Read Namrrik Lucas 12 Bible Online

Lucas 12 - Namrrik bible

Lucas 12

¹Trune misaabe truba truba nørrø tulundzuna, nu køptø ke nømdø melambub itøbuniyaben, Jesúsbe nui kusrenanøb pera uniilan nømunmerrig trenchib pølbasrøbig køn: —Au, fariseosmerai levaduran ashiptø kuy cha, tru palatøbe truba tab indigwan.

²Pøs chitøgucha søra pasriibe søriitø kørrømisrmø, ashchai kenamarig køben, katø wammørmønrrai søra tøgagúibe wammøriimíibe kørrømisrtraamøn cha.

³Inchawei ñim løstøyu wamindigwane tøryu wammørøbguen inchen, ñim yaskabwan kasra nilø wamindigwane yabalasrøngurri trasaig kønrrun cha. Jesús møigwan kørig tøgagømigwan waminchib

⁴’Na ñim nai linchibelane trenchar: Asrwandø kweechibelane kørig kui inchimøtay cha. Kaguen asrwane kweechendø, mas trømbøibe chi martrab kaiman cha.

⁵Inchendø nabe ñim møigwan kørig tøgagømigwan eshkarrumøn cha. Kweecha, mu manchinrrainga tru møra melamnug kegutchabig, truigwane kørig tøgaguy cha. Nabe katøle trendamønrrun: Trunune si, kørig tøgaguy cha.

⁶’¿Trattrøgatø illinzheelan pa centavozhigweindø yanøbelø kømuitarru? chibig køn. Inchendø Tiusbe treelanguen pesannamø, ashibig køn cha.

⁷Pøs ñimuimburappe ñimui turyu pusruumeranguen kan kan mundziizheelø køn cha. Inchawei chi kørig kui inchimøtay chibig køn. Truba yam illimera lataitøguen kømø, ñimbe mas purø nuweyelø køn cha. Misaamerai malau ‘Jesucriston ashmíig kur’ chib pønrrømeelø

⁸’Katø nabe ñimun trendamønrrun: Møikkøben misaamerai merrab ‘Jesúsweingatiig kur’ chibigwane na, tru Møg Misra Arrubikkucha Tiuswei ángelesmerai merrab treetøwei truigwane ‘nuingatiig kur’ cha, nabe trendamønrrun cha.

⁹Inchen misaamerai malau ‘Jesúsweingatiig kømur’ chibigwane Tiuswei ángelesmerai merrab nabe nungucha ‘nuingatiig kømur’ tamønrrun cha.

¹⁰’Møikkøben na, Møg Misra Arrubigwan chigøben kaig waminchibigwane Tiusbe uløwan paymønrrab pesannanrrun. Trune møikkøben Espíritu Santon purø trømbøig waminchibigwaneguende pesannamø, ulø payrrun cha.

¹¹’Ñimun payrrab judíosmera tulundzuni yamerayumay, kabe juezmeraimay, kabe karubelaimay srua ambene, mandø cha løtamermab, mancha løtamermab, chi tamermab chi isumøtay chibig køn.

¹²Kaguende yandø wamindamig puben, Espíritu Santobe maig tamigwan ñimun kusrenanrrun— cha. Kan pua møg chugúi mørmíig lataigwan kemesra wamindig

¹³Kan møikkøsrøn misag utu Jesúswan trenchibig køn: —Kusrennøbig, nai nunewan naimburabig kønrrabigwan pirisha, nan tranø chirra— cha. Inchen Jesúsbe trenchibig køn:

¹⁴—Au, kasuku, ¿nan kan juez lataig, kabe kan pirø pirishibig lataig kønrraimbe nane mu pasrah?— cha.

¹⁵Incha katø trenchibig køn: —Parø indamigwane treenchimønrrab ashiptø kuy cha. Kaguende kan møg øsig kømibe chi nørrø tøgagúinug pasrømíig køn— cha.

¹⁶Incha katø ‘øyeeg lataitøwein køn’ cha, kemesra waminchib trenchibig køn: —Kan truba pua møwan nui pirømerayu truba truba ellmarig misren,

¹⁷tru puaibe nuinetø isub mendabe trendan cha: “¿Chindamer? cha. Nai ellmarig tulisailan yandø chu esegamig chigagur” cha.

¹⁸Inchabe treeg isubig køn cha: “Møimbe sí chi maram kui ashar cha. Nai mamig keerøb esegailan picha, mas nørreelø mara, truyu nai ellmarig tulisailanba, chi tøgagúilanba kerrigu esegamønrrun cha.

¹⁹Incha nabe naasiitøwei trendamønrrun tan cha: ‘Møimbe si, chigøben truba nørrø esegailø yam pilawei pønsra war cha. Møimbe israb, mab, muchib kasraarau’ tamønrrun” cha.

²⁰Inchene Tiusbe trendan: “Chugúinguen mørmø møg, møi yemdøwei ñui møsigwan miaben, kwamig nebuben, ñi esegawa tøgagúibe, ¿muin kørrømisrtrerah?” cha.

²¹’Kan møøbe nuyasiitø chine palømø, tun pønsraindøgucha, Tiusweimburabigwan chiguchaga waachawane øyeeg purainrrun— chibig køn, Jesúsbe. Tiusbe nui uregwane chi palabigwan tranøbig køn

²²Incha Jesúsbe nui kusrenanøb pera uniilan trenchibig køn: —Ñimune trendamønrrun cha: Øsig amønamig, ñim mamigwanba, asru chi kemermab isumigwanba menrra isumøtay cha.

²³Pøs øsig amønamikkan kan mamig lataitø kuitarru cha. Kabe asrkan kan asru keelø lataitø kuitarru cha.

²⁴Pøñiimeranma asay cha, chi ellguamøwei, ellmarig tulishimøwei, mamig esegamig chi kawei, mamig nørrø keera tun pønsra esegamig chi kaweyelanguen Tiusbe manrrai mannøbig køn cha. Ñimbe illimera lataguen kømø, maseløguen køn cha.

²⁵¿Ñim møiløgøben, maya maya incha, katøgan tøbø metrotøguen nurabsruguh? cha.

²⁶Ñim yandøzhigwanguen martrab kaimabeløbe, ¿katøgan peg maramelane chinchabrre isugue? cha.

²⁷’Umeranma asay chibig køn, kwallmøwei, kumøwei inchibelø købendø, tabig nørrøran cha. Inchendø nabe ñimune trendamønrrun: Rey Salomónguen nui chine purø tabzhig tøgagua, umera lata tabzhiibe kemuig køn cha.

²⁸Wambig kaumera, møi ka pønrrøwa, srønabe nagu parrig kønrrabigwanguen Tiusbe øyeeg tabzhig kenanøb lataig marøbiibe, ñimune treetøguen kømøtø, masken marmønrraitarru cha, ñim isubigwan Tiusweinug pasra tøgagúigwan ke kagømønrraindøzhig tøgarwan.

²⁹Inchawei chindamermab isuptø menrra isui inchib lamøtay chibig køn, chi mamermab, chi mutsamermab.

³⁰Kaguende yu pirau misaamerabe mutøgucha iilan isua labelø køn cha. Trune ñimui Møskaimbe ñimui chi palabelan ashaguen wabig køn cha.

³¹Treeg kømøtø, ñimbe Tius nø ashib karub wainuguigwan isua lay chibig køn. Trumaybe tru katøgan chi palabelangucha ñimbe nemarig utønrrun cha. Srømbalasrø chigurrimbunø pønrrabelø

³²’Nai mamdø ubishazheelø, chi kørig kui inchimøtay. Kaguende ñimui Møskaimbe nui karub wainuguigwan tranamig tab kui indin køn.

³³Chi tøgagúilan yana, chigarwan tranay, treeg marabeguende, an pusrig urasrmera, pinønrrabig kømeelø tøgagønrrabguen, chi tøgagúilø managuen pinønrrabgailan srømbalasrø eseganrrab. Truyube niliig kebinrrab kaimabwei, ni pullilla parmøwei inchibnug.

³⁴Kaguende ñimui chi tøgagúilø chu esegaig pønrrøbene, ñimui manrrøgucha ke truyutø isub pasrønrrun cha. Tamara muniitø kømig køn

³⁵’Ñimbe kewa, tamara, pørønawa, martrab ke muniitø kuy; katø ñimui aceite usri lámparamerangucha piløga kuy;

³⁶ñimbe kan mendig melabelø latailø kønrrigay ya puaig novios yaugurri attrab køben muniirabelø latawei. Incha pua, nø yaskabwan pinrrøgøbene, kurtrab muniitø melabelø latailø kømig køn.

³⁷Mayanguen tab kuilø køn tru karuindiig melabelø ya puaig nømun kib køben kømø, kasrig purrabyuh puinabeløbe. Nabe ñimun cierton trendamønrrun: Ya puaig nøashib tamara pørønawa, mishatsigu nømun purramisringarua, mamigwan nøashib pirishinrrun cha.

³⁸Yem tøbøtag pui lata, løtsø pui lata nømun kib kømø, kasrig purrøben puinabeløbe mayanguen tab kuilø kønrrun cha.

³⁹Kan ya puaima niliig chu uras attrab kui mørimbe, yau nilønrrab kebibashmubsruinrrun cha.

⁴⁰Ñimgucha tamara melay chibig køn. Kaguende tru Møg Misra Arrubiibe chi isumø købenba arruptinchun— cha. Mendig megabig maig taigwan marøbigwanba, maig taigwan marmíigwanba kemesra wamindig

⁴¹Inchene Pedrobe trencha payibig køn: —Señor, ¿iig ‘øyeeg lataitøwein køn’ cha, kemesra wamindigwangan namuyasiitø waminchitirru? cha, kabe ¿mayeelain kuitarru?— cha.

⁴²Inchen Señorbe trenchibig køn: —Kan karuindiig megabig maig taigwan møra marøb, katø chi maramelan nøtø tsabø asha marøbigwan, ya puaig nui yau warabelan mannam ura puin kuindø nømui mamigwan srøttrab muniitø wabig kønrrai ashai wanninabiibe ¿møig kerah? cha.

⁴³Truibe mayanguen tab kuig køn cha, nun karua pasrigwan marøb megabenh ya puaig puptindinabigweimbe.

⁴⁴Pøs nabe ñimun cierton trendamønrrun: Ya puaibe nui chi tøgagúigwan kerrigu nø asha marøb pasrønrrai tranrrun cha.

⁴⁵Inchen tru karuindiig megabig nuinetø ya puaibe peguen arrumønrraitamab isua, katøgan karuindiig melabelan møguelan lata, ishumburmeran lata kurrabetab menda, katø mab, muchib, mutsiirab tsubenba,

⁴⁶nui ya puaibe ni attraitamab isuinguen kømø kwaløm, ni ø uras punrraitamab isumø tsubenba, puptincha, purø trømbøig ichagucha, maig taigwan marmeelø pønrrainug kertrun cha.

⁴⁷’Inchen tru karuindiig megabig nun karua pasrøbig ya puaig maig maramig palai indi ashibig købendø, tamarmøwei maig chiben mørmøwei inchibigwane truba yam ichagutsig kønrrun cha.

⁴⁸Inchen tru karuindiig megabig nun karua pasrøbig ya puaig maig maramig palai indi mørmøwa, kørrø ichagutsamdiig marøbigwane trengatig yam ichagutsig kømønrrun cha. Inchen møigwan køben maramigwan mas nu tranøppe, treetøwei nu ulø payrrun cha. Inchen møigwan køben mas purø nørrø maramig traninabigwane, trunune masken nu ulø payrrun chibig køn. Jesúskurri misaamera ke nøørøtø misrøb

⁴⁹’Nabe yu pirau nag lataig kegutchab arrig køn. ¡Nabe yambe manawei pilabguen pasrømønrrammab truba isur!

⁵⁰Nane purø trømbøig pinøbuløb arrubigu pureb yamig nebunrrautan. ¡Nane purø isutan treeg nebumnegatiibe!

⁵¹¿Ñim isubgan nabe piraumay arruppe, ambumay imay tab købigwan srua arritamab isugueh? Nabe treeg kømøtø, nøørøtø, nøørøtø inchib kønrrai arrur cha trendamønrrun.

⁵²Kaguen møingurrimbunøbe kan yau trattrøgatø purramnuube nøørøtø inchib kønrrun cha, pøneløbe pailan namig kurra tarømisren, pailøbe pønelan namig kurra tarømisrtrun cha.

⁵³Møskaimbe nusrkawan namig kurrøben, nusrkaingurrimbe møskawan namig kurrøben, usrimbe nimbasrwan namig kurrøben, nimbasrkurrimbe usran namig kurrøben, sueeragurrimbe yernan, katø yernagurrimbe sueeran namig kurrønrrun— cha, trenchibig køn. Maig pub attrabigwan wamindig

⁵⁴Incha katø Jesúsbe misagwan trenchibig køn: —Wañimera pørr kebibsrø kurrab arrubene, ñimbe trenchibelø køn cha: “Sre punrrun” cha. Inchen pubwei inchibig køn cha.

⁵⁵Inchen isig ambø umbusrøngurri webarrubene: “Pachig kønrrun” chiben, treegwein købig køn cha.

⁵⁶¡Palatø tabelø! Pala wañi maig pasrai asha, pirau maig kui asha ñim øyeeg kønrrun chib, øyeeg kønrrun chib waminchibelø købendø, ¿møin kwaløm chi pureb arrubigwane, trube, øyeeg kønrrun chinrrab wetøgørrønrrab kaimabeløbe mailø køgue? cha. Ñui ashig kømui inchibiiba ambumay imay lata tab kønrrai mar

⁵⁷’¿Sølgandø tabig maig kønrrabigwan ñimasiyaitøwei chindimba asha tamarmøgue?

⁵⁸Ñun maig maramigwan asha marig kønrrai tru kejabiiba, tru maig maramigwan asha marøbigweinuumay ambub pønrrappatø, mallatø trunun mayutø nøba tamara kørrømisrtrab inchi. Inchippa ñun juezweimay srua amben, juezbe policíameran trana øren, truiløbe ñun merrarrawa kailan keeri yau keera pasrmønrraimbe.

⁵⁹Pøs nabe ñimun trendamønrrun: Truyugurri webinrrappe, maya ulø misrigwan ke chishtø pagarawatøwei webinrrabguen— cha.