Read Namrrik Lucas 6 Bible Online

Lucas 6 - Namrrik bible

Lucas 6

¹Kan isrin kwaløm Jesús tirigu ellmarig utuwan pureb ibene, nui kusrenanøb pera uniiløbe tirigu turmeran lurrøb ambabe, tirigu turwan tasiitøga katsøsra, mabene,

²mø fariseosmera køsrøn nømune trenchibelø køn: —Ya isrin kwaløm chigøben marmønrrai merigwan ¿ñimbe chindimba øyeeg margue?— cha.

³Inchene Jesús trencha løtabig køn: —¿Ñimgan lemeelø køtirru cha, tru mana køsrøn Davidwan parøgwab, nui linchibelan parøgwab inchen, nø mandø indigwan?

⁴Nøbe Tiuswei carpa ya tabzhigu kebya, Tiusweyasiitø tarømarig pirrimera, tru sacerdotesmeratø maim pirrimeran mendaibe mu mamønrrai meriilan nø mab, katø nøba purrab misagwangucha srørrøb indigwan.—

⁵Incha katø trenchibig køn: —Møg Misra Arrubiibe tru isrin kwaløm nan nø karunrrain kømøtø, maramdiigwane marøb, maramgaigwane marmub, nabe na asha karubig kur— cha. Kan møg tasig mul-laig

⁶Indiibe katøgan kwaløm isrin kwalømdøwei Jesúsbe judíosmera tulundzuni yau kebya, kusrenanøb pasrøbene, truyube kan møg nui kusrmay tasig mul-laig tøgaig waben,

⁷tru Moisés pørigwan kusrenanøbeløba, fariseosmerababe Jesúswan larab købelø køn, isrin kwaløm tamarøbig køtashchab, chigøben chi køptø.

⁸Inchen nøbe chi isub pønrrailan asha, tru tasig mul-laig tøga møwane: —Kurra, uyu tøbøtag pasramisr— cha trenchibig køn. Inchen tru møøbe nømuin tøbøtag kurra pasramisrøbig køn.

⁹Inchen Jesúsbe katøganelan trenchibig køn: —Na ñimun payrrab inchar cha: ¿Maig maramigwan martrai Moisés pøriibe isrin kwalømbe chiwan martrain taig køh cha, tabiiteh, kabe kaiteh cha; kwamønrrai indamig køh, kabe kweetsamig kø, chindah?— cha.

¹⁰Incha Jesúsbe mayeelø nuim pøtøgatan pønrrabelan ashabe, tru møwan trenchibig køn: —Kwalwan larrøbichi— cha. Inchen møøbe treeg inchen, nui kwalbe tabig kørrømisrøptinchibig køn.

¹¹Inchen treekkurri kaneløbe truba nama, kangurrin kangurri Jesúswan chi kaig maramdiig køtashchab payib mendabelø køn. Jesús nøashib karua øramelø doce lawa wesrub

¹²Tru kwalømmerawan Jesús kan tun palasrø Tius Møskaimba waminchab ya, kwalma ørøba treeg marøb wawa,

¹³tør-rrabene, nui kusrenanøb pera uniilan wama, truilai utu doce lawa, wesrawa, truilane nøashib karua øriilø køn cha, wamabig køn.

¹⁴Truiløbe iilø køn: Simón, nundøwei katø Pedro cha munchi pasrig køben, Simónwei nuneg Andrés køben, Santiago køben, Juan køben, Felipe køben, Bartolomé køben,

¹⁵Mateo køben, Tomás køben, Alfeowei nusrkai Santiago køben, Simón Zelote cha wamig køben,

¹⁶Judas Santiagoi nusrkain køben, Judas Iscariote, tru wendø Jesúswan ashig kømui inchibelaingatø pasramisra, trannrrabig købengue. Misag truba nuwan Jesús kusrenanøb

¹⁷Incha Jesús tun palasrøngurri nømba kørraarrua, kan chagu pasramisrøbig køn. Inchen truyu nui mendig amøñibeløbe truba nu tulundzuna, pasrabig køn, Judea pirauelø kerrigu, jerusalénsreelø køben, Tiroba, Sidónba tru mar pulusreelø køben,

¹⁸truiløbe Jesúswan mørtrab amrruin købig køn, nømui kwanrrømeran tamartraimba. Inchen tru kwanrreelø trømbøig maringarub kwaimandziimera larrø trømbøig kuig melønrrai marinabeløbe tamariilø køben,

¹⁹maya misaabe nun katøranrrab inchibelø køn, kaguende Jesúswei maramburab marøbig nuinukkurri webarrua, mayeelanba tamaren. Kasrag købiiba, chigucha tab kømíiba

²⁰Incha Jesús nui kusrenanøb pera uniilan ashabe trenchibig køn:—Mayanguen tab kuilø køn cha, ñim waachamerabe. Kaguende Tius nø ashib karub waibe ñimuiwein køn cha.

²¹Mayanguen tab kuilø køn cha, ñim møi ya parøgwailøbe. Kaguende maig palai melaigwan Tiusbe nømun unchaguen traniilø kønrrun cha.Mayanguen tab kuilø køn cha, ñim møi ya kishibeløbe. Kaguende wendøbe indzønrrabguen cha.

²²Mayanguen tab kuilø køn cha, ñimun misaamera tsalø ashib, ñimune nøørø kønrrai tarømarøb, ñimun tsalø waminab, ñimui munchiwan ke kaigwan lataig indinab,tru na, Møg Misra Arrubikkurrindø ñimun treeg marene.

²³’Treeg pureb kwalømbe ñimbe truba truba tab kui mørøb, truba kasraarab pørtray chibig køn. Kaguende truburø ñimbe srømbalasrømbe truba nuig ketig utamig tøgagønrrun cha. Kaguende merrabsrø nømui kølli misaamerama Tius maig karuigwan eshkabelan øyeegwei kaig marøbelø kuig køn cha.

²⁴¡Ay, ñim waacha, puarmeraimbe! Kaguende yandø tsabøtø utarguen køn cha, kasrag købigwan.

²⁵¡Ay, ñim waacha, møi ya chi palømø tøgarbe! Parøgwai mørtrun cha.¡Ay, ñim waacha, møi ya indzabeløbe! Ñimbe wamamøra isub kishchun cha.

²⁶¡Ay, ñim waacha, ñimun mayeelø tabig wamindinabelaimbe! Kaguende ñimui merrabsrø kølli misaamerama treetøwei tabig waminchibelø købig køn cha, tru ‘Tius maig karuigwan eshkabelø ker’ chib isabelan. Ñimun ashig kømui inchibelan tsalø ashmumig

²⁷’Inchendø ñim nan mørøbelane nabe trendamønrrun: Ñimun ashig kømui inchibelane undaarab, ñimun tsalø kui inchibelane tabig marøb inday cha.

²⁸Ñimun ‘trømbøig nebubash’ chib wamabelaimbe ñimbe nømune ‘mayanguen tabig nebunrray’ chib trenday cha. Ñimun kaig marøbelaimbe, nømuyasig Tiusba wamindamig køn cha.

²⁹Møikkøben ñun kandarø maløbøtø pashene, kandariigwangucha yul cha. Møikkøben ñui turiwan kerrabene, ñui camisangucha ka srua ibasingaru cha.

³⁰Ñun mu chi miabigwane tranøb, chiwan køben ñuiwan kerrabene, miamøta cha.

³¹Ñimgurrima katøganelø ñimuyasig tabig maramig palai inchibeløbe, ñimgucha katøganelan treetøwei tab inday chibig køn.

³²’Ñim ñimun undaarabelandø undaarawabe, ¿ñimbe chigúin tabig martrague? cha. Kaguende kaig marøbeløguen nømun undaguelane nømgucha undaarabelø køn cha.

³³Ñim ñimun tab inchibelandøwei tab inchabe, ¿ñimbe chigúin tabig martrague? cha. Kaguende kaig marøbeløgucha treetøweimbe marøbelø køn cha.

³⁴Peba tranøppe, katø utamdeelandø pebøbeløbe, ¿ñimbe chigúin tabig martrague? cha. Kaguende kaig marøbeløgucha katøganelø kaig marøbelandøweimbe, katø kerriguwan treetøwei utønrrab pebøbelø køn cha.

³⁵Trune ñimbe ñimui ashig kømui inchibelan undaarab, tabig marøb, pebøb indamig køn, katøyug utønrrab isua kømøtø. Treeg marene, ñimui utamibe truba nuig køben, ñimbe Tius Mayeelaim Pala Pasrabigwei ureemera kønrrun chibig køn. Kaguende nøma chiweinguen ungwaguengarwan, larrø kailan, tab inchibig køn cha.

³⁶Ñimui Tius Møskaima lastima ashibig købene, ñimgucha treetøwei lastima ashibelø kuy cha. Katøganelane ‘kailø køn’ chib

³⁷’Ñimbe katøganelan ‘øyeeg køn, øyeeg marøbelø køn’ chib waminchimøtay, ñimungucha ‘øyeelø, øyeelø køn’ chimønrraimbe. Katøganelan kaigyu pønrrønrrai pønsrømøtay, ñimun treetøwei kaigyu pønrrønrrai pønsrømønrraimbe. Ñimun kaig maren, ulø paymø pesannay, ñimungucha Tius ulø paymø pesannailø kønrrappe.

³⁸Katøganelan tranay; ñimungucha tranrrun, talegayu tab unaasig tingandø kørrøguana, pinølusam netsøganig. Kaguende ñim kanelan maig unaasha traniibe, ñimungucha treetøwei unaasha tranrrun— chibig køn.

³⁹Incha katø Jesúsbe ‘øyeeg lataitøwein køn’ cha, kemesra trenchibig køn: —¿Kan ashchab kaimabiima katøgan ashchab kaimabigwandøwei srua inrrautah? cha. ¿Pailøba treeløtøbe trabyu kegørrømønrraitarru? chibig køn.

⁴⁰Kan kusreb mendig megabiibe nui kusrenanøbigwan purab nuig kømøn. Inchendø chi kusremigwan ne kusrewabeguende, nun kusrenanøbig lataitøwein kønrrun.

⁴¹’¿Chindimbarre ñui nunewan kabyu shauzhig wabigwangøba ashku cha, tru ñuin kabyu nu tsig wabigwanguen ashmubendøbe?

⁴²Inchawei ñitøweinguen ñuin kabyu nu tsigwan ashmubendøbe, ñui nunewane chincha øyeeg chinrragu: “Nai nuneg, ¿ñuin kabyu shauzhig wabigwan wesrarruah?” cha. ¡Ñi, palatø tabig! Ñuin kabyu nu tsig wabigwanmerrig wesru chibig køn. Treenchabe si, ñui nunewein kabyu shauzhig wabigwan wesrumig tab ashchabguen cha. Tusrbe mamikkurri asig køn

⁴³’Kan tab tusrbe kaig mamig niimíig køben, katø kan kaig tusrbe tab mamig niimíig køn cha.

⁴⁴Kaguende tusrmørig chi mamig niguen tabig kui, kaig kui truyu asan cha. Kal tusrmerayugurri yashig lurrmøwei, kaldø misrøb tusryugurri uvas lurrmøwei inchibelø køn cha.

⁴⁵Inchawei kan møg tabiibe tabig isuilan nui manrrau esegabig kua, truyugurrimbe tabig wesrub wamindan. Inchen kan møg kaibe kaig isuilan nui manrrau esegabig kua, truyugurrimbe kaig wesrub wamindan. Inchawei nui manrrau chine isua tøgagúilø pinøguchen, nui triibe treeg wamindan chibig køn. Pailø ya marøbelan kemesra wamindig

⁴⁶’¿Ñimbe nane chindimba: “Señor, Señor” chib wamøgue cha, na maig karuigwane møra marmeelø købendøbe?

⁴⁷Mugucha naimay arrua, nan møra, na maig taigwan marøbigwane, øyeeg møg lataig køn tamønrrun cha:

⁴⁸Truibe kan møg yawan martraptø pirøwanmerrig srugu larrayamnegatig umbu lalla, trugurrimbe tru srug pala yawan niga pasrønrrabigwan marøbig lataig køn cha. Inchen pibe nurawa, arrua, tru yawan purø trømbøig neguchib megambuagucha, kønøgønrrab kaiman cha, kaguende purø may mara pasrig kua.

⁴⁹Inchen kan møg nan mørendø, na maig karuigwan marmíibe, nui yawan niga pasrønrrabig srug pusrmøtø, ka pirø palatø kusrubig lataig køn cha. Pi nurawa arrubig, tru yawan mur megambub neguchene, tru yabe kebeñen, kerrigu pinisaig kørrømisran— cha, trenchibig køn.