Read Namrrik Lucas 7 Bible Online

Lucas 7 - Namrrik bible

Lucas 7

¹Yandø misagwan Jesúsbe chab waminchabe, Capernaumsrø kebibene,

²truyu kan romanosmerai suldau, cienelan ashibig, centurión taig, kan karuindiig megabig truba undaaraig tøgagúibe, truibe kwanrrøtøga yandø ke pinamdø palabig tsubig køn.

³Inchen tru cien suldaumeran ashibiibe, Jesúswan wamindi mørabe, judío misaameran karubelø kølli misaameran karua ørøbig køn, nui kwanrriigwan tamartrab attrai.

⁴Inchen nømbe amba, Jesúsweim pulu kemallabe, ke tiusmanda chib truba inchib trenchibelø køn: —Tru møwane ñi treeg ka purugumdiig treeg møg køn cha.

⁵Kaguende yu nam warain pirau maya misagwan undaguig kua, nøashib nam judíosmera tulundzuni yawan maringaruig køn— chib.

⁶Inchen Jesúsbe nømba iben, yandø yau pub lutau ambene, tru suldaumeran ashibiibe nui trendø linchibelan møilan køsrøn trenchinrrai karua ørøbig køn: —Señor, øyangatiizhiitø attra tan chinrrai. Kaguende ñi nai yau kebattraimbe, nabe trengatig kømuinatan cha.

⁷Incha treekkurri ni naashibguen ñun lanrrab arrumur cha. Tammisr cha, treetø chirra chibig køn. Nai karuindiig megabig tammisrig kønrrai.

⁸Kaguende nagucha mas nørreelø karua pasrig kur cha. Katø treeg køben na karub tøgagúilø suldaumera tøgaig kur cha. Truilanma na møigwan køben: “Inrrø” chibene, ib; katø na møigwan køben: “Amø” chibene, arrub; katø nai karuindiig megabigwan: “Chigøben mar” chibene, marøb inchibig køn cha. Nøbe trendan— chibelø køn.

⁹Inchen Jesús iigwan mørabe, tru møwan nøguen kwaara asha, nui mendig truba nu misag amøñibelan keesha ashabe, trenchibig køn: —Nabe ñimun trendamønrrun cha: israelitasmerai utuguen isubigwan nainug pasrig øya nuig wetørramur cha, i møwei lataig.—

¹⁰Indiibe tru karua øriilø katøle yau pubene, tru karuindiig megabiibe tabikken waptinchibig køn. Jesús kan piudai nusrkawan katø øsiirangarub

¹¹Yandø øyeeg chab puraiben, Jesúsbe kan pueblo Naín taisrømay iben, nui kusrenanøb pera uniiløba, truba nu misaaba linchibelø køn.

¹²Inchen tru puebloyu kebambam yaskab pulu pubene, kan kwaigwan sørønrrab muta, amrrubelø køn, tru kwabiibe kandø nusrkain køben, usrimbe piuda.

¹³Inchen Señorbe tru ishuwan lastima ashabe, trenchibig køn: —Kishmøta— cha.

¹⁴Incha Jesúsbe kemalla, taulwan katøraben, muta ambubeløbe pønrramisren, Jesúsbe kwaigwane trenchiptinchibig køn: —Matsinø, na ñun ¡kurrø! char— cha.

¹⁵Inchen tru kwabiibe kurra, wamisra, waminchib mendøben, Jesúsbe usran tranøbig køn, pera inrrai.

¹⁶Inchen iigwan ashene, nømune mayeelanba kørig købiitø ke chindamdiig køben, Tiuswan truba tabig waminchib trenchibelø køn: —¡Tius maig karuigwan eshkabig purø nuig namui utu kurrin køn! chib. ¡Tiusbe nui misagwan purugunrrab arrin køn!— chib.

¹⁷Inchen Judea pirau kerriguba, katø tru pirau tru pøtøgatanwan kerriguba Jesús chi marigwan wammørøbelø køn. Juan Bautistai kusrenanøb pera uniilø

¹⁸Inchen Juanwei kusrenanøb pera uniiløbe øyeeg purayailan kerrigu nun eshkaben, Juanbe nui mendig amøñibelan pailan wama,

¹⁹Jesúswan trencha payrrai ørøbig køn: ¿Tru Cristo attrabig købiibe ñi kuin kui, kabe nambe katøganun muniiram kuin kui?

²⁰Inchen tru Juanwei kusrenanøb pera uniiløbe amrrua, Jesúswan kemallabe, trenchibelø køn: —Juan Bautistabe, ñun payrrai, namun karua ørtan cha. ¿Tru attrabig købiibe ñi kuin kui, kabe nambe katøganun muniiramig kuin chindi?—

²¹Inchen tru uras, Jesúsbe kwanrreelø truba yamelan tamarøbig køn, chigurrimbunø kaig kwanrrø tøgarmeran køben, kwaimandzig tøgarmeran købengue. Katø truba yam kabgailan ashchai tamarøb inchibig køn.

²²Inchabe Jesúsbe Juan karua øriilan trenchibig køn: —Amba, ñim chi mørigwan, ñim chi asigwan Juanwan eshkanrrigay cha. Kabgailøbe ashen, cojosmerabe amben, asr trerab kwanrrø tøgarmerane nømui kwanrrøwan tamara chishmariilø køben, kalu mørmeeløbe mørøbelø misren, kwailøbe øsiiraben, waachamerane Tiuswei tabig srø wamwan eshkab kusrenaniilø køn cha.

²³Mayanguen tab kuig køn chibig køn, nan peg kuitamab isumøtø, na kuitamab isubigweimbe.— Juan Bautistaimburab maig kuigwan Jesús waminchib

²⁴Incha Juanwei kusrenanøb pera uniilø ambene, Jesúsbe Juanweimburab truba nu misagwan trenchib waminchib pølbasrøbig køn: —¿Misag warab waraimøsrømbe ñimbe chi ashchab webamgue? cha. ¿Kan caña ambumay, imay isig srua yainaptiigwandeh? cha.

²⁵Trube, ¿chi ashchab webamgue? cha. ¿Kabe kan møg truba tabig keweigwandeh? cha. Ñimbe ashibelø køn cha, truba tabig kebeløbe nømun maig marøg købendø marøb, reymerai yau purrabelø kui cha.

²⁶¿Trube, treeg købene, chi ashchab webambig kø? chibig køn. ¿Kabe Tius maig karuigwan kan eshkabigwandeh? cha. Øø, nabe ñimun trendamønrrun cha: Treegwanwei ashchab webambig køn cha, trurrigu Tius maig karuigwan eshkabigwan lataitøguen kømø, mas nuigwan.

²⁷Juanbe tru Tiuswei wamwan pørigu øyah taig truig køn cha:“Au, nabe nai wam srua inrrabigwan ñui merrab ørar taig, ñui maywan ñui merrab tamartrai.”

²⁸Nabe ñimun trendamønrrun chibig køn: Maya møguelø kal-labelai utu tru Juan lata nuibe muguen kaagúig køn cha. Inchendø treeg kuindøgucha, Tius nø ashib karub wainuube kan møg chigucha kømíikken mas nuig køn cha, Juan lataguen kømø.—

²⁹Inchen maya misaameraba, tru romasreelayasig an utabeløba Jesús wamindigwan mørabe, Tiusbe maig kønrrabigwan tabig sølgandø marøbig kuin køn chibelø køn, tru Juan piu umbu ulsrainabeløbe.

³⁰Trune tru fariseosmeraba, tru maig maramigwan martrai Moisés pørigwan treeg maramig køn chib kusrenanøbeløbabe nømuimburab Tius maig martrab isua indigwan kaashibelø køn, kaguende truiløbe Juan piu umbu ulsraimeelø kua.

³¹Katø Señorbe trenchibig køn: —¿Møin kwaløm møguelane chi latailø køn chinrrab køh? cha. ¿Chi lataig asønan chinrrab køh? cha.

³²Kan plazayu ureemera esheerrab purramisra, kangurrin kangurri øyeeg chib trashib purrabelø latailø køn cha:“Nambe ñimuyasig luswan urringucha, ñimbe pailamøwei;cantailø isumdeelø cantaben, ñimbe miirab kishmøwei indan” chibelø latailø.

³³Pøs Juan Bautista pirri mamøwei, vino muchimøwei inchibig arrubene, ñimbe nune, kwaimandzig tøgaig køn, chibelø køn.

³⁴Inchen tru Møg Misra Arrubig mab, muchib inchibig arrubene, trube, ñimbe menrra maptiig køn tamba, menrra muchiptiig køn tamba, romasreelayasig an utabeløba, kaig marøb misaameraba linchibig køn tamba inchibelø køn.

³⁵Inchendø mu møkken nebua isumgaig tru Tius marøb pasraigwane nui ureemerainug ashchai kenamaran— chibig køn. Jesús Simón fariseowei yau

³⁶Kan møikkøsrøn fariseo Jesúswan nøba lincha manrrab attrai eshkaben, Jesúsbe truigwei yau kebyabe, mishatsigu wamisrøbig køn.

³⁷Inchen tru puebloyutøwei kan kaig marøb ishug tsubig, tru fariseowei yau Jesús mab wan tai wammørøppe, kan alabastro limetayu truba may irrab aceite srua puabe,

³⁸kishib Jesúswei wendau srøb pulu wamisra, nui kappinwan Jesúswei katsig tambal pala kørrøgøb sømara, trugurrimbe nui pusruutøga pinømøra, katsigu muchawa, yandø tru may irrab aceiten nui srøb pala itølushibig køn.

³⁹Inchen tru fariseo Jesúswan manrrab attrai eshkabig ashabe, nuinetø treeg isubig køn: “I møg Tius maig karuigwan eshkabig kuimbe, nun katørabiibe mu ishug kui, kaig marøb ishug kui asin kømbala” cha.

⁴⁰Inchen Jesúsbe fariseowan trenchibig køn: —Simón, ñun chigøsrøn tamig tøga war— cha. Inchen fariseobe: —Kusrennøbig, eshkarra— chiben,

⁴¹Jesúsbe trenchibig køn: —Kan an pebigwan pailø møguelø nun ulømisrar købig køn cha, kane quinientos denarios ulø købene, kane cincuenta ulø købig køn cha.

⁴²Indiibe truiløbe chugurringuen trannrrabgailø køben, tru an pebøbiibe pailanba paymønrrab kagøbashiptindig køn cha. Treeg købene, ¿i pailøbe tru an pebøbigwan møig mas undaarerah?— cha.

⁴³Inchen Simónbe trenchibig køn: —Tru mas nu anwan ulø paymø, kagøbasinabig, na møren truig kømmørgøtan— cha. Inchen Jesúsbe trenchibig køn: —Søl isua trendan— cha.

⁴⁴Inchen Jesúsbe ishuwan keesha ashabe, Simónwane trenchibig køn: —¿I ishuwan ashkuh? cha. Nabe ñui yau kebarruben, nai katsigwan kwalamig ñibe nan pi tranmuben, trune i ishuube nui kappinwan kørrøga sømara, nui pusruutøga pinømørtan cha.

⁴⁵Ñibe nan muchamuben, trune nøbe na kebarrinukkurri nai srøbmeran muchab wan cha.

⁴⁶Ñibe nai tur pala aceite srølmuben, nøbe may irrab aceiten nai srøb pala itø lushtan cha.

⁴⁷Inchawei ñun trendamønrrun chibig køn: I ishuwei truba nørrø kalø mariilan nun ulø paymø pesannaikkurri nøbe truba truba undaaran cha. Inchen møikkøben tre nu kømíigwan ulø paymø pesannainabiibe, tru ulø paymø kagøbashibigwane tre undaaramøn— cha.

⁴⁸Inchabe tru ishuwane trenchibig køn: —Ñui kaig mariiløbe payamig kømíig, pesannaig kørrømisran— cha.

⁴⁹Inchen truyu lincha mab nøba purrabeløbe, nømasiyaitø trenchib mendabelø køn: —¿Chigøben kaig mariilanguen ulø paymø pesannamig kønrrai marøbiibe, iibe mu møg køh?— cha.

⁵⁰Inchen Jesúsbe ishuwan trenchibig køn: —Ñi ñui isubigwan nainuutø pasra tøgagúikkurri, kaigyugurri wesraig kørrømisran cha, møimbe chi isumø, inrrø— cha.