Read Namrrik Lucas 18 Bible Online

Lucas 18 - Namrrik bible

Lucas 18

¹Chu urastøgucha Tiusba wamindamigwane elachib kullaaramø melamig truba palabig køn chinrrab, Jesúsbe nui kusrenanøb pera uniilan ‘øyeeg lataitøwein køn’ cha, kemesra waminchib

²trenchibig køn: —Kan puebloyu kan juez wabig køn cha, truibe: “Tiuswan kørmøwei, ni møguelan naimburab kømøbashtømab” isubig.

³Inchen tru puebloyutøwei kan piudagucha wabig køn cha. Truibe tru juezweimay trenchinrrab arruptø arrubig: “Nan kalø marøbigwan maig maramigwan tamara kettra” chib.

⁴Inchen tru juezbe kan maya yana køsrøngatig ke mørøg kømui inchibig køn cha. Inchabe yandø truibe treeg isubig køn cha: “Nabe Tiuswan kørmøwei, ni møguelan naimburab kømøbashtømab isubig kuagucha,

⁵i piudabe ke menrra pub llirab, ke pesrøølig inchib ke katø katø arrumønrrai, ka tamara tranrrab isur” tan— cha.

⁶Inchabe Señorbe trenchibig køn: —Tru sølgandø tabigwan marmø juezken, nø øyeeg taigwan møray cha.

⁷¿Inchawei Tiusbe nuindø kønrrai lawa wesruilø yem kwaløm nun miabelane, nømuyasig sølgandø maig kønrrabigwan marøb purømisrmønrraitarru? cha. Kabe ¿muniitø, muniitø melønrrai inchautah? cha.

⁸Pøs nabe trendamønrrun cha: Tiusbe sølgandø maig kønrrabigwan petø tamara kettrun cha. Inchen treeg køben, na, tru Møg Misra Arrubig yu piraumay katø arrub kwalømbe ¿isubigwan nainuutø tøga misag pirau katøgucha wetørranrrautah?— chibig køn. Chigøben tøgagúimburø an utab wabigwanba, Fariseowanba kemesra wamindig

⁹Møiløgøben nømdø sølgandiig tabelø kermab isua, katøganelane kaashibelaimburab Jesúsbe ‘øyeeg lataitøwein køn’ chib kemesra waminchib trenchibig køn:

¹⁰—Pailø møguelø Tiuswei yau Tiusba waminchab ambubelø køn cha, kane fariseo køben, kane romasreelayasig an utabig.

¹¹Tru fariseobe pasramisra, øyah chib Tiusba waminchibig køn cha: “Nai Tius, ungwa, ungwa chib, kaguen nabe kanelø lata niliig kømøwei, kalø marøptiig søl marmíig kømøwei, itøluløptiig kømøwei, ni i an utabig lataig kømøwein kur cha.

¹²Nabe truneyu pa kwaløm ayunab, na chi tøgagúigugurri diezmørig kan kan tranøb inchibig kur” chib.

¹³Trune tru an utabiibe wendausrøndø pasramisra, ni nui kabmeranguen srømbalaneb neeshig kømui inchib, nui pechondø kurrøb, trenchibig køn cha: “Tius, nan lastima ashcha chib. Nabe kaig marøbig kur” cha.

¹⁴Inchawei nabe trendamønrrun chibig køn: Tru an utabiibe nui yamay katø ippe, Tiusba chi kaig kømíig lataig Tius tabig kørrømarig yan cha. Trune fariseobe treeg kømø yan cha. Kaguen møikkøben nøasiitø ‘nuig kurmab’ isubigwane ka kørig martrun cha. Inchen nøasiitø ‘nuig kurmab’ isumíigwane ‘i møøbe si, nuig køn’ taig kønrrun— cha. Uregwan Jesús mayanguen tab kuilø kønrrain chib

¹⁵Ureezheelan chigucha Jesúsweimay srua amrrubelø køn, nø estsartrai. Inchen nui kusrenanøb pera uniilø trunun ashabe, srua amrrubelan namøben,

¹⁶trune Jesúsbe ureemerane nuimay wama, trenchibig køn: —Ureemerane merømø, naimay ka amrrubasay cha. Kaguende Tius nø ashib karub waibe nøm latailaiwein køn cha.

¹⁷Inchawei nabe ñimun cierton trendamønrrun chibig køn: Møikkøben Tius nø ashib karub wainuguigwan kan unø lataitøwei utaptinchimíibe managuen truyube kebinrraamøn— cha. Kan pua møg Jesúsba waminchib

¹⁸Kan møikkøsrøn chi maramigwan nø ashibiibe Jesúswan trencha payibig køn: —Kusrennøbig tabig, ¿managatig øsig kømigwan Tius tranig tøgagønrrappe, nabe chi maramerah?— cha.

¹⁹Inchen Jesúsbe trenchibig køn: —¿Chindimba nane tabig cha wamøgu? cha. Tabiibe kandø køben, truibe Tiustø køn cha.

²⁰Tius maig maramigwan martrai pønsrailane ñibe yandø ashibig køn cha: “Itølulmøwei, kweechimøwei, nilømøwei, katøganelaimburab isa waminchimøwei, ñui usri møskawan maig købash inchimø, tab indamig køn” tailan.—

²¹Inchen tru møøbe: —Nabe iilane kerriguh matsinø-unøgurri marøbig kur— chiben,

²²Jesús iigwan mørabe trenchibig køn: —Katøgucha kan chigøsrøndø palan cha. Ñui chi tøgagúigwan kerrigu yana, waachameran pirishi cha. Treeg marabe, srømbalasrømbe chigurrimbunø tøgagønrrabguen cha. Trugurrimbe arrua, nai mendig amø— chibig køn.

²³Inchen tru møøbe iigwan mørabe, truba isui inchibig køn, kaguen truba puaig kua.

²⁴Inchen Jesúsbe nun ashabe, trenchibig køn: —¡Tius nø ashib karub wainug puarmera kebambamibe purø murig køn! cha.

²⁵Kan camelloguen tsusain kal trabyu illmø larrayamdiig køben, kan puaibe Tius nø ashib karub waisrø kebinrrab kaimanrrun— cha.

²⁶Inchen mørøbeløbe trenchibelø køn: —Trube, treeg købene, ¿kaigyugurrimbe mu kui wesraig kønrrautah?— cha.

²⁷Inchen Jesúsbe løtappe: —Møguelø martrab kaimaigwane Tiusbe sí, martrun— chibig køn.

²⁸Inchen Pedrobe trenchibig køn: —Au, nambe namui chi tøgagúilan elacha, ñui mendig amrruig køn— cha.

²⁹Inchen Jesúsbe trenchibig køn: —Pøs nabe ñimun cierton trendamønrrun cha: Møikkøben nui yawan, srawan, nunelan, møskalan, uregwan Tius nø ashib karub waigweimburabigwan isua elachibiibe,

³⁰møi yu piraube øyeetøguen kømø, mas purø nu uta tøgagua, kansrømbe managatig øsig kømigwan utønrrun— cha. Jesús katøyug nø kwamigwan eshkab

³¹Jesús nui doce kusrenanøb pera uniilan nøørø wamabe, trenchibig køn: —Au, nambe Jerusalénmay nebambub amber cha. Trusrømbe tru Møg Misra Arrubigweimburab Tius maig karuigwan eshkabig pøriibe kerrigu maig taig punrrun cha.

³²Kaguende nune judíos kømeelan tranen, indzaashib, tsalø wamab, illimbi tuchaashib,

³³ichaguchib srua kua, yandø kwetchun cha. Inchendø pøn kwalømyube katø øsiiranrrun— chibig køn.

³⁴Inchen nømbe trunun mandø kuinguen mørmøwei, ni wamindigwan chi tainguen mørmøwei inchibelø køn. Kaguende iig wamindiiløbe nømune sørin pasrøben, nømbe ni chiwan tainguen mørmeelø køn. Jesús kan jericósriig kabgaigwan tamarøb

³⁵Jesús yandø Jericó ciuda pub lutau ibene, may menda kan kabgaig ‘anzhig kettra’ chib, miab wawabe,

³⁶misag truba nu puraambi mørabe, kabgaibe: —¿Chindah?— cha, payene:

³⁷—Nazaretsrø Jesús pureb yan— cha, trenchiptinchibelø køn.

³⁸Inchen kabgaibe trenchib trashibig køn: —¡Jesús, merrabsrø Davidwei Nusrkai, nan lastima ashcha!— chib.

³⁹Inchen tru merrab ambubeløbe niløtø wanrrai namingucha, nøbe trenchib mas mur trashibig køn: —¡Merrabsrø Davidwei nusrkai, nan lastima ashcha!— chib.

⁴⁰Inchen Jesúsbe pasramisra, srua amrrungaruben, nuim pulu pubene, trencha payibig køn:

⁴¹—¿Na ñuyasig chi maramig paløta?— cha. Inchen kabgaibe trencha løtabig køn: —Señor, nai kabmera ashibig misrimbe køtan— cha.

⁴²Inchen Jesúsbe nun trenchibig køn: —¡Ashibig misr! cha. Ñui isubigwan nainug pasriitøga tabig kørrømisran— cha.

⁴³Inchen tru urastø kabgaibe ashibig misra, Jesúswei mendig Tiuswan truba tabig waminchib iben, mayeelø iigwan ashibeløbe nømgucha Tiuswan tabig waminchibelø køn.