Read Namrrik Lucas 2 Bible Online

Lucas 2 - Namrrik bible

Lucas 2

¹Tru kwalømmerawan Roma maya misagwan ashib karub wabig César Augustobe treeg maramig kønrrai kan kilga treeg pøra weerig købig køn, chutøgucha misaamera maya nu køtashchab munchimeran tulisamig.

²Iig køn, tru srøsrøwan munchimeran tulisingaruig, Cirenio Siria pirausrø kubenadur køb uras.

³Inchen mayeeløba tru trendø nømuim pirau pueblomerasrø munchiwan pøra kørrømartrab ambamig nebubig køn.

⁴Treekkurri Josébe Galilea pirau Nazaret puebloyugurri webya, Judea pirau Belén tru Davidweim pueblo tainuumay ibig køn, kaguende nøbe merrabsrø Davidwei misagugurri arrubig kua.

⁵Incha Maríaba Belénsrø nømui munchiwan pøra kørrømartrab ibig køn. Maríabe Joséba kasharanrrab misraig kwanrriig købig køn.

⁶Indiibe Belén waramnetø, Maríane unan tammisramig ura puben,

⁷nui mayor nusrkawan tøgamisra, may pula, animal maig kan patiayu wayibig køn, kaguende nømuimbe ya pebøbelainuube chu kørrømisramig kaaben. Angelesmera ubisha ashibelan eshkab

⁸Inchen tru pirau Belén pulu møiløgøsrøn ubisha ashibelø ubisha ashib yem warøbene,

⁹møimbe Señorwei ángel nømun kenamisren, Señorwei tørguegwalmabig nømuim pøtøgatan kebiløben, nømbe truba truba kørig kui inchibelø køn.

¹⁰Inchen ángelbe trenchibig køn: —Kørig kui inchimøtay cha. Kaguende ñimun wammørøsrkønrrab kan tabig srøig wam srua arrur cha, mayeelø kasraaramig kønrrai.

¹¹Møi Davidwei puebloyu ñimuyasig kan Kaigyugurri Wesrabig kal-lain køn cha, Cristo tru Señor.

¹²Incha truig kuitamab asamibe, unane pula, animal maig kan patiayu wayig wetørranrrabguen— cha, trenchibig køn ángelbe.

¹³Inchen møimbe tru urastø ángelweim pulube katøgan ángelesmera srømbalasreelø kenamisra, Tiuswan tabig waminchib trenchibelø køn:

¹⁴“¡Srømbalasrømbe Tiusweimbe purø tabig køn chib kasraarab, katø piraube misaamera Señor nø mayanguen tab kui wamig kønrrai,treeg pønrrabelaimbe ambumay imay mayanguen tab køn!” chib.

¹⁵Inchen ángelesmera katø srømbalasrømay amben, ubisha ashibeløbe kangurrin kangurri trenchibelø køn: —Chi purayaitashchab, Señor namun chi taitashchab, møindøwei Belénsrø ashchab amun— cha.

¹⁶Incha malla amba, Maríanba, Joséwanba wetørrabelø køn, unane animal main patiayu wayig.

¹⁷Incha ashabe, ángel tru unaimburab chi taigwan tru ubisha ashibeløbe eshkaben,

¹⁸mayeeløba chi eshkaigwan mørabe, truba kwaarøbelø køn.

¹⁹Inchen Maríabe chi tailane treebe maig kermab isub, nuinetø esegabig køn.

²⁰Inchen ubisha ashibeløbe katøle ambuppe: —Tiusbe maya nuguen tabig køn chib— truba tabig waminchib ambubelø køn, nøm chi mørigwan nøm chi asigwan, tru ángelesmera maig taig treeg purayaigwan asha. Jesús-unan Tiuswei yaumay srua ambub

²¹Inchen trune kwalømyube unan circuncidamig puben, treeg mara, Jesús munchi pasrøbelø køn. María kwanrriig kømøwatø ángel chi munchi pasringaruig, treeg pasrig købig køn.

²²Inchen tru maig maramigwan martrai Moisés pørigu maig chibig køben, tru chilliguig kørrømisrigwan chish maram kwalømmera puben, unan Jerusalén ciudayu Señorwan ‘nuin kønrrai tranrrumøn’ chinrrab srua ambubelø køn.

²³Tru maig maramigwan martrai Señor pasrigu maig chibig køben treeg: “Mutøgucha srøsrø kal-lab nusrkawane Señorweindø tarømarig kønrrain” taigwan.

²⁴Tru maig maramigwan martrai Señor pasrigu maig chibig køben, pagatø nushin kui, kabe pagatø paloma-ureezheelø kui Tiusweyasig trannrrab ambubelø køn. Simeón cantaig

²⁵Inchen tru kwalømmerawan kan møg Jerusalén Simeón taig tsubig køn, sølgandø tabig, Tiuswan chu uragucha pesannamíig, Israel misaamera tab kømui melaigugurri webambamigwan muniirabig. Inchen Espíritu Santobe Simeónba pasrabig køn.

²⁶Incha nune Espíritu Santobe maig kønrrabigwan eshkain købig køn, Criston tru Señorwan ashmøwatøbe ñibe kwanrraamøn cha.

²⁷Inchen tru møøbe Espíritu Santo inrrai inchen Tiuswei yaumay ya, tru Jesús-unai møskalø tru maig maramigwan martrai Moisés pørigu maig chibig køben, nuimburab martrab Tiuswei yaumay srua amrrubene,

²⁸Simeónbe Jesús-unan nui kwalyu muta, Tiuswan tabig waminchib, trenchibig køn:

²⁹“Señor, Mayeelaim Pala Pasrabig, na ñi karuig megabigwanchi isumø pishindø tabig kwabashcha chib, ñi nan maig eshkaig købiibe yandø treeg nebui ashar cha.

³⁰Kaguende nai kaptøga kaigyugurri ñi wesraig kømigwan ashar cha.

³¹Truigwane maya misaamera ashen, ñi tamara pasrin køn cha.

³²Iibe tru maya misag judíos kømeelaimbe ñun kenamaramig tør køben, katø ñui misag israelitasmeraimbe maya nuguen tabig køn” cha.

³³Inchen Joséba, Jesúswei usrimba unaimburab tru Simeón maig taigwan mørabe, kan øyeebe maig kermab isub kwaara ashen,

³⁴Simeónbe mayanguen tab kuilø kønrrain chabe, Jesúswei usri Maríane trenchibig køn: —Au, i unøbe Israel misagwan truba nuwan møilane nørreelø kuigwan chigucha kømeelø kønrrai marøb, møilane nørreelø kønrrai marøb inchabig, treeg køn cha. Tiusweimburabigwan nø kenamaren, misaamera nun kashchab kui asamig, nøbe truig køn cha.

³⁵Truba nu møilaiwan køben, nømui manrrømerayu maig isubelø kuigwan kenamarig kønrrain cha. Inchen ñibe ñui manrrau isubigube kan espadatøga kelarrab kwani lataig isub pusrkwaig kørrømisramig kønrrun— chibig køn. Ana maig kuigwan waminchibig

³⁶Inchen truyu kan ishug, Tius maig karuigwan eshkabig, Fenuelwei nimbasr, Aserwei misagugurri arrubig, Ana taikkucha wabig køn. Truibe yandø truba køllig købig køn. Truba unø kasharawa, siete años keeba tsua,

³⁷yandø keg kwaben nøtiig kørrømisra, yandø ochenta y cuatro años tøgaig købig køn. Tiuswei yaugurri managucha tarømisrmíig købig køn, Tiuswan køriibala tabig waminchib, ayunab, katø Tiusba waminchib yem, kwaløm Tiusweyasig treeg marøb.

³⁸Inchen Anabe tru urastøwei arrua, Tiuswan ‘mayanguen ungwa, ungwa’ chibig køn. Incha nøbe tru unaimburab waminchib mendabig køn tru mayeelø Jerusalén misag Tiusweilø kønrrai kaigyugurri wesrailø kømigwan isub muniirabelane. Nazaretmay katø ambub

³⁹Incha tru maig maramigwan martrai Señor pasrigu maig karuilan kerrigu chab marabe, Galilea pirau Nazaretsrømay ambubelø køn, tru nømuim puebloyumay.

⁴⁰Inchen unøbe nurab ippe, murig chishig, purø kusrebig misrøb iben, Tiuswei tru ka yandø tab indiibe nuim pala pasrabig køn. Jesús-unø kusrebeløba waminchib Tiuswei yau

⁴¹Inchen nui møskaløbe Jerusalén pascua fiestayumay pilamørig ambubelø købig køn.

⁴²Incha Jesúsbe doce años tøgaig misren, fiestayumay ambubelø køn, trendø maig marøbelø køben, treeg martrab.

⁴³Inchen fiesta chab patsøben, nømbe yamay katø amrruben, Jesús-unøbe Jerusalén kørrømisrin køben, møskaløbe ashmuin købig køn.

⁴⁴Nømbe tru misag utu unøbe arritamab isua, mawa ambiisrø amba, nømui nømmisaamerai utuba, asiilai utuba lab menda,

⁴⁵kalawabe, Jerusalénmay katø llirabelø køn, trusrø lanrrab.

⁴⁶Incha pøn kwalømyube Tiuswei yau tru Moisés pørigwan kusrenanøbelai utu mørøb, nøgurri payib wabyu wetørrabelø køn.

⁴⁷Inchen mayeeløba mørøbeløbe truba truba kusrebig kui ashib, katø nø maig løtiilan mørøb inchabe, ke kwaara ashibelø køn.

⁴⁸Inchen møskalø ashabe, ke kwaara asha, Jesúswei usrimbe trenchibig køn: —¿Nai nusrkai, namun chindimbarre øyeeg margu? cha. Ñui møskaimba, nababe truba truba isuilø lab ker— cha.

⁴⁹Inchene Jesúsbe trenchibig køn: —¿Nane chinchabrre lague? cha. ¿Nabe nai Møskawei chi maramelan na marøb wamigwan ñimgan ashmeelø køtirru?— cha.

⁵⁰Inchen nømbe ni chi tainguen mørmeelø køn.

⁵¹Inchabe nui møskaløba Nazaretsrømay katø mendig ya, maig karuben treeg mørøb megabig køn. Inchen nui usrimbe kutøgue iilan nui manrrautø isua esegabig køn.

⁵²Inchen Jesúsbe trurrigu kusrebig misrøb, nurab ibig køn, Tius lata, misaamera lata mayanguen tab indinab.