Read Namrrik Marcos 8 Bible Online

Marcos 8 - Namrrik bible

Marcos 8

¹Tru kwalømmerawan misag truba nu tulundzuna pasrøben, mamibe chigucha kaaben, Jesúsbe nui kusrenanøb pera uniilan nuimay wamabe, trenchibig køn:

²—Misaameran lastima køtan cha. Chabguen yu pøn kwalømguen naba warøwa, yandø chi mamig chigar køn cha.

³Chi mameelan na nømui yamay ka ambashendøbe, mayu parøgwab chab pesannanrrun cha. Kaguende kan utueløbe yabsrøngurri amrruar køn— cha.

⁴Inchen nui kusrenanøb pera uniiløbe trencha løtabelø køn: —¿Yu ya mu misag warømønuube pirri manrrai nømun chincha srøttrab?— cha.

⁵Inchen Jesúsbe trencha payibig køn: —¿Ñimbe mam pirrin tøgagøgue?— cha. Inchen nømbe løtappe: —Siete tøgaguer— chiben,

⁶Jesúsbe misagwan pirau purramisringarua, nui tasku tru pirri sieten muta, Tiuswan ‘mayanguen pay’ chabe, pirisha, nui kusrenanøb pera uniilan tranen, nømbe misagwan pirishibelø køn.

⁷Katø peskau-urekkucha mamdø tøgagøben, Jesúsbe trunun Tiuswan ‘mayanguen pay’ chabe, katø trunungucha misagwan pirishinrrai karubig køn.

⁸Inchen mayeeløba øska ma kørrømisren, katøgucha pitis undailan tasinmerayu netsøbateelø siete tulishibelø køn.

⁹Inchen tru mabeløbe pib milburab købig køn. Incha Jesúsbe misagwan ‘ungwa’ chabe,

¹⁰nui kusrenanøb pera uniiløba barcoyu kebya, Dalmanuta pirausrømay ibig køn. Fariseosmera Jesúswan kan mana asiimíig martrai miab

¹¹Inchen fariseosmera amrruabe, Jesúswan ‘¿øyeebe maig køh?’ chib payib menda, nune srømbalasrøngurriigwan asamig martrai miabelø køn, Tius nøba pasrain kui ashchab, ke chinchibig køtashchab ashig køptø.

¹²Inchen Jesúsbe truba isui inchib, nu israbe, trenchibig køn: —¿Møin kwaløm misaamerabe Tius naba pasrain kui ashchab chindimba maramig miah? cha. Nabe ñimun cierton trendamønrrun cha: Møin kwaløm misaameran ashig kui indigwane chigucha marig kømønrrun— cha.

¹³Incha nøbe nømun pønrramnetø, katø barcoyu kebya, pisu ambøgatøsrømay ibig køn. Fariseosmerai levadura

¹⁴Inchen nui kusrenanøb pera uniiløbe pirri srua amrrumigwan pesan amba, barcoyube pirri kandø tøgar purrabelø køn.

¹⁵Inchen Jesúsbe nømune trenchib eshkabig køn: —Au, ñimbe levadura fariseosmeraiwanba, saduceosmeraiwanba ashiptø kuy— cha.

¹⁶Inchen nui kusrenanøb pera uniiløbe kangurrin kangurri trenchibelø køn: —Kaguen nam pirrin chigar kuimba, nøbe trendan— cha.

¹⁷Inchen Jesúsbe nøm trenchib purrai ashabe, trenchibig køn: —¿Chindimbarre ñimasiyaitø ‘pirringar ker’ chib purrøgue? cha. ¿Katøgucha ni chigúinguen mørmøwei, chiwan wamindinguen mørmøwei inchigueh? cha. ¿Katøgucha ñimui manrrømerane mur mara tøga pønrrøtirru? cha.

¹⁸¿Ñimbe kabmera tøgar købendø ashmøwei, kalumera tøgar købendø mørmøwei inchigue? cha. ¿Yamba isumuitarru? cha.

¹⁹Tru na trattrøgatø pirriwan trattrø mil møguelan pirishib urasma tasinyu netsøbatø ñimbe ¿mam tasin tulisaig køh?— cha. Inchen nømbe løtappe: —Doce— chibelø køn.

²⁰Inchen Jesúsbe trenchibig køn: —¿Tru na siete pirriwan pib mil misagwan pirishib uras chigucha netseelø mam tasin tulisaig køh?— cha payene: —Siete— chibelø køn:

²¹Inchen nømune Jesúsbe trenchibig køn: —¿Inchendø katøgucha chigúi mørmøwa køtirru?— cha. Betsaidasriig kabgaigwan Jesús tamarøb

²²Incha Betsaida pueblosrø pubene, Jesúsweimay kan kab ashmíigwan srua amrrua, kabyu katørabsrumugu chib, meløben,

²³nøbe nun tasku kemøra, puebloyugurri wambiisrø srua ya, kabyu illimbitøga srøla, nui tasigwan kabgaigweim pala estsarabe: —¿Maytøguen ashkuh?— cha payibig køn.

²⁴Inchen tru møøbe ashabe, trenchibig køn: —Møguelan ashar cha. Tusrmera latailø købendø, amønan— cha.

²⁵Inchen Jesúsbe katøyug nui tasiimeran kab pala estsarabe, nune asingaruben, yandø tabig ashibig kørrømisra, chiwandøgucha tørgandø nebua ashibig misrøbig køn.

²⁶Inchen Jesúsbe nui yamay ørøppe, trencha ørøbig køn: —Puebloyu kebimøwei, truyu mungucha eshkamøwei inchig— cha. Pedro Jesúswan: “Cristo køn” chib

²⁷Incha Jesúsbe nui kusrenanøb pera uniiløba Filipo pirau Cesareasrø yamera tsitsø pønrrabsrømay webamba ambabe, mayu nømun trencha payibig køn: —¿Misaamerabe nane mu køn tah?— cha.

²⁸Inchen nømbe trencha løtabelø køn: —Møiløbe Juan Bautista køn chiben; katøganeløbe Elías køn chiben; møiløbe møikkøben Tius maig karuigwan eshkabig kuinrrun tan— cha.

²⁹Inchen Jesúsbe trencha payibig køn: —¿Trune ñimbe nane mu køn chinrrague?— cha. Inchene Pedrobe trencha løtabig køn: —Ñibe Cristo køn— cha.

³⁰Inchen Jesúsbe nømun mungucha eshkamønrrain karubig køn. Jesús nø kwamigwan eshkab

³¹Incha nø tru Møg Misra Arrubiibe truba truba kaig indinab megamig nebunrrun chib, kusrennøb mendabig køn. Misagwan karubelø kølli misaamera køben, sacerdotesmeran karubelø køben, tru Moisés pørigwan kusrenanøbelø køben nune kaasig kømig nebunrrain køn chib. Nune kweechen, pøn kwalømyube øsiiranrrun chib.

³²Iigwane Jesúsbe nømune tørgandø eshkabig køn. Inchen Pedrobe nun nøørøsrø pera ya, murtø waminchib mendabig køn.

³³Inchen Jesúsbe keesha asha, nui kusrenanøb pera uniilan ashabe, Pedrone trenchib namabig køn: —Satanás, ¡nainukkurri tarømisr! cha. Kaguende ñibe isuppe, Tius lataig isumøtø, møguelø isuimay isun— cha.

³⁴Incha Jesúsbe nui kusrenanøb pera uniilanba, misagwanba wama, trenchibig køn: —Møikkøben nai mendig uñig købene, nøasiitø nuimburabigwangøba isumøtø, nui kuruswan mutab, nai mendig arrum nebunrrun cha.

³⁵Inchen møikkøben øsig kømigwangøba esegabiibe yandø pinab pinamig nebunrrun cha. Inchen nagurrimba, Tiuswei tabig srø wamgurrimba kwabiibe, managatig øsig kømigwan esegawa tøgagønrrun cha.

³⁶¿Kan møg yu pirau chine købigwan kerrigu nuindø maringucha, nui øsig kømigwan trubisaibe, chiwein kui tabig kønrrab kø? cha.

³⁷¿Kabe kan møøbe kwamønrrappe, chi tranøbsruerah? chibig køn.

³⁸Inchawei møikkøben i møin kwaløm misaamera itøluløpteelø, kaig marøb misaamerai merrab naimburappa, na wamindiilaimburappa kørig isub kørig kui inchibigwane, nungucha kørig purørtrun, chibig køn, Møg Misra Arrubig tru nui Møskawei tørguegwalmabigu Tiusweindø tarømari ángelesmeraba arrua.—