Read Namrrik Lucas 23 Bible Online

Lucas 23 - Namrrik bible

Lucas 23

¹Incha mayeeløba truyu tulundzuna pasrabiibe kurra, Pilatoimay Jesúswan srua amba,

²truyu ‘øyeeg køn, øyeeg marøbig køn’ chib mendabelø køn: —I møøbe namui misagwei isuigwan kaig isubelø kønrrai ke peemaytø chab yunømarøb, Roma maya misagwan karubig Césarwan nam trendø an pagarab kuigwan pagaramumig køndamba, katø nøbe tru Cristo, kan rey kurtamba indi aser— cha.

³Inchen Pilatobe Jesúswane trenchibig køn: —¿Ñigan judíosmerai rey køtirru?— cha. Inchen Jesúsbe trencha løtabig køn: —Ñitøweinguen chab trendan— cha.

⁴Inchen Pilatobe sacerdotesmeran karubelanba, misaameranba trenchibig køn: —I møwane nabe chigucha chi kaig mariibe wetørramur— cha.

⁵Inchen nømbe masken, masken inchib, trenchibelø køn: —Judea pirau kerriguba, maya misaameran nui kusrenaniiløtøga ke chindi asamgaig maran cha. Galilea pirausrø pølbasra, møimbe yusrø treeg inchib arrun— cha. Jesús Herodeswei merrab

⁶Inchen Pilatobe trunun mørabe, trencha payibig køn: —¿Trube, nøbe galileasriig kø chindah?— cha.

⁷Inchen: —Trusriigwein køn— chiben, Pilatobe Jesúswane tru Galileasrø Herodes karub waim pirauig kuin kui ashabe, nune Herodesweimay purøørøbig køn, kaguen Herodeskucha tru kwalømmerawane Jerusalénsrøwei waben.

⁸Inchen Herodesbe Jesúswan ashabe, truba kasraarabig køn, kaguende mas merrabsrøwei ashimmørø inchibig købig kua. Pøs Jesúsweimburab chigøben wamindi mørøbig kua, nøgurri Tius maramburab marigwan mari ashig kui inchibig køn.

⁹Incha chigøben truba truba payen, Jesúsbe chigucha kusrua løtømuben,

¹⁰sacerdotesmeran karubeløba, tru Moisés pørigwan kusrenanøbeløbabe ‘øyeeg køn’ chib; ‘øyeeg marøbig køn’ chib, truiløbe truba truba trenchib truyu purrabelø køn.

¹¹Inchen Herodesbe nui suldaumeraba Jesúswan truba kaig inchib, indzatø ashib srua kua, truba tabzheelø kenana, Herodesbe Pilatoimay katøle ørøbig køn.

¹²Tru kwalømbe Pilatoba, Herodesba tab linchibelø misrøbelø køn, merrappe tsaleelø købig kuig. Jesúswan yandø kwanrrai pasrøb

¹³Inchen Pilatobe sacerdotesmeran karubelan køben, tru pirau ashib karub purrabelan køben misaameran køben tulundzunønrrai wama,

¹⁴trenchibig køn: —Ñimbe nan i møwan misaameran ke chine martrab isunrrai marøb unan chib, naimay srua amrrutan cha. Inchen nabe ñimui merrab maig kuitashchab ashchab paya ashen, nuinuube chigucha chi kalø mariibe wetørramur cha, tru ñim ‘øyeeg, øyeeg kalø marøptiig køn’ chib pønrraigwane.

¹⁵Katø Herodeskucha chi maramgaig kui asha, katøle nøbe namuimaytøwei ørin køn cha. Ñimguen ashke cha, ke kwanrraingatig maramdiibe chigucha chi kaig mariibe kaagøn cha.

¹⁶Treekkurri nun ichaguchabe, elatchab— chibig køn.

¹⁷Fiesta kwalømmerawane Pilatobe kan merrarrawa keerig pasrabigwan inrrai elatsamig nebubig køn.

¹⁸Inchen mayeeløba trenchib trashib mendabelø køn: —¡Øigwane patsøgay! cha. ¡Barrabáswan inrrai elachi!— chib.

¹⁹Pøs, tru Barrabásbe tru kailan keerinug pasrappe, tru Jerusalén ciudayu misaameran pera kaig marøb kurrikkurrimba, katø kweetsikkurrimba merrarrawa keerig pasrabig købig køn.

²⁰Incha Pilatobe Jesúswan elatchab isua, katøyug nømun waminchen,

²¹nømbe mas mur trashibelø køn: —¡Kurusyu mesrø! ¡Kurusyu mesrø!— chib.

²²Inchen pønmayyu Pilatobe katø trenchibig køn: —¿Chindimba øyeeg martrainchigue cha? ¿I møøbe chi kalø mara pasra? cha. Kwamnegatig maramdiibe nuinuube chigucha chi kaig mariibe nabe wetørramur cha. Ichaguchabe, inrrai lelatchab— chibig køn.

²³Inchen nømbe: —¡Kurusyu mesrø, mesrø!— chib, mur trashib miab køptø, nøm maig marøg kui indigwan treeg martrab uta pønrramisrøbelø køn.

²⁴Inchen Pilatobe tru nøm miaigwane treeg kønrrai kørrømarøbig køn.

²⁵Incha tru misaameran pera kaig marøb kurrikkurrimba, katø kweetsikkurrimba tru kailan keeri yau pasrab møwan nøm elatchai miaigwan, trunun inrrai elacha, Jesúswane nømun maig marøg køben martrai tranøbig køn. Jesúswan kurusyu mesramsrømay srua ambub

²⁶Yandø Jesúswan kurusyu mesrønrrab srua amba, kan Cirenesrø møg, Simón taig, nøørøsrøngurri arruben, nun kemørabe, kuruswan mutøsra, Jesúswei wendautø merranøbelø køn.

²⁷Inchen misaamera truba nu mendig amben, truba yam ishumburmera nun isua wamamøra kishib, isuilø trashib amrruben,

²⁸Jesúsbe nømun ashabe, trenchibig køn: —Jerusalén ishumburmera, nan isua kishmøtø, ñimuyasiiba, ñimui uregweyasiiba isua kisay cha.

²⁹Kaguende kwalømmera attrun cha, øyah tamig: “Ureg tøgagønrrab kaimabelø, mana patsø kwanrriig kømeelø købelø, mana urekkar kua mutsøsrøb nørrøranmeelaimbe mayanguen tab kuilø køn” tailø kømig.

³⁰Katø misaamerabe nørrø tunmeran: “Namuim pala itøgørrørray” chib, shush tunmerane: “Namun itøgasrørray” chib mendønrrun cha.

³¹Kaguen ¿tsøg tusrwanguen øyeeg marøbeløbe, mas mulwane chitø martrerah?— chibig køn.

³²Katø pagatø kaig marøbelangucha Jesúsba kegøtø kwetchab srua ambubelø køn. Jesúswan kurusyu mesrøb

³³Incha kanbalø Calavera tainug puabe, truyu Jesúswane kurusyu mesrøbelø køn, tru pagatø nileelangucha, kanun kusrmay, kanun atsimaygatø.

³⁴Inchen Jesúsbe trenchibig køn: —Nai Møskai, nømun ulø paymø, pesannanrrig cha. Kaguende nømbe chi marermabguen isumøn— cha. Inchen suldaumerabe Jesús kewagúilan suerte kucha, pirishibelø køn.

³⁵Inchen misaamera truyu ashib køben, tru ashib karubelø købenguen Jesúswan indzatø ashib trenchibelø køn: —Kanelanma kaigyugurri wesrabiibe nøasiitøwei pinaarrubash cha, nø tru Cristo, Tius Lawa Wesruig kuabe.—

³⁶Inchen suldaumeragucha indza ashib, køchiibiwan mutchai yuuløb kemallabe,

³⁷trenchibelø køn: —¡Ñi tru judíosmerai rey kuabe, kwamønrrab ñitøwei chigøben mar!— chib.

³⁸Inchen Jesús megaim palagucha kan pørig mesraig megabig køn, griegomay køben, latínmay køben, hebreomay købengue: IIBE JUDIOSMERAI TRU REY KØN chibig. Jesúsba, tru pailø kailøba

³⁹Inchen truyu melsraig melabeløgucha kane trenchib tsalø wamabig køn: —¿Ñibe tru Cristo kømøtirru? cha. ¡Kwamønrrab ñitøwei chigøben mara, namungucha treetøwei martra!— cha.

⁴⁰Inchen kane tru katøganun namig trenchibig køn: —Ñigucha treegutøwei mesraig megabendø, ¿ñungan Tiuswan kørig kømuitarru? cha.

⁴¹Kaguende nambe øyeeg marig melappe melsrambuawei melsrai meler cha. Kaguende nambe kaig marimburø øyeeg melambuawei møra meløben, trune i møøbe chigucha chi kaig marig kømøn— chib.

⁴²Inchabe Jesúswan trenchibig køn: —Jesús, ñi ashib karub wamigwan ñi ashib karub pølbasrabe, nan isurrunrrig— cha.

⁴³Inchen Jesúsbe trencha løtabig køn: —Nabe ñun cierton trendamønrrun cha: Møindøweinguen naba purø tabzhiisrø wanrrabguen— cha. Jesús kwaig

⁴⁴Inchen yandø kwaløm tøbøtag køsrøn køben, tre uraskurri maaben las treskatig pirau ørøba løstiig kørrømisren,

⁴⁵pørrbe løtsøraben, Tiuswei yau tru purø tab llensuzhig kelarrab søtø mesraig megabiibe tøbøtakkørrab kølsrøbig køn.

⁴⁶Inchen Jesúsbe mur trashib trenchibig køn: —Nai Møskai, nai espíritun ñui tasku tranar— chib. Trenchabe yandø isrømuptinchibig køn.

⁴⁷Inchen tru Roma suldau cienelan nø karubiibe øyeeg purayaigwan ashabe, Tiuswan trenchib truba tabig waminchibig køn: —I møøbe, isa kømø, sølgandø tabig uñibig kuin køn— chib.

⁴⁸Inchen maya misaamera øyeeg purayailan truyu ashib pønrrabeløbe, truba isub nømui pechondø kurramørøb truyugurri ambubelø køn.

⁴⁹Inchen mayeelø Jesúswei asiiløba, ishumburmera Galileasrøngurri nui mendig amrrubeløbabe yabsrøngurrindø ashib pønrrabelø køn truyu treeg puraiben. Jesúswan sørig

⁵⁰Kan møg José taig Judea pirau Arimatea pueblosriig købig køn, truibe tru Setenteelø maig maramigwan asha marøbelai utuig truba tabig, katø sølgandø uñibig.

⁵¹Katø tru Josébe Tius nø ashib karub wainuguigwan muniirabigwein kuabe, tru Setenteelø maig maramigwan asha marøbelø ‘øyeelø martrab’ chib kørrømara pønsraigwanba, nøm chi mariilanbabe chi tab kømui asig køn.

⁵²Incha nøbe Pilaton ashchab ya, Jesúswei asrwan miawa,

⁵³kurusyugurri pinøsrawabe, kan lino llensutøga kirra, peñayu søramig trab lalig munguen søriimíig pasrabigu sørabig køn.

⁵⁴Katø judíosmerai isram kwaløm tru sábadoweyasig tamaram kwaløm maaben købene, yandø tru sábado kwaløm pumibe ke pølbasramitø palabig køn.

⁵⁵Inchen ishumburmera Jesúswan Galileasrøngurri mendig amrrubeløbe nømgucha mendig amba, sørigwan ashib, Jesúswei asrwan mandø wayigwan ashib inchibelø køn.

⁵⁶Incha nømbe katøle ambabe, may irrabzheeløba, srølameløba tamarabe, tru maig maramigwan martrai Moisés maig karuig køben, tru sábado kwalømbe israbelø køn.