pitis pirisaig undailan tasinmerayu tulishiben, tasinmera doce netsabig køn.

⁴⁴Inchen tru pirriwan mabeløbe møgueløtø trattrø mil købig køn. Jesús pi palawan arrub

⁴⁵Incha tru urastø Jesúsbe nui kusrenanøb pera uniilan pisu ambøgatø Betsaidasrømay merrab amrrai barcoyu nebambingarubig køn, nø tru nu søtø misagwan ‘ungwa’ chib pasrappatø.

⁴⁶Incha yandø misagwan chab ‘ungwa’ chabe, tunsrø Tius Møskaimba waminchab ibig køn.

⁴⁷Incha yem køben, barcobe chabguen pisu tøbøtaasrønguen iben, Jesúsbe nøtø pirau kørrømisrøbig køn.

⁴⁸Inchen kaguen isiibe nømui malaugøba megambub ichen, nømbe barcoyu amrrab kaima, muraaraig remab melai ashib pasrabig køn Jesúsbe. Incha løtsøzhig yemdø nøbe pi palawan katsikka nømuimay kemallib ya, purab inrrab lataig inchen,

⁴⁹pi palawan arri ashippe, nømbe møsig kønmab isua, trashibelø køn.

⁵⁰Kaguende mayeeløba ashagurri purø trømbøig kørig kui inchen, Jesúsbe møi møi nømune waminchib trenchibig køn: —¡Kørmø, mur isua purray! cha. Na kur cha. Kørig kui inchimøtay— cha.

⁵¹Incha nø barcoyu nebibene, isiibe wasrøngandø pasramisrøptinchen, kan øyeebe chi maig kermab nømbe truba kwaarøbelø køn.

⁵²Kaguende tru pirriwan øyeeg marigwanma katøgucha nømbe tab chigúi mørmøwa kørrømisrin købig køn, larrø mur manrrømera tøgar srø kua. Jesús Genesaretsrø kwanreelan tamarøb

⁵³Incha yandø tru pisuyu chab larraamba, Genesaret pirausrø pua, truyu barcon pi menda licha pasrøbelø køn.

⁵⁴Incha barcoyugurri nøm webamben latatø, misaamerabe Jesús kui nebua asha,

⁵⁵nømbe tru pirau truørø lula, Jesús chu wan taig mørøppe, trusrømay kwanrreelan tsigalyu muta, amrrub mendabelø køn.

⁵⁶Inchen Jesúsbe yamera tsitsø pønrrabsrø, pueblomerasrø, wambig nøørøsrø chugøben kebibene, penab, yanøb indiisrø kwanrreelan wara: —Ñi pala itøguewa kuig urøzhigwandøguen namun katørabashcha— chib, Jesúswan rugabelø køn. Incha mayeeløba katørabeløbe yandø tamariilø kørrømisrøbelø køn.