Read Namrrik Lucas 24 Bible Online

Lucas 24 - Namrrik bible

Lucas 24

¹Srø trune pølbasrøb kwaløm tru ishumburmerabe ullarbatø løtsøzhig søriinuumay amrrubelø køn, nømui may irrabzheelø nøm tamariilan srua. Inchen nømba katøgan ishumburmeragucha amrrubelø køn.

²Incha nøm truyu pua, ashene, tru sørinug kasraig sruube yandø truyu kømø, malsrain tsuptinchen,

³nømbe kebambabe, Señor Jesúswei asrwane kalaptinchibelø køn.

⁴Inchen, treeg køben, kwaariilø chinchabguen kaima pønrrøbene, møimbe pailø møguelø, tør pilabelø kewar, nømuim pulu pønrraptinchen,

⁵nømbe kørig køptø malømeran pirausrøngatig kebachen, tru møgueløbe trenchibelø køn: —¿Ñimbe øsiguigwane kwailai utube chindimba lague? cha.

⁶Yube mu kaagøn cha. Katø øsiiraig køn cha. Nø Galileasrø uñib urassrøwei ñimun maig wamindiilan isuy chibelø køn,

⁷tru nø øyeeg taigwan: “Na, Møg Misra Arrubigwane kaig marøbelai tasku tranig kømig nebuben, kurusyu mesrøben, pøn kwalømyube katø øsiiranrrun” taigwan.—

⁸Inchen ishumburmerabe Jesús chi wamindiilan isua,

⁹sørinukkurri katøle amrrua, tru onceelanba, katø mayeelanba maig purayaigwan kerrigu eshkabelø køn.

¹⁰Inchen tru chi purayaigwan tru Jesús nøashib karua øriilan eshkab ishumburmerabe iilø købelø køn, María Magdalenaba, Joanaba, Jacoboi usri Maríaba, katøgan ishumburmeraba.

¹¹Inchen nømune tru ishumburmera wamindiibe ke ka indzøkken kønrraptiig mørøraben, nømbe køremeelø køn.

¹²Inchendøgucha Pedrobe søriisrømay ashchab luløb ya, sørinug trarraashene, tru kirra sørig llensumeratø waraptinchen, treeg purayaigwan ashabe, ‘kan øyeebe maig kermab’ truba kwaarig, yamay ibig køn. Jesús Emaússrømay ambi mayu arrub

¹³Inchen tru kwalømdøwei pailø Jesúswan lincha amøñibelø købeløbe Emaús taig pueblosrømay ambubelø køn, Jerusaléngurri once kilómetrosburab ambiisrø,

¹⁴tru purayailan nømdø kerriguh waminchib.

¹⁵Inchen nøm waminchib payiyab ambub pønrramnetø, Jesúsbe nøashib kemalla, nømba ib mendøben,

¹⁶nømbe nømui kabmerabe kasrailø latailø kua, nune mu kuinguen nebua ashmeelø køn.

¹⁷Inchene Jesúsbe trencha payibig køn: —¿Ambub pønrrappe, ñimbe chiwan waminchibrre amgue?— cha. Inchen nømbe pønrramisrøppe, isubiitø ke maløguen mindiilø købig køn.

¹⁸Inchen møikkøsrøn, Cleofas taibe, nune trenchibig køn: —Møin kwalømmerawan Jerusalén chi purayaigwan mayeeløba wammøra køben, ¿ke ñitøgan wammørmíig truyu arruatiig pua tsutirru?— cha.

¹⁹Inchen Jesúsbe: —¿Chi purayah?— cha payen, nømbe trenchibelø køn: —Nazaretsrø Jesúsweimburab waminder cha. Truibe Tius maig karuigwan kan eshkabig, nui mariiløyu, nui wamindiiløyu maramburab marøbig købig køn cha, Tiuswei merrab lata, katø maya misagwei merrab lata.

²⁰Inchen truigwane sacerdotesmeran karubeløba, namun ashib karub purrabeløba kurusyu mesra, kweetsig kønrrai tranan cha.

²¹Nam isuppe, Israel maya misagwan kaigyugurri wesranrrabiibe nøwein kønrraitamab isua muniiraig købig køn cha. Møimbe yandø kweetsig pøn kwalømguen purayan cha.

²²Inchagucha namui utu ishumburmerabe namune kwaarøsrøtan cha, tru ullarbatø søriisrø ashchab ambubeløbe.

²³Incha nui asrwan wetørramuig kuig køppe, namune trenchib amrrubelø køn cha, nømune: “Angelesmera kenamisra: ‘Jesúsbe øsig unan’ chitan” chib.

²⁴Inchen møiløgøsrøn namui lincha amøñibelø søriinuumay amba, ishumburmera maig eshkaig treeg wetørrabwei inchendø, Jesúswane ashmuin køn— chibelø køn.

²⁵Inchene Jesúsbe trenchibig køn: —¡Ñim kui, chugúinguen mørmeelø! cha. ¡Tius maig karuigwan eshkabelø chi wamindiilan kørenrraptøgucha ke yaandø, yaandø amøñibelø køn! cha.

²⁶¿Nui tørguegwalmabigu nø wamnug kebimøwatø, Cristogan øyeeløyumerrig trømbøig marinab purayamig palømuig kuitarru?— cha.

²⁷Incha nøbe tru Moisés pøriiløyugurri pølbasra Tius maig karuigwan eshkabelø pøriiløyu chishtø eshkab pureb ya, Tiuswei wamyu nuimburab waminchibig pørig pønrrabelan kerriguba øyeeg køn cha nømun eshkabig køn.

²⁸Incha tru Emaús pueblosrø pub ambabe, Jesúsbe nui maywan ke merrabmisra, ib inrrab lataig inchen,

²⁹nømbe ke kørrømisri ashchab inchibelø køn. Inchabe trenchibelø køn: —Namba kørrømisr cha. Kaguen yandø maaben køben, yandø pilliranrraindan— cha. Inchen Jesúsbe nømba kørrømisrtrab kebya,

³⁰nømba mishatsigu wawabe, pirriwan muta, Tius Møskawan ‘mayanguen pay’ cha, pirishabe, nømun srørrøbig køn.

³¹Inchen nømbe Jesús kui nebua ashiptindinaben, Jesúsbe waitø kenamuptinchibig køn.

³²Inchen nømbe kangurrin kangurri trenchibelø køn: —Au yamba, nø namun maysrø Tiuswei wam pørig pønrrabelan øyeeg køn chib eshkab arrubene, namune namui manrraube ke nøs, nøs indig kømøh— cha.

³³Inchen nømbe tru urastø Jerusalénmay katø amba, trusrømbe tru once Jesús kusrenanøb pera uniiløba, truyu nømba lincha purrabeløba tulaamba purrabyuh pubelø køn. Inchen truyu purrabeløbe trenchibelø køn:

³⁴—Isa kømø, Señorbe katø øsiirain køn cha. Incha Simónwan kenamisrin køn— cha.

³⁵Inchen tru pailø pubeløbe maysrø maig purayaigwan kerrigu eshkabelø køn, katø Jesús pirriwan pirishiben, yandø nø kui nebua ashiptindigwanba. Jesús nui kusrenanøb pera uniilan kenamisrøb

³⁶Inchen nøm tru waminchib purramnetø, Jesúsbe nømuin tøbøtag pasramisrøb: —Ñimun chi isumgaig, tab køn— chibig køn.

³⁷Inchen nømbe kwariilø truba kørig kuilø kan møsigwan asermab isubelø køn.

³⁸Inchen Jesúsbe trenchibig køn: —¿Chindimbarre kørig kui inchigue? cha. ¿Ñimui manrraube chindimbarre na kømuitamab isugue? cha.

³⁹Nai tasiimeranba, srøbmeranba asay cha. Peg kømø, natøwein kur cha. Nan katørab ashib inday chibig køn. Kan møsiibe yaungawei, ni tsutsikkawayig køn cha, ñim nan asi lataig kømø.—

⁴⁰Incha iigwan chab trenchabe, tasiimeran srøbmeran eshkab kenamaren,

⁴¹nømbe kasrag købiibah kan øyeebe maikkermab kwaarøbiibatø, katøgucha køremø srø pønrrøben, Jesúsbe trenchibig køn: —¿Ñimbe yu chigøben mamig tøgagømøgueh?— cha.

⁴²Inchen nømbe nun peskau piti tsirigwan srørren,

⁴³nøbe uta, nømui malau mabig køn.

⁴⁴Inchabe trenchibig køn: —Na ñimba uñippatøwei nabe ñimun iilan wamindig køn cha, tru maig maramigwan martrai Moisés pøriiløyu lata, Tius maig karuigwan eshkabelø pøriiløyu lata, Salmosyu lata naimburab waminchibig pønrrabiibe truyu maig taig kerriguh treeg nebunrrabig køn— chib.

⁴⁵Incha nømune Tiuswei wamwan pørigwan tørgandø øyeeg kuitamab isunrrai nømui isubigwan kura,

⁴⁶nømune trenchibig køn: —Øyah chibig pørig pasran cha, Cristobe trømbøig marinab megamig nebuben, pøn kwalømyube kwailai utugurri katø øsiiraben,

⁴⁷mas kaig marmønrrab isua møramigwanba, nømui kaig mariilan ulø paymø pesannailø kømigwanba nui munchiyu eshkab kusrenanamig kønrrai Jerusalénsrøngurri pølbasra, chu pirausreelandøgucha kerriguba.

⁴⁸Inchen møi øyeeg purayaigwan ashibeløbe ñim køn chibig køn.

⁴⁹Au, nai Møskai trannrrab misra kørrømisrigwane nabe øramønrrun cha, ñimuim pala. Inchendø ñimbe yu Jerusalén ciudayutø ka kørrømisray cha, maramburab marøbig srømbalasrøngurri arrua, ñimun pinøbulamnegatig.— Jesús srømbalasrømay nebib

⁵⁰Incha Jesúsbe ciudayugurri wambig Betaniasrøngatig nui kusrenanøb pera uniilan pera ya, tasiimeran kusruabe, nømuimburab ‘mayanguen tabig kønrrain’ chibig køn.

⁵¹Incha trenchib pasraimaytø nømuim pulugurri tarømisren, nune srømbalasrømay srua yaig køn.

⁵²Inchen nømbe Señorweimburab truba tabig wamincha, Jerusalénmay katø truba truba kasrag amba,

⁵³nømbe chu uragucha Tiuswei yau Tiuswan tabzhig waminchib købelø køn.