Read Namrrik Lucas 22 Bible Online

Lucas 22 - Namrrik bible

Lucas 22

¹Pirri Levaduragaig maig Fiesta, tru Pascua Fiesta taig, lutau køben,

²sacerdotesmeran karubeløba, tru Moisés pørigwan kusrenanøbeløbabe Jesúswan mandø kweetsamigwan labendø, misagwan køriimatabelø køn.

³Inchen Jesús tru doce kusrenanøb pera uniilai utuig, Judas, tru Iscariote cha wamigwan, Satanásbe kebiben,

⁴Judasbe webya, sacerdotesmeran karubelanba, tru Tiuswei yau ashib pønrrab suldaumeran karubelanba ashchab ya, Jesúswan mandø incha nømui tasku tranamigwan waminchene,

⁵nømbe truba kasraarawa, an trannrrab misrøbelø køn.

⁶Inchen nøbe treeg martrab misra, misag tre nu kaaben Jesúswan mandø incha tranamigwan yandø lab mendabig køn. Señorwei pascua mamig

⁷Yandø Pirri Levaduragaig main kwaløm puben, tru Pascua ubisha-unan kweecha tranamig købig køn.

⁸Inchen Jesúsbe Pedronba, Juanwanba trencha karua ørøbig køn: —Pascua Fiesta mamigwan manrrab tamartrab ambay— cha.

⁹Inchen nømbe: —¿Nambe chu tamaramø?— cha payen,

¹⁰Jesúsbe trenchibig køn: —Ñim ciudayu kebambene, kan møg pigøtsø mutaig ñimun katøben, truigwei wendautø amrrigay cha, nø kebyam yaugatig.

¹¹Incha tru ya puaigwane trenchinrrigay chibig køn: “Kusrennøbiibe ñun trendan cha: ¿Nai kusrenanøb pera uniiløba pascua mamigwan mab purram salabe chu køh?” cha.

¹²Inchen ya puaibe pala pisusrø kan nu sala chab tamarikken ñimun eshkaben, truyu tamartrigay— chibig køn.

¹³Inchen nømbe amba, Jesús maig taig treeg wetørrawa, tru Pascuan tamarøbelø køn. Señor nui doce pera uniiløba mab

¹⁴Incha yandø ura puben, Jesúsbe nui karua øriiløba mishatsigu wamisrabe,

¹⁵trenchibig køn: —¡Nan øyeeg kaig nebuig megamig pumøwatø, Pascua Fiesta mamigwan ñimba manrrab truba truba isuig køn! cha.

¹⁶Kaguende ñimun trendamønrrun chibig køn: Tius nø ashib karub wainug katøle ñimba manrrab wamisramnegatig nabe i mamigwane mamumønrrun— cha.

¹⁷Incha copan muta Tiuswan ‘mayanguen pay’ chabe, trenchibig køn: —Cha iigwan, larrabelø mutsay cha.

¹⁸Kaguende ñimun trendamønrrun cha: Møingurrimbunøbe uvas piwane mas muchimumønrrun cha, nai Møskai nø ashib karub waisrø katøyug ñimba mutsam kwalømgatig.—

¹⁹Incha pirriwan muta, Tiuswan ‘mayanguen pay’ cha, pirisha, nømun trenchib srørrøbig køn: —Iibe nai asr køn cha, ñimuyasig tranig. Iigwan øyeeg marøppe, nan isunrrab maray— chibig køn.

²⁰Inchen chab ma, katø treetøwei copan mutabe, trenchibig køn: —Iibe tru nai anindøga Tius tru misagweyasig srø acuerdon marig, tru copa køn cha, tru ñimuyasig na ani lusig.

²¹’Inchendø asay chibig køn. Nan ashig kømui inchibelan trannrrabigwei tasiibe i mishatsigutøwei nain tasiiba trubalatø trarra wan cha.

²²Tru Møg Misra Arrubiibe muwan inrrai pasrig, truwan iben, trune ¡tru nun ashig kømui inchibelan trannrrab møg waachaweimbe, kan maig kønrrer!— chibig køn.

²³Inchen nømasiyaitø: —¿Treeg martrabiibe mu kerah?— cha payiyab mendabelø køn. Møig mas nuig kerah cha payiyab

²⁴Inchabe nømbe nømui utu møig mas nuig kønrraptiig kerah cha, payib aleguiyab købelø køn.

²⁵Inchen Jesúsbe kusrub trencha løtabig køn: —Tru reymera judíos kømeeløbe nøm karub tøgagúilane maig købash inchib purran cha. Inchen tru nømun ashib karub purrabelane ‘misaamerayasig tabig marøb møguelø køn’ chib wamiilø køn cha.

²⁶Trune ñimbe øyamay kømøtø kømig køn chibig køn. Masken ñimui utu tru mas nuibe matsinø-unø lataitø misramig køn cha. Inchen tru chi maramigwan nø ashibiibe kan karuig marøb megabig lataitø misramig køn cha.

²⁷Pøs trube, øyeeg købene, ¿møig mas nuig kønrrab køh? cha. ¿Mishatsigu manrrab wamisrøbiiteh? Kabe ¿tru mishatsigu mamigwan pønsrøbiiteh? cha. ¿Pøs mishatsigu manrrab wamisrøbig, truig mas nuig kømuitarru? cha. Øyeeg kuingucha, nabe ñimui utube tru mishatsigu manrrai pønsrøb megabig lataig kur chibig køn.

²⁸’Ñim køn chu uragucha nan elachimø, chigøben murig pub arringucha treegu wendautø lincha melabeløbe.

²⁹Incha nai Møskai tru ashib karub waigwan nan tranøb lataitøwei, nabe ñimun tranamønrrun chibig køn,

³⁰tru na ashib karub waisrø nai mishatsigu mab, muchib, katø tru ashib karub purramigu purramisra, ñim tru doce nusrkalø Israelweinukkurri karrab misaameran ashib karub purramig kønrrain— cha. Pedro nan ‘ashmíig kur’ chinrrautan cha, Jesús eshkab

³¹Incha Señorbe katø trenchibig køn: —Au, Simón, Simón cha, Satanásbe ñimun miain køn cha, kan tirigu trulmeran latawei kønishib sruagutchab.

³²Inchendø nabe ñuimburappe ñui isubigwan nainuutø tøga pasraigwan elachib pasrømønrrai ñuyasig Møskawan miar chibig køn ‘purugurrunrrig’ chib. Ñi nan wendøbasra ya, naimay katøle arruabe, ñibe ñui nunelan chiyutøgucha kullaaramø, mur pønrrønrrai purugunrrig— cha, trenchibig køn.

³³Inchene Simónbe: —Señor, ñun kailan keeri yau keeren, nabe ñiba truyu pasrønrrab treetø attrab pasrømøtø, nagucha ñiba tøga kwanrrab attrab pasrar— cha, trencha løtabig køn.

³⁴Inchen Jesúsbe trenchibig køn: —Pedro, nabe ñune trendamønrrun cha: Møin kwalømdøwei kallu wamømøwatø, ñibe pønmayguen nan, ‘ashmíig kur’ chinrrautan— cha. Purø trømbøig kuim pasramig lutaurab

³⁵Incha Jesúsbe trencha payibig køn: —Na ñimun wasrkaig, katø an pusramig chigaig, alpargatiskaig ørenma, ¿ñimun chi palappuig køh?— cha. Inchen nømbe: —Chigucha chi palappumuig køn— cha løtabelø køn.

³⁶Inchen Jesúsbe trenchibig køn: —Møimbe treeg kømøtø, an pusrig tøgaibe, srua inrrø cha. Inchen wasr tøgaibe, ila inrrø cha. Inchen espadagaibe, trube, nui pala itøgueigwan yana, kan penø cha.

³⁷Kaguende nabe ñimun trendamønrrun cha: Tiuswei wamwan pørigu naimburab iig øyeeg chibig pasrabiibe treeg nebunrrain køn cha: “Larrø kailai utu treeg kui lataitøwei asha tøgagúig køn” taig. Kaguen naimburab chi nebunrrai pørig pasrabiibe kerriguh treeg nebunrrabig køn— cha.

³⁸Inchen nømbe: —Señor, yuguen pagatø espadamera køn— chiben, Jesúsbe: —Øiløtø tsabø køn— cha, løtabig køn. Jesús Getsemanísrø Tius Møskaimba waminchib

³⁹Incha Jesúsbe nø trendø treeg marøbig kuig køppe, Olivos Tunsrømay iben, nui kusrenanøb pera uniiløgucha mendig ambubelø køn.

⁴⁰Incha truyu puabe, trenchibig køn: —Tiusba waminchib purray cha, chiyugøben kaigyu kegørrab pønrrømønrrappe.—

⁴¹Incha Jesúsbe kan srug kutsimburab lataitø ya, Tius Møskaimba waminchab tømbønsrabe,

⁴²trenchibig køn: —Nai Møskai, i copan nan tarømaramdiig købene, tarømartra cha. Inchendø na maig isuig køben, treeg kønrrain kømøtø, ñi nan maig maramdiig køben, treegwan maramig kønrrain— cha.

⁴³Inchen srømbalasriig kan ángel Jesúswan mas kullaaramønrrai purugunrrab kenamisrøbig køn.

⁴⁴Inchen truba truba trømbøig køben, katøgucha ¡katø! miabig, miabig køn. Inchen nui pøsrimbiguen pirau kan anim pirrab lataig nørriig pirrabig køn.

⁴⁵Incha kurra, nui kusrenanøb pera uniilan ashchab yabe, isubiitø kamariilø, kib purrain kui wetørrawabe, Jesúsbe trenchibig køn:

⁴⁶—¿Chindimba kib køgue? cha. Kurra, Tiusba waminchib purray cha, chiyugøben kaigyu kegørrab pønrrømønrrappe.— Jesúswan kemøra srua ambub

⁴⁷Inchen Jesús waminchib pasramne, truba nu misag puben, Judas taig, tru doce kusrenanøb pera uniilai utuibe, truilan pera arrua, Jesúswan muchanrrab kemallen,

⁴⁸Jesúsbe trenchibig køn: —Judas, ¿Møg Misra Arrubigwan nan ashig kømui inchibelan kan muchawa trannrreendirru?— cha.

⁴⁹Inchen Jesúsba pønrrabeløbe tru treeg purainrrabigwan ashabe, nune payibelø køn: —Señor, ¿nam espadatøga kørriincha petamøh?— cha.

⁵⁰Inchen nømui utu møikkøsrøn tru maya sacerdotesmeran nø karub sacerdotei karuindiig megabigwan kusrmay kaluwan kelarrab lutiichiptinchibig køn.

⁵¹Inchen Jesúsbe trenchibig køn: —Au, øyeebe marmøtay— cha. Incha kaluwan katørawa, treetøwei tamarøbig køn.

⁵²Incha sacerdotesmeran karubelanba, misagwan karubelø kølli misaameranba, Tiuswei yau ashib pønrrabelø policíameranba nun tru sruamrrab amrrubelan trenchibig køn: —Nabe kan niliig kui lata ñimbe espadamera køben, tsiimera køben sruar werrunrrappe, ¿chindimba treeg werrugue? cha.

⁵³Nabe ñimba kwalømmørig Tiuswei yau waben, kemørmuig køn cha. Inchendø yandø møimbe tru kaig maringarubig tru løstøyuig nø merrarrawa nø karub pasramisren, ñimuimburab ñim maramig ura puin køn— cha. Pedro Jesúswan ‘ashmíig kur’ cha isab

⁵⁴Incha Jesúswan kemøra, tru maya sacerdotesmeran nø karub sacerdotei yamay srua amben, Pedrobe yaptø, yaptø mendig ibig køn.

⁵⁵Incha tru yawambigu nag urra, tru pøtøgatan purramisren, Pedrogucha nømui utu wamisren,

⁵⁶kan srusrø mendig megabiibe naabilabig tøryu Pedron wai ashabe, ashib pasraptø, ashib pasraptø trenchibig køn: —I møkkucha Jesúsba uñibiitøwein køn— cha.

⁵⁷Inchen Pedrobe trenchib isabig køn: —¡Paare ishuube, nagan ashibig kuitarru!— cha.

⁵⁸Inchen yanazhigutø Pedron katøgan ashabe, trenchibig køn: —Ñigucha truilai utuigwein kørreh— cha. Inchene Pedrobe: —¡Paare møøbe! nagan truig kuitarru— chibig køn.

⁵⁹Katø kan ura wendau køsrøn katøgan trenchibig trenchig køn: —Isa kømø, i møkkucha Jesúsba uñibigwein kørreh cha. Kaguende nøbe galileasriitøwein køn— cha.

⁶⁰Inchen Pedrobe trenchibig køn: —¡Paare møøbe! ñibe ni chi waminchib pasrainguen mørmur— cha. Inchen tru urastø Pedro waminchib pasramnetø, kan kallu wamaptinchibig køn.

⁶¹Inchen Señorbe keesha, Pedron ashene, Pedrobe Señor øyah taig kømørramab isuptinchibig køn: “Møi kallu wamømøwatø nan pønmayguen, ‘ashmíig kur’ chib isønrrautan” taigwan.

⁶²Inchabe Pedrobe webya, truba truba isuig kishibig køn. Jesús tru Setenteelø maig maramigwan asha marøbelai merrab

⁶³Inchen tru møguelø Jesúswan ashib srua købeløbe nun indza ashib, kurrøb incha,

⁶⁴kabwan lusra, maløbøtø pashabe, trenchibelø køn: —¿Mu kurragutsin kui? Namun kelarrab eshkau pøs— cha.

⁶⁵Incha trømbøig tsalø wamab, katø chineh chibelø køn.

⁶⁶Yandø tør-rraben tru misagwan karubelø kølli misaameraba, sacerdotesmeran karubeløba, tru Moisés pørigwan kusrenanøbeløba trubalatømisra, nømui tru Setenteelø tru maig maramigwan asha marøbelai merrab Jesúswan srua amben,

⁶⁷nømbe trenchibelø køn: —¿Ñi Cristo køtirru? cha. Namun eshkarra— cha. Inchen nøbe trencha løtabig køn: —Na ñimun: “Truig kur” cha, trenchibene, ñimbe køremøwei,

⁶⁸katø na chigøben payene, ñimbe løtømøwei inchautan cha.

⁶⁹Inchen møingurrimbunøbe na, Møg Misra Arrubiibe tru maramburab marøb Tiuswei kusrmaygatø wamisrtrun— chibig køn.

⁷⁰Inchene mayeeløba trencha payibelø køn: —¿Trube, ñibe Tiuswei Nusrkain køtirru?— cha. Inchene Jesúsbe trencha løtabig køn: —Ñimdøweinguen nabe truigwein køn cha chab trendan— cha.

⁷¹Inchene nømbe trenchibelø køn: —¿Trube, nuimburab waminchabelø mas chiwein kuin palønrrab kø? cha. Nui triitøgatøwei wamindigwan namashib mører— cha.