Read Namrrik Lucas 10 Bible Online

Lucas 10 - Namrrik bible

Lucas 10

¹Øyeeg chab puraiben, Señor katø setenta lawa wesrua, pagatø pagatø pueblosmørig katøganbalømerasrø nø yamsrømay nui merrab ørøbig køn.

²Incha nømun trenchibig køn: —Ellmarig tulisamibe truba nørrø køben, trune tulishinrrabeløbe mamdø køn cha. Inchawei tru ellmarig puaig Tiuswan miay chibig køn, nui ellmarigwan tulishinrrabelø ørtrai.

³Ñimbe ambay cha. Au, nabe ñim ubishamera latailan lobosmerai utu ørar cha.

⁴An pusramig urasr ila ammøwei, wasr ila ammøwei, alpargatis katø nøørø srua ammøwei, ñim maywan ambuppe, mun køben wamab waminchib pønrrømøwei inchigay cha.

⁵’Incha kan yau kebambuppe, øyeemerrig chinrrigay cha: “I yaube chi isumgaig mayanguen tab kønrrun” cha.

⁶Inchen truyu chi isumgaig tab købigwan tøga møg wabene, tru: “Chi isumgaig tab kønrrun” cha ñim trendaibe nuinug kørrømisrtrun chibig køn. Inchen treeg møg kaabene, tru ñim trendaibe ñimuinuutøwei kørrømisrtrun cha.

⁷Inchen ñimbe tru yautøwei kørrømisra, nøm chi srørrendø mab, mutchigay cha. Kaguen chi marøbiibe nui marimburøbe mu chi chinrrainga, utamig køn cha. Yamørig, yamørig ammønrrigay cha.

⁸Ñim kan puebloyu kebamben, ñimun wamab utøbene, chi srørrendø manrrigay cha.

⁹Incha truyu kwanreelan tamarøb, tru misaameran: “Tius nø ashib karub wainuguiibe ñimuinuube lutaurab pasran” chinrrigay cha.

¹⁰’Inchen ñim kan puebloyu puben, ñimun wamømubene, trube, callesmerayu webamba, misagwan øyeeg chinrrigay cha:

¹¹“Ñimui puebloyu usrø namui srøbmerayu mendigwan møimbe trube, ñim kusrenrrigay chib pabørrguer chib. Inchendø møimbe yandø ñimbe isua kuy cha, Tius nø ashib karub wainuguiibe ñimuinuube lutaurain køn” chib.

¹²Inchawei nabe ñimun trendamønrrun: Srabe kwalømbe tru puebloimbe Sodomai lataitøguen kømø, Tiuswei tru maig kønrrabigwan asha maram kwaløm attrabiibe mas purø trømbøig kønrrun cha. Isua mørmø misaameran isumdiig nebunrrabig

¹³’¡Ay, ñi Corazín pueblo, waacha! ¡Ay, ñi Betsaida pueblo, waacha! Kaguende Tirosrø, Sidónsrø tru maramburab mariilan na ñimui utu lataitøwei marig kuimbe, manawei truiløbe nømui kaig mariilan isua møra, Tiusweimay llirabsruig kuinrrun cha. Incha kaig marmønrrab yandø isua mører chib kenamartrab, trøsrkøleelø keb, nagusrøyu purramisrøb inchibsruinrrun cha.

¹⁴Pøs Tiuswei tru maig kønrrabigwan asha maram kwalømbe Tiroba, Sidónba misaamera lataitøguen kømø, ñimbe mas purø trømbøigwan utønrrun cha.

¹⁵Inchen ñi Capernaum pueblogan, ¿purø tab incha srømbalasrøngatig kusruig kønrrurmab isutirru? cha. Treeg kømøtø, ñibe tru møra melamnug kegutsig kønrrabguen— chibig køn.

¹⁶Incha nui pera uniilan trenchibig køn: —Ñimun mørøbiibe, nan møran cha. Inchen ñimun kaashibiibe, nan kaasan cha. Inchen tru nan kaashibiibe, nan karua ørøbigwan kaasan— cha. Karua ørig setenteelø katø amrrub

¹⁷Inchen tru setenteeløbe truba kasrag katø amrruabe, trenchibelø køn: —Señor, ñui munchiyube kwaimandziimeraguen namune mørtan— cha.

¹⁸Inchene Jesúsbe trenchibig køn: —Satanásbe srømbalasrøngurri kan palaig peñib lataig peñen, nabe asig køn cha.

¹⁹Nabe mu mandamgaig maramburab maramigwan ñimun tranamønrrun cha, ulmeran, alacránmeran itøbunønrrai, katø tru ashig kømui inchibig, Satanás, nø kanawa, chi martrab kaimanrraimba. Inchen ñimbe chi indiimeelø puramrrun cha.

²⁰Inchen ñimbe, kwaimandziimera ñimun mørimba kasraaramøtø, ñimui munchimera srømbalasrø pørig pønrraimba kasraaray— chibig køn. Jesús nuielaimburab kasraarab

²¹Incha tru uras Jesúsbe Espíritu Santogurri truba kasraarawa, trenchibig køn: —Nai Møskai, srømbalawanba, pirøwanba ashib karubig, ñun tabig waminchar cha, kaguende ñibe kusrebelø chigúi mørøbelan ashmønrrai tru sørig pønrrabelane tru chigucha kømeelø kusremeelan kenamarikkurri. Treewein køn, nai Møskai, ñi treeg kønrrai maramig tab kuig kua.

²²’Nai Møskaimbe chiwandøgucha nan trandan cha. Mugucha na Nusrkawane mu kui ashmuben, Møskaindøwei asan cha. Mugucha Møskawane mu kui ashmuben, na Nusrkaimba, møiløgøben na asingaruilø truiløbatø asan— chibig køn.

²³Incha nui kusrenanøb pera uniilan ashabe, nømundø trenchibig køn: —Tru ñimui kabmera nebua asigwan ñim ashibeløbe mayanguen tab kuilø køn cha.

²⁴Kaguende nabe ñimun trendamønrrun cha: Truba nørrø Tius maig karuigwan eshkabelø køben, reymera køben, i ñim asigwan asinrrabna kui inchendø, ashmuig køn cha; i ñim mørigwan mørinrrabna kui inchendø, mørmuig køn— cha. Kan tabig marøb samaritanon Jesús kemesra wamindig

²⁵Inchen tru maig maramigwan martrai Moisés pørigwan kan kusrenanøbig Jesúswan mandø inchibig køtashchab nøba waminchab kurra yabe, trencha payibig køn: —Kusrennøbig, ¿managatig øsig kømigwan Tius tranig tøgagønrappe, nabe chi maramerah?— cha.

²⁶Inchen Jesúsbe trencha løtabig køn: —Maig maramigwan martrai Moisés pørigube ¿chi pørig pasrah? cha. ¿Ñibe truigwane mandø taitamab isugu?— cha.

²⁷Inchen nøbe trenchibig køn: —“Señor ñui Tiuswane ñui manrraugurri kerrigu newan undaaraitøgaba, kerrigu ñui øsig pasraitøgaba, katø kerrigu ñui asru chishkømburab chish kuitøgaba, kerrigu ñui turtøga isumburab isuitøgaba undaaramig køn cha. Katø ñima ñiasiitøwei maig undaguig køppe, ñui mendaigwangucha treetøwei undaaramig køn” cha, trenchibig pørig pasran— cha.

²⁸Inchen Jesúsbe trenchibig køn: —Ñibe sølwei løtan cha. Iigwan mar cha. Treeg marabe si, ñibe managatig øsig kømigwan Tius tranig tøgagønrrabguen— cha.

²⁹Inchen tru møøbe nø payigwan tab webig køb, Jesúswane trencha payibig køn: —¿Naimbe mendaibe mu kerah?— cha.

³⁰Inchene Jesúsbe trencha løtabig køn: —Kan møg Jerusalénmay ambi maywan Jericómay kørraarrub arrubene, nileelø merrarrawa, kerrigu nui kewagúigwanbañau nila, kurragucha, kwaig lataig mara trarra ambubelø køn cha.

³¹Inchen kan judíosmerai sacerdote tru maywandøwei chi isumø purainrrab arrub pasrøwa, tsui ashippe, yabwansrøndø purayan cha.

³²Katø treetøwei kan levitagucha truyu pubendø, ashabe, mendawansrøndø pureppa ib ibig køn cha.

³³Trune kan Samariasrø møg tru maywandøwei purainrrab arrua, nun ashabe, lastima isua,

³⁴møwan kemallabe, nui pisrøwan aceiteba, vinoba srøla, llensutøga lusra, trugurrimbe nui burroyutøwei itøguanøsra, kan ya pebøbelainuumay srua ya, truyu ashib tøgagúig køn cha.

³⁵Incha katø kwaløm samaritanobe inrrappe, tru ya puaigwan pagatø an wesrawa, trana: “I møwan ashchunrrig tan cha. Ñi mas kastain købene, katø arruabe, pagararrumøn” tan— cha.

³⁶Incha Jesúsbe tru Moisés pørigwan kusrenanøbigwane trenchibig køn: —¿Tru nileelø kemørinab møwan, tru i pønelø nøasi lataitøwei isua ashibiibe, ñune møig truig kønrraptiig køta?— cha.

³⁷Inchen nøbe løtappe trenchibig køn: —Tru møwan lastima ashibig, truig kømmørgøtan— cha. Inchen Jesúsbe trenchibig køn: —Ñigucha ya, treetøwei mar— cha. Jesús Martaba, Maríaba waminchib

³⁸Incha Jesúsba, nui kusrenanøb pera uniiløba nui maywan amba, yamera tsitsø pønrrabsrø pubene, truyube kan ishug, Marta taig, nui yaumay amø cha, utabig køn.

³⁹Martabe kan numøsrai María taig tøgaig købig køn. Inchen truibe Jesúswei srøb pulu nø chi taigwan mørtrab wamisren,

⁴⁰trune Martabe, ke chi maram kuinguen mørmíig wawa, Jesúswan kemallabe, trenchibig køn: —Señor, chi maramelan nai numøsrai ke nandø keguchen, ñungan isumuitarru cha, nan puruguptøguen wau taindø— cha.

⁴¹Inchen Jesúsbe trenchibig køn: —Marta, Marta, ñi kui ke chinsraatø inchib, ñui chigurrimbunø maramelangøba isun cha.

⁴²Inchendø kanbaløtø mas isumig pasran cha. Inchen Maríabe tru mas tabigwan trunun lawa wan cha. Truigwane kerraig kømønrrun— chibig køn.