Read Namrrik Lucas 20 Bible Online

Lucas 20 - Namrrik bible

Lucas 20

¹Kan kwaløm Jesús misaameran Tiuswei yau kusrenanøb, tabig srø wamwan eshkab pasrøbene, sacerdotesmeran karubeløba, tru Moisés pørigwan kusrenanøbeløba, misagwan karubelø kølli misaameraba kemallabe,

²nune trenchibelø køn: —Namun eshkarra cha: ¿Ñi mariilane mu karua pasriitøgarre margu? cha. ¿Ñi øyeeg maramigwane mu karua pashta?— cha.

³Inchene Jesúsbe løtappe, trenchibig køn: —Nagucha ñimun kan chigøsrøn payrrab cha. Løtørray pøs cha.

⁴¿Misagwan Juan piu umbu ulsrøb uniibe srømbalasrøngurrin kuig kø chindah, kabe møguelainukkurrin kuig kø chindah?— cha.

⁵Inchen nømbe nømasiyaitø trenchib payiyab mendabelø køn: “Nam: ‘Srømbalasrøngurrin kuig køn’ chibene, nøbe namune trenchinrrun cha: ‘¿Chindimba nune køremøgue?’ cha.

⁶Kabe: ‘Møguelainukkurrin kuig køn’ chibene, misaamerabe mayeeløba namune sruutøga petønrrun cha. Kaguen misaabe Juanwane Tius maig karuigwan eshkabig kui ke yandø tsabø asha tøgar køn” cha.

⁷Incha nømbe trencha løtabelø køn: —Maig kuindøbeh— cha.

⁸Inchen Jesúsbe trenchibig køn: —Trube, nagucha eshkamumønrrun cha, iilan na mu karuitøga marigwan.— Kwallibelø larrø kailan kemesra wamindig

⁹Incha Jesúsbe misaameran pølbasra waminchib mendappe ‘øyeeg lataitøwein køn’ chib kemesra iigwan waminchibig køn: —Kan møg uvas tra mara, trugurrimbe nui misrigwan pirishinrraptø pirøwan katøganelan kwallchai tranabe, yabsrømay truba yana yan cha.

¹⁰Incha yandø lurramig puben, nui kan karuindiig megabigwan tru kwallchab utabelan tru kanbalø lurrigwan nøm trannrai karua ørøbig køn. Inchen treeg øringucha, nømbe nun kurragucha, chiguchagaig ørøbelø køn cha.

¹¹Inchen puaibe katøgan karuindiig megabigwan øren, truigwangucha tsalø wama, kurragucha, chiguchagaig inrrai øran chibig køn.

¹²Inchen puaibe pønmay kønrrabyu katøgan øren, tru kwallibeløbe trunungucha kørriincha, truyugurri wambig weguchibelø køn cha.

¹³’Inchen yandø tru pirø puaibe trendan cha: “¿Chindamer? cha. Nai undaaraig nusrkawan ørtrab tan cha. Nune inchippa chinchimubgun” cha.

¹⁴Inchen tru kwallibelø nun ashabe, nømdø trenchibelø køn cha: “Pirøwan ketig utønrrabiibe iigwein køn cha. Pirøwan namui martrab nune kweechigun” tan cha.

¹⁵Inchabe uvas traugurri wegucha, nune kweechibelø køn cha. ’¿Trube tru uvas tra puaibe tru kwallibelane chi martrerah? cha.

¹⁶Arrua, tru kwallibelane kweecha, tru uvas trawane katøganelan tranrrun— chibig køn Jesúsbe. Inchene misaamera iigwan mørabe: —¡Managuen kan trengatikkucha puraimuimbe!— chibelø køn.

¹⁷Inchene Jesúsbe nømun ashabe trenchibig køn: —Trube, treeg købene, ¿Tiuswei wamwan pørigu øyah chibiibe mandø cha trendah? cha:“Tru ya marøbelø kaasig sruube katsiisrø pølbasra wayamig mas purø tab srukken misrin køn” chippe.

¹⁸Inchawei møikkøben tru srug pala peñippe, pitis misrtrun cha. Inchen tru srug muim pala køben peñippe, nune usrø tuindø martrun— chibig køn.

¹⁹Inchen tru uras tru Moisés pørigwan kusrenanøbeløba, sacerdotesmeran karubeløba tru ‘øyeeg lataitøwein køn’ cha waminchippe nømun kemesra wamindi møra, Jesúswan ¡katø! møi møi kemørtrab inchendø, misaameran kørig kui inchibelø køn. Tiuswein kønrrabigwane Tiuswan tranøppe Césarwein kønrrabigwane Césarwan tranøb

²⁰Inchabe kan møilan køsrøn larønrrai ørøbelø køn, sølgandø amøñibelø misrøb, Jesús chigøben wamindigu kebenøsrka trumay kubenadurwei tasku purørtrab, nui mu mandamgaig mariitøga nø asha martrai.

²¹Inchabe nømbe payibelø køn: —Kusrennøbig, ñibe søl waminchib, søl kusrenanøb indi nambe ashibelø ker cha. Ñibe misaameran mumera køtasha asha kusrenmø, Tiuswei maywan ñibe maig kusrenanamigwan cierton sølwan kusrenanøbig køn cha.

²²Trube, ¿tru Roma maya misagwan karub wabigwan nam an pagaramig merig køh, kabe merømuig køh, chinderah?— cha.

²³Inchen Jesúsbe nømune ka kaig isuatørre inchib pønrrai ashabe, trenchibig køn:

²⁴—Kan anwan eshkarra cha. ¿I anyu maløba, i munchi pøriibabe muin køh?— cha. Inchen nømbe trencha løtabelø køn: —Tru Césarwein køn— cha.

²⁵Inchen Jesúsbe trenchiptinchibig køn: —Césarwein købene, Césarwan tranay cha. Inchen Tiuswein købene, Tiuswan tranay— cha.

²⁶Inchen misagwei malau nø chi tailøyu chiyugucha kebenøsrkønrrab kaimabelø køn. Tru nø løtiilan nømguen kwaara asha, niløtø kørrømisrøbelø køn. Kwailø katøle øsiiranrrab kuigwan payib

²⁷Inchen møiløgøsrøn saduceosmera Jesúswan ashchab amrrubelø køn. Tru saduceosmerabe kwailøbe katøbe øsiiramønrrun chibelø kua, Jesúswane øyeeg chib payibelø køn:

²⁸—Kusrennøbig, Moisésbe namune øyeeg pøra kørrømarig køn cha: “Møigwei nuneg køben kwawa, srawan urekkaig kørrømarene, trube tru nuneebe piudaba kasharawa, nuneg kwabigweimburab ureg tøgagømig køn” chibig.

²⁹’Trube, siete nunelø købig køn cha. Indiibe srøsriibe kasharawa, chi urekkaig kwaben,

³⁰tru wendauikkucha tru piudaba kasharawa, katø chi urekkaitøwei kwaben,

³¹katø tru pøn kønrrabyuigwangucha treetøwei nebuben, yandø søteeløba tru ishuuba kasharawa, møikkucha urekkar kwabelø køn cha.

³²Inchen yandø srabebe tru ishukkucha kwan cha.

³³Pøs treeg købene, trube, tru kwabelø katø øsiirabene, ¿nøbe møigwei srain kønrrerah? cha, payibelø køn, tru sieteeløba nune srai mara tøgagúig købene.—

³⁴Inchen Jesúsbe trencha løtabig køn: —Møi yu piraube kasharab, katø kasharanøb inchibelø køn cha.

³⁵Trune tru kansrø kanmaytø kebamrrai tøgagúinabeløbe trunun nebub, katø kwabelai utugurri øsiiramigwan nebub incha, truiløbe kasharanrrab kømøwei, kasharanøb kønrrabelø kømøwein køn cha,

³⁶kaguende nømbe katøle kwanrrabelø kømøwa. Pøs nømbe ángelesmera latailø, katø Tiuswei ureemera køn cha, kwabelai utugurri øsiirab ureg kua.

³⁷Inchen tru tusr-unø naaraigu maig purayaigwan pøra pasriguma, tru kwabeløbe katø øsiiranrrab kuigwan Moisésken kenamarig køn, tru Señorwan øyah cha wamappe: “Tiusbe Abrahamwei Tius, Isaacwei Tius, Jacobwei Tius køn” cha.

³⁸Pøs Tiusbe kwailai Tius kømøtø, øsiguelai Tius køn cha. Inchawei mayeeløba nuimbe øsigueløtø køn— chibig køn.

³⁹Inchen møiløgøsrøn tru Moisés pørigwan kusrenanøbeløbe trenchibelø køn: —Kusrennøbig, ñibe sølwein tan— cha.

⁴⁰Trugurrimbe yandø mas payrrab inchimeelø køn. ¿Cristobe mui misagugurri arrubig kerah?

⁴¹Jesúsbe trencha payibig køn: —¿Misaabe chincha Cristone Davidwei misagugurri arrub nusrkain køn tamig kønrrab køh? cha.

⁴²Kaguende Davidbe nøtøweinguen Salmoswan pørigu trenchibig køn cha:“Señor Tiusbe tru nai Señorwane trendan cha:

⁴³‘Nai kusrmaygatø wamisr cha, ñui ashig kømui inchibelan ñi nebuna wamig na pønsramnegatig.’ ”

⁴⁴Cristone Davidbe: “Señor” cha, øyeeg wamubene, trube, ¿mandøgurri Cristobe Davidwei nusrkain kønrrab køh?— chibig køn. Moisés pørigwan kusrennøbelø nøm mailø kuilan Jesús waminchib

⁴⁵Maya misaamera mørøb pønrrøben, Jesúsbe nui kusrenanøb pera uniilan trenchibig køn:

⁴⁶—Tru Moisés pørigwan kusrenanøbelan ashiptø kuy cha. Kaguen nømbe kørrabelø kewa llirab amønamig chullelø, penab yanøb indiisrø maig købash kømø, truba tab wamønrrai indamigwan chullelø køn cha. Katø judíosmera tulundzuni yamerayube purø tab purramdønug purrag kui indamba, katø lincha tabig mabyugucha nørreelø purrainug purø tabigu purrag kui indamba inchibelø køn cha.

⁴⁷Katø piudasmeran nømui yameran kerrawabe, tabelø misrøb ke ka yandø truba yana Tiusba waminchibelø køn cha. Truiløbe møra melamig mas nuigwan utønrrun— chibig køn.